Oʻzbekiston Respublikasi Hukumati va Qirgʻiziston Respublikasi Hukumati, bundan keyin Tomonlar deb ataluvchilar,

jinoyatchilik, ayniqsa uning uyushgan shakllarining koʻlamlari va tamoyillari oʻsib borayotganligidan tashvishlanayotganliklarini izhor qilib,

oʻz mamlakatlari fuqarolarini ularning hayotiga, insoniy huquq va erkinliklariga, or-nomusi va sharafiga, jamiyat va davlat manfaatlariga tajovuz qilinishidan ishonchli himoya qilishni taʼminlashga intilishdan kelib chiqib,

umum eʼtirof etilgan inson huquqlari va erkinliklariga amal qilishda xalqaro hamkorlikka muhim ahamiyat berib,

1996-yil 24-dekabrdagi Oʻzbekiston Respublikasi va Qirgʻiziston Respublikasi oʻrtasida Abadiy doʻstlik toʻgʻrisida shartnoma hamda Oʻzbekiston Respublikasi va Qirgʻiziston Respublikasi oʻrtasida Fuqarolik, oilaviy va jinoiy ishlar yuzasidan huquqiy yordam va huquqiy munosabatlar toʻgʻrisida shartnomani eʼtiborga olib,

Birlashgan Millatlar Tashkiloti va Mustaqil Davlatlar Hamdoʻstligining jinoyatchilikning oldini olish va jinoiy odil sudlovni amalga oshirish sohasida qabul qilgan hujjatlarining qoidalarini hisobga olib,

teng huquqlilik va oʻzaro manfaatli hamkorlik prinsiplaridan kelib chiqib,

quyidagilar toʻgʻrisida kelishib oldilar:

1. Tomonlar oʻzlarining markaziy vakolatli organlari orqali ushbu Bitim qoidalariga muvofiq hamda milliy qonunlarga, shuningdek oʻz mamlakatlarining xalqaro shartnomalariga amal qilgan holda jinoyatchilikka qarshi kurashda hamkorlik qiladilar.

2. Ushbu Bitim maqsadlari uchun quyidagilar markaziy vakolatli organlar hisoblanadi:

Oʻzbekiston Respublikasi uchun — Oʻzbekiston Respublikasi Prokuraturasi, Oʻzbekiston Respublikasi Ichki ishlar vazirligi, Oʻzbekiston Respublikasi Milliy xavfsizlik xizmati, Oʻzbekiston Respublikasi Davlat bojxona qoʻmitasi, Oʻzbekiston Respublikasi Davlat soliq qoʻmitasi, Oʻzbekiston Respublikasi Adliya vazirligi, Oʻzbekiston Respublikasi Moliya vazirligi, Oʻzbekiston Respublikasi Markaziy banki, Oʻzbekiston Respublikasi Davlat chegaralarini qoʻriqlash boʻyicha qoʻmita, Oʻzbekiston Respublikasi Vazirlar Mahkamasi huzuridagi narkotik moddalarni nazorat qilish milliy markazi;

Qirgʻiziston Respublikasi uchun — Qirgʻiziston Respublikasi Bosh Prokuraturasi, Qirgʻiziston Respublikasi Milliy xavfsizlik vazirligi, Qirgʻiziston Respublikasi Ichki ishlar vazirligi, Qirgʻiziston Respublikasi Adliya vazirligi, Qirgʻiziston Respublikasi Moliya vazirligi, Qirgʻiziston Respublikasi Moliya vazirligi huzuridagi Davlat bojxona inspeksiyasi, Qirgʻiziston Respublikasi Moliya vazirligi huzuridagi Davlat soliq inspeksiyasi, Qirgʻiziston Respublikasi Hukumati huzuridagi Narkotiklarni nazorat qilish boʻyicha davlat komissiyasi, Qirgʻiziston Respublikasi Milliy banki.

3. Tomonlardan har biri oʻz markaziy vakolatli organlari roʻyxatiga oʻzgartishlar kiritilishi toʻgʻrisida boshqa Tomonni darhol xabardor qiladi.

