Oʻzbekiston Respublikasi Hukumati va Tojikiston Respublikasi Hukumati, bundan keyin Tomonlar deb ataluvchilar,

er yuzida terrorizm hodisasining turli shakl va koʻrinishlarda keng yoyilishi davlatlar va xalqlar oʻrtasidagi doʻstona munosabatlarga tahdid solishi, inson huquqlarini poymol etishi, jamiyatning asosiy erkinliklari hamda demokratik negizlariga putur yetkazishidan tashvishlanib,

oʻz davlatlari fuqarolarining hayoti, huquqi va qonuniy manfaatlarini jinoiy tajovuzlardan ishonchli muhofaza etishga intilib,

davlatlar xavfsizligini izdan chiqarishga, millatlar orasida mojaro keltirib chiqarishga, konstitutsion va ijtimoiy tuzumni kuch ishlatib oʻzgartirish maqsadida siyosiy, diniy va boshqa xildagi ekstremizmdan foydalanishga urinishlar yoʻlini toʻsish niyatida,

giyohvandlik vositalari va psixotrop moddalarning noqonuniy yurgizilishi ular xalqlarining sogʻligʻi hamda turmush farovonligiga jiddiy xavf soladigan, jamiyatning siyosiy, iqtisodiy, ijtimoiy va madaniy negizlariga daxl qiladigan muammo ekanligini eʼtirof etib,

Birlashgan Millatlar Tashkilotining xalqaro tinchlik va xavfsizlikni qoʻllab-quvvatlash, davlatlar oʻrtasida yaxshi qoʻshnichilik, doʻstona munosabatlar hamda hamkorlikni rivojlantirish borasidagi maqsad va prinsiplariga sodiq ekanliklarini taʼkidlab,

quyidagilar toʻgʻrisida ahdlashib oldilar:

1. Tomonlar ushbu Bitim qoidalari hamda oʻz davlatlarining qonunlari va xalqaro majburiyatlariga amal qilgan holda terrorizmga, siyosiy, diniy va boshqa xildagi ekstremizmga, giyohvandlik vositalari va psixotrop moddalar (bundan keyin — giyohvandlik moddalari)ning noqonuniy yurgizilishiga qarshi kurashda oʻz vakolatli organlari orqali hamkorlik qiladilar.

2. Ushbu Bitimga binoan quyidagilar vakolatli organlar deb hisoblanadi:

Oʻzbekiston Respublikasi uchun — Ichki ishlar vazirligi, Milliy xavfsizlik xizmati, Davlat bojxona qoʻmitasi, Tashqi ishlar vazirligi;

Tojikiston Respublikasi uchun — Ichki ishlar vazirligi, Xavfsizlik vazirligi, Davlat bojxona qoʻmitasi, Tashqi ishlar vazirligi.

3. Tomonlar oʻz vakolatli organlari roʻyxatiga kiritilgan oʻzgartishlar toʻgʻrisida bir-birlariga zudlik bilan xabar beradilar.

4. Ushbu Bitimni bajarishda vakolatli organlar bir-birlari bilan bevosita hamkorlik qiladilar.

Tomonlar konstitutsiyaviy va ijtimoiy tuzumni kuch ishlatib oʻzgartirishga, oʻz davlatlari hududiy yaxlitligining buzilishiga, terrorizmga, siyosiy, diniy va boshqa xildagi ekstremizmga, giyohvandlik moddalarini noqonuniy yurgizishga urinishlariga qarshi kelishilgan harakatlarni amalga oshiradilar.

Tomonlar, ushbu Bitimning 2-moddasi qoidasini eʼtiborga olib hamda oʻz davlatlarining qonunlaridan kelib chiqib, quyidagi jinoiy qilmishlarning oldini olish, aniqlash, bartaraf etish hamda ochib tashlashda hamkorlik qiladilar:

terrorizm va qoʻporuvchilik holatlari, siyosiy, diniy va boshqa xildagi ekstremizm;

siyosiy, diniy va boshqa xildagi ekstremistlarni tayyorlash boʻyicha yashirin markazlarning tashkil etilishi hamda faoliyat yuritishi;

millatlar oʻrtasida mojaro keltirib chiqarish;

giyohvandlik moddalarining noqonuniy yurgizilishi.

