Oʻzbekiston Respublikasi Hukumati va Qozogʻiston Respublikasi Hukumati, bundan keyin Ahdlashuvchi Tomonlar, deb ataluvchilar,

ikkala davlat oʻrtasidagi oʻzaro foydali kengroq iqtisodiy hamkorlikka uzoq muddatli asosda yordam berishni maqsad qilib,

bir Ahdlashuvchi Tomon davlati investorlariga boshqa Ahdlashuvchi Tomon davlati hududida investitsiyalar uchun qulay sharoitlarni yaratish va saqlash maqsadida investitsiyalarni ragʻbatlantirish va himoya qilish zarurligini tan olib,

investitsiyalarning barqaror asosi iqtisodiy resurslardan foydalanish eng yuqori samaradorlikni va ishlab chiqarish kuchlarini rivojlantirishni taʼminlashiga rozilik bildirib,

quyidagilar toʻgʻrisida ahdlashib oldilar:

Ushbu Bitim maqsadlarida:

1. «Investor» atamasi quyidagilarga tatbiq etiladi va ularni oʻz ichiga oladi:

a) Ahdlashuvchi Tomonlar davlatlarining yuridik shaxslari;

b) Ahdlashuvchi Tomonlar davlatlarining fuqarolari, fuqarolar birlashmalari va fuqaroligi boʻlmagan shaxslari;

2. «Investitsiyalar» atamasi mulkiy boyliklarning har qanday turini va ularga boʻlgan huquqlarni, shuningdek Ahdlashuvchi Tomonlardan birining investorlari tomonidan boshqa Ahdlashuvchi Tomon davlati hududiga foyda (daromad) olish maqsadida qoʻyiladigan intellektual mulkni anglatadi hamda jumladan quyidagilarni, biroq shularning oʻzinigina emas, oʻz ichiga oladi:

a) koʻchar va koʻchmas mulk hamda uning bilan bogʻliq mulkiy huquqlar;

b) pul mablagʻlari, aksiyalar, omonatlar va boshqa qimmatli qogʻozlar hamda Ahdlashuvchi Tomonlardan har birining qonunchiligiga muvofiq roʻyxatdan oʻtkazilgan korxonalarda, aksiyadorlik jamiyatlarida, xoʻjalik shirkatlarida, birlashmalarda va boshqa yuridik shaxslarda qatnashishning har qanday shakllari;

v) investitsiyalarni amalga oshirish bilan bogʻliq boʻlgan iqtisodiy qimmatga ega boʻlgan pul talabnomalari va boshqa huquqlar;

g) mualliflik huquqlari hamda ixtirolar, patentlar, sanoat loyihalari va namunalari, savdo belgilari, firma nomlari, kelib chiqish koʻrsatkichlari, texnologiyalar, nou-xau kabi intellektual va sanoat mulkiga boʻlgan huquqlar;

d) erga (shu jumladan ijara asosida) va tabiiy resurslarga egalik qilish va ulardan foydalanish huquqlari.

3. Investitsiyalar joylashtirilgan Ahdlashuvchi Tomon davlati qonunchiligiga muvofiq amalga oshirilgan investitsiyalar shakllarini oʻzgartirish uni investitsiya sifatida tavsiflashni oʻzgartirmaydi.

4. «Yuridik shaxslar» atamasi Ahdlashuvchi Tomonlardan birining davlat qonunchiligiga muvofiq tashkil etilgan va boshqa Ahdlashuvchi Tomon hududida investitsiyalarni amalga oshiradigan har qanday yuridik shaxsni anglatadi.

5. «Fuqarolar» atamasi bir Ahdlashuvchi Tomon davlati qonunchiligiga koʻra fuqarolikka va huquqiy layoqatga ega boʻlgan, uning hududida yoki chet elda doimiy yashaydigan va boshqa Ahdlashuvchi Tomon hududida investitsiyalarni amalga oshiradigan shaxslarni anglatadi.

6. «Fuqaroligi boʻlmagan shaxslar» atamasi bir Ahdlashuvchi Tomon davlati hududida doimiy yashaydigan, Ahdlashuvchi Tomon davlati qonunchiligiga koʻra tadbirkorlik faoliyatini yuritish uchun roʻyxatga olingan va boshqa Ahdlashuvchi Tomon hududida investitsiyalarni amalga oshiradigan fuqaroligi boʻlmagan shaxslarni anglatadi.

