Boshoqli don ekinlarini oʻz vaqtida va sifatli oʻrib-yigʻib olishni taʼminlash hamda davlat resurslariga don sotish yuzasidan kontraktatsiya shartnomalarini bajarish maqsadida Vazirlar Mahkamasi qaror qiladi:

1. Qishloq va suv xoʻjaligi vazirligi (Murodov) va “Oʻzqishloqxoʻjaliktaʼminottuzatish” davlat-kooperativ qoʻmitasi (Yusupov)ning 1999-yilgi boshoqli don ekinlari hosilini oʻrib-yigʻib olish, tozalash va tashish uchun texnikani tayyorlash asosan tugallanganligi toʻgʻrisidagi axboroti maʼlumot uchun qabul qilinsin. Oʻrim-yigʻim ishlari davrida texnikaning uzluksiz ishlashi uchun ehtiyot qismlar va tuzatish materiallarining zarur zaxiralari yaratilgan.

Hosilni yigʻishtirib olishda Qoraqalpogʻiston Respublikasi va viloyatlar boʻyicha 1-ilovaga muvofiq 6551 kombayn, shu jumladan 1184 “Keys” va “Klaas” kombaynlari ishlaydi.

Don hosili oʻrim-yigʻimining tashkil etilishi hamda oʻz vaqtida va sifatli yigʻishtirib olinishi uchun masʼuliyat shaxsan Qoraqalpogʻiston Respublikasi Vazirlar Kengashi Raisi, viloyatlar hokimlari, Qishloq va suv xoʻjaligi vazirligi hamda “Oʻzqishloqxoʻjaliktaʼminottuzatish” davlat-kooperativ qoʻmitasi rahbarlari zimmasiga yuklansin.

2. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzmevasabzavotuzumsanoat-xolding” kompaniyasi, “Oʻzdonmahsulot” davlat korporatsiyasi:

yanchilgan don miqdori va don kirim qilinishi ustidan nazoratni taʼminlash maqsadida boshoqli don ekinlari hosilini yigʻishtirish boshlangunga qadar hosilning har bir dala boʻyicha ekspert baholanishini va tegishli dalolatnomalar tuzilishini tugallasinlar;

kombaynchilar, transport vositalari haydovchilari, oʻrim-yigʻimda va don tashishda, texnikaga xizmat koʻrsatishda band boʻlgan boshqa xodimlar mehnatiga kombaynning ish unumiga, hosil oʻrim-yigʻimi sifatiga qarab haq toʻlash va ularni moddiy ragʻbatlantirishga oid tavsiyalarni Oʻzbekiston Respublikasi Moliya vazirligi bilan kelishgan holda bir hafta muddatda ishlab chiqsinlar va xoʻjaliklarga yetkazsinlar. Mehnatga mahsulot bilan haq toʻlash hisobiga don berishni faqat “Oʻzdonmahsulot” davlat korporatsiyasi korxonalariga don sotish boʻyicha shartnoma majburiyatlari bajarilgandan, urugʻlik fondi gʻamlangandan va mahsulot kirim qilingandan keyin amalga oshirsinlar;

kombaynlarning guruh boʻlib, kechayu-kunduz ishlash usullarini keng qoʻllasinlar, guruhlarning har biriga texnika xizmati koʻrsatish va transport vositalarini, yonilgʻi quyish mashinalarini biriktirib qoʻysinlar. Gʻallaning pishishiga qarab guruhlarning harakatlanish yoʻnalishlarini ishlab chiqsinlar;

shirali ozuqa yetishtirishni koʻpaytirish va sugʻoriladigan yerlardan foydalanish samaradorligini oshirish maqsadida takroriy ekinlar ekish uchun maydonlarni belgilasinlar, qisqa muddatlarda ularga 2-ilovaga muvofiq maydonlarga ozuqa, sabzavot ekinlari va boshqa ekinlarni eksinlar.

3. Davlat resurslariga don sotish boʻyicha shartnoma majburiyatlarini bajargan qishloq xoʻjaligi korxonalariga hosilni oʻrish-yigʻish ishlari uchun mashina-traktor parklari bilan hisob-kitoblarni xoʻjaliklar ixtiyorida qolgan don bilan, uni shartnomaviy narxlar boʻyicha don mahsulotlari tayyorlash korxonalariga yetkazib berish va soʻngra mablagʻlarni mashina-traktor parklariga oʻtkazish yoʻli bilan amalga oshirishiga ruxsat etilsin.

