Oʻzbekiston Respublikasi va Ukraina, bundan keyin — Ahdlashuvchi Tomonlar deb ataluvchilar,

ikkala davlat, ularning yuridik shaxslari va fuqarolari huquq hamda manfaatlarini samaraliroq himoya qilish, Ahdlashuvchi Tomonlar oʻrtasida doʻstlik va hamkorlikni mustahkamlash maqsadida oʻzlarining konsullik munosabatlarini rivojlantirish istagiga amal qilib,

1963-yil 24-apreldagi Konsullik aloqalari toʻgʻrisidagi Vena konvensiyasi qoidalarini rivojlantirish uchun,

ushbu Konvensiyada koʻrsatilmagan masalalar boʻyicha xalqaro odat huquqlari va Ahdlashuvchi Tomonlar qatnashgan xalqaro shartnomalar qoʻllanilishini tasdiqlab,

ushbu Konvensiyani tuzishga qaror qildilar va quyidagilar toʻgʻrisida ahdlashib oldilar:

Ushbu Konvensiyada keltirilgan atamalar quyidagi maʼnoga ega:

1) “konsullik muassasasi” har qanday bosh konsulxona, konsulxona, vitse-konsulxona yoki konsullik agentligini anglatadi;

2) “konsullik okrugi” konsullik muassasasiga konsullik vazifalarni bajarish uchun ajratilgan nohiyani anglatadi;

3) “konsullik muassasasi boshligʻi” shu sifatda harakat qilish topshirilgan shaxsni anglatadi;

4) “konsullik mansabdor shaxsi” shu sifatda konsullik vazifalarini bajarish yuklatilgan har qanday shaxsni, jumladan konsullik muassasasi boshligʻini ham anglatadi;

5) “konsullik xizmatchisi” konsullik muassasasida maʼmuriy yoki texnik vazifalarni bajaruvchi har qanday shaxsni anglatadi;

6) “xizmat koʻrsatuvchi xodim” konsullik muassasasiga xizmat koʻrsatish boʻyicha vazifalarni bajaruvchi har qanday shaxsni anglatadi;

7) “konsullik muassasasi xodimlari” konsullik muassasasi mansabdor shaxslari, konsulxona xizmatchilari va konsullik muassasasining xizmat koʻrsatuvchi xodimlarini anglatadi;

8) “oila aʼzolari” konsullik xodimining xotini (eri), farzandlari, ota-onasi hamda u bilan birga yashayotgan va uning qaromogʻida boʻlgan boshqa shaxslarni anglatadi;

9) “fuqaro” vakolat bergan davlat yoki konsulxona joylashgan davlat qonunchiligiga muvofiq shu davlatlar fuqarosi boʻlgan har qanday jismoniy shaxsni anglatadi;

10) “konsullik binolari” kimning mulki boʻlishidan qatʼi nazar, faqatgina konsullik muassasasi uchun foydalaniladigan binolar yoki ularning qismlarini, yoki ushbu bino yoxud bino qismlariga xizmat qiluvchi yer maydonlarini anglatadi;

11) “konsullik arxivlari” oʻz ichiga saqlash va saqlanishi taʼminlanishi uchun moʻljallangan barcha qogʻozlar, hujjatlar, xat-xabarlar, kitoblar, filmlar, maʼlumot toʻplash, saqlash va foydalanish texnik vositalari, shifrlar, kodlar, kartotekalar va har qanday jihozlar bilan birga konsullik muassasasi reyestrlarini oʻz ichiga oladi;

12) “kema” vakolat bergan davlat bayrogʻini koʻtarish huquqiga ega boʻlgan har qanday kemani anglatadi;

13) “havo kemasi” vakolat bergan davlat belgisini ishlatish huquqiga ega boʻlgan har qanday fuqarolik havo kemasini anglatadi.

1. Konsullik muassasasi konsulxona joylashgan davlat hududida faqat shu davlatning roziligi bilan ochilishi mumkin.

2. Konsullik muassasasining manzilgohi, uning darajasi va konsullik okrugi, shuningdek bu masaladagi har qanday oʻzgarish vakolat bergan davlat va konsulxona joylashgan davlatning kelishuvi asosida belgilanadi.

1. Konsullik muassasasi boshligʻini tayinlashda vakolat bergan davlat oldindan konsulxona joylashadigan davlatning roziligini olishi kerak. Agar konsulxona joylashadigan davlat rozilik bermasa, u oʻz qarorining sabablarini xabar qilishga majbur emas.

2. Vakolat bergan davlat konsulxona joylashgan davlat Tashqi ishlar vazirligiga konsullik patenti yoki konsullik muassasasi boshligʻini tayinlash haqida xabar beradi.

3. Konsullik patenti taqdim etilishi bilan konsulxona joylashgan davlat imkoni boricha qisqa vaqt ichida konsullik muassasasi boshligʻiga ekzekvatura beradi.

4. Konsullik muassasasi boshligʻi konsullik joylashgan davlatning ekzekvaturasini olishi bilan oʻz vazifalarini bajarishga kirishishi mumkin.

5. Konsullik joylashgan davlat ekzekvatura bergunga qadar konsullik muassasasi boshligʻiga oʻz vazifalarini vaqtincha bajarishiga ruxsat berishi mumkin.

6. Konsullik muassasasi boshligʻiga ekzekvatura yoki vaqtincha oʻz vazifalarini bajarish uchun ruxsatnoma berilgach, konsullik joylashgan davlat bu haqda konsullik okrugining maʼmurlariga xabar beradi va konsullik muassasasi boshligʻiga oʻz vazifasini bajarishi va ushbu Konvensiyada koʻrsatilgan huquq, imtiyoz va immunitetlardan foydalanish imkoniyatini yaratish uchun barcha zarur choralarni koʻradi.

1. Agar konsullik muassasasi boshligʻi oʻz vazifasini bajara olmasa yoki konsullik muassasasi boshligʻi lavozimi vakant boʻlsa, konsullik muassasasi boshligʻining vazifasi vaqtincha konsullik boshligʻi vazifasini bajaruvchi tomonidan bajarilishi mumkin.

2. Konsullik muassasasi boshligʻi vazifasini bajaruvchining toʻla ismi va familiyasi, konsullik muassasasi boshligʻi tomonidan, agar u buni qila olmasa, vakolat beruvchi davlatning har qanday vakolatli idorasi tomonidan konsulxona joylashgan davlat Tashqi ishlar vazirligiga oldindan xabar qilinadi.