1. Tomonlar davlatlarining vakolatli organlari ushbu Bitim qoidalarini amalga oshirishda quyidagi shakllarda hamkorlik qiladilar:

jinoyatlarga aloqador jismoniy hamda yuridik shaxslarni, tashkilotlarni aniqlash, jinoyatlarning oldini olish va ochib tashlashga yordam beradigan maʼlumotlarni almashish;

oshigʻich qidiruv tadbirlarini oʻtkazish toʻgʻrisidagi soʻrovlarni bajarish;

jinoiy taʼqibdan yoki jazoni oʻtashdan qochib yurgan, shuningdek bedarak yoʻqolgan shaxslarni qidirish;

shaxslar, voqealar, narsalar va hujjatlar, giyohvandlik moddalarini kontrabanda qilishning yoʻnalish va usullari, yangi giyohvandlik moddalari va ularni tayyorlash texnologiyasi, shuningdek unga qarshi kurashning metodlari va vositalari toʻgʻrisidagi axborotni almashish;

ish yuzasidan tajriba almashish, jumladan stajirovkalar, konsultatsiyalar, seminarlar va oʻquv kurslarini oʻtkazish;

qonunlar va boshqa xil meʼyoriy-huquqiy hujjatlarni almashish, oʻquv va metodik asarlarni almashishga koʻmaklashish.

2. Hamkorlikning koʻlami hamda konkret shakllari manfaatdor vakolatli organlar tarafidan, ehtiyoj va sharoitning oʻzgarishiga qarab, shuningdek ahamiyatli boʻlgan boshqa holatlarni hisobga olgan holda belgilanadi.

1. Ushbu Bitim doirasida hamkorlik Tomonlar davlatlarining vakolatli organlari yordam soʻrab bergan soʻrovlar asosida amalga oshiriladi.

2. Yordam soʻrab beriladigan soʻrovlar yozma shaklda yuboriladi. Yordam toʻgʻrisidagi soʻrovning haqiqiyligi yoki uning mazmuni borasida shubha tugʻilsa, uni tasdiqlab berish soʻralishi mumkin.

3. Yordam soʻrab beriladigan soʻrovda:

a) yordam berishni soʻrayotgan vakolatli organning va soʻrov yoʻllanayotgan vakolatli organning nomi;

b) ish mohiyatining bayoni;

v) soʻrovdan maqsad va uning asoslanishi;

g) soʻralayotgan yordamning mazmuni koʻrsatilishi kerak.

4. Shu jumladan, zarurat va imkoniyatga qarab, soʻrovda quyidagilar ham boʻlishi lozim:

a) ishga aloqador shaxslarning ismi va familiyasi, laqabi, ularning tugʻilgan vaqti va joyi, fuqaroligi, kasb-kori, doimiy yoki vaqtinchalik yashash joyi;

b) ishga aloqasi boʻlgan yuridik shaxslar, muassasa va tashkilotlarning nomlanishi va joylashgan oʻrni haqida maʼlumot;

v) qilmish yoki voqeaning bayoni, jinoiy ishlar boʻyicha esa — soʻrayotgan Tomon davlatining qonunlariga muvofiq qilmishning toifasi hamda qoʻllanadigan qonun tegishli moddasining matni;

g) javob olinishi kerak boʻlgan savollar roʻyxati;

d) soʻrovni bajarish chogʻida amal qilish kerak boʻlgan alohida tartib bayoni hamda bu zaruratning asoslanishi;

e) soʻrovni bajarishda foydasi tegishi mumkin boʻlgan boshqa har qanday maʼlumotni.

5. Ushbu Bitim doirasida maʼlumotlarni vakolatli organlar bir-biriga oʻz tashabbuslariga koʻra soʻrovsiz yuborishlari mumkin.