“Oʻzqishloqxoʻjaliktaʼminottuzatish” davlat-kooperativ qoʻmitasi Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasi, xizmat koʻrsatuvchi banklar va “Oʻzdonmahsulot” davlat korporatsiyasi bilan birgalikda mashina-traktor parklarining hosilni yigʻishtirish boʻyicha bajargan ishlari hisobiga xoʻjaliklar tomonidan topshirilgan don uchun hisob-kitob qilish tartibini bir hafta muddatda ishlab chiqsin.

4. “Oʻzqishloqxoʻjaliktaʼminottuzatish” davlat-kooperativ qoʻmitasi (Yusupov), “Oʻzqishloqxoʻjalikmash-xolding” kompaniyasi (Matchonov) don hosilini yigʻishtirib olish davrida sanoat korxonalarini tumanlarga 3-ilovaga muvofiq biriktirib qoʻysinlar, sanoat korxonalari bilan “MTP” davlat-aksiyadorlik jamiyatlari oʻrtasida tegishli shartnomalar tuzishlarini taʼminlasinlar.

5. Qoraqalpogʻiston Respublikasi Vazirlar Kengashi, viloyatlar hokimliklari, Qishloq va suv xoʻjaligi vazirligi, “Oʻzavtotrans” davlat korporatsiyasi, “Oʻzqishloqxoʻjaliktaʼminottuzatish” davlat-kooperativ qoʻmitasi xoʻjaliklarga ularning buyurtmanomalariga muvofiq donni tashishda foydalanish uchun yuk avtomobillarini 4-ilovaga muvofiq miqdorlarda yuborsinlar.

Zarurat boʻlganda don tashishga Mudofaa vazirligi va boshqa vazirliklar, idoralar va tashkilotlarning avtomobil transporti tomonlarning kelishuviga asosan jalb qilinsin.

Donni xoʻjaliklar tomonidan don qabul qilish punktlariga yetkazib berish boʻyicha transport xarajatlari “Oʻzdonmahsulot” davlat korporatsiyasi tomonidan toʻlanishi belgilab qoʻyilsin.

7. “Oʻzdavdoninspeksiya” “Oʻzdonmahsulot” davlat korporatsiyasi va “Oʻzdavnazoraturugʻmarkaz” bilan birgalikda tayyorlanayotgan don va boshoqli don ekinlari urugʻligining sifati ustidan kundalik nazorat oʻrnatsin, belgilangan meʼyorlar va qoidalarning buzilishi hollariga qatʼiy barham bersin.

8. Oʻzbekiston Respublikasi Qishloq va suv xoʻjaligi vazirligi viloyatlar hokimliklari bilan birgalikda xoʻjaliklarning 1999-yilda oʻzlari yetishtirgan hosildan oʻz ehtiyojlarini taʼminlaydigan hajmda urugʻlik gʻamlashini tashkil etsin.

Urugʻlik donni “Oʻzdonmahsulot” davlat korporatsiyasi bilan tuzilgan kontraktatsiya shartnomalari boʻyicha don sotishning umumiy hajmlari hisobiga topshirish, shuningdek tovar dondan urugʻlik sifatida foydalanish qatʼiy taqiqlansin. Urugʻlik fondini yaratishning belgilangan tartibi buzilishiga yoʻl qoʻygan shaxslar respublika qonun hujjatlariga muvofiq javobgarlikka tortilsin.

9. Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasi “Oʻzdonmahsulot” davlat korporatsiyasi va Jamgʻarmaning moliya agentlari bilan birgalikda topshirilgan don uchun Topshirilgan qishloq xoʻjaligi mahsulotlari uchun yakuniy hisob-kitob qilishda toʻlovlarni amalga oshirish tartibiga muvofiq Jamgʻarma mablagʻlari hisobidan xoʻjaliklar bilan oʻz vaqtida hisob-kitob qilinishini taʼminlasin.

10. Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasiga, “Gʻalla-bank”, “Paxta-bank” va boshqa tijorat banklariga xoʻjaliklar va mashina-traktor parklarini don oʻrim-yigʻimi mavsumi qatnashchilariga oʻrim-yigʻim ishlari boshidan boshlab har besh kunda Vazirlar Mahkamasining “1999-yilda paxta xomashyosi va boshoqli ekinlar doni xarid narxlari hamda ichki xoʻjalik iqtisodiy mexanizmini takomillashtirish chora-tadbirlari toʻgʻrisida” 1999-yil 15-maydagi 248-son qarorida nazarda tutilgan narxlar boʻyicha ish haqi toʻlash uchun pul mablagʻlari va tegishli naqd pul bilan taʼminlash tavsiya etilsin.

11. “Oʻzdonmahsulot” davlat korporatsiyasiga urugʻchilik xoʻjaliklaridan navli urugʻlarni sifatiga muvofiq — super elita uchun tovar donga belgilangan narxdan 300 foizga, elita urugʻ uchun 200 foizga, birinchi reproduksiyali urugʻ uchun 150 foizga, ikkinchi-uchinchi reproduksiyali urugʻ uchun 100 foizga oshirilgan narxlar boʻyicha xarid qilishga ruxsat berilsin, ular davlat resurslariga xarid qilinadigan donning umumiy hajmlariga kiritilmasin.

12. Don tashiyotgan temir yoʻl va avtomobil transporti xizmatlari uchun oʻz vaqtida hisob-kitob qilinishini taʼminlash maqsadida 1999-yil don hosilini tashish davrida, istisno tariqasida, shu yilning 1-noyabrigacha “Oʻzdonmahsulot” davlat korporatsiyasi tizimi korxonalari uchun bevosita ishlab chiqarish faoliyati bilan bogʻliq kechiktirib boʻlmaydigan ehtiyojlarga (transport xarajatlarini hisobga olgan holda) tushumdan 15 foiz miqdorida mablagʻ ajratish stavkasi belgilansin.

13. “Oʻzneftmahsulot” aksiyadorlik kompaniyasi (Ahmedov) boshoqli don ekinlari hosilini yigʻishtirish davrida xoʻjaliklarga hamda hosilni oʻrish-yigʻishda va tashishda band boʻlgan mashina-traktor parklariga yonilgʻi-moylash materiallarini belgilangan limitlar boʻyicha uzluksiz berilishini taʼminlasin. “Keys” kombaynlari va traktorlari uchun moy yetkazib berilishiga alohida eʼtibor berilsin.

14. “Oʻzagrokimyotaʼminot” birlashmasi elevator va omborxonalarni, shuningdek don mahsulotlarini zararli mikroblardan tozalash uchun zarur miqdordagi fumigantlarning oʻz vaqtida keltirilishini taʼminlasin.

15. Ichki ishlar vazirligi, Qoraqalpogʻiston Respublikasi Vazirlar Kengashi va viloyatlar hokimliklari donning nobud boʻlishi va talon-toroj qilinishi hollarining oldini olish maqsadida donni oʻrib-yigʻib olish joylarida, xirmonlarda va don qabul qilish punktlarida kecha-kunduz ishlaydigan nazorat postlari oʻrnatsinlar, yongʻindan saqlash boʻyicha zarur tadbirlarning bajarilishini taʼminlasinlar.

17. Oʻzbekiston Respublikasi Makroiqtisodiyot va statistika vazirligi:

tuman darajasidan boshlab don tayyorlashning yagona statistika hisobini yuritsin, don qabul qilish punktlaridan xoʻjaliklar boʻyicha hisobotlarni qabul kvitansiyalari nusxalari ilova qilingandagina qabul qilsin;

don yetishtirishning umumiy hajmini aniqlash uchun aholi xoʻjaliklarida yetishtirilgan donni alohida satrda hisobga olsin;

don yetishtirish va sotish toʻgʻrisidagi statistika hisobotining toʻgʻriligini muntazam tekshirib borsin va aniqlangan notoʻgʻri maʼlumotlar toʻgʻrisida Vazirlar Mahkamasini xabardor qilsin.

18. Mazkur qarorning bajarilishini nazorat qilish Bosh vazir oʻrinbosari B. M. Olimjonov zimmasiga yuklansin.