Oʻzbekiston Respublikasi Prezidentining “Oʻzbekiston sportchilarining 2016-yilda Rio-de-Janeyro shahrida (Braziliya) boʻlib oʻtadigan XXXI yozgi Olimpiada va XV Paralimpiada oʻyinlarida ishtirok etishga tayyorgarligi toʻgʻrisida” 2013-yil 25-fevraldagi PQ-1923-son qarorini bajarish yuzasidan, shuningdek Oʻzbekiston Milliy olimpiya qoʻmitasi huzuridagi Oʻzbekiston olimpiadachilarini qoʻllab-quvvatlash jamgʻarmasi faoliyatini samarali tashkil etish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining “Oʻzbekiston sportchilarining 2016-yilda Rio-de-Janeyro shahrida (Braziliya) boʻlib oʻtadigan XXXI yozgi Olimpiada va XV Paralimpiada oʻyinlarida ishtirok etishga tayyorgarligi toʻgʻrisida” 2013-yil 25-fevraldagi PQ-1923-son qarorining 5-bandiga muvofiq Oʻzbekiston Milliy olimpiya qoʻmitasi huzurida Oʻzbekiston olimpiadachilarini qoʻllab-quvvatlash jamgʻarmasini (keyingi oʻrinlarda Jamgʻarma deb ataladi) tashkil etish nazarda tutilganligi, shuningdek Jamgʻarma mablagʻlaridan foydalanishning maqsadlari va uning daromadlarini shakllantirish manbalari belgilanganligi;

Oʻzbekiston Milliy olimpiya qoʻmitasining Bosh assambleyasi tomonidan Jamgʻarmani nodavlat notijorat tashkiloti sifatida taʼsis etish toʻgʻrisida qaror qabul qilinganligi, uning ustavi tasdiqlanganligi va Jamgʻarma Vasiylik kengashining tarkibi saylanganligi, Vasiylik kengashi tomonidan 2013-yil 25-martdagi majlisda (1-son bayonnoma) Jamgʻarmaning tuzilmasi maqullanganligi va uning boshqaruv organlari shakllantirilganligi;

Jamgʻarmaning dastlabki mablagʻlarini shakllantirish Vazirlar Mahkamasining 2013-yil 4-martdagi 98-f-son farmoyishiga muvofiq amalga oshirilishi maʼlumot uchun qabul qilinsin.

2. Quyidagilar:

Oʻzbekiston Milliy olimpiya qoʻmitasi huzuridagi Oʻzbekiston olimpiadachilarini qoʻllab-quvvatlash jamgʻarmasining tuzilmasi 1-ilovaga muvofiq;

Oʻzbekiston Milliy olimpiya qoʻmitasi huzuridagi Oʻzbekiston olimpiadachilarini qoʻllab-quvvatlash jamgʻarmasi mablagʻlarini shakllantirish va ulardan foydalanish tartibi toʻgʻrisidagi Nizom 2-ilovaga muvofiq maqullansin.

3. Oʻzbekiston Milliy olimpiya qoʻmitasi ikki hafta muddatda Jamgʻarmani davlat roʻyxatidan oʻtkazish uchun zarur hujjatlarni Oʻzbekiston Respublikasi Adliya vazirligiga taqdim etsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. Ushbu Nizom Oʻzbekiston Milliy olimpiya qoʻmitasi huzuridagi Oʻzbekiston olimpiadachilarini qoʻllab-quvvatlash jamgʻarmasining (keyingi oʻrinlarda Jamgʻarma deb ataladi) mablagʻlarini shakllantirish va ulardan foydalanish tartibini belgilaydi.

2. Jamgʻarma Oʻzbekiston sportchilarini Olimpiada va Paralimpiada oʻyinlariga sifatli tayyorlash va ularning muvaffaqiyatli ishtirok etishini taʼminlash maqsadida tashkil etilgan.