3. Konsulxona joylashgan davlatning vakolatli organlari konsullik muassasasi boshligʻi vazifasini bajaruvchiga yordam koʻrsatadilar va himoya qiladilar. Konsullik muassasasi boshligʻi vazifasini bajarish davrida unga ushbu Konvensiyada koʻrsatilgan konsullik boshligʻiga tegishli qoidalar ham tegishlidir.

1. Vakolat bergan davlat oʻzining vakolatli organlari orqali konsullik joylashgan davlat Tashqi ishlar vazirligini quyidagilar haqida yozma ravishda oldindan xabardor qiladi:

a) konsullik muassasasi xodimlarining familiyasi, ismi, fuqaroligi, lavozimi, ularning kelish va ketish yoki vazifalarining tugatilish vaqti, shuningdek konsullik muassasasida ishlash mobaynida uning maqomidagi har qanday oʻzgarishlar haqida;

b) har bir konsullik muassasasi xodimi oila aʼzolarining familiyasi, ismi, fuqaroligi, kelish hamda ketish kuni, shuningdek biron bir shaxs oila aʼzoligiga kirgani yoki chiqqani haqida.

2. Konsullik joylashgan davlat vakolatli maʼmurlari shu davlat qonunlariga muvofiq konsullik muassasasi xodimlariga va ularning oila aʼzolariga ularning maqomini konsullik muassasasi xodimlari va ularning oila aʼzolari sifatida belgilovchi guvohnomani bepul asosda beradilar, konsullik joylashgan davlat fuqarosi boʻlgan yoki u yerda doimiy yashaydigan shaxslar bundan mustasno.

Konsullik mansabdor shaxslari vakolat bergan davlat fuqarolari boʻlishi kerak.

Konsullik muassasasi joylashgan davlat istagan vaqtda u yoki bu konsullik mansabdor shaxsini “persona non grata” yoki konsullik muassasasi xodimlarining birortasini nomaqbul deb vakolat bergan davlatni xabardor qilishi mumkin. Konsullik muassasasi joylashgan davlat oʻz qarorining sababini asoslashga majbur emas. Bunday holda vakolat bergan davlat konsullik muassasasi xodimini chaqirib olishi kerak. Agar vakolat bergan davlat bu majburiyatni oqilona vaqt ichida bajarmasa, konsullik joylashgan davlat bu shaxsni konsullik muassasasi xodimi deb tan olishdan voz kechishi mumkin.

Konsullik mansabdor shaxsi quyidagi huquqqa ega:

1. Vakolat bergan davlat, uning fuqarolari va huquqiy shaxslarining huquq va manfaatlarini himoya qilish, ularga yordam va koʻmak berish.

2. Savdo, iqtisodiy, huquqiy, turistik, ekologik, ilmiy-texnik, axborot, madaniy, gumanitar aloqalarni hamda vakolat bergan va konsulxona joylashgan davlat oʻrtasidagi sport va maʼrifat sohalaridagi aloqalarni rivojlantirish, shuningdek boshqa tarzda ular oʻrtasidagi doʻstona munosabatlarga koʻmaklashish.

3. Savdo, iqtisod, madaniyat, ilmiy hayotdagi vaziyatlar va voqealarni barcha qonuniy yoʻllar bilan aniqlash, ular haqida vakolat bergan davlat hukumatiga xabar qilish.

4. Vakolat bergan davlat tomonidan konsullik muassasasiga yuklatilgan konsulxona joylashgan davlatning qonun va qoidalariga zid boʻlmagan boshqa vazifalarni bajarish.

1. Konsullik mansabdor shaxsi quyidagi huquqqa ega:

1.1. vakolat bergan davlat fuqarolarini hisobga olish;

1.2. fuqarolik masalalari boʻyicha har qanday arizalarni qabul qilish;

1.3. konsulxona joylashgan davlat vakolatli organlaridan vakolat bergan davlat fuqarolarining tugʻilishi va oʻlimi haqida maʼlumotlar olish, ularning tugʻilishi va oʻlimini qayd qilish hamda tegishli hujjatlarni rasmiylashtirish;

1.4. vakolat bergan davlat qonunlariga muvofiq vakolat bergan davlat fuqarolari oʻrtasida nikoh tuzishni va nikohni bekor qilishni qayd qilish.

2. Ushbu moddaning 1-bandida koʻrsatilgan qoidalar manfaatdor shaxslarni konsullik muassasasi joylashgan davlatning qonun va qoidalariga rioya etish majburiyatidan ozod qilmaydi.

Konsullik mansabdor shaxsi quyidagi huquqqa ega:

1. Vakolat bergan davlat fuqarolariga pasportlar berish, yangilash, olib qoʻyish, bekor qilish, ularning amal qilish muddatini choʻzish, ularga zarur belgilar qoʻyish, shuningdek fuqarolarga chegaradan oʻtishga huquq beruvchi boshqa hujjatlarni berish.

2. Vakolat bergan davlat hududiga kirish va undan chiqish, shuningdek uning hududidan tranzit oʻtish uchun vizalar berish, ularning muddatini uzaytirish va bekor qilish.

1. Konsullik mansabdor shaxsi quyidagi notarial harakatlarni bajarish huquqiga ega:

1.1. har qanday fuqaroning arizasi asosida vakolat bergan davlatda va uning tashqarisida foydalanishi uchun akt va hujjatlarni tuzish va tasdiqlash;

1.2. vakolat bergan davlat va konsulxona joylashgan davlat vakolatli idoralari rasmiy hujjatlaridagi imzolar va muhrlarning, agar Ahdlashuvchi Tomonlar ishtirok etgan xalqaro shartnomalarda boshqacha tartibi koʻrsatilmagan boʻlsa, haqiqiyligini tasdiqlash;

1.3. rasmiy hujjatlar aslini legalizatsiya qilish va ularning nusxalarini, koʻchirmalarini, bu hujjatlar tarjimalarini haqiqiyligini tasdiqlash;

1.4. vakolat bergan davlat qonunlarida koʻzda tutilgan har qanday boshqa notarial harakatlarni bajarish.

2. Konsullik mansabdor shaxsi tomonidan tuzilgan, tasdiqlangan va zarurat yuzasidan legalizatsiya qilingan hujjatlar, agarda ular konsulxona joylashgan davlat qonunlari va normalariga zid kelmasa, konsulxona joylashgan davlat vakolatli organlari tomonidan tuzilgan, tasdiqlangan va zarurat yuzasidan legalizatsiya qilingan hujjatlar kabi yuridik kuchga ega boʻladi.

1. Konsulxona joylashgan davlatning vakolatli organlari vakolat bergan davlat fuqarosining ushlanganligi, hibsga olinganligi yoki uning ozodligini har qanday boshqa cheklash holi yuz bergani haqida tegishli konsullik mansabdor shaxsini zudlik bilan xabardor qiladi.

