Mavjud suv resurslaridan samarali va oqilona foydalanish, suv taqchilligining salbiy oqibatlarini yumshatish va 2011-yil iyun — sentabr oylarida qishloq xoʻjaligini sugʻorma suv bilan barqaror taʼminlash uchun shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi tomonidan Iqtisodiyot vazirligi, Moliya vazirligi, “Oʻzgidromet” markazi, Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda ishlab chiqilgan quyidagilarni:

1-ilovaga* muvofiq 2011-yil iyun — sentabr oylari davrida qishloq xoʻjaligi uchun suv olish limitlarini;

2-ilovaga* muvofiq 2011-yilda qishloq xoʻjalik ekinlarini sugʻorishning suvni tejaydigan texnologiyalarini joriy etish parametrlarini;

3-ilovaga* muvofiq 2011-yil iyun — sentabr oylari davrida suv xoʻjaligi tashkilotlarining ekspluatatsiya xarajatlari hisobiga bajariladigan taʼmirlash-tiklash ishlari parametrlarini;

4-ilovaga* muvofiq 2011-yil iyun — sentabr oylari davrida suv isteʼmolchilari uyushmalari va fermer xoʻjaliklari mablagʻlari hisobiga bajariladigan taʼmirlash-tiklash ishlari parametrlarini;

5-ilovaga* muvofiq 2011-yil iyun — sentabr oylari davrida Oʻzbekiston Respublikasi Davlat budjeti mablagʻlari hisobiga xarid qilinadigan asbob-uskunalar va ehtiyot qismlar roʻyxatini oʻz ichiga oladigan suvni tejaydigan texnologiyalarni joriy etish va sugʻorma suvni tejash boʻyicha kompleks tadbirlar maʼqullansin.

2. Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari:

bir hafta muddatda suv olish limitlarini har bir suvdan foydalanuvchi va suv isteʼmolchisiga yetkazsinlar hamda suv resurslaridan maqsadli va oqilona foydalanish uchun ularning masʼuliyatini oshirish boʻyicha tizimli chora-tadbirlar koʻrsinlar;

sugʻorishning suvni tejaydigan texnologiyalarini joriy etish parametrlari va taʼmirlash-tiklash ishlari bajarilishi ustidan obyektma-obyekt monitoring olib borsinlar, ushbu ishlar belgilangan muddatlarda oʻz vaqtida va sifatli tugallanishiga doir tezkor chora-tadbirlar koʻrsinlar.

Suv olish limitlariga rioya qilish va suv resurslaridan oqilona foydalanishni taʼminlash, shuningdek sugʻorishning suvni tejaydigan texnologiyalarini joriy etish parametrlari va taʼmirlash-tiklash ishlari oʻz vaqtida bajarilishi uchun shaxsiy javobgarlik Oʻzbekiston Respublikasi Qishloq va suv xoʻjaligi vaziriga, Qoraqalpogʻiston Respublikasi Vazirlar Kengashi Raisiga, viloyatlar va tumanlar hokimlariga yuklansin.

3. Oʻzbekiston Respublikasi Qishloq va suv xoʻjaligi vazirligi uch kun muddatda manbalar boʻyicha hududlarning suv olishi oʻn kunlik limitlarini hamda suv omborlarini toʻldirish va ulardan suv chiqarish rejimini tasdiqlasin.

4. “Oʻzbekenergo” davlat-aksiyadorlik kompaniyasi Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari bilan birgalikda bir hafta muddatda suv olish limitlariga muvofiq sugʻorma suv berish uchun nasos stansiyalari va quduqlarni elektr energiyasi bilan uzluksiz taʼminlash jadvallarini tasdiqlasin hamda ularning bajarilishi ustidan qatʼiy nazorat oʻrnatsin.

5. “Oʻzbekenergo” davlat-aksiyadorlik kompaniyasiga nasos stansiyalarining tashqi elektr taʼminoti obyektlarini loyihalashtirish va qurish boʻyicha buyurtmachi funksiyasi yuklansin. Koʻrsatib oʻtilgan obyektlarni moliyalashtirish 6-ilovaga* muvofiq parametrlarga binoan kompaniyaning oʻz mablagʻlari hisobiga amalga oshirilishi nazarda tutilsin.