1. Agar soʻrovni bajarish soʻralayotgan Tomon davlatining milliy xavfsizligi yoki boʻlak manfaatlariga ziyon yetkazishi mumkin boʻlsa, yoxud uning milliy qonunlari yoinki xalqaro majburiyatlariga zid kelsa, ushbu Bitim doirasida yordam koʻrsatishdan toʻla yoki qisman voz kechilishi mumkin.

2. Agar soʻrovda koʻrsatilgan qilmish soʻralayotgan Tomon davlatining qonunlariga koʻra jinoyat deb hisoblanmasa, soʻrovni bajarish rad etilishi mumkin.

3. Soʻrovni bajarishni rad etishga qaror qilingan taqdirda soʻrayotgan Tomon davlatining vakolatli organi rad etish sababini koʻrsatgan holda yozma ravishda xabardor qilinadi.

1. Soʻralayotgan Tomon davlatining vakolatli organi soʻrovni bajarish uchun zarurati bor deb topgan qoʻshimcha maʼlumotlarni soʻrab olishga haqli.

2. Soʻralayotgan Tomon davlatining vakolatli organi soʻrovni tezda, toʻlaligicha hamda sifatli qilib bajarish uchun barcha choralarni koʻradi. Soʻrovni bajarishga toʻsqinlik qiladigan yoki uni sekinlashtiradigan sabablar mavjud boʻlsa, bu toʻgʻrida soʻrayotgan vakolatli organ darhol xabardor qilinadi.

3. Soʻrovni bajarishda soʻralayotgan Tomon davlatining qonunlari qoʻllanadi.

4. Soʻrayotgan Tomon davlatining vakolatli organi iltimosiga koʻra, soʻralayotgan Tomon davlatining vakolatli organi soʻrov va uning mazmuni maxfiyligini taʼminlash uchun barcha choralarni koʻradi. Soʻrov maxfiyligini saqlagan holda uni bajarishning iloji topilmasa, soʻralayotgan Tomon davlati bu toʻgʻrisida soʻrayotgan Tomon davlatining vakolatli organini xabardor qilib, bunday sharoitda soʻrovni bajarish- bajarmaslikni aniqlaydi.

5. Soʻrayotgan Tomon davlatining vakolatli organi iltimos qilsa, soʻralayotgan Tomon davlatining vakolatli organi soʻrovni bajarishning borishi toʻgʻrisida maʼlumot beradi.

6. Soʻralayotgan Tomon davlatining vakolatli organi soʻrayotgan Tomon davlatining vakolatli organini soʻrovni bajarish natijalaridan zudlik bilan xabardor qiladi.

Tomonlar oʻz davlatlari qonunlari va imkoniyatlari doirasida, jumladan har qanday uchinchi davlat bilan oʻzaro maqbul kelishuvlar asosida, oboroti maxsus qoidalar bilan tartibga solinadigan narsa, vosita va moddalarni nazorat qilinadigan yetkazib berish usulini bu narsa, vosita va moddalarning noqonuniy oborotida ishtirok etuvchi shaxslarni aniqlash va ularni jinoiy taʼqib etish maqsadida tegishlicha ishlatishni koʻzda tutadigan zarur choralarni koʻradilar.

1. Tomonlar oʻz davlatlarining vakolatli organlariga ularning hududlarida jinoyatlarning oldini olish, ochish va tekshirish, jinoyatni sodir etishda gumon qilinayotgan shaxslarni ushlash, jinoyatchilarni qidirish boʻyicha qoʻshma oshigʻich qidiruv tadbirlarini amalga oshirish imkoniyatini taqdim etishga rozi boʻldilar.

2. Bir Tomon davlati vakolatli organlarining vakillari tegishli soʻrovlar asosida va ruxsat olinganidan keyin xizmat topshiriqlarini bajarish, oshigʻich qidiruv tadbirlarni va tergov harakatlarini oʻtkazishda koʻmaklashish uchun boshqa Tomon davlati hududiga xizmat safariga yuborilishlari mumkin. Xizmat safariga yuborilgan xodimlarga ularga yuklatilgan vazifalarni bajarishda, xizmat safarida boʻlish bilan bogʻliq boʻlgan boshqa masalalarni hal etishda zarur koʻmak beriladi.

