Oʻzbekiston Respublikasi Prezidentining 2012-yil 10-apreldagi PF–4435-son “Davlat boshqaruvi sohasidagi kadrlarni tayyorlashni yanada takomillashtirish chora-tadbirlari toʻgʻrisida”gi Farmoniga muvofiq buyuraman:

1. Oʻzbekiston Respublikasi Prezidenti huzuridagi Davlat boshqaruvi akademiyasi magistraturasiga oʻqishga kirish uchun nomzodlarni dastlabki tanlovdan oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Taʼlim toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda), “Kadrlar tayyorlash milliy dasturi toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 11-12-son, 295-modda) qonunlari, Oʻzbekiston Respublikasi Prezidentining 2012-yil 10-apreldagi PF–4435-sonli “Davlat boshqaruvi sohasida kadrlar tayyorlashni yanada takomillashtirish boʻyicha chora-tadbirlar toʻgʻrisida”gi va 2013-yil 12-iyuldagi PF–4548-sonli “Oʻzbekiston Respublikasi Prezidentining 2012-yil 10-apreldagi PF–4435-sonli “Davlat boshqaruvi sohasida kadrlar tayyorlashni yanada takomillashtirish boʻyicha chora-tadbirlar toʻgʻrisida”gi Farmoniga oʻzgartirishlar va qoʻshimcha kiritish haqida”gi farmonlariga muvofiq, Oʻzbekiston Respublikasi Prezidenti huzuridagi Davlat boshqaruvi akademiyasi (bundan buyon matnda Akademiya deb yuritiladi) magistraturasiga oʻqishga kirish uchun nomzodlarni dastlabki tanlovdan oʻtkazish tartibini belgilaydi.

1. Dastlabki tanlov nomzodning ingliz tili boʻyicha bilim darajasini aniqlash uchun suhbat hamda axborot-kommunikatsiya texnologiyalari (bundan buyon matnda AKT deb yuritiladi) boʻyicha bilim darajasini, tahlil qilish qobiliyatini va yetakchilik fazilatlarini aniqlashga qaratilgan test oʻtkazish tarzida amalga oshiriladi.

2. Dastlabki tanlov magistraturaga kirish uchun hujjatlar qabul qilish tugallangandan soʻng, Akademiya rektori buyrugʻiga muvofiq Qabul komissiyasi tomonidan tashkil etiladi.

3. Dastlabki tanlovda ishtirok etadigan shaxslar roʻyxati, suhbat va testlarni oʻtkazish jadvali hamda imtihonning taxminiy savollari Qabul komissiyasi tomonidan eʼlon qilinadi.

4. Dastlabki tanlovda nomzodning:

ingliz tili boʻyicha bilimi, xususan, soʻz boyligi darajasi, nutqining grammatik jihatdan toʻgʻriligi, matnlarni va nutqni tushunishi baholanadi;

AKT bilan ishlash koʻnikmasi, Akademiyaning taʼlim dasturlarini toʻliq va sifatli oʻzlashtirish uchun zarur boʻlgan axborotni Internet tarmogʻi orqali qidirish, jamlash va qayta ishlash boʻyicha koʻnikmalarga ega ekanligi tekshiriladi;

zamonaviy rahbar uchun zarur boʻlgan tahlil qilish, aql-zakovat darajasi, shuningdek psixologik testlar oʻtkazish orqali maʼnaviy-axloqiy fazilatlari va yetakchilik qobiliyatlari aniqlanadi.

5. Kollegiallik, shaffoflik (ochiqlik) va xolislik dastlabki tanlov oʻtkazishning asosiy prinsiplari hisoblanadi.

6. Qabul komissiyasi:

suhbat va test oʻtkazishni tashkil qiladi;

manfaatdor shaxslarga, xususan, nomzodlarga dastlabki tanlov oʻtkazish sanasi, vaqti va joyi haqida xabar beradi;

nomzodlarning maʼmuriy hududiy birliklar boʻyicha roʻyxati, ularni roʻyxatga olish qaydnomalari va fanlar boʻyicha baholar qaydnomasini tuzadi;

fanlar boʻyicha guruhlar faoliyatining tashkiliy-texnik taʼminoti boʻyicha masalalarni hal qiladi;

imtihon materiallarining oʻz vaqtida tayyorlanishini taʼminlaydi.

