LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Vazirlar Mahkamasi Qoraqalpog‘iston Respublikasi Vazirlar Kengashi, Xorazm va Surxondaryo viloyatlari hokimliklari, O‘zbekiston Respublikasi Qishloq va suv xo‘jaligi vazirligi hamda “Oziqovqatsanoat” uyushmasi 1998-yilda qand lavlagi yetishtirish, tayyorlash va uni qayta ishlashda jiddiy kamchiliklarga yo‘l qo‘yganliklarini qayd etadi.
Lavlagi ekuvchi tumanlar hokimliklari va qishloq xo‘jaligi mahalliy boshqaruv organlarining nazorat qilmasliklari tufayli lavlagi ekish uchun yer tanlanishida xatolarga yo‘l qo‘yildi, lavlagi ekish muddatlari qo‘pol ravishda buzildi, qator oralariga ishlov berish va lavlagini sug‘orish o‘z vaqtida va sifatli o‘tkazilmadi.
Natijada respublika bo‘yicha umuman gektaridan rejalashtirilgan 290 sentner o‘rniga Xorazm viloyatida lavlagi hosildorligi gektaridan o‘rtacha 167,8 sentnerni, Qoraqalpog‘iston Respublikasida esa gektaridan atigi 47,7 sentnerni tashkil etdi.
Hazorasp qand-shakar zavodi rahbarlari va mutaxassislarining aybi bilan lavlagini xo‘jaliklardan qabul qilib olish 30 — 40 kunga cho‘zilib ketdi, salkam 30 ming tonna lavlagi xo‘jaliklardan jihozlanmagan vaqtinchalik punktlarda qabul qilindi, bu lavlagining og‘irligi ancha kamayib ketishiga va uning sifati yomonlashishiga olib keldi.
Hazorasp qand-shakar zavodi quvvatlaridan samarali foydalanish, uni respublikada ishlab chiqarilgan zarur xomashyo bilan ta’minlash va qand-shakar ishlab chiqarishni ko‘paytirish maqsadida Vazirlar Mahkamasi qaror qiladi:
1. Qoraqalpog‘iston Respublikasi Vazirlar Kengashi va Xorazm viloyati hokimi I. Yusupovning Vazirlar Mahkamasining “Hazorasp qand-shakar zavodini xomashyo bilan ta’minlash masalalari to‘g‘risida” 1998-yil 5-yanvardagi 1-son qarorini bajarish bo‘yicha ishi qoniqarsiz ekanligi qayd etilsin.
Ularga lavlagi hosildorligi pastligining sabablarini batafsil o‘rganib chiqish, lavlagi yetishtirish, tayyorlash va uni qayta ishlashni tashkil etishda yuz bergan jiddiy kamchiliklarga joriy yilda yo‘l qo‘ymaslik chora-tadbirlarini belgilash topshirilsin. Lavlagi yetishtirish, tayyorlash va saqlash texnologiyasi buzilishida aybdor shaxslar respublika qonun hujjatlariga muvofiq qattiq javobgarlikka tortilsin. Natijalari to‘g‘risida 1999-yil 1-martgacha Vazirlar Mahkamasiga axborot berilsin.
2. O‘zbekiston Respublikasi Makroiqtisodiyot va statistika vazirligi Qishloq va suv xo‘jaligi vazirligining Qoraqalpog‘iston Respublikasi Vazirlar Kengashi va Xorazm viloyati hokimligi bilan kelishilgan 1999-yilda qand lavlagi ekin maydonlari va uning yalpi hosili to‘g‘risidagi takliflari ilovaga muvofiq qabul qilinsin.
Yuqori hosil olish maqsadida lavlagi yetishtirish texnologiyasiga qat’iy rioya qilinishi ta’minlansin. Bazis shakarlilik kamida 15,5 foiz etib belgilansin.
3. O‘zbekiston Respublikasi Qishloq va suv xo‘jaligi vazirligi (Bobojonov) 72 tonna hajmida bir kurtakli sifatli qand lavlagi urug‘i yetkazib beruvchilarni tender asosida aniqlasin, “Oziqovqatsanoat” uyushmasi (Qosimxo‘jayev) esa urug‘ xarid qilinishini ta’minlasin.
O‘zbekiston Respublikasi Qishloq va suv xo‘jaligi vazirligi, Qishloq xo‘jaligi ilmiy-ishlab chiqarish markazi Xorazm viloyati hokimligi bilan birgalikda qand lavlagi urug‘chiligining o‘z bazasini rivojlantirish bo‘yicha tadbirlarni 1999-yil 20-fevralgacha ishlab chiqsinlar, ushbu maqsadda Xorazm viloyatining aniq xo‘jaliklarini tanlasinlar.
O‘zbekiston Respublikasi Makroiqtisodiyot va statistika vazirligi, Qishloq va suv xo‘jaligi vazirligi Xorazm viloyatida standartlar talablariga muvofiq qand lavlagi urug‘iga qo‘shimcha kompleks ishlov berish bo‘yicha ixtisoslashtirilgan sex tashkil etish yuzasidan takliflarni 1999-yil 1-iyulgacha tayyorlasinlar va ularni Vazirlar Mahkamasiga kiritsinlar.
4. “O‘zqishloqxo‘jalikta’minottuzatish” davlat-kooperativ qo‘mitasi (Yusupov), “O‘zqishloqxo‘jalikmash-xolding” kompaniyasi (Matchonov) lavlagi ekuvchi xo‘jaliklarni qand lavlagi yetishtirish va uning hosilini yig‘ishtirib olish uchun yetishmayotgan texnika bilan ta’minlasinlar.
O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi va Xorazm viloyati hokimligi bilan birgalikda 1999-yil hosilidan qand lavlagi xarid qilish yuzasidan xo‘jaliklar bilan kontraktatsiya shartnomalari tuzilishini bir oy muddatda tugallasin;
xo‘jaliklarga shartnomaviy narx bo‘yicha xarid qilinadigan xomashyo qiymatining 40 foizi miqdorida ikki bosqichda, shu jumladan 15 foizi 1999-yil 1-martgacha, 25 foizi qand lavlagi ekish tugallangandan so‘ng avans to‘lasin.
7. O‘zbekiston Respublikasi Qishloq va suv xo‘jaligi vazirligi, “O‘zdonmahsulot” davlat korporatsiyasi Qirg‘iziston Respublikasiga borib respublika xo‘jaliklarida yetishtirilgan urug‘lik materialga Cho‘y viloyatining Kant tumanidagi ixtisoslashtirilgan korxonada qo‘shimcha ishlov berish masalasini ishlab chiqsin.
“O‘ztransgaz” kompaniyasi ekish materialiga ishlov berish bo‘yicha xizmatlarga Hukumatlararo bitim bo‘yicha olingan tabiiy gaz uchun “Qirg‘izenergo” aksiyadorlik jamiyatining qarzlari hisobiga haq to‘lash masalalarini bir hafta muddatda hal qilsin.
8. “O‘zavtotrans” davlat korporatsiyasi va “O‘zbekiston temir yo‘llari” davlat-aksiyadorlik kompaniyasi “Oziqovqatsanoat” uyushmasiga 1999-yilda qand lavlagi tashish uchun zarur miqdorda avtotransport vositalari, shuningdek kodlar va temir yo‘l vagonlari ajratsinlar.