“Jismoniy tarbiya va sport toʻgʻrisida”gi Oʻzbekiston Respublikasining Qonuni (Oʻzbekiston Respublikasi Oliy Majlisining Axborotnomasi, 2000-y., 5-6-son, 147-modda) va Oʻzbekiston Respublikasi Vazirlar Mahkamasining 2003-yil 13-yanvardagi 15-son “Ommaviy tadbirlarni oʻtkazish qoidalarini tasdiqlash toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2003-y., 1-2-son, 10-modda) muvofiq, shuningdek futbol boʻyicha sport musobaqalarini oʻtkazishda jamoat xavfsizligini taʼminlash maqsadida buyuraman:

1. Futbol boʻyicha sport musobaqalarini oʻtkazish vaqtida tomoshabinlarning (muxlislarning) oʻzini tutish qoidalari ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Qoidalar “Jismoniy tarbiya va sport toʻgʻrisida”gi Oʻzbekiston Respublikasining Qonuni (Oʻzbekiston Respublikasi Oliy Majlisining Axborotnomasi, 2000-y., 5-6-son, 147-modda) va Oʻzbekiston Respublikasi Vazirlar Mahkamasining 2003-yil 13-yanvardagi 15-son “Ommaviy tadbirlarni oʻtkazish qoidalarini tasdiqlash toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2003-y., 1-2-son, 10-modda) muvofiq, Oʻzbekiston Respublikasi hududida joylashgan sport inshootlarida futbol boʻyicha sport musobaqalari va tomosha tadbirlarini oʻtkazish vaqtida tomoshabinlarning (muxlislarning) oʻzini tutish tartibini belgilaydi.

1. Sport inshootiga kirish vaqtida tomoshabinlar (muxlislar):

chiptaga asosan sport inshootiga kirish va joylashish;

sport inshooti hududida joylashgan saqlash kameralari, bufet, kafe hamda tashkilotchilar va sport inshooti maʼmuriyati tomonidan taqdim etilgan boshqa xizmatlardan belgilangan tartibda foydalanish;

plastik surnaylar, dastasi plastikdan boʻlgan bayroqchalar, dastasi yoʻq bayroqlar, fotoapparatlar, mobil telefonlarni sport inshootiga olib kirish huquqiga ega.

2. Muxlislarning guruhlariga sport inshootiga ichi kavak (teleskopik) dastali bayroqlarni va barabanlarni olib kelishga ruxsat etiladi. Bunda bayroqning maksimal hajmi – 1 x 2 m, dastasining maksimal uzunligi – 1,2 m boʻlishi kerak.

3. Muxlislarning guruhlari sport inshooti maʼmuriyati va huquqni muhofaza qilish organlarining masʼul xodimlari bilan kelishgan holda katta futbolka va bayroqlarni boʻsh sektorlar va yugurish yoʻlakchalariga joylashtirish, toʻsiqlarga banner-transparantlarni osib qoʻyishlari mumkin. Katta futbolka, bayroqlar, banner-transparantlarda haqoratli yozuvlar, shuningdek qonun hujjatlari talablariga zid boshqa yozuvlar boʻlmasligi kerak.

4. Tomoshabinlar (muxlislar):

sport inshootiga kirish jarayonida maxsus nazoratdan (tekshiruvdan) oʻtish vaqtini hisobga olgan holda sport inshootiga tadbir boshlangunga qadar kelishga;

sport inshooti maʼmuriyati va huquqni muhofaza qilish organlari xodimlariga chiptalar, taklifnomalar yoki tadbirga kirish huquqini beradigan ruxsatnomalarni koʻrsatishga hamda ularning xavfsizlik va tartibni saqlash boʻyicha qonuniy talablarini bajarishga majbur.

5. Tomoshabinlar (muxlislar) sport inshootiga kirish chogʻida huquqni muhofaza qilish organlari tomonidan maxsus nazoratdan (tekshiruvdan) oʻtkaziladi.

6. Tomoshabinlarga (muxlislarga) quyidagilar taqiqlanadi:

mast holda sport inshootiga kirish, spirtli ichimliklarni olib kelish, tamaki mahsulotlarini yoki boshqa mast qiluvchi vositalarni sport inshooti hududida isteʼmol qilish;

oʻzi bilan oʻq otar qurol, tez oʻt oladigan, portlovchi, zaharli, pirotexnik, oʻtkir hidli moddalarni, sanchadigan yoki kesadigan predmetlar, chemodanlar, portfellar, katta oʻlchamdagi oʻramlar va sumkalar, shisha idishlarni, shuningdek boshqa tomoshabinlarga va tadbir oʻtkazishga beruvchi boshqa buyumlarni olib kelish;

yuz yoki tananing boshqa qismlarini boʻyash;

tadbirga jonivorlar bilan kelish;

milliy, irqiy, etnik yoki diniy adovatni qoʻzgʻashga qaratilgan, tadbir ishtirokchilari va boshqa tomoshabinlarni haqorat qiladigan belgi yoki timsol va yozuvlarni olib yurish yoki ochiq namoyish etish;

tadbir ishtirokchilarining qadr-qimmatini kamsituvchi hayqiriqlar yoki harakatlar qilish.