3. Jamgʻarma faoliyati xayriya xususiyatiga ega. Jamgʻarma mablagʻlari tushish manbalaridan qatʼi nazar, Jamgʻarmaga yuklangan maqsadlar va vazifalarga erishish uchun sarflanadi.

4. Quyidagilar Jamgʻarma mablagʻlarini shakllantirish manbalari hisoblanadi:

sportning olimpiada turlari boʻyicha respublika federatsiyalari va uyushmalarining, boshqa tashkilotlarning, shuningdek jismoniy shaxslarning xayriya ehsonlari;

Oʻzbekiston Milliy olimpiya qoʻmitasi, sport federatsiyalari va uyushmalari, tashkilotlar va klublarning mablagʻlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari;

xorijiy mamlakatlar, xalqaro tashkilotlar va moliyaviy institutlarning grantlari va begʻaraz yordami;

qonun hujjatlarida taqiqlanmagan boshqa manbalar.

5. Jamgʻarma mablagʻlaridan quyidagi maqsadlarda foydalaniladi:

sportning olimpiada turlari boʻyicha federatsiyalar va uyushmalarga biriktirilgan sport bazalari va markazlarini rekonstruksiya qilish va jihozlanganligini oshirishni moliyalashtirish, shu jumladan ularning moddiy-texnika va sport infratuzilmasini mustahkamlash, sport uskunalari, inventar va sport kiyimlari sotib olish;

oʻrnak koʻrsatgan va iqtidorli sportchilar va trenerlarni moddiy ragʻbatlantirish, ijtimoiy qoʻllab-quvvatlash;

sportchilarning, trenerlar va hakamlar tarkiblarining kasb koʻnikmalarini oshirish, shu jumladan Oʻzbekiston milliy terma jamoalarini xalqaro musobaqalarga va oʻquv-mashq yigʻinlariga tayyorlash va ularda ishtirok etish, shuningdek milliy terma jamoalar bilan ishlash uchun sportning olimpiada turlari boʻyicha yuqori malakali trenerlarni va boshqa sport mutaxassislarini jalb etish bilan bogʻliq xarajatlarga haq toʻlash;

xorijiy sport klublari va federatsiyalari bilan xalqaro hamkorlikni tashkil etish va rivojlantirish, shu jumladan xalqaro musobaqalar, oʻquv-mashq yigʻinlari, sportning olimpiada turlari boʻyicha mutaxassislar uchun seminarlar oʻtkazish.

6. Jamgʻarmaning ijro etuvchi apparati taʼminoti va moddiy-texnik taʼminlash qonun hujjatlariga va Jamgʻarma Boshqaruvining qarorlariga muvofiq Jamgʻarma mablagʻlari hisobiga amalga oshiriladi.

7. Jamgʻarma Boshqaruvi ushbu Nizomning 5-bandida nazarda tutilgan Jamgʻarma mablagʻlaridan foydalanish maqsadlariga muvofiq Jamgʻarma mablagʻlaridan foydalanishning aniq yoʻnalishlarini belgilaydi va qarorlar qabul qiladi.

Jamgʻarma mablagʻlarini sarflash tartibi Jamgʻarma Boshqaruvining qarori bilan tasdiqlanadi.

8. Jamgʻarma mablagʻlaridan foydalanishni Jamgʻarmaning Vasiylik kengashi muvofiqlashtiradi va nazorat qiladi.

9. Jamgʻarmaning yillik moliyaviy hisoboti Jamgʻarma Boshqaruvining taqdimnomasi boʻyicha Vasiylik kengashi tomonidan tasdiqlanadi.