7. «Daromadlar» atamasi, ushbu moddaning 2-bandida belgilanganidek, investitsiyalar natijasida olingan foydalar, foizlar, dividendlar, royalti, litsenziya va vositachilik taqdirlashlari, texnik yordam koʻrsatish, texnik xizmat uchun toʻlovlar, taqdirlashning boshqa shakllari tarzida olingan mablagʻlarni, biroq shularning oʻzinigina emas, anglatadi.

8. «Hudud» atamasi tegishli ravishda Ahdlashuvchi Tomon davlatining xalqaro huquq normalariga muvofiq oʻz suveren huquqlarini va yurisdiksiyasini amalga oshiradigan hududini anglatadi.

1. Har bir Ahdlashuvchi Tomon oʻz davlati qonunchiligiga muvofiq boshqa Ahdlashuvchi Tomon davlati investorlari investitsiyalarining oʻz davlati hududiga kirib kelishiga yoʻl qoʻyadi va ularni ragʻbatlantiradi, shuningdek ushbu investitsiyalarning toʻliq va soʻzsiz huquqiy himoya qilinishini kafolatlaydi.

2. Har bir Ahdlashuvchi Tomon oʻz davlati qonunchiligi doirasida oʻzaro investitsiyalarning xilma-xil shakllarini qoʻllab-quvvatlaydi, ularni oʻz davlati hududida himoya qilinishini taʼminlaydi va ushbu investitsiyalarning muomalada boʻlishini, foydalanilishini va tasarruf etilishini ixtiyoriy choralari koʻrish yoʻli bilan kamsitmaydi.

3. Agar Ahdlashuvchi Tomon ushbu Bitim doirasida oʻz davlati hududiga investitsiyalar kirib kelishiga yoʻl qoʻygan boʻlsa, shu Ahdlashuvchi Tomon oʻz davlati qonunchiligiga muvofiq boshqa Ahdlashuvchi Tomon davlati investorlariga ana shunday investitsiyalarga aloqador boʻlgan zarur ruxsatnomalar beradi.

1. Har bir Ahdlashuvchi Tomon oʻz davlati hududida boshqa Ahdlashuvchi Tomon davlati investorlari investitsiyalari va daromadlariga oʻz investorlari va/yoki har qanday uchinchi davlat investorlari investitsiya hamda daromadlariga beradigan tartibdan noqulayroq boʻlmagan odil va teng huquqli tartibni yaratadi.

2. Har bir Ahdlashuvchi Tomon boshqa Ahdlashuvchi Tomon investorlari amalga oshirayotgan investitsiyalarga nisbatan uning milliy qonunchiligi va ushbu Bitimdan kelib chiquvchi har qanday majburiyatlarga rioya qiladi.

3. Ushbu Bitimning eng qulay sharoitlarni yaratish prinsipiga daxldor qoidalari Ahdlashuvchi Tomonlardan birini boshqa Ahdlashuvchi Tomon davlati investorlariga quyidagilardan kelib chiquvchi preferensiyalar yoki ustuvorliklarning imtiyozli tartibini joriy qilishga majburlovchi tarzda talqin qilinmasligi kerak:

a) Ahdlashuvchi Tomonlardan biri qatnashchisi boʻlgan yoki ana shunday boʻlishi kutilayotgan mavjud yoki kelajakda mumkin boʻlgan boj, valyuta va toʻlov ittifoqlari, erkin savdo va yagona tariflar zonalari, umumiy bozor yoki mintaqaviy iqtisodiy integratsiya toʻgʻrisidagi Bitimlarning har qanday boshqa shakllari;

b) soliq toʻlanishiga yoʻl qoʻymaslik toʻgʻrisidagi bitimlar yoki soliq solish masalalari boʻyicha boshqa xalqaro bitimlar.

Agar Ahdlashuvchi Tomonlardan birining davlati qonunchiligi qoidalari yoki xalqaro huquqqa aloqador majburiyatlarda, ushbu Bitimda mavjud boʻlgan, kelajakda unga qoʻshimcha ravishda yaratilgan majburiyatlarda boshqa Ahdlashuvchi Tomon davlati investorlari investitsiyalariga ushbu Bitimga beriladigandan qulayroq umumiy yoki oʻziga xos tusdagi sharoit berilishi toʻgʻrisida qoidalar boʻlsa, bu qoidalar ushbu Bitimga qiyosan qulayroq boʻlgan hajmda ustuvorlikka ega boʻladi.

