Oʻzbekiston Respublikasi va Ukraina, bundan keyin Ahdlashuvchi Tomonlar deb ataluvchilar,

davlat suvereniteti, teng huquqlilik va oʻzaro hurmat prinsiplaridan kelib chiqib,

xalqaro huquq normalariga asoslanib va jinoyat huquqi sohasidagi davlatlararo hamkorlikni rivojlantirishni istab,

hukm etilganlarning jazoni oʻzlari fuqarosi boʻlgan davlatda oʻtashlari jazoni ijro etish maqsadiga samaraliroq erishishga, huquqni buzganlarni jamiyatda normal hayotga qaytarishga koʻmaklashishini hisobga olib,

gumanizm va inson huquqlarini hurmat qilish prinsiplariga amal qilib,

quyidagilar toʻgʻrisida ahdlashib oldilar:

1. Ushbu Shartnoma maqsadlariga erishish uchun quyida koʻrsatilgan atamalar:

1) «hukm chiqarilgan davlat» — sudi shaxsni ozodlikdan mahrum etish tarzida jazolash toʻgʻrisida hukm chiqargan Ahdlashuvchi Tomonni;

2) «hukm ijro etiladigan davlat» — ozodlikdan mahrum etilgan shaxs jazoni oʻtashni davom ettirish uchun oʻtkazilayotgan va uning fuqarosi boʻlgan Ahdlashuvchi Tomonni;

3) «mahkum» — jinoyat sodir etganligi uchun ozodlikdan mahrum etish tarzida Ahdlashuvchi Tomonlardan birining sudi hukm etgan shaxsni;

4) «yaqin qarindoshlar» —

Oʻzbekiston Respublikasi uchun: qarindosh boʻlgan yoki quda tomondan qarindosh boʻlgan shaxslar, yaʼni ota-onalar, aka-ukalar va opa-singillar, er-xotinlar, bolalar, jumladan farzandlikka olinganlar, nabiralar, shuningdek er-xotinlarning ota-onalari, aka-ukalari va opa-singillari,

Ukraina uchun: qarindosh boʻlgan shaxslar, yaʼni ona, ota, er, xotin, bolalar, tugʻishgan aka-ukalar va opa-singillar, nabiralar, buva va buvi, farzandlikka oluvchilar, farzandlikka olinganlar;

5) «qonuniy vakillar» — har bir Ahdlashuvchi Tomonning qonunlari tomonidan oʻrnatilgan tartibda shunday deb tan olinganlarni;

6) «vakolatli organlar» — mahkumlarni oʻtkazish toʻgʻrisidagi qarorlarni bajaruvchi Ahdlashuvchi Tomonlarning organlarini;

7) «markaziy organlar» —

Oʻzbekiston Respublikasi uchun — Oʻzbekiston Respublikasi Prokuraturasi;

Ukraina uchun — Ukraina Adliya vazirligi.

2. Ushbu Shartnomani bajarish masalalari boʻyicha Ahdlashuvchi Tomonlarning vakolatli organlari markaziy organlar orqali bir-birlari bilan aloqada boʻladilar.

1. Ahdlashuvchi Tomonlar ushbu Shartnoma shartlariga binoan bir-birlarining soʻrovnomalari boʻyicha hukm chiqargan davlat hududida jinoyatlar sodir etganlik uchun ozodlikdan mahrum etish joylarida jazoni oʻtayotgan va boshqa Ahdlashuvchi Tomonning fuqarosi boʻlgan mahkumlarni hukm ijro etiladigan davlatda jazoni oʻtash uchun oʻtkazish majburiyatini oladilar.

2. Mahkum fuqarosi boʻlgan Ahdlashuvchi Tomon sudi hukm chiqargan Ahdlashuvchi Tomonga mahkumni oʻtkazish imkoniyati toʻgʻrisidagi masalani koʻrib chiqish iltimosi bilan murojaat etishi mumkin.

3. Sudi hukm chiqargan Ahdlashuvchi Tomon mahkum fuqarosi boʻlgan Ahdlashuvchi Tomonga mahkumni oʻtkazish imkoniyati toʻgʻrisidagi masalani koʻrib chiqish iltimosi bilan murojaat etishi mumkin.

Mahkumni u fuqarosi boʻlgan Ahdlashuvchi Tomonga oʻtkazish protsedurasini qoʻzgʻatish uchun asos boʻlib shu shaxsning yoki uning yaqin qarindoshlarining, yoki uning qonuniy vakilining hukm chiqargan davlatning markaziy organiga yuborilgan ariza hisoblanadi.