Shu bilan birga konsulxona joylashgan davlat vakolatli organlari kechiktirmasdan konsullik muassasasiga ushbu shaxs tomonidan berilgan har qanday maʼlumotni yetkazadi.

2. Konsulxona joylashgan davlat vakolatli organlari vakolat bergan davlat fuqarosining ushlangani, hibsga olingani yoki uning ozodligini boshqacha cheklash holi yuz bergan vaqtdan boshlab kechiktirmasdan konsullik mansabdor shaxsining bu fuqaro bilan uchrashish yoki u bilan bogʻlanish, hamda unga zarur yordamni, jumladan huquqiy yordamni koʻrsatish huquqini amalga oshirishini taʼminlaydilar.

3. Konsulxona joylashgan davlat vakolatli organlari vakolat bergan davlatning tegishli fuqarosini ushbu moddaning 1- va 2-bandlariga muvofiq uning huquqlari haqida xabardor qiladilar.

4. Ushbu moddaning 1- va 2-bandlarida koʻrsatilgan huquqlar, agar konsulxona joylashgan davlat qonun va qoidalari ularni bekor qilmagan taqdirda, ular asosida amalga oshiriladi.

1. Konsullik mansabdor shaxsi quyidagi huquqlarga ega:

1.1. konsullik okrugida joylashgan vakolat bergan davlatning istalgan fuqarosini kelib koʻrish va u bilan aloqa qilish huquqiga ega, bunda konsulxona joylashgan davlat vakolat bergan davlat fuqarolari va konsullik muassasalari oʻrtasidagi aloqalarga toʻsqinlik qilmaydi va fuqarolarning konsullik muassasasiga kelishlarini cheklamaydi;

1.2. agar bu konsulxona joylashgan davlat qonunlariga zid boʻlmasa, vakolat bergan davlat barcha fuqarolaridan vaqtincha saqlash uchun mulk, pul mablagʻlari, qimmatbaho buyumlar va hujjatlarni qabul qilish;

1.3. vakolat bergan davlat fuqarosiga daxldor boʻlgan moddiy zarar va kishilar halokati, avtotransport ushlanishi hamda baxtsiz hodisalarga olib kelgan har qanday voqealarga oid maʼlumotlarni konsulxona joylashgan davlatning vakolatli organlaridan tezlik bilan berishni soʻrash;

1.4. konsulxona joylashgan davlat vakolatli idoralariga vakolat bergan davlatning bedarak yoʻqolgan fuqarolarini topishda yordam berishni soʻrab murojaat qilish;

1.5. konsullik muassasasi oʻzi joylashgan va vakolat bergan davlatning huquqni himoya qilish idoralari tomonidan huquqiy yordam koʻrsatish masalalari 1993-yil 22-yanvarda Mustaqil Davlatlar Hamdoʻstligi davlatlari oʻrtasida tuzilgan Jinoiy, oilaviy va fuqarolik ishlari boʻyicha huquqiy munosabatlar va huquqiy yordam haqidagi Konvensiyada koʻrsatilgan tartibda hal qilinishiga koʻmaklashish.

2. Vakolat bergan davlat fuqarosi oʻz huquq va manfaatlarini konsulxona joylashgan davlat qonunlariga asosan oʻz vaqtida himoya qilishga qodir boʻlmasa, konsullik mansabdor shaxsi konsullik joylashgan davlat sud va boshqa vakolatli idoralarida uning nomidan vakillik qilishi mumkin yoki fuqaro oʻz vakilini tayinlagunicha yoxud oʻz huquq va manfaatlarini oʻzi himoya qilish imkoniyati paydo boʻlguniga qadar vakil bilan taʼminlashi mumkin.

1. Konsulxona joylashgan davlatning vakolatli idoralari kechiktirmasdan vakolat bergan davlatning belgilangan tartibda muomalaga layoqatsiz yoki muomala layoqati cheklangan deb topilgan fuqarolari, shu jumladan voyaga yetmaganlarga nisbatan vasiylik yoki homiylik oʻrnatish zarurligi haqida xabar qiladi.

2. Konsullik mansabdor shaxsi konsullik joylashgan davlat qonun va qoidalariga asosan vakolat bergan davlatning belgilangan tartibda muomalaga layoqatsiz yoki muomala layoqati cheklangan fuqarolari, shu jumladan voyaga yetmaganlar huquq va manfaatlarini himoya qilish va zarur boʻlganda bunday shaxsga vasiy va homiy tavsiya qilish yoki tayinlash va vasiylik va homiylikka tegishli harakatlarni kuzatish huquqiga ega.

Vakolat bergan davlat fuqarosi konsulxona joylashgan davlatda oʻlsa, konsulxona joylashgan davlatning vakolatli organlari bu haqda konsullik muassasasiga zudlik bilan xabar qiladilar. Ular konsullik muassasasining iltimosiga binoan unga oʻlganlik haqida guvohnoma yoki oʻlganlik haqida boshqa hujjatlarni topshiradilar.

1. Konsulxona joylashgan davlatning vakolatli organlari konsullik muassasasiga uning okrugi hududida vakolat bergan davlat fuqarosining oʻlganligi haqida imkon darajasida qisqa vaqt ichida xabar qiladilar, shuningdek meros mulki, vasiyatnoma borligi yoki konsulxona joylashgan davlatda yashovchi yoki vakil qilingan shaxs ushbu mulkni boshqaruvchi etib tayinlangani haqida maʼlum qiladi.

2. Konsullik mansabdor shaxsi ushbu moddaning 1-bandida koʻrsatilgan meros bor boʻlgan holda konsullik joylashgan davlat vakolatli organlari tomonidan uni roʻyxatga olishda qatnashish huquqiga ega va meros mulkini qoʻriqlash boʻyicha tegishli choralar koʻradi.

3. Vakolat bergan davlat fuqarosi konsulxona joylashgan davlatda oʻlgan shaxsning, uning fuqaroligidan qatʼi nazar, merosini olish huquqiga ega boʻlsa, bu davlatning vakolatli organlari konsullik muassasasini bu haqida darhol xabardor qiladilar.

4. Vakolat bergan davlat fuqarosi konsulxona joylashgan davlatda meros olish huquqiga ega yoki meros olishga daʼvogar boʻlsa, biroq u yoki uning vakili meros haqidagi ish koʻrilishida qatnasha olmasa, konsullik mansabdor shaxsi oʻzi yoki vakili orqali konsulxona joylashgan davlat sud yoki boshqa idoralarida ushbu fuqaro nomidan vakillik qilishi mumkin.