1. Ahdlashuvchi Tomon davlati hududida investitsiyalarni amalga oshirgan boshqa Ahdlashuvchi Tomon davlati investorlari tegishli soliq, boj va yigʻimlarni toʻlaganlaridan soʻng Ahdlashuvchi Tomon shu investitsiyalarga aloqador quyidagi toʻlovlarning toʻsiqsiz oʻtkazilishini taʼminlaydi, ammo beistisno emas, xususan:

a) ushbu Bitimning 1-moddasi 7-bandida belgilanganidek foizlar, dividendlar, foyda va boshqa joriy daromadlarni;

b) ikkala Ahdlashuvchi Tomonlar investitsiyalar sifatida tan olgan zayomlarni toʻlash summalarini;

v) ushbu Bitimning 1-moddasi 2-bandida nazarda tutilgan huquqlardan kelib chiquvchi litsenziya tushumlari va boshqa toʻlovlarni;

g) saqlash yoki rivojlantirish uchun zarur boʻlgan sarmoya va qoʻshimcha summalarni, shuningdek boshqa Ahdlashuvchi Tomon davlati hududida amalga oshiriladigan investitsiyalar menejmentini;

d) investitsiyalarni begonalashtirishdan, qisman yoki toʻliq tugatishdan, shu jumladan sarmoyaning oʻsishidan tushgan tushumlarni;

e) Ahdlashuvchi Tomonlardan biri davlati fuqarolarining boshqa Ahdlashuvchi Tomon davlati hududida amalga oshirilayotgan investitsiyalar munosabati bilan oladigan ish haqlarini;

j) ushbu Bitim moddalariga muvofiq toʻlanadigan kompensatsiyalar va ushbu Bitim doirasida har qanday investitsiya bahslari bilan bogʻliq toʻlovlarni.

2. Toʻlovlarni oʻtkazish kechiktirishlarsiz, investitsiyalar amalga oshirilgan valyuta yoki erkin muomaladagi valyutada toʻlovlarni oʻtkazish kunida qoʻllanilayotgan kurs boʻyicha va hududida investitsiyalar amalga oshirilgan Ahdlashuvchi Tomon davlati qonunchiligida nazarda tutilgan tartibga muvofiq amalga oshiriladi.

3. Ushbu moddaning 1- va 2-bandlar qoidalariga qaramay, Ahdlashuvchi Tomon oʻz davlatining qonunchiligi adolatli, kamsitilishsiz qoʻllanilishi shartlarida quyidagi holatlarda pul oʻtkazishni cheklashi mumkin:

a) bankrotlik, toʻlovga qodir emaslik yoki kreditorlar huquqlarini himoya qilish;

b) jinoiy yoki maʼmuriy javobgarliklar;

v) sud muhokamasi tartibiga yoki qarorlariga nomuvofiqlik yuzaga kelgan holatlarda.

4. Ushbu moddada koʻrsatilgan har qanday valyutadagi daromadlar va boshqa summalar hamda bir Ahdlashuvchi Tomon davlati investorlari boshqa Ahdlashuvchi Tomon davlati hududida investitsiyalarni amalga oshirish natijasida investitsiya qilish joyi boʻyicha manbalardan olinganlar keyingi Ahdlashuvchi Tomon davlati hududida uning qonunchiligiga muvofiq reinvestitsiya qilinishi yoki boshqa maqsadlarda foydalanilishi mumkin.

5. Ahdlashuvchi Tomonlar davlatlari valyutalarini va boshqa davlatlar valyutalarini, toʻlov hujjatlarini, qimmatli qogʻozlarini olib kelish va olib chiqib ketish, shuningdek ushbu moddaning bajarilishi investitsiyalar amalga oshirilayotgan joy boʻyicha Ahdlashuvchi Tomon davlatining qonunchiligiga muvofiq tartibga solinadi.

1. Ahdlashuvchi Tomonlar boshqa Ahdlashuvchi Tomon davlati investorlariga tegishli investitsiyalarga nisbatan tortib olish, natsionalizatsiya qilish yoki shunday tusga yoki teng oqibatda ega boʻlgan boshqa harakatlarni bevosita yoki bilvosita koʻllamaydilar, agar ular:

a) qonuniy tartibda amalga oshirilayotgan ijtimoiy manfaatlarda qoʻllanilayotgan chora-tadbirlar;

b) kamsitmaslik tusidagi chora-tadbirlar bilan bogʻliq boʻlmasa.