1. Kelib tushgan soʻrov boʻyicha oʻtkazish uchun rozilik yoki rad etish qarorini ushbu Shartnomaning 8-moddasi 1-bandida sanab oʻtilgan hujjatlar olingan kundan bir oylik muddatdan kechiktirmay Ahdlashuvchi Tomonning markaziy organi tomonidan qabul qilinadi. Qabul qilingan qaror haqida yozma ravishda u toʻgʻrisida yuborilgan soʻrov yuborilgan shaxsga yoki uni oʻtkazish toʻgʻrisidagi ariza bilan murojaat qilgan shaxsga xabar qilinadi.

2. Mahkumni oʻtkazishni rad etish toʻgʻrisidagi qaror asoslangan boʻlishi lozim.

1. Mahkum qilingan shaxs ushbu Shartnomaga muvofiq quyidagi shartlar mavjud boʻlsa oʻtkazilishi mumkin:

1) agar bu shaxs hukm ijro etiladigan davlat fuqarosi boʻlsa;

2) agar hukm qonuniy kuchga kirgan boʻlsa;

3) agar oʻtkazish toʻgʻrisidagi soʻrovnoma olingan vaqtda mahkum yana kamida 6 oy mobaynida jazoni oʻtashi kerak boʻlsa;

4) agar mahkum yoki, uning yoshini, jismoniy yoki ruhiy ahvolini eʼtiborga olib, Ahdlashuvchi Tomonlardan biri buni zarur deb hisoblasa, mahkumning qonuniy vakili oʻtkazishga rozi boʻlsa;

5) agar hukm chiqarishga asos boʻlgan harakat yoki harakatsizlik hukm ijro etiladigan davlatning qonunlariga koʻra jinoyat deb hisoblansa;

6) agar jinoyat tufayli etkazilgan moddiy zarar undirilgan boʻlsa;

7) agar hukm chiqarilgan davlat va hukm ijro etiladigan davlat mahkumni oʻtkazishga rozi boʻlishsa.

2. Mahkumni oʻtkazish imkoniyati va uning yuridik oqibatlari toʻgʻrisida hukm chiqarilgan davlatning jinoiy- ijroiya tizimi boshqaruv organlarining mansabdor shaxslari tomonidan mahkumga yoki uning qonuniy vakiliga tushuntirilgan boʻlishi kerak.

3. Hatto agar mahkumning jazoni oʻtashiga 6 oydan kam vaqt qolgan yoki jinoyat tufayli etkazilgan zarar toʻliq hajmda undirib olinmagan taqdirda ham Ahdlashuvchi Tomonlar mahkumni oʻtkazishga istisno hollarida rozi boʻlishlari mumkin.

Agar:

1) ushbu Shartnomaning 5-moddasi 1-bandida sanab oʻtilgan shartlarga rioya qilinmagan boʻlsa;

2) mahkum fuqarosi boʻlgan Ahdlashuvchi Tomon shu Ahdlashuvchi Tomon qonunlariga muvofiq jinoiy taʼqib muddati oʻtganligi oqibatida jazoni amalga oshira olmasa;

3) ushbu Shartnomaning 8-moddasi shartlari soʻrovchi Ahdlashuvchi Tomon tarafidan kerakli tarzda bajarilmagan boʻlsa,

mahkumni oʻtkazish amalga oshirilmaydi.

Ahdlashuvchi Tomonlar oʻz zimmalariga quyidagi majburiyatlarni oladilar:

1) boshqa Ahdlashuvchi Tomon fuqarolarining ozodlikdan mahrum qilishga hukm etilgani, shuningdek ularning turish joyi toʻgʻrisida markaziy organlar orqali bir-birlarini yozma ravishda xabardor qilish;

2) mahkumlarga, ularning qonuniy vakillariga, yoki yaqin qarindoshlariga, mahkum fuqarosi boʻlgan davlatga oʻtkazish toʻgʻrisidagi ariza bilan istalgan bir Ahdlashuvchi Tomonning vakolatli organlariga murojaat qilishlarining imkoniyatini tushuntirish va amalda taʼminlash.

1. Mahkumni oʻtkazish toʻgʻrisidagi soʻrovnoma yozma shaklda tuziladi va unga hukm chiqarilgan davlatning markaziy organi tomonidan quyidagilar ilova qilinadi:

1) mahkumning shaxsi toʻgʻrisidagi maʼlumotlar (familiyasi, ismi, otasining ismi, tutilgan sanasi va joyi);

2) mahkumning fuqaroligini tasdiqlovchi hujjat;

3) shaxsning hukm qilinishiga asos boʻlgan jinoyat va jazo toʻgʻrisidagi qonun moddalarining matni;

4) mahkumning yoki ushbu Shartnomaning 5-moddasi 1-bandi 4-kichik bandida nazarda tutilgan hollarda uning qonuniy vakilining oʻtkazishga rozilik toʻgʻrisidagi yozma arizasi;

5) hukmning va yuqori turuvchi sud organlarining ish boʻyicha mavjud qarorlarining, hukmning qonuniy kuchga kirishi toʻgʻrisidagi hujjatlarning nusxalari;

