Oʻzbekiston Respublikasi Vazirlar Mahkamasining “Sanoatda ishlab chiqarish xarajatlarini qisqartirish va mahsulot tannarxini pasaytirishga doir qoʻshimcha chora-tadbirlar toʻgʻrisida” 2012-yil 7-martdagi 64-son qarorini bajarish yuzasidan, zamonaviy tejamli va energiyani tejaydigan texnologiyalarni izchil joriy etish, tabiiy va moliyaviy resurslardan samarali va oqilona foydalanish asosida suv taʼminoti va suv chiqarish boʻyicha koʻrsatiladigan xizmatlar tannarxini pasaytirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, “Suvsoz” davlat unitar korxonasi (keyingi oʻrinlarda “Suvsoz” DUK deb ataladi) tomonidan “Grundfos,” “Flygt” va “Andritz” kompaniyalari bilan tuzilgan shartnomalar boʻyicha 182 komplekt nasos uskunasi sotib olindi va oʻrnatildi, bu esa har yili 41,9 mln kVt elektr energiyasi va 3,6 mlrd soʻm moliyaviy mablagʻlarni tejashga, shuningdek, suv taʼminoti xizmatlari tariflarini barqarorlashtirishga erishish imkonini berdi.

2. Toshkent shahar hokimligining “Suvsoz” DUKning oʻz mablagʻlari hisobiga umumiy summasi 3 456,1 ming yevro boʻlgan 239 komplekt texnologik nasos uskunasini 1-ilovaga* muvofiq jadval boʻyicha toʻlovlarni 5 yilga boʻlib-boʻlib toʻlash sharti bilan sotib olish toʻgʻrisidagi taklifiga rozilik berilsin.

3. “Suvsoz” DUKga:

tender savdolari oʻtkazmasdan, istisno tariqasida, 2-ilovaga* muvofiq roʻyxat boʻyicha umumiy summasi 3 456,1 ming yevro boʻlgan 239 komplekt texnologik nasos uskunasini yetkazib berish yuzasidan “Grundfos” kompaniyasi bilan kontrakt tuzsin;

suv taʼminoti va suvni chiqarib tashlash boʻyicha koʻrsatilgan xizmatlar uchun tushumlar hisobiga tasdiqlangan jadvalga muvofiq “Grundfos” kompaniyasining toʻlovlarini taʼminlash uchun zarur boʻlgan hajmda pul mablagʻlarini jamlash uchun vakolatli bankda maxsus hisob raqami ochsin.

4. Oʻzbekiston Respublikasi Markaziy bankiga vakolatli bank bilan birgalikda “Suvsoz” DUK buyurtmanomalari boʻyicha yetkazib berilgan texnologik nasos uskunasi uchun “Grundfos” kompaniyasiga toʻlovlarni amalga oshirish uchun zarur boʻlgan mablagʻlarning belgilangan tartibda konvertatsiya qilinishini taʼminlash tavsiya etilsin.

5. Toshkent shahar hokimligiga:

Toshkent shahrining ichimlik suv taʼminoti va oqova suvni chiqarib tashlash tizimiga zamonaviy energiya tejaydigan texnologiyalarni modernizatsiya qilish va joriy etish boʻyicha barcha tadbirlarning amalga oshirilishini muvofiqlashtirish va nazorat qilish, shuningdek, yetkazib berilayotgan texnologik nasos uskunalaridan maqsadli foydalanish va umuman loyihani samarali amalga oshirish;

Toshkent shahrining ichimlik suv taʼminoti va oqova suv tizimiga zamonaviy energiya tejaydigan texnologiyalarni modernizatsiya qilish va joriy etish loyihasini amalga oshirish doirasida “Grundfos” kompaniyasiga toʻlovlarni amalga oshirish uchun zarur boʻlgan hajmda suv taʼminoti va oqova suvni chiqarib tashlash xizmatlari uchun tushadigan pul mablagʻlari “Suvsoz” DUKning maxsus hisob raqamida oʻz vaqtida jamlanishi ustidan nazoratni amalga oshirish.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.