7. Dastlabki tanlov har yili iyul oyining birinchi oʻn kunligida oʻtkaziladi.

8. Nomzodlarning maʼmuriy hududlar boʻyicha roʻyxati dastlabki tanlov oʻtkazilishidan 10 kun oldin Qabul komissiyasi tomonidan tuziladi va Qabul komissiyasining masʼul kotibiga taqdim etiladi.

9. Nomzodlar dastlabki tanlov haqida tanlov oʻtkazilishidan kamida 5 kun oldin xabardor qilinishi kerak.

10. Dastlabki tanlovni oʻtkazish jadvali Qabul komissiyasi masʼul kotibining oʻrinbosari tomonidan tuziladi.

11. Dastlabki tanlov oʻtkaziladigan tegishli yoʻnalishlar boʻyicha savollar fanlar boʻyicha guruhlar tomonidan ishlab chiqiladi. Fanlar boʻyicha guruhlar tarkibi Qabul komissiyasi raisi tomonidan tasdiqlanadi.

12. Akademiyaning kompyuter texnikasiga xizmat koʻrsatish va dasturiy taʼminot boʻlimi xodimlari tomonidan:

kompyuter sinflari testga tayyorlanadi;

test dasturi oʻrnatiladi;

axborot va texnika xavfsizligini taʼminlash boʻyicha tegishli choralar koʻriladi.

13. Ingliz tili boʻyicha dastlabki tanlov oʻtkaziladigan sinflar videokamerali kompyuterlar bilan jihozlanadi.

14. Akademiyaning oʻquv-metodik boʻlimi xodimlari:

imtihon komissiyalarining ish jadvali va nazoratchilar roʻyxatini tuzadi;

dastlabki tanlovni oʻtkazishga oid bayonnomalar blankalarini tayyorlaydi.

15. Dastlabki tanlovni oʻtkazish uchun barcha zarur materiallar (roʻyxatga olish, baholash qaydnomalari va hokazo) Qabul komissiyasi tomonidan tayyorlanadi.

16. Dastlabki tanlov nomzodlarni dastlabki tanlov oʻtkazish tartibi bilan tanishtirishdan boshlanadi.

17. Ingliz tili boʻyicha suhbat har biri kamida ikkita mutaxassisdan iborat boʻlgan bir nechta imtihon komissiyasi tomonidan olib boriladi. Nomzodlar Qabul komissiyasi tomonidan roʻyxatga olinadi va roʻyxat boʻyicha suhbatga taklif qilinadi. Nomzodlarga tayyorlanish uchun oʻn daqiqa vaqt beriladi.

18. AKT, tahlil qilish qobiliyati va yetakchilik fazilatlarini aniqlash boʻyicha testlar kompyuter sinflarida oʻtkaziladi. Nomzodlarga dastlabki tanlovdan oʻtish uchun bir marta imkoniyat beriladi. Nomzod har bir yoʻnalish boʻyicha test topshirgandan soʻng, test natijasi baholar qaydnomasiga alohida kiritilib, nomzodning imzosi bilan tasdiqlanadi.

19. Nomzod dastlabki tanlovga uzrli sabablarga (kasalligi, xizmat safari yoki oilaviy sharoitga) koʻra kelmagan va uzrli sabablarni tasdiqlovchi rasmiy hujjat taqdim qilgan hollarda, unga boshqa kunda oʻtkaziladigan dastlabki tanlovda ishtirok etish huquqi beriladi. Zarur boʻlgan hollarda, Qabul komissiyasi raisi tomonidan dastlabki tanlov oʻtkazish uchun qoʻshimcha kunlar belgilanishi mumkin.

