LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Respublikaning turizm salohiyatini yanada oshirish, Toshkent shahrining mehmonxona xo‘jaligini rivojlantirishga to‘g‘ridan to‘g‘ri xorijiy investitsiyalarni jalb etish maqsadida Vazirlar Mahkamasi qaror qiladi:
1. “Daegeon Global Co.Ltd” kompaniyasi (Koreya Respublikasi) bilan 2007-yil 28-sentabrda tuzilgan oldi-sotdi shartnomasiga muvofiq, investor tomonidan 18,0 mln AQSh dollari miqdorida qo‘shimcha investitsiya majburiyatlari qabul qilingan holda, “Chorsu” mehmonxona kompleksi 7,0 mln AQSh dollariga sotilganligi ma’lumot uchun qabul qilinsin.
2. O‘zbekiston Respublikasi Moliya vazirligi, Tashqi iqtisodiy aloqalar, investitsiyalar va savdo vazirligi, Tashqi ishlar vazirligi, Davlat mulki qo‘mitasi, “O‘zbekturizm” milliy kompaniyasi, Toshkent shahar hokimligi va “Daegeon Global Co.Ltd” kompaniyasining sobiq “Chorsu” mehmonxonasi negizida tegishli infratuzilmaga ega bo‘lgan zamonaviy mehmonxona kompleksini tashkil etish loyihasini quyidagi qo‘shimcha shartlarda amalga oshirishni jadal tugallash to‘g‘risidagi takliflariga rozilik berilsin:
“Daegeon Global Co.Ltd” kompaniyasi 2012-yil 1-sentabrdan kechikmagan muddatda mehmonxona kompleksi obyektlarini rekonstruksiya qilish va qurish bo‘yicha qurilish-montaj ishlari tugallanishini ta’minlash majburiyatini oladi;
ilgari sotib olish to‘lovlari, jarimalar va penyalar hisobiga to‘langan mablag‘lar, shuningdek tashkil etiladigan mehmonxona kompleksiga jalb etilgan investitsiyalar hamda mas’uliyati cheklangan jamiyat shaklidagi “Daegeon Global Korea” xorijiy korxonasi hisob raqamlaridagi mablag‘larning joriy qoldig‘i, keyinchalik oldi-sotdi shartnomasi investor aybiga ko‘ra bekor qilingan taqdirda, to‘liq miqdorda O‘zbekiston Respublikasi Davlat mulki qo‘mitasi foydasiga ushlab qolinadi;
investitsiya majburiyatlarining o‘z vaqtida bajarilmaganligi natijasida vujudga kelgan penyalar mehmonxona kompleksi obyektlarini rekonstruksiya qilish va qurish bo‘yicha qurilish-montaj ishlarini tugallash tarzida qabul qilingan majburiyatlar “Daegeon Global Co.Ltd” kompaniyasi tomonidan o‘z vaqtida va to‘liq bajarilgan taqdirda hisobdan chiqarilgan hisoblanadi.
3. O‘zbekiston Respublikasi Davlat mulki qo‘mitasi “O‘zbekturizm” milliy kompaniyasi bilan birgalikda o‘n kun muddatda, ushbu qarorning 2-bandida nazarda tutilgan qo‘shimcha shartlarni hisobga olgan holda, ilgari “Daegeon Global Co.Ltd” kompaniyasi bilan tuzilgan oldi-sotdi shartnomasiga o‘zgartirish va qo‘shimchalar kiritsin.
4. Tashkil etilayotgan mehmonxona kompleksi obyektlarini loyihalashni va loyiha-smeta hujjatlarini tasdiqlashni birga bajargan holda 2011-yil 1-yanvargacha ishchi chizmalar bo‘yicha rekonstruksiya qilish va qurishga istisno tartibida ruxsat berilsin.
5. O‘zbekiston Respublikasi Davlat arxitektura va qurilish qo‘mitasi belgilangan tartibda loyiha-smeta hujjatlarini ekspert xulosasi bilan birga ishlab chiqishni va amalga oshirilayotgan qurilish-montaj ishlari sifati yuzasidan nazoratni ta’minlasin.