4. Markaziy vakolatli organlar ushbu Bitimni bajarish uchun bir-birlari bilan bevosita hamkorlik qiladilar.

1. Tomonlar quyidagi xildagi jinoyatlarning oldini olish, aniqlash, bartaraf qilish va tekshirishda hamkorlik qiladilar:

millatlararo, davlatning hududiy yaxlitligi va suvereniteti borasida nizo chiqarishga qaratilgan;

kishining hayotiga, sogʻligʻi, erkinligi va qadr-qimmatiga, shuningdek mulkiga qarshi;

terrorizm aktlari, shu jumladan diniy ekstremizm, uyushgan jinoyatchilik va korrupsiya;

qurol-yarogʻ, oʻq-dori, portlovchi va zaharli moddalar, kimyoviy, biologik, radioaktiv va yadroviy materiallar, strategik yoʻnalishdagi texnologiya hamda harbiy texnikaning noqonuniy aylanishi;

narkotik vositalar, psixotrop moddalar hamda prekursorlarning noqonuniy aylanishi;

odam oʻgʻirlash va sotish, shuningdek kishi aʼzolari va toʻqimalarining noqonuniy savdosi;

fohishabozlikni ekspluatatsiya qilish;

ekologik jinoyatlar;

iqtisodiyot sohasidagi jinoyatlar, shu jumladan valyuta boyliklari bilan noqonuniy operatsiyalar, noqonuniy xalqaro moliyaviy, eksport va import operatsiyalari, jinoiy faoliyatdan olingan daromadlarni legallashtirish, qalbaki pul belgilari va moliyaviy hujjatlar, qimmatbaho qogʻozlar va bepul toʻlov vositalarini tayyorlash va sotish;

kontrabanda va bojxona qonunlarini buzish;

madaniy va tarixiy qadriyatlarga jinoiy tajovuz qilish;

transportda jinoyat sodir etish;

avtotransport vositalarini oʻgʻirlash va ularni noqonuniy ishga solish;

oʻsimlik va hayvonot dunyosining noyob turlariga qarshi jinoyatlar.

2. Tomonlar oʻz davlatlarining qonunlariga muvofiq, shuningdek quyidagi yoʻnalishlarda hamkorlikni amalga oshiradilar:

vakolatli organlarning xizmat safarida yurgan vakillariga zarur yordam berish va koʻmaklashish;

transport va yoʻl harakatida xavfsizlikni taʼminlash;

jinoiy jazo ijrosini tashkil qilish;

pasport-viza ishlari, chet ellik fuqarolar va fuqaroligi boʻlmagan shaxslarning kelish-ketish va tranzit oʻtishlari va boʻlib turishlarini nazorat qilish;

qimmatbaho va maxsus yuklarni kuzatish va qoʻriqlash;

yongʻin xavfsizligini taʼminlash;

tanib boʻlmagan jasadlar, oʻzi haqida maʼlumot bera olmaydigan bemorlar va bolalarning shaxsini aniqlashtirish.

3. Tomonlar quyidagi sohalarda ham hamkorlik qiladilar:

oʻz vakolatli organlarini moddiy-texnikaviy taʼminlash;

kadrlar tayyorlash va ular malakasini oshirish;

jinoyatchilikka qarshi kurashga xizmat qiladigan ilmiy tadqiqotlarni amalga oshirish, jumladan axborot tizimlarini, aloqa vositalari va maxsus texnikani taraqqiy ettirish;

shuningdek oʻzaro manfaatli boʻlgan boshqa sohalar.

4. Tomonlar, shuningdek oʻgʻirlab olib ketilgan yoki noqonuniy moliyaviy (eksport, import) operatsiyalari orqali qoʻlga kiritilgan va ushbu Bitim doirasidagi harakatlar natijasida tortib olingan narsalar, mol-mulk hamda pul mablagʻlarini bir-birlariga qaytarishda hamkorlik qiladilar.