2. Ushbu modda 1-band a), b) kichik bandlarida nazarda tutilgan holatlarga muvofiq investitsiyalarni tortib olishni amalga oshirgan Ahdlashuvchi Tomon boshqa Ahdlashuvchi Tomon davlati investorlariga odil va samarali qoplash berilishini taʼminlaydi. Bunday qoplash tortib olingan investitsiyalarning tortib olinishigacha yoki tortib olish toʻgʻrisidagi qaror barchaga maʼlum boʻlgan vaqtga qadar (qaysi biri oldin sodir boʻlishiga koʻra) boʻlgan bozor qiymatiga muvofiq keladi, tortib olish kunidan boshlab Libor + 0 olti oylik depozit stavkasi boʻyicha tortib olingan investitsiyalar qiymatidan foizlarni qamrab oladi va ular erkin oʻtkazilishi lozim boʻladi. Qoplash summalari investitsiyalar amalga oshirilgan yoki erkin muomaladagi valyutada belgilanishi va investorga kechiktirishlarsiz, uning qayerdaligi yoki qayerda yashayotganligidan qatʼi nazar, toʻlanishi kerak. Toʻlovni oʻtkazishga aloqador normal talab etiladigan vaqt mobaynida amalga oshirilgan toʻlov «ortiqcha kechiktirilmagan» toʻlov hisoblanadi. Bu davrni hisoblash talabnoma berilgan kundan boshlanadi va u uch oydan oshib ketmasligi kerak.

3. Investitsiyalari boshqa Ahdlashuvchi Tomon davlati hududida sodir boʻlgan urush yoki boshqa qurolli toʻqnashuv, revolyutsiya, favqulodda holat, toʻntarish, fuqarolar tartibsizliklari yoki shunga oʻxshash hodisalar tufayli zarar koʻrgan bir Ahdlashuvchi Tomon davlati investorlariga koʻrilgan zarar uchun oʻz investorlariga yoki har qanday uchinchi davlat investorlariga beriladigandan kam boʻlmagan shartlarda kompensatsiya, restitutsiya yoki boshqa qiymat toʻlovlari beriladi.

4. Bir Ahdlashuvchi Tomon davlati investorlari boshqa Ahdlashuvchi Tomon davlati hududida shu Ahdlashuvchi Tomon davlati organlari, mansabdor shaxslarining investitsiya qilish joyi boʻyicha davlat qonunchiligiga zid boʻlgan xatti-harakatlari natijasida, shuningdek bunday organlar yoki mansabdor shaxslar tomonidan birinchi Ahdlashuvchi Tomon davlati investorlariga yoki shu investitsiyali korxonalariga nisbatan qonunchilikda nazarda tutilgan majburiyatlarni tegishlicha bajarmaganliklari yoki bu investitsiyalarga toʻsqinlik qilganliklari oqibatida oʻz investitsiyalariga etkazilgan zararni, boy berilgan foydani ham qoplatish huquqiga egadirlar.

1. Bir Ahdlashuvchi Tomon yoki vakil qilingan muassasalar oʻz investorlariga boshqa Ahdlashuvchi Tomon davlati hududida amalga oshirgan investitsiyalariga nisbatan notijorat tavakkalchiliklariga qandaydir moliyaviy kafolatlar bergan va shu kafolatlar boʻyicha toʻlovlarni amalga oshirgan boʻlsalar boshqa Ahdlashuvchi Tomon subrogatsiya prinsipi asosida bu investorlar huquqlarini, shu jumladan, talab qilish huquqlarini toʻliq hajmda, birinchi Ahdlashuvchi Tomonga yoki uning vakil qilingan muassasalariga bu investorlarning shu yoʻsinda sugʻurta qilingan investitsiyalariga aloqador majburiyatlari munosabatidagi shartlar bilan oʻtishini tan oladi.

2. Ushbu modda 1-bandida belgilangan subrogatsiya sodir boʻlganda investor talabnomalar bilan chiqmaydi, agar u bunga Ahdlashuvchi Tomon yoki uning vakil qilingan muassasasi tomonidan vakil qilinmagan boʻlsa.