5. Konsullik mansabdor shaxsi vakolat bergan davlatning konsulxona joylashgan davlatda doimiy yashamaydigan fuqarosi nomidan konsulxona joylashgan davlatdagi unga tegishli har qanday turdagi merosni ushbu shaxsga berish uchun olish huquqiga ega.

6. Agar vakolat bergan davlatning konsulxona joylashgan davlatda doimiy yashamaydigan fuqarosi oʻlsa, konsullik mansabdor shaxs oʻlgan shaxsning shaxsiy narsalarini, hujjatlarini, pul mablagʻlarini merosxoʻrlariga, boshqaruvchisi yoki boshqa vakil shaxslarga berish uchun vaqtincha saqlash uchun olish huquqiga ega.

7. Vakolat bergan davlat fuqarosi konsulxona joylashgan davlat hududida boʻlmasa, konsullik mansabdor shaxsi ushbu shaxs nomidan har qanday shaxsning oʻlimi bilan bogʻliq holda huquqi boʻlgan pullarni va boshqa mulklarni, shu jumladan meros mulkini, baxtsiz hodisa bilan bogʻliq kompensatsiya toʻlovlari haqidagi qonunlarga muvofiq qilingan toʻlovlarni, shuningdek hayotni sugʻurta qilish bilan bogʻliq boʻlgan sugʻurta hujjatlari boʻyicha toʻlovlarni suddan, maʼmurlardan yoki ayrim shaxslardan olishi mumkin.

8. Konsullik mansabdor shaxsi ushbu moddaning 4-, 5-, 6-, 7-bandlarida koʻrsatilgan vazifalarni bajarish vaqtida konsulxona joylashgan davlatning qonun va qoidalariga rioya qilishi kerak.

1. Konsullik mansabdor shaxsi oʻz konsullik okrugi doirasida vakolat bergan davlatning konsulxona joylashgan davlat hududiy dengiz yoki ichki suvlaridagi kemalariga, ularning kapitani va ekipaj aʼzolariga yordam berish huquqiga ega, shuningdek:

1.1. kema bortiga chiqish, kapitan va xohlagan ekipaj aʼzosini soʻroq qilish, kema faoliyati, suzish jarayoni va uning yuki haqida maʼlumot olish;

1.2. konsulxona joylashgan davlat maʼmurlari huquqlariga zid boʻlmagan holda suzish paytida sodir boʻlgan baxtsiz hodisalarni tekshirish;

1.3. kapitan va ekipaj aʼzolari oʻrtasidagi nizolarni, shu jumladan yollash toʻgʻrisidagi shartnomada koʻrsatilgan ish haqi va majburiyatlar bilan bogʻliq nizolarni bartaraf etish hamda kema bortidagi xavfsizlikni taʼminlashga doir choralarni koʻrish;

1.4. kema kapitani va istalgan ekipaj aʼzosiga tibbiy yordam koʻrsatish yoki oʻz vataniga qaytarishni taʼminlash choralarini koʻrish;

1.5. kemaga taalluqli hujjatlarni qabul qilish, koʻrib chiqish, tuzish, imzolash yoki tasdiqlash;

1.6. vakolat bergan davlat topshirigʻi asosida kemaga taalluqli boshqa muammolarni hal etish huquqiga ega.

2. Konsulxona joylashgan davlatning qonun va qoidalarini buzmagan holda kapitan va ekipaj aʼzolari bevosita konsullik mansabdor shaxsi bilan bogʻlanish huquqiga egadirlar.

1. Konsullik joylashgan davlat sudlari yoki boshqa vakolatli organlari vakolat bergan davlat kemasida biror bir majburiy choralar qoʻllamoqchi boʻlsalar yoki qandaydir tekshiruv oʻtkazishni topshirmoqchi boʻlsalar, ular konsullik muassasasini konsullik mansabdor shaxsi yoki uning ishonchli vakili bu harakatlarni amalga oshirish davomida ishtirok etishi uchun oldindan ogohlantiradilar. Agar shoshilinch boʻlgani tufayli ogohlantirishning imkoni boʻlmasa, konsullik muassasasi konsulxona joylashgan davlat vakolatli organlari tomonidan amalga oshirilgan harakatlar toʻgʻrisida, konsullik mansabdor shaxsining iltimosiga koʻra esa — amalga oshirilgan harakatlarning natijalari toʻgʻrisida zudlik bilan xabardor qilinishi zarur.

2. Ushbu moddaning 1-bandi qoidalari konsulxona joylashgan davlat vakolatli organlari tomonidan quruqlikda kema kapitani yoki biron bir ekipaj aʼzosiga nisbatan amalga oshirilgan harakatlarga ham taalluqli.

3. Ushbu moddaning 1- va 2-bandlari qoidalari konsulxona joylashgan davlat vakolatli organlari tomonidan bojxona, port maʼmuriyati, karantin, chegara nazorati masalalarida amalga oshiriladigan kundalik tekshiruvlarga hamda dengizda qatnov xavfsizligini taʼminlash yoki suvlarni ifloslantirishni oldini olishga qaratilgan choralarga taalluqli emas.

4. Agarda konsulxona joylashgan davlat tinchligi, xavfsizligi va jamoat tartibi buzilmasa, konsulxona joylashgan davlat vakolatli organlari vakolat bergan davlat kemasi ichki ishlariga, aralashishi mumkin emas. Kema kapitanining shaxsiy iltimosi yoki roziligi yoxud vakolat bergan davlat konsullik mansabdor shaxsi roziligi bilan amalga oshiriladigan harakatlar bundan mustasno.

1. Agar vakolat bergan davlat bayrogʻi ostida suzuvchi kema halokatga yoki avariyaga uchrasa, sayoz joyga tushib qolsa yoki qandaydir boshqa sabablarga koʻra mustaqil harakatni davom ettira olmasa, konsullik joylashgan davlat vakolatli organlari konsullik muassasasini kema bortidagi odamlar, yuk va boshqa mollarni qutqarish borasida koʻrilgan choralar haqida zudlik bilan xabardor qiladilar.

2. Konsullik joylashgan davlat vakolatli organlari konsullik muassasasi mansabdor shaxsiga halokatga yoki avariyaga uchragan, sayoz joyga tushib qolgan yoki qandaydir boshqa sabablarga koʻra mustaqil suzishni davom ettira olmaydigan kemaga, uning ekipajiga va passajirlariga yordam berishiga toʻsqinlik qilmaydi va shu maqsadda konsullik mansabdor shaxsi konsulxona joylashgan davlat maʼmurlariga yordam soʻrab murojaat qilishi mumkin.