Ushbu Bitim 2-moddasi qoidalarini bajarish uchun Tomonlarning markaziy vakolatli organlari, jumladan quyidagi shakllarda hamkorlikni amalga oshiradilar:

tayyorlanayotgan yoki amalga oshirilgan jinoyatlar hamda ularga daxldor jismoniy va yuridik shaxslar hamda tashkilotlar toʻgʻrisida qiziqish uygʻotuvchi maʼlumotlarni almashish;

operativ-qidiruv tadbirlarini oʻtkazish toʻgʻrisidagi soʻrovlarni bajarish;

jinoiy taʼqibdan yoki jazoni oʻtashdan yashirinib yurgan, shuningdek bedarak yoʻqolgan shaxslarni qidirish;

noqonuniy aylanishda paydo boʻlgan narkotik vositalar, psixotrop moddalar va prekursorlarning yangi turlari toʻgʻrisidagi, ularni tayyorlash va bunda qoʻllanadigan moddalar, shuningdek narkotik vositalar, psixotrop moddalar hamda prekursorlarni tadqiq etish va aniqlashtirishning yangi usullari toʻgʻrisidagi axborot bilan almashish;

oʻgʻirlab ketilgan, nomeri yoki maxsus farqlovchi belgisi boʻlgan narsalar, jumladan avtotransport va oʻtochar qurollar, shuningdek nomerli qimmatbaho qogʻozlar va pasportlarni (shaxsni tasdiqlovchi hujjatlarni) qidirib topish;

ish tajribasini oʻrtoqlashish, jumladan stajirovkalar, maslahatlashuvlar, seminarlar va oʻquv kurslarini oʻtkazish;

qonunlar va boshqa meʼyoriy-huquqiy hujjatnomalarni almashish, oʻquv va metodik asarlarni olishda koʻmaklashish;

oʻzaro manfaatli muammolar yuzasidan qoʻshma ilmiy tadqiqotlar olib borish;

oʻzaro manfaatli asosda ilmiy-texnikaviy asarlar va axborotlarni almashish;

shuningdek Tomonlarning oʻzaro kelishuvi boʻyicha boshqa shakllardagi hamkorlik.

1. Ushbu Bitim doirasida hamkorlik Tomonlar vakolatli organlarining yordam koʻrsatish toʻgʻrisidagi soʻrovlari asosida amalga oshiriladi.

2. Yordam koʻrsatish toʻgʻrisidagi soʻrovlar yozma tarzda yuboriladi. Soʻrovning haqiqiyligiga yoki mazmuniga shubha tugʻiladigan boʻlsa, uni tasdiqlab berish talab qilinishi mumkin.

3. Yordam koʻrsatish toʻgʻrisidagi soʻrovda quyidagilar aks ettirilishi kerak:

a) soʻrovni yuborayotgan va soʻrov yoʻllangan vakolatli organning nomi;

b) ish mazmunining bayoni;

v) soʻrovdan maqsad va uning asoslanishi;

g) soʻralayotgan yordamning mazmuni.

4. Shuningdek lozim va mumkin boʻlsa, soʻrovda quyidagilar ham aks ettirilishi kerak:

a) ishga aloqador kishilarning ismi va familiyasi, laqabi, fuqaroligi, tugʻilgan vaqti va joyi, kasbi, turar joyi yoki yashab turgan oʻrni;

b) ishga aloqasi boʻlgan yuridik shaxslar, muassasa va tashkilotlarning nomlanishi va joylashgan oʻrni;

v) amalga oshirilgan qilmish yoki yuz bergan voqea bayoni, jinoiy ishlar boʻyicha esa soʻrayotgan tomon davlati qonunlariga muvofiq qilmishning baholanishi va qoʻllanadigan qonun matni;

g) javob olinishi kerak boʻlgan savollar roʻyxati;

d) soʻrovni bajarish chogʻida amal qilish kerak boʻlgan alohida tartib tafsiloti va bu zaruratning boisi;

e) soʻrovni bajarishni yengillatishda foydasi tegishi mumkin boʻlgan yana boshqa har qanday maʼlumotlar.

5. Yordam koʻrsatish toʻgʻrisidagi soʻrov asl nusxada taqdim etilishi va soʻrayotgan vakolatli organning rahbari yoki uning oʻrinbosari tomonidan imzolanib, shu vakolatli organning gerbli muhri bilan tasdiqlangan boʻlishi kerak.

6. Yordam koʻrsatish toʻgʻrisidagi soʻrov ushbu Bitim 1-moddasining 4-bandida koʻrsatilgan tartibda yuboriladi.

1. Agar soʻrovning bajarilishi soʻralayotgan vakolatli organ davlatining milliy xavfsizligiga va boshqa manfaatlariga ziyon yetkazsa yoki uning davlati qonunlariga yoxud xalqaro shartnomalariga zid boʻlsa, ushbu Bitim doirasida yordam berish butunlay yoki qisman rad etilishi mumkin.

