Oʻzbekiston Respublikasi Vazirlar Mahkamasining 2013-yil 10-yanvardagi “Respublika aholi punktlarini obodonlashtirish ishlarini tashkil etishni takomillashtirish chora-tadbirlari toʻgʻrisida”gi 4-sonli qarori (Oʻzbekiston Respublikasi Hukumati qarorlari toʻplami, 2013-y., 1-son, 2-modda) ijrosini taʼminlash hamda viloyat, tuman (shahar) aholi punktlarini obodonlashtirish ishlarini tashkil etish va boshqarishni yanada takomillashtirish, shuningdek mahalliy budjetlar xarajatlarini maqbullashtirish maqsadida qaror qilaman:

1. Oʻzbekiston Respublikasi Vazirlar Mahkamasining 2013-yil 10-yanvardagi “Respublika aholi punktlarini obodonlashtirish ishlarini tashkil etishni takomillashtirish chora-tadbirlari toʻgʻrisida”gi 4-sonli qarori ijro uchun qabul qilinsin.

2. Viloyat markazi boʻlgan Jizzax shahar obodonlashtirish boshqarmasining namunaviy tuzilmasi 1-ilovaga*, tumanlar obodonlashtirish boshqarmalarining namunaviy tuzilmasi 2-ilovaga* muvofiq tasdiqlansin.

3. Faoliyat koʻrsatib turgan obodonlashtirish tashkilotlari (boʻlinmalari) qayta tashkil etilsin hamda ularning negizida shahar va tumanlarda ushbu qarorga 1-2-ilovalarda nazarda tutilgan namunaviy tuzilmalarga muvofiq obodonlashtirishning tegishli boshqarmalari tashkil etilsin.

4 Oʻzbekiston Respublikasi Vazirlar Mahkamasining 2013-yil 10-yanvardagi “Respublika aholi punktlarini obodonlashtirish ishlarini tashkil etishni takomillashtirish chora-tadbirlari toʻgʻrisida”gi 4-sonli qarori bilan tasdiqlangan shahar va tumanlar obodonlashtirish boshqarmalari toʻgʻrisidagi namunaviy nizom asosida obodonlashtirish boshqarmalari haqidagi nizomlar tasdiqlansin.

5. Obodonlashtirish boshqarmalariga joy ajratilsin va zarur hollarda ular maʼmuriy va ishlab chiqarish binolariga joylashtirilsin hamda malakali mutaxassislar, muhandis-texnik va ishlab chiqarish xodimlari bilan taʼminlansin.

6. Shaharsozlik hamda sanitariya meʼyorlari va qoidalariga muvofiq obodonlashtirish obyektlarini saqlash va ulardan foydalanish ishlarini oʻz vaqtida va sifatli bajarish shahar va tumanlar obodonlashtirish boshqarmalarining asosiy vazifalari etib belgilansin.

Ularning asosiy vazifalariga quyidagilar kiritilsin:

koʻchalar, skverlar, xiyobonlar, yodgorlik majmualari va umumiy foydalaniladigan boshqa koʻkalamzor xududlarini koʻkalamzorlashtirish, dov-daraxtlarni parvarish qilish boʻyicha agrotexnik talablarini oʻtkazish, ularning zararkunandalari va kasalliklariga qarshi kurashish;

yoʻl-koʻprik xoʻjaligini (koʻchalar, yoʻlaklar, qatnov qismining yoʻl qoplamasi, bekat koʻtarmalari, yer osti oʻtish joylari, koʻpriklar, transport chorrahalari va yoʻl oʻtkazgichlar, yon bardyurlar, suv chiqarib yuborish tarmoqlari va sunʼiy inshootlar) saqlash, mukammal va joriy taʼmirlash;

xoʻjaliklararo qishloq avtomobil yoʻllarini saqlash, mukammal va joriy taʼmirlash;

drenaj xoʻjaligi (vertikal va gorizontal quduqlar, ochiq va yopiq kollektorlar, sunʼiy havzalar, yer osti va yomgʻir suvlarini haydaydigan nasos stansiyalari) va favvoralarni saqlash, mukammal, joriy taʼmirlash va ulardan foydalanish boʻyicha boshqa ishlar;

elektr energiyasini tejash maqsadida zamonaviy asbob-uskunalar va texnologiyalarni joriy etgan holda yoʻllar va koʻchalarning tashqi yoritish tarmoqlarini saqlash, mukammal va joriy taʼmirlash hamda ulardan foydalanish boʻyicha boshqa ishlar;

nazoratsiz, shu jumladan egasiz itlar, mushuklar va yirtqich hayvonlarni veterinariya-sanitariya qoidalariga rioya qilgan holda tutish va davlat veterinariya boʻlinmalariga olib kelish;

ekologiya meʼyorlariga, sanitariya, shaharsozlik meʼyorlari va qoidalariga hamda boshqa meʼyorlari va qoidalarga muvofiq dafn etish joylari (qabristonlar) va qabr ustiga oʻrnatilgan yodgorliklarni saqlash va foydalanish;

mavsumiy talablarni hisobga olgan holda obodonlashtirish obyektlarini sanitariya jihatdan tozalash.

7. Shahar va tumanlarda obodonlashtirish boshqarmalarini qayta tuzish va tashkil etish masalalarini muvofiqlashtirish boʻyicha 3-ilovaga* muvofiq ishchi guruhi tashkil etilsin.

Ishchi guruh (B. Soatov) ushbu qarorni amalga oshirish yuzasidan joylarda davlat hokimiyati organlari ishini muvofiqlashtirilishini taʼminlasin va ularga zarur metodik yordam koʻrsatsin.

8. Ushbu qaror rasmiy eʼlon qilingan kundan boshlab kuchga kiradi.

9. Mazkur qarorning ijrosini nazorat qilish viloyat hokimining oʻrinbosari B. Soatov zimmasiga yuklatilsin.