3. Konsulxona joylashgan davlat vakolatli organlari agar vakolat bergan davlat kemasi halokatga yoki avariyaga uchrasa, sayoz joyga tushib qolsa yoki qandaydir boshqa sabablarga koʻra mustaqil suzishni davom ettira olmasa yoxud kemaga taalluqli biror bir predmet yoki yuk qirgʻoqdan topilsa yoki konsulxona joylashgan davlat portiga keltirilsa-yu, bunda kema kapitani, kema egasi, kema agenti yoki sugʻurta kompaniyasining vakili ishtirok eta olmasa yoki bularni saqlash yoki tasarruf qilish choralarini koʻra olmasa, konsullik muassasasini zudlik bilan ogohlantiradilar. Bunday sharoitda konsullik mansabdor shaxsi ular nomidan zarur choralar koʻrishi mumkin.

4. Halokatga yoki avariyaga uchragan, sayoz joyga tushib qolgan yoki qandaydir boshqa sabablarga koʻra mustaqil suzishni davom ettira olmaydigan vakolat bergan davlat kemasining yuki va mulki uchun hech qanday boj toʻlovlari olinmaydi, konsulxona joylashgan davlatda ularning sotilgan yoki foydalanilgan hollari bundan mustasno.

5. Konsullik mansabdor shaxsi konsulxona joylashgan davlat vakolatli idoralari tomonidan kemaning avariyaga uchraganligi, sayoz joyga tushib qolganligi yoki uning mustaqil harakatni davom ettira olmasligi sabablari aniqlanayotgan paytda qatnashish huquqiga ega.

Vakolat bergan davlatning kemalariga taalluqli boʻlgan ushbu Konvensiya qoidalari, agar ular vakolat bergan davlat va konsulxona joylashgan davlat oʻrtasidagi boshqa ikki tomonlama shartnomalarda yoki bu ikkala davlat ishtirokchilari boʻlgan koʻp tomonlama shartnomalarning qoidalariga zid kelmasa, vakolat bergan davlatning havo kemalariga nisbatan ham qoʻllaniladi.

Konsullik mansabdor shaxsi, agarda bu konsullik joylashgan davlat qonun va qoidalarida ruxsat etilgan boʻlsa, sud hujjatlarini va sudga taalluqli boʻlmagan hujjatlarni topshirish huquqiga ega. Agar vakolat bergan davlat bilan konsulxona joylashgan davlat oʻrtasida boshqa shartnomalar amal qilsa, ularning qoidalarini qoʻllash kerak.

Konsullik mansabdor shaxsi konsullik vazifalarini konsullik okrugi doirasida bajarishi mumkin. Konsulxona joylashgan davlatning roziligi bilan konsullik mansabdor shaxsi oʻz vazifalarini konsullik okrugi hududidan tashqarida ham bajarishi mumkin.

Konsullik mansabdor shaxs oʻz konsullik okrugi mahalliy maʼmurlariga, diplomatik vakolatxona boʻlmagan holda esa, konsulxona joylashgan davlat qonun-qoidalari va urf-odatlari ruxsat etadigan darajada markaziy vakolatli maʼmurlariga murojaat qilishi mumkin.

Konsulxona joylashgan davlat konsullik muassasasiga konsulxona joylashgan davlat qonunchiligiga kiritilgan vakolat bergan davlat fuqarolari huquqi va manfaatiga aloqasi boʻlishi mumkin boʻlgan oʻzgarishlar haqida xabar qiladi.

1. Konsulxona joylashgan davlat konsullik muassasasiga oʻz vazifalarini bajarishi uchun barcha imkoniyatlarni namoyish etadi.

2. Konsulxona joylashgan davlat konsullik muassasasi xodimlariga tegishlicha eʼtibor bilan qaraydi va ushbu Konvensiyaga asosan konsullik vazifalarini bajarishini taʼminlash uchun zarur choralarni koʻradi.

1. Konsulxona joylashgan davlat vakolat bergan davlatga oʻzining hududida oʻz qonun va qoidalariga muvofiq konsullik muassasasi uchun zarur boʻlgan binolar sotib olishda koʻmaklashadi yoki boshqacha yoʻl bilan binolarni olishiga yordam beradi.

2. Konsulxona joylashgan davlat zarurat boʻlsa, konsullik muassasasiga uning xodimlari uchun qulay turar joy olishiga koʻmaklashadi.

3. Ushbu moddadagi hech narsa konsulxona joylashgan davlatning binolarni konstruksiyasi va joylanishini, shuningdek shaharni rejalashtirish va nohiyalarga boʻlishni tartibga soluvchi qonun va qoidalariga rioya etmagani uchun vakolat bergan davlatni javobgarlikdan ozod etadi deb sharhlanmasligi kerak.

1. Konsullik muassasasi konsullik muassasasi binosiga davlat gerbi hamda vakolat bergan davlat va konsulxona joylashgan davlat tillarida konsullik muassasasi nomi yozilgan yozuvni oʻrnatib qoʻyish huquqiga ega.

2. Konsullik muassasasi konsullik binolariga, konsullik muassasasi boshligʻi qarorgohiga va rasmiy vazifalarni bajarayotganda transport vositalariga davlat bayrogʻini oʻrnatish huquqiga ega.

1. Konsullik binolari va konsullik mansabdor shaxslarining turar joylari daxlsizdir. Konsulxona joylashgan davlat maʼmurlari organlarining vakillari konsullik binolariga va konsullik mansabdor shaxslarning turar joylariga konsullik muassasasi boshligʻi yoki konsulxona joylashgan davlatdagi diplomatik vakolatxona boshligʻining yoxud ular tomonidan tayinlangan shaxsning ruxsatisiz kira olmaydi.

2. Konsulxona joylashgan davlat konsullik binolari va konsullik mansabdor shaxslarining turar joylarini har qanday tajovuz yoki zarar yetkazishdan muhofaza qilish hamda konsullik muassasasi tinchligini har qanday buzish yoki uning qadr-qimmatini haqorat qilishning oldini olish boʻyicha barcha zarur choralarni koʻradi.

Konsullik binosi, konsullik muassasasining barcha mulklari, shuningdek uning harakat vositalari davlat mudofaasi yoki jamoat ehtiyojlari maqsadida majburiy olib qoʻyishning har qanday turiga qarshi immunitetga egadir. Binolarni koʻrsatilgan maqsadlar uchun olib qoʻyish zarurati tugʻilgan holda konsullik vazifalarni bajarish uchun toʻsiqlarni yoʻqotish boʻyicha barcha zarur choralar qoʻllaniladi hamda vakolat bergan davlatga zudlik bilan tegishli va samarali kompensatsiya toʻlanadi.