10. Jamgʻarma Boshqaruvi:

Jamgʻarma mablagʻlaridan foydalanish boʻyicha tadbirlarning yillik rejasini tasdiqlaydi;

Jamgʻarmaning yillik budjetini koʻrib chiqadi va tasdiqlaydi;

Jamgʻarma daromadlari barqaror shakllantirilishini, Jamgʻarma mablagʻlarini oʻz vaqtida moliyalashtirishni va ulardan maqsadli foydalanish taʼminlanishini muntazam nazorat qiladi;

Jamgʻarma mablagʻlaridan foydalanish boʻyicha ijro etuvchi direktorning har choraklik hisobotini eshitadi;

bir yilda kamida bir marta Jamgʻarmaning Vasiylik kengashiga Jamgʻarma faoliyati toʻgʻrisidagi hisobotni, shu jumladan oldingi yil uchun moliyaviy hisobotni taqdim etadi;

Jamgʻarmaning ijro etuvchi direktorini lavozimga tayinlaydi va lavozimdan ozod qiladi;

Jamgʻarma Ustaviga muvofiq boshqa vakolatlarni amalga oshiradi.

11. Jamgʻarma mablagʻlaridan foydalanish toʻgʻrisidagi qarorlar Oʻzbekiston Milliy olimpiya qoʻmitasi, sport federatsiyalari, uyushmalar va boshqa tashkilotlarning, shuningdek milliy terma jamoalar aʼzolari boʻlgan jismoniy shaxslarning va boshqa sport mutaxassislarining taqdim etilgan buyurtmanomalari asosida Jamgʻarma Boshqaruvi tomonidan koʻrib chiqiladi va qabul qilinadi.

12. Jamgʻarmaning ijro etuvchi direktori:

Jamgʻarma mablagʻlaridan foydalanish boʻyicha tadbirlarning yillik rejasini shakllantiradi va tasdiqlash uchun Jamgʻarma Boshqaruviga kiritadi;

Jamgʻarma Boshqaruvi tomonidan tasdiqlangan tadbirlar rejasi bajarilishini tahlil qiladi va monitoring olib boradi;

Jamgʻarmaning yillik budjetini ishlab chiqadi va tasdiqlash uchun Jamgʻarma Boshqaruviga kiritadi;

Oʻzbekiston Milliy olimpiya qoʻmitasi, sport federatsiyalari, uyushmalar va boshqa tashkilotlarning, shuningdek milliy terma jamoalar aʼzolari boʻlgan jismoniy shaxslarning va boshqa sport mutaxassislarining taqdim etilgan buyurtmanomalari asosida Jamgʻarma mablagʻlaridan foydalanish boʻyicha takliflarni Jamgʻarma Boshqaruviga taqdim etadi;

Jamgʻarma Boshqaruvining qarori boʻyicha mablagʻlarni bevosita oluvchilarga oʻtkazadi;

Jamgʻarma faoliyati masalalari boʻyicha yuridik va jismoniy shaxslar bilan shartnomalar tuzadi;

Jamgʻarma mablagʻlaridan foydalanish boʻyicha har choraklik hisobotni Jamgʻarma Boshqaruviga taqdim etadi;

Jamgʻarma Ustaviga muvofiq boshqa vakolatlarni amalga oshiradi.

13. Jamgʻarma Boshqaruvi va Ijro etuvchi direktor buxgalteriya hisobi yuritilishi, Jamgʻarmaning daromadlari va xarajatlari toʻgʻrisida hisobotlar tuzilishi va taqdim etilishi uchun javob beradi.

14. Jamgʻarma mablagʻlaridan maqsadli va oqilona foydalanilishi ustidan doimiy monitoring olib boradi.

15. Sport federatsiyalari, uyushmalar va boshqa tashkilotlar Jamgʻarmadan olingan mablagʻlardan foydalanish toʻgʻrisida har chorakda hisobot taqdim etadilar va ulardan maqsadli foydalanish uchun javob beradilar.

16. Jamgʻarmaning moliyaviy faoliyati hamda pul mablagʻlarini toʻgʻri sarflash va uning boshqa mol-mulkidan foydalanish ustidan nazorat qilish uchun Jamgʻarmaning taftish komissiyasi tuziladi, uning shaxsiy tarkibi Jamgʻarmaning Vasiylik kengashi tomonidan tasdiqlanadi.

17. Jamgʻarma qonun hujjatlariga muvofiq oʻz faoliyatini har yili auditorlik tekshiruvidan oʻtkazadi.