LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
O‘zbekiston xalq yozuvchisi, o‘zbek adabiyoti va ilm-fani rivojiga beqiyos hissa qo‘shgan akademik adib Muso Toshmuhammad o‘g‘li Oybek ijodining ulkan ahamiyatini inobatga olib, yosh avlod qalbida Vatanga muhabbat va sadoqat, ajdodlarimizning ma’naviy merosi bilan faxrlanish va iftixor tuyg‘ularini yuksaltirish maqsadida hamda yozuvchi tavalludining yuz yilligi munosabati bilan Vazirlar Mahkamasi qaror qiladi:
1. O‘zbekiston Yozuvchilar uyushmasi, Fanlar akademiyasi, Respublika “Ma’naviyat va ma’rifat” Kengashining O‘zbekiston xalq yozuvchisi, akademik Muso Toshmuhammad o‘g‘li Oybek tavalludining 100 yilligini mamlakatimiz miqyosida keng nishonlash to‘g‘risidagi taklifi ma’qullansin.
Ushbu sanaga tayyorgarlik ko‘rish va uni nishonlash bo‘yicha tashkiliy qo‘mita tarkibi ilovaga muvofiq tasdiqlansin.
Tashkiliy qo‘mita bir oy muddatda tegishli vazirliklar va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda yubiley tadbirlari rejasini ishlab chiqsin va amalga oshirishga kirishsin.
2. O‘zbekiston Respublikasi Fanlar akademiyasi, O‘zbekiston Yozuvchilar uyushmasi, Madaniyat va sport ishlari vazirligi 2005-yilning may oyida “Oybek ijodining ma’naviy-ma’rifiy ahamiyati” mavzusida ilmiy konferensiyani hamda adib tavalludiga bag‘ishlangan tantanali adabiy-badiiy anjumanni o‘tkazsin.
3. Madaniyat va sport ishlari vazirligi adibning asarlarini sahnalashtirish, Fanlar akademiyasi bilan birgalikda Oybek uy-muzeyining ekspozitsiyasini boyitish bo‘yicha ishlarni amalga oshirsin.
4. Oliy va o‘rta maxsus ta’lim, Xalq ta’limi vazirliklari Yozuvchilar uyushmasi bilan birgalikda ta’lim muassasalari va kutubxonalarda adib hayoti va ijodiga bag‘ishlangan adabiy-badiiy tadbirlar, oybekxonlik kunlari, davra suhbatlari, ijodkorlar bilan uchrashuvlar tashkil etsin.
5. O‘zbekiston Matbuot va axborot agentligi Fanlar akademiyasi va Yozuvchilar uyushmasi bilan birgalikda Oybek asarlarini hamda “Oybek zamondoshlari xotirasida” kitobini chop etishni rejalashtirsin.
7. O‘zbekiston Aloqa va axborotlashtirish agentligi Oybek siymosi tushirilgan va uning asarlari mavzusi asosida ishlangan pochta markalari va konvertlar turkumini chiqarsin.
8. O‘zbekiston Milliy axborot agentligi, “O‘zteleradio” kompaniyasi va respublika ommaviy axborot vositalariga adib hayoti va ijodi to‘g‘risida turkum ko‘rsatuv hamda radioeshittirishlar tayyorlash, maqolalar chop etish, yubiley tadbirlarini keng yoritish tavsiya etilsin.
9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Qosimov zimmasiga yuklansin.
1. | Qosimov R. | O‘zbekiston Respublikasi Bosh vazirining o‘rinbosari, tashkiliy qo‘mita raisi | |
2. | Sultonov X. | O‘zbekiston Respublikasi Prezidentining Davlat maslahatchisi (kelishuv bo‘yicha) | |
3. | Azizxo‘jayev A. | O‘zbekiston Respublikasi Madaniyat va sport ishlari vaziri | |
4. | Jo‘rayev T. | O‘zbekiston Respublikasi Xalq ta’limi va�iri | |
5. | Shoabdurahmonov R. | Toshkent shahar hokimi | |
6. | Murod Muhammad Do‘st | “O‘zbekkino” Milliy agentligi bosh direktori | |
7. | Shog‘ulomov R. | O‘zbekiston Matbuot va axborot agentligi bosh direktori | |
8. | Hazratqulov M. | O‘zbekiston Milliy axborot agentligi bosh direktori | |
9. | Oripov A. | O‘zbekiston Yozuvchilar uyushmasi raisi | |
10. | Yo‘ldoshev B. | O‘zbekiston Fanlar akademiyasi prezidenti | |
11. | Qo‘ziyev T. | O‘zbekiston Badiiy akademiyasi raisi | |
12. | Ko‘chimov A. | “O‘zteleradio” kompaniyasi raisi | |
13. | A’zamov Q. | Respublika “Ma’naviyat va ma’rifat” markazi rahbari | |
14. | Izbosarov A. | O‘zbekiston Aloqa va axborotlashtirish agentligi bosh direktorining birinchi o‘rinbosari | |
15. | Ashrafxonov B. | O‘zbekiston Respublikasi Moliya vazirining o‘rinbosari | |
16. | Ahmedov Y. | O‘zbekiston Milliy akademik drama teatri direktori | |
17. | Jabborov A. | Vazirlar Mahkamasining mas’ul xodimi, tashkiliy qo‘mita kotibi | |
18. | Karimov N. | Filologiya fanlari doktori, oybekshunos | |
19. | Habibullayev N. | “O‘zbekmuzey” fondi raisi | |
20. | Toshmuhamedova O. | Oybek uy-muzeyi direktori |