6) jazoning oʻtalgan qismi va jazoning oʻtalishi kerak boʻlgan qismi toʻgʻrisidagi hujjat;

7) qoʻshimcha jazoning, agar u tayinlangan boʻlsa, ijrosi toʻgʻrisidagi hujjat;

8) mahkum sogʻligʻining ahvoli toʻgʻrisida meditsina xulosasi va xulq-atvorining xususiyatlari toʻgʻrisida maʼlumotlar;

9) moddiy zarar mavjudligi va uni undirish tartibi toʻgʻrisidagi maʼlumotlar;

10) boshqa hujjatlarning nusxalari faqat vakolatli organlarning oʻzaro kelishuviga binoan ilova qilinishi mumkin.

2. Sanab oʻtilgan barcha hujjatlar bunga vakolati boʻlgan shaxs tomonidan imzolangan va gerbli muhr bilan tasdiqlangan boʻlishi kerak.

1. Hukm chiqarilgan davlat ushbu Shartnomaning 5-modda 1-bandining 4-kichik bandiga muvofiq oʻtkazishga rozilik berayotgan shaxs buni ixtiyoriy va bunday rozilikning huquqiy oqibatlarini toʻliq tushunib qilishini taʼminlaydi.

2. Hukm chiqarilgan davlat hukm ijro etiladigan davlatga rasmiy shaxs yordamida mahkum shaxsni oʻtkazishga rozilik shu moddaning 1-bandiga muvofiq olinganligini tekshirish imkoniyatini beradi.

Mahkumni oʻtkazish joyi va tartibi Ahdlashuvchi Tomonlarning jazoni ijro etuvchi organlari tomonidan belgilanadi.

Mahkumlarni oʻtkazish bilan bogʻliq barcha xarajatlar faqat hukm chiqarilgan davlat hududida vujudga kelgan xarajatlardan tashqari, hukm ijro etiladigan davlat tomonidan qoplanadi.

1. Hukm ijro etiladigan davlat, bunda oʻz milliy qonunchiligiga amal qilib, jazoni toʻliq hajmda ijro etilishini taʼminlashga majbur.

2. Hukm ijro etiladigan davlat mahkumning ahvolini yomonlashtirmagan holda oʻz qonunlariga muvofiq jazoni oʻtashning davom etishini taʼminlaydi. Hukmni boshqa Ahdlashuvchi Tomon ijro etishi bilan bogʻliq masalalar Ahdlashuvchi Tomonlardan har birining qonunlari boʻyicha aniqlanadi.

3. Mahkumga belgilangan jazo hukm chiqarilgan davlat sudining hukmiga asosan oʻtaladi. Hukm ijro etiladigan davlat sudi chiqarilgan hukmdan kelib chiqib uni ijro etish toʻgʻrisida qaror qabul qiladi.

4. Agar hukm ijro etiladigan davlat qonunlari boʻyicha mazkur qilmish uchun ozodlikdan mahrum qilishning cheklangan muddati hukm boʻyicha tayinlangan muddatdan kam boʻlsa, hukm ijro etiladigan davlat sudi ushbu davlatning qonunlarida nazarda tutilgan ozodlikdan mahrum etishning eng koʻp muddatini belgilaydi.

5. Agar hukm ijro etiladigan davlatda bittasi yoki bir nechtasi jinoyat deb eʼtirof etilmaydigan ikki yoki undan ortiq qilmishlarga taalluqli boʻlsa, ushbu davlat sudi jazoning jinoyat deb hisoblanadigan qilmishga nisbatan qoʻllanadigan qismini belgilaydi.

6. Qoʻshimcha jazoni ijro etish toʻgʻrisidagi qaror, agar bunday jazo sodir etilgan qilmish uchun ushbu davlat qonunlarida nazarda tutilgan boʻlsa, hukm ijro etiladigan davlat sudi tomonidan qabul qilinadi.

Har bir Ahdlashuvchi Tomon oʻtkazilgan mahkumga afv etish va amnistiyani qoʻllashga haqlidir.

1. Oʻtkazilgan mahkumga nisbatan hukmning asosliligini qayta koʻrib chiqish qonuniy huquqiga faqat hukm chiqarilgan davlat egadir.

2. Hukm qayta koʻrib chiqilgan taqdirda uni chiqargan davlat hukm ijro etiladigan davlatga sudning hukm bekor qilingani yoki oʻzgartirilgani toʻgʻrisidagi qarorining tasdiqlangan nusxasini darhol joʻnatadi.