2. Soʻralayotgan vakolatli organ davlatining qonunlariga koʻra soʻrovda koʻrsatilgan qilmish jinoyat deb hisoblanmasa, yordam koʻrsatish rad etilishi mumkin.

3. Yordam koʻrsatish toʻgʻrisidagi soʻrovni bajarishni rad etish toʻgʻrisida qaror qabul etilsa, soʻrayotgan Tomonning vakolatli organiga raddiya sababi koʻrsatilgan holda yozma ravishda xabar beriladi.

1. Agar soʻrovning bajarilishi soʻrovni olgan organning vakolatiga kirmasa, bu organ uni darhol oʻz davlatining tegishli vakolatli organiga joʻnatadi va bu haqda soʻrayotgan Tomonning vakolatli organini xabardor qiladi.

2. Soʻralayotgan Tomonning vakolatli organi oʻz nuqtai nazaridan soʻrovni bajarish uchun lozim boʻladigan qoʻshimcha maʼlumotlarni soʻrab olishga haqlidir.

3. Soʻralayotgan Tomonning markaziy vakolatli organlari soʻrovni tezlik bilan, iloji boricha toʻliq hamda sifatli qilib bajarish uchun barcha zarur choralarni koʻradilar.

Soʻrovni bajarishga toʻsqinlik qiladigan yoki uni xiyla kechiktiradigan sabablar bor boʻlsa, bu haqda soʻrayotgan vakolatli organ tezda xabardor qilinadi.

4. Soʻrovni bajarishda soʻralayotgan Tomon davlatining qonunlari qoʻllanadi, biroq soʻrayotgan Tomonning iltimosiga koʻra, agar bu narsa soʻralayotgan Tomonning qonunlariga yoki xalqaro majburiyatlariga zid kelmasa, soʻrayotgan Tomon davlatining qonunlari qoʻllanishi ham mumkin.

5. Soʻralayotgan Tomonning vakolatli organi soʻrovning bajarilishi oʻz davlatida amalga oshirilayotgan jinoiy qidiruvga yo boshqa biron ishga xalaqit beradi deb hisoblasa, u soʻrovni bajarishni kechiktirishi yoki uning bajarilishini soʻrayotgan Tomonning markaziy vakolatli organi bilan maslahatlashilganidan keyin belgilangan shartlarga amal qilinishiga bogʻliq qilib qoʻyishi mumkin. Soʻrayotgan Tomon yordamni shu shartlar asosida qabul etsa, u bunday shartlarga amal qilishi kerak.

6. Soʻralayotgan Tomonning vakolatli organi soʻrayotgan Tomon vakolatli organining iltimosini olgach, soʻrov va uning mazmunini maxfiy saqlashni taʼminlash uchun barcha zarur choralarni koʻradi. Soʻrovning bajarilishi uning oshkor etilishini taqozo etsa, soʻralayotgan Tomonning vakolatli organi bu haqda soʻrayotgan Tomonning vakolatli organini xabardor qiladi va u bunday shartlarda soʻrovni bajarish lozim yoki yoʻqligini hal qiladi.

7. Soʻralayotgan Tomonning vakolatli organi, soʻrayotgan Tomonning vakolatli organi iltimosiga koʻra soʻrovning bajarilishi qanday borayotganidan uni xabardor qilib turishi mumkin.

8. Soʻralayotgan Tomonning vakolatli organi iloji boricha qisqa muddatda soʻrovni bajarishning natijasi toʻgʻrisida soʻrayotgan Tomonning vakolatli organini xabardor qiladi.

9. Tomonlarning vakolatli organlari oʻz davlatlarining qonunlariga muvofiq hamda oʻz vakolatlari doirasida bir-birlariga koʻmaklashadilar.

1. Tomonlar oʻz davlatlarining qonunlari doirasida hamda oʻz imkoniyatlari darajasida narsalar va moddalarning noqonuniy aylanishida ishtirok etayotgan shaxslarni aniqlash va ularni jinoiy taʼqib etish maqsadida istalgan uchinchi tomon bilan oʻzaro maqbul ahdlashuvlar asosida aylanishi taqiqlangan narsalar va moddalarni nazorat qilinadigan yetkazib berish metodidan tegishlicha foydalanishni koʻzda tutadigan zarur choralarni koʻradilar.