3. Boshqa Ahdlashuvchi Tomon davlati investori bilan bahsda tomon hisoblanuvchi Ahdlashuvchi Tomon bahsni hal qilish yoki u boʻyicha qarorning butun bajarilish jarayonida himoya vositasi sifatida oʻz immunitetini yoki investor tomonidan keyingi Ahdlashuvchi Tomon yoki uning vakil qilingan muassasalari kafolatlari berilishini nazarda tutmaydigan koʻrilgan zararlar yoki yoʻqotishlar toʻliq hajmini yoki bir qismini qoplaydigan sugʻurta kontrakti boʻyicha tegishli boʻlgan qoplash summasi olinishini bahona qilmasligi kerak.

Har bir Ahdlashuvchi Tomon boshqa Ahdlashuvchi Tomonga ushbu Bitimni talqin qilish yoki qoʻllashga aloqador masalalar boʻyicha maslahatlashuvlar oʻtkazishni taklif qilishi mumkin. Boshqa Ahdlashuvchi Tomon bunday taklifni xayrixohlik bilan qabul qiladi va bunday maslahatlashuvlar uchun tegishli imkoniyatlarni yaratadi.

1. Ahdlashuvchi Tomonlar oʻrtasidagi ushbu Bitimni talqin qilish yoki qoʻllashga daxldor bahslar diplomatik kanallar orqali muzokaralar va maslahatlashuvlar yoʻli bilan hal etiladi.

2. Agar Ahdlashuvchi Tomonlar bahs paydo boʻlgan kundan boshlab olti oy mobaynida kelishuvga erisha olmasalar, bahs istalgan Ahdlashuvchi Tomon talabiga koʻra uch aʼzodan tarkib topgan arbitraj Sudiga koʻrib chiqish uchun beriladi. Ahdlashuvchi Tomonlardan har biri bittadan arbitr tayinlaydi, tayinlangan arbitrlar esa ikkala Ahdlashuvchi Tomonlar davlatlari bilan diplomatik munosabatlar oʻrnatgan uchinchi davlat fuqarosi boʻlgan Raisni saylaydilar.

3. Agar Ahdlashuvchi Tomonlardan biri oʻz arbitrini tayinlamasa va ikkinchi Ahdlashuvchi Tomonning bunday tayinlashni ikki oy mobaynida amalga oshirish toʻgʻrisidagi taklifiga rozilik bildirmasa, keyingi Ahdlashuvchi Tomon tegishli tayinlashlarni amalga oshirish uchun BMT Xalqaro Sudi Prezidentiga murojaat qilishi mumkin.

4. Agar ikkala arbitr ham tayinlanganlaridan soʻng ikki oy mobaynida Raisni tanlashda kelishuvga erisha olmasalar, istalgan Ahdlashuvchi Tomon BMT Xalqaro Sudi Prezidentiga Raisni kerakli tayinlashni oʻtkazish haqida murojaat qilishi mumkin.

5. Agar ushbu moddaning 3-, 4-bandlarida koʻrsatilgan hollarda BMT Xalqaro Sudi Prezidenti koʻrsatilgan vazifani bajara olmasa yoki u Ahdlashuvchi Tomonlar davlatlaridan birining fuqarosi boʻlsa, bunday tayinlashni Prezidentning oʻrinbosari amalga oshiradi, agar u ham tegishli vazifani bajara olmasa yoki Ahdlashuvchi Tomonlar davlatlaridan birining fuqarosi boʻlsa, tayinlashni BMT Xalqaro Sudining Ahdlashuvchi Tomonlardan birortasining fuqarosi boʻlmagan yuqoriligi jihatdan navbatdagi lavozimdagi aʼzosi amalga oshiradi.

6. Sud qaror chiqarishdan oldin, oʻz ishining istalgan bosqichida Ahdlashuvchi Tomonlarga bahsni doʻstona yoʻl bilan hal etishni taklif qilishi mumkin. Agar Ahdlashuvchi Tomonlar ana shunday qarorga kelsalar, oldingi qoidalar bahsni hal qilish yoʻliga toʻsiq boʻlmaydi.

7. Ahdlashuvchi Tomonlar oʻrtasidagi boshqa kelishuvlarni buzmay, Sud koʻrib chiqish oʻz tartiblarini belgilaydi. Sud qarorni koʻpchilik ovoz bilan qabul qiladi.

8. Ahdlashuvchi Tomonlardan har biri Suddagi oʻz aʼzosi uchun, shuningdek arbitraj protsedurasidagi oʻz ulushlariga muvofiq xarajatlarni oʻzi qoplaydi. Arbitraj Sudi Raisiga oid xarajatlar va boshqa xarajatlarni Ahdlashuvchi Tomonlar teng ulushda qoplaydilar.