7. Agar mehmon jamoa muxlislarining joyi uchrashuvni qabul qilayotgan jamoa muxlislari tarafida boʻlsa, sport inshooti maʼmuriyati va huquqni muhofaza qilish organlari xodimlari xavfsizlikni taʼminlash maqsadida uchrashuvni qabul qilayotgan jamoa muxlislaridan mehmon jamoa muxlislari uchun moʻljallangan sektorga oʻtishni talab qilishi mumkin.

8. Futbol boʻyicha sport musobaqalari oʻtkazilayotgan vaqtda tomoshabinlar (muxlislar):

noqulay ob-havo sharoitida jamoani turgan holda qoʻllab-quvvatlashlari;

foto va videosʼyomkani amalga oshirishlari;

oʻyin vaqtida jamoani faol va uyushgan holda qoʻllab-quvvatlashlari;

qoʻllab-quvvatlovchi shior va chaqiriqlardan foydalanishlari;

futbol va uning natijasi bilan bogʻliq axborot olish huquqiga ega.

9. Futbol boʻyicha sport musobaqalari oʻtkazilayotgan vaqtda tomoshabinlar (muxlislar):

jamoat tartibi va axloq normalariga rioya etishlari;

sport inshootining jihozlariga ehtiyotkorlik bilan munosabatda boʻlishlari;

yongʻin xavfsizligi qoidalariga amal qilishlari;

boshqa jamoalarning muxlislariga nisbatan qoʻpol munosabatda boʻlmasliklari;

boshqalarga nisbatan hurmat bilan munosabatda boʻlishlari, atrofdagilarga xavf soladigan harakatlarni sodir etmasliklari;

shubhali predmetlar va buyumlarni koʻrganda, shuningdek tutun yoki yongʻin sodir boʻlganda zudlik bilan sport inshooti maʼmuriyati yoki huquqni muhofaza qilish organlari xodimlariga xabar berishlari;

favqulodda vaziyatlar yuzaga kelganda tartibni saqlashga masʼul boʻlgan shaxslar koʻrsatmasiga asosan harakat qilishlari;

davlat ramzlariga, shuningdek Oʻzbekiston Futbol federatsiyasi, Oʻzbekiston Professional futbol ligasi, klublar va jamoalarning ramzlariga hurmat bilan munosabatda boʻlishlari shart.

10. Futbol boʻyicha sport musobaqalari oʻtkazilayotgan vaqtda tomoshabinlarga (muxlislarga) quyidagilar taqiqlanadi:

turli buyumlarni futbol maydoniga, futbol musobaqasi ishtirokchilariga qarab uloqtirish,

mashʼala yoki gulxanlar yoqish;

futbol maydoniga chiqish, jamoalar, hakamlar, murabbiylar va zaxira oʻyinchilar joylashgan joyga, doping nazorati xonasiga, rasmiy shaxslar uchun moʻljallangan xona va VIP-lojaga yoki stadionning boshqa maxsus xonalariga kirish;

oʻtish joylarida, zinalarda yoki lyuklarda turish, ishtirokchilar va tomoshabinlarning (muxlislarning) harakatlariga xalal berish, oʻrindiq ustiga chiqib olish, toʻsiq va panjaralarga osilish, yoritish qurilmalariga, machtalar, qimirlamaydigan konstruksiyalarga chiqish, sport inshooti mulkiga zarar yetkazish.

11. Futbol boʻyicha sport musobaqasi yakuniga yetganidan keyin tomoshabinlar (muxlislar) sport inshootidan chiqib ketish tartibi toʻgʻrisida axborot olish huquqiga ega.

12. Futbol boʻyicha sport tadbiri yakuniga yetganidan keyin tomoshabinlar (muxlislar) belgilangan tartibga rioya qilgan holda sport inshootini tark etishlari shart.

13. Futbol boʻyicha sport musobaqasi yakuniga yetganidan keyin tomoshabinlar (muxlislar)ga quyidagilar taqiqlanadi:

sport inshooti yoki klub maʼmuriyati vakilisiz maydonga chiqish, shuningdek sportchilarning kiyim almashtirish xonalariga, hakamlarning hamda boshqa xizmat koʻrsatish xonalariga kirish;

boshqa shaxslarning mulkiga zarar yetkazish;

futbolchilar, murabbiylar yoki tomoshabinlarga, shuningdek ularning transport vositalariga buyumlar uloqtirish.

14. Mazkur Qoidalarning talablariga rioya etmagan yoki unga boʻysunishdan bosh tortgan shaxslar sport inshootiga qoʻyilmaydi yoki chiptaning haqi toʻlab berilmasdan musobaqadan chetlashtiriladi.

15. Mazkur Qoidalarning talablari buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladilar.

16. Mazkur Qoidalar Oʻzbekiston Respublikasi Ichki ishlar vazirligi va Oʻzbekiston Futbol federatsiyasi bilan kelishilgan.