Konsullik arxivlari ularning joylashgan joyidan qatʼi nazar, hamma vaqt daxlsizdir.

Kirishi taqiqlangan hududlar haqidagi qonun va qoidalarga zid boʻlmagani uchun yoki davlat xavfsizligi nuqtai nazaridan tartibga solingani uchun konsulxona joylashgan davlat barcha konsullik muassasasi xodimlariga uning hududida harakat qilish yoki sayohat erkinligini taʼminlashi zarur. Bunda barcha hollarda konsulxona joylashgan davlat konsullik mansabdor shaxsining oʻz xizmat vazifalarini bajarishi uchun imkoniyat yaratadi.

1. Konsulxona joylashgan davlat konsullik muassasasining barcha rasmiy maqsadlar uchun aloqalar erkinligiga ruxsat etadi va himoya qiladi. Konsullik muassasasi vakolat bergan davlat hukumati, diplomatik vakolatxonalari va boshqa konsullik muassasalari bilan aloqa qilishda barcha mos keladigan vositalardan, jumladan: diplomatik va konsullik kuryerlaridan, kodlangan va shifrlangan depeshalardan, diplomatik va konsullik valizalaridan foydalanishi mumkin.

2. Konsullik muassasasining rasmiy xat-xabarlari daxlsizdir. Konsullik valizasi ushlanishi va ochilishi mumkin emas. U uning xarakterini koʻrsatuvchi koʻzga tashlanadigan tashqi belgilarga ega boʻlishi kerak va faqatgina rasmiy xat-xabar, rasmiy hujjatlar yoki rasmiy foydalanish uchun moʻljallangan ashyolardan iborat boʻlishi mumkin.

3. Konsullik kuryeri vakolat bergan davlatning konsulxona joylashgan davlatda doimiy yashamaydigan fuqarosi boʻlishi kerak. U konsulxona joylashgan davlatda diplomatik kuryer ega boʻlgan ustunlikdan, imtiyoz va immunitetlardan foydalanadi.

4. Vakolat bergan davlat yoki konsullik muassasasi ad hoc konsullik kuryerini tayinlashi mumkin. Bunday hollarda ushbu moddaning 3-bandi qoʻllaniladi, biroq bunday kuryerning immunitetlari unga topshirilgan konsullik valizasini manzilga olib kelib topshirishi bilan tugaydi.

5. Konsullik valizasi vakolat bergan davlat kemasi kapitani yoki havo kemasi komandiriga ishonib topshirilishi mumkin. U valizani tashkil etgan joylarning soni koʻrsatilgan rasmiy hujjatga ega boʻlishi kerak, ammo u konsullik kuryeri boʻlib hisoblanmaydi. Konsullik muassasasi xodimlari kema kapitani yoki havo kemasi komandiriga bemalol va bevosita konsullik valizasini topshirishi va ulardan konsullik valizasini qabul qilib olishi mumkin.

1. Konsullik muassasasi konsulxona joylashgan davlat hududida konsullik harakatlari uchun vakolat bergan davlat qonun va qoidalariga asosan yigʻimlar va bojlar olishi mumkin.

2. Ushbu moddaning 1-bandida keltirilgan yigʻimlar va bojlar konsullik joylashgan davlatda barcha yigʻim, boj va soliqlardan ozod etiladi.

Konsullik mansabdor shaxslari shaxsiy daxlsizlikdan foydalanadilar va ularni ushlash va hibsga olish mumkin emas. Konsulxona joylashgan davlat ularning erkinligi va qadr-qimmatiga tajovuz qilinishiga qarshi zarur choralarni koʻradi.

1. Konsullik mansabdor shaxslar 1961-yil 18-apreldagi Diplomatik aloqalar toʻgʻrisidagi Vena konvensiyasida koʻrsatilgan qoidalarga muvofiq diplomatik agent kabi barcha diplomatik imtiyoz va immunitetlardan toʻlaligicha foydalanadilar.

2. Konsullik xizmatchilari konsulxona joylashgan davlatda xizmat burchini bajarayotgandagi harakatlariga nisbatan yurisdiksiyaga ega emas.

3. Ushbu moddaning 2-bandida koʻrsatilganlar fuqarolik daʼvolariga nisbatan qoʻllanilmaydi:

3.1. konsullik xizmatchisi tomonidan vakolat bergan davlat agenti sifatida bevosita yoki bilvosita majburiyat olmasdan tuzilgan shartnomalardan kelib chiqqan, yoki

3.2. uchinchi tomonning konsullik joylashgan davlatda yoʻl transporti, kema va samolyot bilan yuz bergan hodisa tufayli keltirilgan zarar uchun.

1. Konsullik mansabdor shaxsi guvohlik koʻrsatmalari berishga majbur emas.

2. Konsullik xizmatchilari va xizmat koʻrsatuvchi xodimlar konsulxona joylashgan davlatda sud yoki maʼmuriy ishlar yurgizilayotganda guvohlik koʻrsatmalarini berish uchun chaqirilishi mumkin. Ushbu moddaning 3-bandida keltirilgan holatlardan boshqa hollarda ular guvohlik berishdan bosh tortishlari mumkin emas.

3. Konsullik xizmatchilari va xizmat koʻrsatuvchi xodimlar oʻzlarining vazifalariga oid masalalar boʻyicha koʻrsatma berishga yoki ularning vazifalariga oid hujjat va xat-xabarlarini koʻrsatishga majbur emas. Konsullik muassasasi boshligʻining roziligi bilan ular vakolat bergan davlat qonunchiligi boʻyicha ekspert sifatida guvohlik koʻrsatmalarini berish huquqiga ega, ammo ular ekspert sifatida guvohlik koʻrsatmalarini bermaslik huquqiga ham ega. Guvohlik koʻrsatmalarini berishdan bosh tortgan hollarida ularga nisbatan maʼmuriy jazo choralari qoʻllanishi mumkin emas.

4. Konsulxona joylashgan davlatning vakolatli maʼmurlariga biron-bir konsullik xizmatchisi yoki xizmat koʻrsatuvchi xodimning koʻrsatmasi kerak boʻlsa, ular bu shaxs tomonidan uning xizmat majburiyatlarini bajarishida xalaqit bermasliklari kerak. Bu maʼmurlar oʻsha shaxsning koʻrsatmalarini imkoniyat boʻlganida uning yashash joyida, konsullik muassasasi binosida eshitishlari yoki undan yozma ravishda koʻrsatmalarni qabul qilishlari mumkin.