Ammo sud oʻz qarorida Ahdlashuvchi Tomonlardan biriga xarajatlarda koʻproq ishtirok etishini belgilashi mumkin va bu qaror Ahdlashuvchi Tomonlarning har biri uchun bajarilishi majburiy hisoblanadi.

9. Sud qarori har bir Ahdlashuvchi Tomon uchun uzil-kesil va majburiy hisoblanadi.

Har bir Ahdlashuvchi Tomon ushbu orqali bir Ahdlashuvchi Tomon va boshqa Ahdlashuvchi Tomon davlati investori oʻrtasida oʻzi birinchi Ahdlashuvchi Tomon davlati hududida amalga oshirayotgan investitsiyalari boʻyicha yuzaga keladigan har qanday qonuniy bahsni koʻrib chiqish uchun quyidagilarga tavsiya etishga rozilik beradi:

a) BMT Xalqaro Sudiga;

b) BMTning xalqaro savdo huquqi boʻyicha komissiyasining Arbitraj (YuNSITRAL) qoidalariga muvofiq taʼsis etiladigan ad hos arbitraj sudiga;

v) agar ikkala Ahdlashuvchi Tomonlar ham Vashingtonda 1965-yil 18-martda imzolash uchun ochilgan Davlatlar va boshqa davlatlar fuqarolari oʻrtasidagi investitsiya bahslarini hal etish boʻyicha Konvensiya qatnashchilari hisoblanishsa Investitsiya bahslarini hal etish Xalqaro markaziga.

1. Ushbu Bitimda boshqacha tartib koʻzda tutilgan boʻlmasa, ushbu Bitimga muvofiq barcha investitsiyalar bu investitsiyalar amalga oshirilgan Ahdlashuvchi Tomon davlati hududida amalda boʻlgan qonunchilik bilan boshqarib boriladi.

2. Ushbu moddaning 1-bandi qoidalariga qaramay, Ahdlashuvchi Tomonlar oʻzining qonunchiligiga muvofiq kamsitishlarsiz asosda amalga oshiriladigan ularning hayotiy manfaatlarini va milliy xavfsizligini taʼminlashga qaratilgan chora-tadbirlarni koʻrishlari mumkin.

Investitsiyalarning ushbu Bitim kuchga kirishidan oldin yoki keyin amalga oshirilganidan qatʼi nazar, ushbu Bitim bir Ahdlashuvchi Tomon hududida uning qonunchiligiga muvofiq boshqa Ahdlashuvchi Tomon investorlari tomonidan amalga oshirilgan investitsiyalarga nisbatan qoʻllaniladi.

Ushbu Bitimga Ahdlashuvchi Tomonlarning yozma holdagi roziligi bilan oʻzgartirishlar va qoʻshimchalar kiritilishi mumkin.

1. Ahdlashuvchi Tomonlar ushbu Bitimni kuchga kiritish borasida har bir Ahdlashuvchi Tomon davlati milliy qonunchiligida nazarda tutilgan huquqiy tartib-qoidalar bajarilganligi toʻgʻrisidagi notalar bilan oʻzaro almashadilar.

Soʻnggi nota olingan sana Bitimning kuchga kirish sanasi hisoblanadi.

2. Ushbu Bitim oʻn yil mobaynida amalda boʻladi. Ushbu Bitimning amalda boʻlishi, agar Ahdlashuvchi Tomonlardan hech biri boshqa Ahdlashuvchi Tomonga tegishli muddat tugashidan oʻn ikki oy oldin ushbu Bitimning amalda boʻlishini toʻxtatish toʻgʻrisidagi maqsadini yozma holda xabar qilmasa, navbatdagi besh yillik davrlarga oʻz-oʻzidan uzayaveradi.

3. Ushbu Bitim bekor qilingan taqdirda uning qoidalari, 1 — 12-moddalari ushbu Bitimning amalda boʻlishi toʻxtatilgunga qadar amalga oshirilgan investitsiyalarga nisbatan keyingi oʻn yillik davr mobaynida oʻz kuchini saqlab qoladi.

Almati shahrida 1997-yil 2-iyunda ikki nusxada, har biri oʻzbek, qozoq va rus tillarida tuzildi, bunda barcha matnlar bir xil kuchga egadir.

Ushbu Bitimni talqin qilish maqsadida rus tilidagi matndan foydalaniladi.