Nomzod dastlabki tanlovda uzrli sabablarsiz ishtirok etmagan taqdirda, dastlabki tanlovdan oʻtmagan hisoblanadi va Qabul komissiyasi tomonidan nomzodni asosiy sinovlarga kiritmaslik haqida qaror qabul qilinadi. Qabul komissiyasining ushbu qarori Qabul komissiyasi yigʻilishining bayonnomasida aks ettiriladi.

20. Har bir oʻtkazilgan dastlabki tanlov natijalari boʻyicha alohida bayonnoma rasmiylashtiriladi. Bayonnomada dastlabki tanlovni oʻtkazish vaqti va joyi, guruhlar tarkibi, dastlabki tanlov oʻtkazishning qisqacha tavsifi aks ettiriladi. Roʻyxatga olish va baholash qaydnomalari bayonnomaga ilova qilinadi.

21. Dastlabki tanlov jadvali eʼlon qilinadigan kuni namunaviy test savollari hamda ingliz tili boʻyicha suhbat biletlari dastlabki tanlov oʻtkazishning vaqti va joyi toʻgʻrisidagi maʼlumotlar bilan birga dastlabki tanlovga oid stendga, shuningdek Akademiyaning Internet tarmogʻidagi rasmiy veb-saytiga joylashtiriladi.

22. Dastlabki tanlovda ishtirok etuvchi nazoratchilar roʻyxati dastlabki tanlov oʻtkazilishidan kamida uch kun oldin Akademiyaning masʼul xodimlari orasidan shakllantiriladi va tasdiqlanadi. Bunda har bir auditoriyaga kamida 2 ta nazoratchi tayinlanadi.

23. Nazoratchilar dastlabki tanlov oʻtkaziladigan kuni:

oʻzlariga biriktirilgan auditoriyaga dastlabki tanlov boshlanishidan 30 daqiqa oldin yetib keladi va auditoriyani dastlabki tanlov oʻtkazish uchun tayyorligini tekshiradi;

nomzodlarni ularning shaxsini tasdiqlovchi hujjatlari asosida tekshirib, roʻyxat boʻyicha auditoriyaga kiritadi;

nomzodlarni dastlabki tanlov oʻtkazish tartibi bilan tanishtiradi;

dastlabki tanlov yakunlangach, tegishli bayonnoma rasmiylashtiradi va Qabul komissiyasiga topshiradi.

24. Nomzodning ingliz tilini bilish darajasini baholash suhbat shaklida amalga oshiriladi. Suhbat chogʻida har bir nomzodga matn oʻqish va tushunish, tanlangan mavzuga oid matn bayoni hamda imtihon oluvchi bilan suhbat natijalariga koʻra baho qoʻyiladi.

25. Suhbat natijalari 100 ballik reyting tizimida baholanadi. Nomzodning matnni oʻqishi va tushunishi hamda uning mazmunini davlat yoki rus tilida gapirib berishi 40 ballgacha, tanlangan mavzu boʻyicha matn bayoni 40 ballgacha baholanadi, bunda gaplar soni, ularning mazmuni hamda nutq matnining grammatik tuzilmasi inobatga olinadi. Imtihon oluvchi bilan suhbat 20 ballgacha baholanadi, bunda javobning mazmuni va gaplarning grammatik jihatdan tuzilmasiga eʼtibor beriladi. Ogʻzaki suhbat (matnni oʻqish, uning mazmunini davlat yoki rus tilida tushuntirish va intervyu) vaqtida nomzodning tilga oid bilimlari, ogʻzaki nutq borasida amaliy mahorati va koʻnikmalari baholanadi.

26. Nomzodning AKTdan foydalanish darajasi oddiy foydalanuvchi darajasidagi dasturlar, zamonaviy amaliy dasturlar va internetda ishlash boʻyicha tuzilgan test savollari vositasida aniqlanadi. Test savollarining 75 foizi — Microsoft Office Applications dasturi, 25 foizi — Internet tarmogʻi va axborot texnologiyalardan foydalanish boʻyicha tuziladi. Har bir savolga javob berish uchun nomzodga bir daqiqa vaqt beriladi.