Konsullik muassasasi xodimlari konsulxona joylashgan davlatda barcha shaxsiy, jamoat majburiyatlaridan va harbiy majburiylikdan, shuningdek konsulxona joylashgan davlat qonun va qoidalarida koʻrsatilgan chet el fuqarolarining roʻyxatdan oʻtishi va yashashi uchun ruxsat olishiga oid biror-bir talablarni bajarishdan ozod qilinadi.

1. Konsulxona joylashgan davlat quyidagilarni soliq va yigʻimlardan ozod qiladi:

1.1. vakolat bergan davlat ijaraga olgan yoki egalik qilgan, vakolat bergan davlat yoki uning vakili nomidan olingan konsullik binolari va konsullik muassasasi xodimlarining turar joylari, shuningdek bunga tegishli shartnoma va aktlar;

1.2. konsullik muassasasi tomonidan rasmiy maqsadlar uchun qonuniy olingan koʻchar mulk va transport vositalari, shuningdek ularni sotib olish, egalik qilish va qarash.

2. Ushbu modda 1-bandining qoidalari quyidagilarga nisbatan qoʻllanilmaydi:

2.1. maxsus xizmatlar uchun toʻlov sifatida olinadigan soliq va yigʻimlar;

2.2. vakolat bergan davlat yoki uning vakili bilan shartnoma tuzgan shaxsdan konsullik joylashgan davlat qonun va qoidalariga muvofiq olinadigan soliq va bojlar.

1. Konsullik muassasasi xodimlari, shuningdek ular bilan birga yashovchi oila aʼzolari barcha shaxsiy va mulkiy, davlat, tuman va munitsipal soliq va bojlardan ozod etiladi, quyidagilar bundan mustasno:

1.1. tovar va xizmat bahosiga kiritiladigan bilvosita soliqlar;

1.2. 38-moddada koʻrsatilganlar istisno holda konsulxona joylashgan davlat hududidagi shaxsiy koʻchmas mulkka solinadigan soliq va bojlar;

1.3. 43-moddaning 2-bandida koʻrsatilganlar istisno holda meros mulkiga solinadigan soliqlar, merosga solinadigan bojlar, mulkning oʻtishi bilan bogʻliq soliqlar;

1.4. konsulxona joylashgan davlatda manbaga ega boʻlgan sarmoyalardan olinadigan daromadlarni oʻz ichiga olgan xususiy daromadlarga solinadigan soliq va bojlar, shuningdek konsulxona joylashgan davlatdagi tijorat yoki moliyaviy korxonalardagi sarflangan mablagʻga solinadigan soliqlar;

1.5. 38-moddada koʻrsatilgan holatlar istisno holda aniq xizmat turlari uchun olinadigan soliq va bojlar, roʻyxatga olish, sud va reyestrlar bojlari, ipoteka va gerbli yigʻimlar.

2. Konsullik muassasasi xodimlarining konsullik muassasasida bajargan vazifalari uchun oladigan ish haqi soliqlar, bojlar va yigʻimlardan ozod qilinadi.

3. Konsulxona joylashgan davlatda ish haqi daromad soligʻidan ozod qilinmagan shaxslarni yollagan konsullik muassasasi xodimlari daromad soligʻi solinishini belgilagan qonun va qoidalardagi majburiyatlarni bajaradilar.

1. Konsullik joylashgan davlat oʻz qonun va qoidalariga asosan saqlash, tashish va shunga oʻxshash xizmatlardan tashqari quyidagilarni boj toʻlovlaridan ozod qilib olib kirish va olib chiqishga ruxsat beradi:

1.1. konsullik muassasasidan rasmiy foydalanish uchun moʻljallangan buyumlarni;

1.2. konsullik mansabdor shaxsining shaxsiy foydalanishi uchun moʻljallangan buyumlarni;

1.3. konsullik xizmatchilari va konsullik muassasasi xizmat koʻrsatuvchi xodimlari birinchi marta kelayotganda olib kelayotgan buyumlarini, shu jumladan maishiy buyumlarini.

2. Ushbu moddaning 1-bandi 1.2.- va 1.3.-kichik bandlarida koʻrsatilgan buyumlar tegishli shaxslarning shaxsiy foydalanishi uchun zarur boʻlgan miqdordan ortiq boʻlmasligi kerak.

3. Konsullik mansabdor shaxsining shaxsiy yuki bojxona koʻrigidan ozod etiladi. U konsullik joylashgan davlat vakolatli organlari tomonidan shu moddaning 1-bandi 1.2.-kichik bandida koʻrsatilgan buyumlardan tashqari narsalar yoki olib kelish va olib chiqish konsullik joylashgan davlat qonunlari yoxud karantin qoidalari bilan taqiqlangan narsalar bor deb hisoblashga jiddiy asoslar mavjud boʻlsa, koʻzdan kechiriladi. Bu holda koʻzdan kechirish konsullik mansabdor shaxsi yoki uning vakili ishtirokida oʻtkaziladi.

1. Konsullik muassasasi xodimlarining oila aʼzolari konsullik muassasasining tegishli xodimi foydalanadigan imtiyoz va immunitetlardan foydalanadilar.

2. Ushbu moddaning 1-bandi qoidalari konsulxona joylashgan davlat fuqarosi boʻlgan yoki ushbu davlatda doimiy yashaydigan yoxud konsullik joylashgan davlatda daromad olish maqsadida tijorat yoki kasb faoliyati bilan shugʻullanadigan oila aʼzolariga qoʻllanilmaydi.

1. Konsulxona joylashgan davlat fuqarosi boʻlgan yoki shu davlatda doimiy yashaydigan konsullik xizmatchisi va konsullik muassasasi xizmat koʻrsatuvchi xodimlari 36-moddaning 3-bandida koʻrsatilgan hollardan boshqa ushbu Konvensiyada koʻrsatilgan imtiyoz va immunitetlardan foydalanmaydilar.

2. Ushbu moddaning 1-bandida koʻrsatilgan shaxslarning oila aʼzolari ushbu Konvensiyada koʻrsatilgan imtiyoz va immunitetlardan foydalanmaydilar.

3. Konsulxona joylashgan davlat ushbu moddaning 1- va 2-bandlarida koʻrsatilgan shaxslarga nisbatan konsullik muassasasi faoliyatiga toʻsqinlik vujudga keltirmaslik shaklida yurisdiksiyani amalga oshiradi.

