Kichik biznes va xususiy tadbirkorlikni ularni kreditlashni kengaytirish hisobiga jadal rivojlantirish uchun qulay shart-sharoitlar yaratish, mikromoliyalashtirishni yanada ragʻbatlantirish, shuningdek tijorat banklarining kredit resurslarini koʻpaytirish maqsadida Vazirlar Mahkamasi qaror qiladi:

1. Quyidagilar:

Osiyo taraqqiyot banki Direktorlar kengashi 2010-yil 21-aprelda Oʻzbekiston Respublikasiga “Kichik va mikromoliyalashtirishni rivojlantirish. 2-faza” loyihasini amalga oshirish uchun qaytarish muddati 20 yil, shu jumladan imtiyozli davri besh yil boʻlgan 50 mln AQSh dollari miqdorida qarz berish, shuningdek loyihada ishtirok etayotgan tijorat banklari, mikromoliyalashtirish tashkilotlari hamda kichik biznes va xususiy tadbirkorlik subyektlarining salohiyatini oshirishga texnikaviy koʻmaklashish maqsadida 600 ming AQSh dollari miqdorida grant berishni maʼqullaganligi;

koʻrsatib oʻtilgan loyihani amalga oshirish uchun Oʻzbekiston Respublikasi bilan Osiyo taraqqiyot banki oʻrtasidagi Qarz bitimi, shuningdek Osiyo taraqqiyot banki bilan loyihani amalga oshirishda ishtirok etayotgan tijorat banklari — “Agrobank” ochiq aksiyadorlik tijorat banki, “Xamkor bank” ochiq aksiyadorlik tijorat banki va “Ipak yoʻli” ochiq aksiyadorlik innovatsiya tijorat banki oʻrtasidagi loyiha bitimlari 2010-yil 1-mayda imzolanganligi maʼlumot uchun qabul qilinsin.

2. Belgilab qoʻyilsinki:

Oʻzbekiston Respublikasi Moliya vazirligi koʻrsatib oʻtilgan loyiha amalga oshirilishi hamda loyihani amalga oshirishda ishtirok etayotgan tijorat banklari faoliyati muvofiqlashtirilishi uchun masʼul boʻlgan ijro etuvchi organ hisoblanadi;

loyihada ishtirok etayotgan tijorat banklari loyihaning tegishli komponentlarini amalga oshirish boʻyicha agentlar, Osiyo taraqqiyot bankining qarz mablagʻlari va grantidan maqsadli va samarali foydalanilishi uchun masʼul hisoblanadilar;

Osiyo taraqqiyot bankining qarz mablagʻlari tijorat banklari tomonidan keyinchalik xorijiy va milliy valyutada kichik biznes va xususiy tadbirkorlik subyektlariga, shuningdek mikromoliyalashtirish tashkilotlariga kreditlar (subqarzlar) berish uchun loyihani amalga oshirishda ishtirok etuvchi tijorat banklariga qayta kreditlash toʻgʻrisidagi bitimlar asosida qayta moliyalashtiriladi;

Osiyo taraqqiyot bankining qarzini qaytarish, shuningdek qarz boʻyicha foizlar va vositachilik haqi toʻlash loyihani amalga oshirishda ishtirok etuvchi tijorat banklari tomonidan amalga oshiriladi;

loyihani amalga oshirishda ishtirok etuvchi tijorat banklari bir qarz oluvchiga 20 ming AQSh dollari miqdorida yoki Oʻzbekiston Respublikasi milliy valyutasidagi ekvivalentda kreditlar (subqarzlar) beradilar;

koʻrsatib oʻtilgan loyiha doirasida jalb qilingan subqarzlar hisobiga mikromoliyalashtirish tashkilotlari tomonidan beriladigan mikrokreditlar va mikroqarzlar ekvivalentda 1 ming AQSh dollaridan ortiq boʻlmasligi kerak.

3. Quyidagilar:

loyihani amalga oshirishda ishtirok etuvchi tijorat banklariga Osiyo taraqqiyot bankining qarzini berish jadvali 1-ilovaga* muvofiq;

Osiyo taraqqiyot bankining qarzini qaytarish hamda qarz boʻyicha foizlar va vositachilik haqi toʻlash jadvali 2-ilovaga* muvofiq tasdiqlansin.

4. Oʻzbekiston Respublikasi Moliya vaziriga loyihani amalga oshirishda ishtirok etuvchi 1-ilovaga muvofiq tijorat banklari bilan qayta kreditlash toʻgʻrisidagi bitimlarni Oʻzbekiston Respublikasi nomidan imzolash vakolati berilsin.

5. Oʻzbekiston Respublikasi Adliya vazirligi Oʻzbekiston Respublikasi bilan Osiyo taraqqiyot banki oʻrtasidagi qarz bitimi, Oʻzbekiston Respublikasi bilan loyihani amalga oshirishda ishtirok etuvchi tijorat banklari oʻrtasidagi qayta kreditlash toʻgʻrisidagi bitimlar yuzasidan belgilangan tartibda yuridik xulosa bersin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Markaziy banki raisi F.M.Mullajonov zimmasiga yuklansin.