1. Ushbu Bitim 9-moddasining 2-bandida koʻzda tutilgan hollarda koʻmaklashish toʻgʻrisidagi soʻrovda quyidagilar aks ettirilgan boʻlishi kerak:

soʻralayotgan va soʻrayotgan vakolatli organlarning nomi;

xizmat safarining maqsadi va uning muddatlari;

oʻzaro harakat miqyoslari va amalga oshirilishi zarur boʻlgan tadbirlar roʻyxati;

xizmat safariga yuborilayotgan xodimlar toʻgʻrisida maʼlumotlar;

avtotransport toʻgʻrisida maʼlumotlar (agar avtotransport vositalarida borish rejalashtirilayotgan boʻlsa);

biriktirilgan shaxsiy qurol, unga oʻq-dorilar, maxsus vositalar va individual himoya vositalari (qurol va mazkur vositalar bilan xizmat safari rejalashtirilayotgan boʻlsa);

boshqa zarur axborot.

2. Bunday soʻrov boʻyicha qaror soʻralayotgan vakolatli organ tomonidan soʻrov olingan daqiqadan boshlab besh kunlik muddatdan kechiktirmay qabul qilinadi va u toʻgʻrisida soʻrayotgan vakolatli organga darhol maʼlum qilinadi. Zarur holda soʻralayotgan vakolatli organ soʻrayotgan vakolatli organdan qaror qabul qilish uchun qoʻshimcha maʼlumotlar olish huquqiga ega, soʻrovni qondirishga rozilik esa maʼlum shartlar bilan berilishi mumkin.

3. Xizmat safariga yuborilgan xodimlarning biriktirilgan shaxsiy quroli, unga oʻq-dorilar, maxsus vositalar va individual himoya vositalari bilan boʻlishiga ruxsatni soʻralayotgan Tomon beradi.

1. Tomonlar davlatlari vakolatli organlarining xodimlari tezkor-qidiruv tadbirlarini hududida bu tadbirlar oʻtkazilayotgan davlatning vakolatli organlari ishtiroki va nazoratida hamda uning qonunlariga rioya qilgan holda oʻtkazadilar.

2. Ushbu moddaning 1-bandida koʻrsatilgan tadbirlar hududida bu tadbirlar amalga oshirilayotgan davlatning tegishli vakolatli organi ularni toʻxtatish toʻgʻrisida talab qoʻyishi bilanoq toʻxtatiladi.

1. Tomonlar ushbu Bitim doirasida bir-birlaridan olinadigan axborotning, agar bu axborot yopiq xarakterga ega boʻlsa yoki beruvchi Tomon uning tarqatilishini nomaqbul deb hisoblasa, maxfiyligini taʼminlashga rozi boʻldilar.

2. Ushbu Bitim doirasida olingan axborot, texnik vositalar, qurilma va materiallarni uchinchi tomonga berish zarurati boʻlsa, ularni taqdim etgan Tomonning yozma roziligini olish talab qilinadi.

3. Tomonlar bir-birlaridan olgan axborot faqatgina ushbu Bitimda belgilangan maqsadda ishlatilishi mumkin. Beruvchi Tomon axborotning toʻgʻriligini, shuningdek zarur boʻlganida, tegishli oʻzgartish va qoʻshimchalarni berishni taʼminlaydi. Axborotni qabul qilish, roʻyxatga olish, saqlash, ishlatish va yoʻq qilish milliy qonunlarga muvofiq amalga oshiriladi. Barcha hollarda Tomonlar begona shaxslarning axborotdan foydalanishlaridan, uning ruxsatsiz oʻzgartirilishi, yoʻq qilinishi yoki tarqatilishidan samarali himoyani taʼminlaydilar.