3. Agar mahkum jazoni oʻtash uchun oʻtkazilgandan keyin hukm chiqarilgan davlatda hukm bekor qilingan va ishni yangidan koʻrib chiqish yoki sudda koʻrish nazarda tutilgan boʻlsa, bu toʻgʻridagi qaror nusxasi, jinoiy ish materiallari hamda mahkum yoʻqligida mumkin boʻlgan zarur protsessual harakatlarni oʻtkazish natijalari boʻyicha boshqa materiallar, jinoiy ishning barcha materiallari rus tiliga tarjima qilingan holda, hukm ijro etiladigan davlatga ushbu davlat qonunlariga koʻra jinoiy taʼqibni amalga oshirish uchun joʻnatiladi.

4. Oqlash asosidagi qoʻshimcha tergov natijalari boʻyicha jinoiy ish toʻxtatilgan yoki sud tomonidan oqlov hukmi chiqarilgan holda asossiz ravishda jinoiy javobgarlikka tortish tufayli shaxsga etkazilgan zarar asossiz ravishda hukm qabul qilingan davlat tomonidan qoplanadi.

5. Agar mahkum jazoni oʻtash uchun oʻtkazilgandan keyin hukm uni chiqargan davlat tomonidan oʻzgartirilsa, bu toʻgʻridagi qaror nusxasi va boshqa zarur hujjatlar hukm ijro etiladigan davlatning markaziy organiga joʻnatiladi. Hukm ijro etiladigan davlat sudi bunday qarorni ijro etish toʻgʻrisidagi masalani ushbu Shartnomaning 12-moddasida nazarda tutilgan tartibda hal qiladi.

1. Hukm ijro etiladigan davlatga jazoni oʻtash uchun oʻtkazilgan shaxsga nisbatan ham xuddi shunday qilmishlarni sodir etganlik uchun ushbu davlat hududida hukm etilgan shaxslarga nisbatan hukm qilishning xuddi shunday huquqiy oqibatlari sodir boʻladi.

2. Boshqa Ahdlashuvchi Tomonning sudi chiqargan hukmni ijro etish uchun oʻtkazilgan shaxs hukm ijro etiladigan davlat hududida qonuniy kuchga kirgan hukmni chiqarishga sabab boʻlgan ayni shu qilmish uchun qayta jinoiy javobgarlikka tortilishi mumkin emas.

1. Bir Ahdlashuvchi Tomon oʻz qonunlariga muvofiq, agar boshqa Ahdlashuvchi Tomon unga shunday iltimos bilan murojaat qilsa va agar murojaat qilgan Ahdlashuvchi Tomon uchinchi davlat bilan shunday shaxsni uning hududiga yoki uning hududidan oʻtkazish toʻgʻrisida kelishgan boʻlsa, uning hududi boʻylab mahkum shaxsni tranzit tarzda olib oʻtish toʻgʻrisidagi iltimosni qondirishi mumkin. Bunda mahkumni qamoqda saqlashning zarur sharoitlari taʼminlanadi.

2. Mahkum shaxsni tranzit tarzda olib oʻtishni amalga oshirish bilan bogʻliq boʻlgan xarajatlarni shunday olib oʻtish toʻgʻrisidagi iltimos bilan murojaat qilgan Ahdlashuvchi Tomon qoplaydi.

Ushbu Shartnomani qoʻllashda paydo boʻladigan masalalarni Ahdlashuvchi Tomonlarning markaziy organlari hal etadilar.

1. Ushbu Shartnomani bajarishda Ahdlashuvchi Tomonlar oʻz davlat tillaridan foydalanadilar.

2. Ahdlashuvchi Tomonlarning davlat tillarida bajarilgan hujjatlarga rus tilidagi tasdiqlangan tarjimalar ilova qilinadi.

Ushbu Shartnomaning amal qilishi Ahdlashuvchi Tomonlar sudlari tomonidan Shartnoma kuchga kirgunicha hukm etilgan shaxslarga ham tatbiq etiladi.

Ushbu Shartnomaning qoidalari Ahdlashuvchi Tomonlarning ular qatnashchilari boʻlgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

1. Ushbu Shartnoma ratifikatsiya qilinadi va Ahdlashuvchi Tomonlar ratifikatsiya yorliqlari bilan almashgandan keyin oʻttiz kun oʻtgach kuchga kiradi.

2. Shartnoma belgilanmagan davrga tuziladi.

3. Ushbu Shartnomaning amal qilishi Ahdlashuvchi Tomonlardan biri boshqa Ahdlashuvchi Tomonning uning amal qilishini toʻxtatish niyati toʻgʻrisidagi yozma bildirishnomasini olgan sanadan boshlab olti oy oʻtgach toʻxtatiladi.

Kiyev shahrida 1998-yil 19-fevralda ikki nusxada, har biri oʻzbek, ukrain va rus tillarida tuzildi, barcha matnlar autentikdir.

Ushbu Shartnoma matnini talqin qilishda kelishmovchiliklar yuzaga kelgan holda Ahdlashuvchi Tomonlar rus tilida bayon qilingan matnga murojaat qiladilar.