Istisno tariqasida Oʻzbekiston Respublikasi Qishloq va suv xoʻjaligi vazirligiga va “Oʻzbekenergo” davlat-aksiyadorlik kompaniyasiga 2011-yil 1-sentabrgacha nasos stansiyalarining tashqi elektr taʼminoti obyektlarini qurishni loyihalashtirish bilan bir paytda amalga oshirishga ruxsat berilsin.

6. Oʻzbekiston Respublikasi Moliya vazirligi:

suv xoʻjaligi tashkilotlari tomonidan isteʼmol qilinadigan elektr energiyasiga haq toʻlash uchun nazarda tutilgan mablagʻlardan 6,11 mlrd soʻmni 5-ilovaga* muvofiq asbob-uskunalar va ehtiyot qismlar sotib olishga, shuningdek suv xoʻjaligi obyektlarida avariya-tiklash ishlarini bajarish uchun moddiy-texnika resurslari zaxirasini yaratishga ajratsin;

2011-yilning toʻqqiz oyi yakunlari boʻyicha Oʻzbekiston Respublikasi Davlat budjetiga toʻlovlar boʻyicha moddiy-texnika resurslari yetkazib beruvchilar va suv xoʻjaligi tashkilotlarining qarzdorligini qayta koʻrib chiqish yoʻli bilan foydalanuvchi suv xoʻjaligi tashkilotlarining qishloq xoʻjaligini sugʻorma suv bilan barqaror taʼminlash tadbirlarini amalga oshirish natijasida hosil boʻlgan kreditorlik qarzlarini uzsin.

7. “Oʻzbekneftgaz” milliy xolding kompaniyasi:

Oʻzbekiston Respublikasi Iqtisodiyot vazirligi bilan birgalikda suv taqchilligini yumshatish boʻyicha sugʻorishning suvni tejaydigan texnologiyalarini joriy etish uchun Oʻzbekiston Respublikasi Qishloq va suv xoʻjaligi vazirligining asoslangan hisob-kitoblariga muvofiq birja kotirovkalarining oʻrtacha narxlari boʻyicha “Jizzaxplastmassa” ochiq aksiyadorlik jamiyatining toʻgʻridan-toʻgʻri shartnomalari boʻyicha polietilen granulalar yetkazib berilishini taʼminlasin;

“Oʻzdavneftgazinspeksiya” xulosasiga muvofiq taʼmirlash-tiklash ishlarini bajarish uchun birja kotirovkalarining oʻrtacha narxlari boʻyicha toʻgʻridan-toʻgʻri shartnomalarga koʻra yoqilgʻi-moylash materiallari yetkazib berilishini taʼminlasin.

8. Suv resurslaridan samarali va oqilona foydalanish, suv taqchilligining salbiy oqibatlarini yumshatish va 2011-yil iyun — sentabr oylarida qishloq xoʻjaligini sugʻorma suv bilan barqaror taʼminlash uchun shart-sharoitlar yaratish ishlarini muvofiqlashtirish uchun 7-ilovaga* muvofiq tarkibda ishchi guruh tashkil etilsin.

Ishchi guruh (Sh.M. Mirziyoyev):

suv olish limitlariga va suv omborlaridan sugʻorma suv chiqarishga rioya etilishi ustidan qattiq nazoratni tashkil etsin;

sugʻorishning suvni tejaydigan texnologiyalarini joriy etish parametrlari va taʼmirlash-tiklash ishlari bajarilishini muntazam oʻrgansin va har oʻn kunda Qoraqalpogʻiston Respublikasi Vazirlar Kengashi Raisi, viloyatlar va tumanlar hokimlarining suv taqchilligining salbiy oqibatlarini yumshatish va 2011-yil iyun — sentabr oylarida qishloq xoʻjaligini sugʻorma suv bilan barqaror taʼminlash uchun shart-sharoitlar yaratish boʻyicha hisobotlarini eshitsin;

har oyda, manbalardagi suvdan kelib chiqib, zaruriyat boʻlganda, suv olish limitlariga tuzatishlar kiritsin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.