Davlat mulki obyektlaridan samarali foydalanish hamda adliya organlarining moddiy-texnika bazasini yanada mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi, Adliya vazirligi, Xususiylashtirish, monopoliyadan chiqarish va raqobatni rivojlantirish davlat qoʻmitasi hamda Buxoro viloyati hokimligining Buxoro viloyati Shofirkon tumani moliya boʻlimi balansidagi davlat mulki boʻlgan Buxoro viloyati, Shofirkon tumani, Shofirkon shoh koʻchasi, 108-uy manzilida joylashgan binoni Shofirkon tumani FHDY boʻlimi va 2-son notarial idorasini joylashtirish uchun Buxoro viloyati adliya boshqarmasi balansiga tasarruf etish huquqisiz bepul berish toʻgʻrisidagi taklifiga rozilik berilsin.

2. Buxoro viloyati hokimligi, Oʻzbekiston Respublikasi Moliya vazirligi mazkur qarorning 1-bandida koʻrsatilgan binoni belgilangan tartibda topshirilishini, Adliya vazirligi qabul qilib olinishini hamda undan maqsadli va samarali foydalanilishini taʼminlasin.

3. Mazkur qarorning 1-bandida koʻrsatilgan binoni saqlash bilan bogʻliq barcha xarajatlar Buxoro viloyati adliya boshqarmasi mablagʻlari hisobidan amalga oshirilishi belgilansin.

4. Vazirlar Mahkamasining 2012-yil 31-maydagi 154-son qarori 2-ilovasining 121-qatori oʻz kuchini yoʻqotgan deb hisoblansin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.