Bir Tomon davlati vakolatli organlari yoki ularning xodimlari boshqa Tomon davlati jismoniy va yuridik shaxslariga yetkazgan ziyon shu Tomon davlati qonunlariga muvofiq qoplanadi.

1. Ushbu Bitimni bajarish boʻyicha xarajatlarni Tomonlar mustaqil ravishda, ular oʻz majburiyatlarini bajarishlari uchun zarur boʻlgan chegaralarda qoplaydilar.

2. Zarur boʻlganida Tomonlar ushbu Bitimdan kelib chiqadigan harakatlarni amalga oshirish uchun birgalikdagi xarajatlarni qoplaydilar, bu tegishli kelishuvlar orqali rasmiylashtiriladi.

3. Tomonlar bir-birlariga bepul, jumladan ushbu Bitim doirasida jinoyatlarning oldini olish boʻyicha aniq masalalarni hal etish uchun zarur boʻlgan qurilma va materiallar bilan yordam berishlari mumkin.

Tomonlar ushbu Bitim doirasida hamkorlikni huquqiy tartibga solishni mukammallashtirishga, terrorizm uchun, siyosiy, diniy va boshqa ekstremizm uchun, giyohvandlik moddalarining noqonuniy yurgizilishi uchun javobgarlikni koʻzda tutuvchi milliy qonunlarni yaqinlashtirishga harakat qiladilar.

Ushbu Bitim qoidalari Tomonlar oʻrtasida ikkala davlat vakolatli organlari oʻzaro harakatining shartlari va tartibi yanada batafsil belgilanadigan boshqa bitimlarning imzolanishiga toʻsqinlik qilmaydi.

1. Ushbu Bitim doirasida hamkorlikni mustahkamlash va samaradorligini oshirish masalalarini koʻrib chiqish maqsadida Tomonlar oʻz davlatlari vakolatli organlarining teng sonli vakillaridan Idoralararo qoʻshma komissiya tuzishga qaror qildilar. Bu komissiya oʻz vakolati doirasida qarorlar chiqaradi va ularning bajarilishini nazorat qiladi. Komissiya oʻz ishining reglament va protsedurasini mustaqil ravishda belgilaydi.

2. Idoralararo qoʻshma komissiya, zaruratga qarab, Tomonlar davlatlarining hududlarida navbatma-navbat yigʻiladi.

3. Ushbu Bitim qoidalarini qoʻllash yoki talqin qilish boʻyicha har qanday bahslarni Tomonlar maslahatlashish va muzokaralar orqali hal etadilar.

Ushbu Bitimni bajarishda Tomonlar rus tilidan foydalanadilar.

Ushbu Bitim qoidalari Tomonlarning ular ishtirokchilari boʻlgan boshqa xalqaro shartnomalar boʻyicha huquq va majburiyatlariga daxl qilmaydi.

Tomonlarning roziligi bilan ushbu Bitimga alohida protokollarda rasmiylashtiriladigan oʻzgartish va qoʻshimchalar kiritilishi mumkin, ular ushbu Bitimning ajralmas qismi boʻlib hisoblanadi.

Ushbu Bitim imzolangan kundan boshlab kuchga kiradi va besh yil davomida amal qiladi. Agar Tomonlar boshqa qaror qabul qilmasalar, Bitim keyingi besh yillik davrlarga oʻz-oʻzidan uzaytiriladi. Tomonlardan har biri boshqa Tomonni yozma ravishda xabardor qilish yoʻli bilan ushbu Bitimni bekor qilishi mumkin. Boshqa Tomon bunday xabarnomani olgan kundan boshlab olti oy oʻtgach, Bitim oʻz kuchini yoʻqotadi.

Xoʻjand shahrida 1999-yil 26-mayda ikki nusxada, har biri oʻzbek, tojik va rus tillarida tuzildi, barcha matnlar bir xil kuchga ega. Ushbu Bitim qoidalarini talqin qilishda rus tilidagi matndan foydalaniladi.