Agarda konsullik muassasasi xodimi yoki uning oila aʼzosi vafot etgan holda konsulxona joylashgan davlat:

a) vafot etgan shaxsning konsulxona joylashgan davlatda sotib olgan, u oʻlgan vaqtda ularning olib ketilishi man qilingan buyumlardan tashqari koʻchadigan mulkini olib ketishga ruxsat berishga;

b) vafot etgan shaxsning koʻchar mulkiga vorislikka solinadigan bojlar va merosga solinadigan barcha soliqlardan ozod qilishga majbur.

1. Konsullik muassasasining har bir xodimi ushbu Konvensiyada koʻrsatilgan imtiyoz va immunitetlardan konsullik joylashgan davlat hududiga kirib oʻz xizmat joyiga ketayotgan vaqtdan boshlab, yoki u shu davlat hududida boʻlsa, konsullik muassasasida oʻz vazifasini bajarishga kirishgan paytdan boshlab foydalanadi.

2. Konsullik muassasasi xodimlarining ular bilan birga yashaydigan oila aʼzolari ushbu Konvensiyada koʻrsatilgan imtiyoz va immunitetlardan konsullik joylashgan davlat hududiga kirib kelishlari bilan yoki oila aʼzosi boʻlgan paytdan boshlab foydalanadilar.

3. Konsullik muassasasi xodimi vazifasi tugaganda, u va u bilan birga yashovchi oila aʼzolarining imtiyoz va immunitetlari konsullik joylashgan davlatdan chiqqan paytda yoki chiqishi uchun oqilona muddat oʻtishi bilan tugaydi. Konsullik muassasasi xodimi oila aʼzolarining imtiyoz va immunitetlari uning oila aʼzoligidan chiqqan vaqtdan boshlab tugaydi. Biroq, agar ushbu shaxslar oqilona muddat ichida konsullik joylashgan davlatdan chiqib ketmoqchi boʻlsa, u holda ularning imtiyoz va immunitetlari joʻnab ketgunlariga qadar saqlanadi.

4. Konsullik muassasasi xodimi vafot etsa, u bilan birga yashagan oila aʼzolari berilgan imtiyoz va immunitetlardan konsullik joylashgan davlatdan chiqib ketgunga qadar yoki konsullik joylashgan davlatdan chiqib ketish uchun oqilona muddat oʻtgunga qadar foydalanishda davom etadilar.

1. Vakolat bergan davlat ushbu Konvensiyada koʻrsatilgan qoidalarga muvofiq konsullik muassasasi xodimlari foydalanadigan har qanday imtiyoz va immunitetlardan voz kechishi mumkin. Barcha hollarda bunday voz kechish aniq ifodalangan boʻlishi va bu toʻgʻrida konsulxona joylashgan davlatni yozma ravishda bildirishi kerak.

2. Har qanday shaxs tomonidan ushbu Konvensiyaga muvofiq yurisdiksiyaga qarshi immunitetdan foydalanishi mumkin boʻlgan hollarda daʼvo qoʻzgʻashi agar asosiy daʼvo bilan bogʻliq qarshi daʼvo mavjud boʻlsa, bunday shaxsni yurisdiksiyaga qarshi immuniteti borligini dalil qilib keltirish huquqidan mahrum qiladi.

3. Maʼmuriy yoki fuqarolik ishlarga nisbatan yurisdiksiyaga qarshi immunitetdan voz kechish sud qarorlarining ijrosi boʻyicha immunitetdan voz kechishni anglatmaydi. Bunga nisbatan yozma ravishda alohida voz kechish zarur.

1. Ushbu Konvensiya qoidalari diplomatik vakolatxonalar tomonidan konsullik vazifalari bajarilgan hollarda tatbiq qilinadi.

2. Konsullik vazifalarini bajarish topshirilgan diplomatik vakolatxona xodimlarining familiyalari diplomatik vakolatxona joylashgan davlat Tashqi ishlar vazirligiga yoki shu vazirlik tomonidan koʻrsatilgan organga xabar qilinadi.

3. Konsullik vazifalarini bajarishda diplomatik vakolatxonalar:

3.1. konsullik okrugi mahalliy maʼmurlariga;

3.2. tegishli xalqaro bitimlarga yoki diplomatik vakolatxona joylashgan davlat qonun-qoidalariga va urf-odatlariga zid boʻlmasa, shu davlat markaziy maʼmurlariga murojaat qilishi mumkin.

4. Ushbu moddaning 2-qismida koʻrsatilgan diplomatik vakolatxona xodimlarining imtiyoz va immunitetlari diplomatik aloqalarga oid xalqaro huquq normalari bilan tartibga solinaveradi.

1. Ushbu Konvensiyada koʻrsatilgan imtiyoz va immunitetlarga ziyon yetmagan holda ushbu imtiyoz va immunitetlardan foydalanuvchi shaxslar konsulxona joylashgan davlat qonun va qoidalarini, jumladan yoʻl transport qoidalarini hurmat qilishga majbur.

2. Konsullik binolaridan konsullik vazifalarini bajarishga toʻgʻri kelmagan maqsadlarda foydalanish mumkin emas.

3. Konsullik muassasasi, konsullik muassasasi xodimlari va ularning oila aʼzolari konsulxona joylashgan davlatning transport vositalarini sugʻurta qilish borasidagi qonun va qoidalarini hurmat qilishga majbur.

4. Vakolat bergan davlat konsullik muassasasi xodimlari konsulxona joylashgan davlatda tijorat va kasbi boʻyicha faoliyatni amalga oshirolmaydilar, rasmiy vazifalarni bajarish bilan bogʻliq hollar bundan mustasno.

Ahdlashuvchi Tomonlar oʻzaro kelishuvga asosan ushbu Konvensiyaga oʻzgartishlar va qoʻshimchalar kiritishlari mumkin.

1. Ushbu Konvensiya ratifikatsiya qilinadi va ratifikatsiya yorliqlari bilan almashilgach, oʻttizinchi kuni kuchga kiradi.

2. Ushbu Konvensiya noaniq muddatga tuziladi va Ahdlashuvchi Tomonlardan biri ikkinchi Ahdlashuvchi Tomonga ushbu Konvensiyani denonsatsiya qilish haqidagi oʻz qarorini yozma ravishda diplomatik yoʻllar bilan xabar qilgan kundan boshlab 6 oy oʻtgunga qadar amal qiladi.

Kiyev shahrida 1998-yil 19-fevralda ikki nusxada, har biri oʻzbek, ukrain va rus tillarida tuzildi, bunda barcha matnlar teng autentikdir.

Ushbu Konvensiya qoidalarini talqin qilishda tafovut yuz bersa, Ahdlashuvchi Tomonlar rus tilidagi matnga amal qiladilar.