LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Agrar sohadagi iqtisodiy islohotlar jarayonini chuqurlashtirishni ta’minlash, qishloq xo‘jaligi kooperativlari (shirkatlar)ni shakllantirish, mulkiy paylar va oilaviy pudrat tizimini joriy etish asosida qishloqda haqiqiy mulkdorlar sinfini shakllantirish, tuproq unumdorligini oshirish, yerdan oqilona foydalanish va uni muhofaza qilish, seleksiya va urug‘chilikni yaxshilash, raqobatbardosh qishloq xo‘jalik mahsulotlari ishlab chiqarishni ko‘paytirish maqsadida:
1. 1998 — 2000-yillardagi davrda Qishloq xo‘jaligidagi iqtisodiy islohotlarni chuqurlashtirish dasturi* ma’qullansin.
2. Qishloq xo‘jaligida iqtisodiy islohotlarni chuqurlashtirishga oid ushbu Dasturning bajarilishini nazorat qiluvchi Respublika komissiyasi tuzilsin.
Respublika komissiyasi har chorakda Dastur qanday bajarilayotganligi yakunlarini chiqarib, uning natijalari to‘g‘risida respublika hukumatiga ma’lum qilib borsin.
3. O‘zbekiston Respublikasi Vazirlar Mahkamasi bir hafta muddatda ushbu Dasturni amalga oshirish yuzasidan tadbirlar ishlab chiqib, tasdiqlasin.
4. Qoraqalpog‘iston Respublikasi Vazirlar Kengashi va viloyat hokimliklari O‘zbekiston Respublikasi Makroiqtisodiyot va statistika vazirligi, Moliya vazirligi, Qishloq va suv xo‘jaligi vazirligi hamda boshqa tegishli vazirliklar va idoralar bilan birgalikda ikki hafta muddat ichida hududlar bo‘yicha Dastur qoidalarini amalga oshirishga doir aniq chora-tadbirlarni ishlab chiqib, O‘zbekiston Respublikasi Vazirlar Mahkamasiga taqdim etsinlar.
5. 1998 — 2000-yillardagi davrda Qishloq xo‘jaligidagi iqtisodiy islohotlarni chuqurlashtirish dasturi bajarilishini ta’minlash uchun vazirliklar va idoralarning rahbarlari, Qoraqalpog‘iston Respublikasi Vazirlar Kengashining Raisi va viloyatlarning hokimlari shaxsan javobgar ekanliklari belgilab qo‘yilsin.
6. Dasturning bajarilishi har chorakda O‘zbekiston Respublikasi Vazirlar Mahkamasining majlislarida muhokama qilib borilsin.
7. Mazkur Farmonning bajarilishini nazorat qilish O‘zbekiston Respublikasi Bosh vaziri O‘.T. Sultonov zimmasiga yuklansin.