2. Nazorat qilinadigan yetkazib berish metodini qoʻllash toʻgʻrisidagi qarorlar har bir alohida holatda ikkala Tomonning vakolatli organlari tarafidan jamoatchilik xavfsizligini tavakkalga qoʻyishini hamda lozim boʻlsa, moliyaviy ahdlashuvlarni hisobga olgan holda, shuningdek yurisdiksiya masalasida Tomonlar erishgan oʻzaro anglashuvlarni nazarda tutib qabul qilinadi.

3. Erishilgan ahdlashuvlarga muvofiq nazorat qilib yetkazib berilayotgan narsalar va moddalarning noqonuniy turkumlari, shu jumladan istalgan uchinchi tomon ishtirokida, jinoiy-protsessual qonunlarga amal qilib, va asralgan holda bundan keyin tashilishi uchun toʻla yoki qisman olib qoʻyilishi mumkin.

Tomonlar oʻz davlatlarining qonunlari asosida tegishli hollarda oʻzarolik asosida koʻrsatmalari yoki harakatlari uyushgan jinoiy guruhlar faoliyatining oldini olishda yoki unga chek qoʻyishda, yo boʻlmasa jinoiy ishlarni tekshirish va sudda koʻrib chiqishda muhim ahamiyatga ega boʻlgan yoki muhim ahamiyat kasb etishi mumkin boʻlgan shaxslarning, zarur boʻlganida esa ularning yaqin qarindoshlarining ham xavfsizligini taʼminlash yuzasidan kelishilgan tadbirlarni amalga oshiradilar.

Ushbu Bitimni amalga oshirish yoʻlida Tomonlarning manfaatdor markaziy vakolatli organlari alohida bitimlar tuzishlari mumkin.

1. Ushbu Bitimni bajarish chogʻida yuzaga keladigan xarajatlarni, agar har bir konkret holatda alohida tartib belgilab olingan boʻlmasa, Tomonlarning oʻzlari qoplaydi.

2. Tomonlar, zarur boʻlganida, bir-birlariga bepul, jumladan jinoyatchilikka qarshi kurashda muayyan vazifalarni hal etish uchun zarur boʻlgan uskuna va materiallar bilan yordam berishlari mumkin.

Tomonlarning vakolatli organlari hamkorlikni amalga oshirishda rus tilini ishlatadilar.

1. Tomonlarning yoki ularning markaziy vakolatli organlarining vakillari zarur boʻlganida ushbu Bitim asosida hamkorlikni mustahkamlash va samaraliligini oshirish masalasini koʻrib chiqish maqsadida ishchi uchrashuvlari va maslahatlashishlar oʻtkazishlari mumkin.

2. Ushbu Bitim qoidalarini talqin qilish va qoʻllash borasidagi barcha bahsli masalalar Tomonlar oʻrtasida muzokaralar oʻtkazish orqali hal qilinadi.

Ushbu Bitimning qoidalari Tomonlarning ular ishtirok etgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

Tomonlarning roziligiga koʻra ushbu Bitimga oʻzgartish va qoʻshimchalar kiritilishi mumkin. Ular alohida protokollar tarzida rasmiylashtirilib, ushbu Bitimning 15-moddasi qoidalariga muvofiq kuchga kiradi va ushbu Bitimning ajralmas qismi boʻlib hisoblanadi.

Ushbu Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida diplomatik kanallar orqali olingan oxirgi bildirishnoma sanasidan boshlab kuchga kiradi.

Ushbu Bitim Tomonlardan biri uning amal qilishini toʻxtatish niyati toʻgʻrisida boshqa Tomonni diplomatik kanallar orqali yozma ravishda xabardor qilmagunicha oʻz kuchida qoladi. Bu holda boshqa Tomon bunday bildirishnomani olganidan soʻng olti oy oʻtgach, ushbu Bitim amal qilishini toʻxtatadi.

Toshkent shahrida 1999-yil 9-iyulda ikki nusxada, har biri oʻzbek, qirgʻiz va rus tillarida tuzildi, barcha matnlar bir xil kuchga ega.

Ushbu Bitimni talqin qilish uchun rus tilidagi matn ishlatiladi.