27. Natijalar 100 ballik reyting tizimida baholanadi.

28. Nomzodlarning tahlil qilish qobiliyati test savollari vositasida aniqlanadi. Test savollari nomzodning mantiqiy fikrlash, axborotni tizimga solish, uni tahlil qilish va umumlashtirish, qonuniyatlar topish, amaliy miqdoriy masalalarni echish qobiliyatini baholashga qaratilgan.

29. Test savollari Akademiyaning professor-oʻqituvchilari tomonidan tuziladi va tekshiriladi. Bunda savollar miqdoriy, mantiqiy, qiyosiy va makonga oid turlarga boʻlinadi. Miqdoriy savollar nomzodning amaliy arifmetik masalalar va hisoblashga oid misollarni echish, mantiqiy savollar muayyan shart-sharoitdan kelib chiqib, aniq fikrlash va toʻgʻri xulosa chiqarish, sonli va shaklli qonuniyatlarga eʼtibor berishga, qiyosiy savollar esa, oʻzaro bogʻliqlikni hamda turli tushuncha va jarayonlar oʻrtasidagi oʻxshashlikni sezish qobiliyatini aniqlashga qaratilgan. Makonga oid savollar makonga oid fikrlash darajasini aniqlovchi geometrik shakllar bilan bogʻliqdir. Har bir savolga javob berish uchun nomzodga ikki daqiqa vaqt beriladi.

30. Natijalar 100 ballik reyting tizimida baholanadi.

31. Nomzodlarning yetakchilik fazilatlari psixologik test savollari vositasida aniqlanadi hamda rahbar kadrlarni kasbiy jihatdan tanlashni takomillashtirish va ularning shaxsiy va emotsional jihatlari shakllanishida ijtimoiy-ruhiy qonuniyatlarni oʻrganishga qaratilgan. Nomzodning yetakchilik fazilatlarini aniqlashda uning rahbarlik faoliyatiga (mustaqillik, masʼuliyat, maqsadga erishishda faollik) moyilligi, berilgan vazifani hal qilishda muvaffaqiyatga erishishi, jamoani qoʻyilgan vazifani echishga yoʻnaltira olishi, hamkasblar bilan munosabat oʻrnatish va ularni mustahkamlash mahorati, kasbiy oʻsish va oʻzini rivojlantirishga intilishi eʼtiborga olinadi.

32. Nomzodlarning yetakchilik fazilatlarini aniqlash uchun ularga bir xil psixologik test savollari beriladi.

33. Dastlabki tanlov natijalariga koʻra:

ingliz tili boʻyicha — ushbu yoʻnalish uchun belgilangan maksimal ballning 20 foizi va undan koʻp;

AKTdan foydalanish boʻyicha — ushbu yoʻnalish uchun belgilangan maksimal ballning 30 foizi va undan koʻp;

tahlil qilish boʻyicha — ushbu yoʻnalish uchun belgilangan maksimal ballning 30 foizi va undan koʻp ball toʻplagan nomzodlar dastlabki tanlovdan oʻtgan hisoblanadi va Akademiyaning kirish imtihonlarida ishtirok etish huquqiga ega boʻladi.

34. Dastlabki tanlov natijalariga koʻra Akademiyaning kirish imtihonlarida ishtirok etish huquqiga ega boʻlgan nomzodlar roʻyxati Qabul komissiyasi tomonidan eʼlon qilinadi.

35. Mazkur Nizom talablarining buzilishida aybdor shaxslar qonun hujjatlarida belgilangan tartibda javobgarlikka tortiladi.

36. Mazkur Nizom Oʻzbekiston Respublikasi Oliy va oʻrta maxsus taʼlim vazirligi va Oʻzbekiston Respublikasi Vazirlar Mahkamasi huzuridagi Davlat test markazi bilan kelishilgan.