Oʻzbekiston Respublikasi Hukumati bilan Hindiston Respublikasi Hukumati, bundan keyin “Tomonlar” deb ataluvchilar,

bojxona qonunlarining buzilishi oʻz mamlakatlarining iqtisodiy, moliyaviy va tijoriy manfaatlariga ziyon yetkazadi, deb hisoblab,

bojxona bojlari, soliqlari va boshqa toʻlovlarning aniq belgilanishi, taqiqlash, cheklash va nazoratga doir choralarni qabul qilish muhimligini tushunib,

bojxona qonunlarini qoʻllash va ularga rioya qilishda xalqaro hamkorlik zarurligini eʼtirof etib,

bojxona qonunlarini buzishning oldini olishga qaratilgan saʼy-harakatlar ular bojxona organlarining qalin hamkorligining yanada samarali vositasi boʻlishiga ishonib,

Butunjahon bojxona tashkiloti Bojxona hamkorligi kengashining Oʻzaro maʼmuriy koʻmaklashish toʻgʻrisida 1953-yil 5-dekabrdagi Tavsiyalarini eʼtiborga olib,

shuningdek muayyan tovarlarga nisbatan taqiqlar, cheklashlar va maxsus nazorat choralari yuzasidan xalqaro konvensiyalarni nazarda tutgan holda,

quyidagilar toʻgʻrisida ahdlashib oldilar:

Ushbu Bitimda:

1. “Bojxona qonunlari” atamasi bojxona maʼmuriyatlari tomonidan tovarlar importiga, eksportiga, tranzitiga va ularni har qanday bojxona rejimiga solinishiga, bunga taqiqlash, cheklash va nazorat qilish ham kiradi, nisbatan qoʻllanadigan va rioya qilinadigan qonunlar, qonunga doir va normativ hujjatlarni anglatadi.

2. “Bojxona huquqbuzarligi” bojxona qonunlarini istalgan tarzda buzish yoki buzishga urinishni anglatadi.

3. “Bojxona bojlari va soliqlari” atamasi tovarlar importi va eksporti chogʻida yoki shunga bogʻliq ravishda undiriladigan bojxona bojlari va boshqa barcha bojlar, soliqlar va yigʻimlarni anglatadi, qiymati koʻrsatiladigan xizmatlar qiymatiga taxminan teng cheklangan yigʻimlar bundan mustasno.

4. “Bojxona maʼmuriyati” atamasi Oʻzbekiston Respublikasiga nisbatan — Davlat bojxona qoʻmitasini, Hindiston Respublikasiga nisbatan — Moliya vazirligi Daromadlar departamentining Aksizlar va bojxona masalalari boʻyicha markaziy maʼmuriyatini anglatadi.

5. “Shaxs” atamasi har qanday jismoniy va yuridik shaxsni anglatadi.

6. “Axborot” atamasi har qanday maʼlumotni, hujjatni, hisobotni, ularning tasdiqlangan yoki bir xil nusxalari yoxud boshqa maʼlumotlarni anglatadi.

7. “Operativ maʼlumotlar” atamasi bojxona huquqbuzarligi yuz berganda tegishli ravishda qoʻllanadigan ishlangan yoki tahlil etilgan axborotni anglatadi.

8. “Soʻrovchi maʼmuriyat” atamasi koʻmaklashishni soʻrab murojaat qilayotgan bojxona maʼmuriyatini anglatadi.

9. “Soʻralayotgan maʼmuriyat” atamasi koʻmaklashish soʻralayotgan bojxona maʼmuriyatini anglatadi.

10. “Davlat” atamasi Oʻzbekiston Respublikasini va Hindiston Respublikasini anglatadi.

1. Ushbu Bitim doirasida har ikkala Tomon oʻz milliy qonunlari va vakolati hamda bojxona maʼmuriyatlarining mavjud imkoniyatlari darajasida koʻmaklashadi.

2. Bojxona maʼmuriyatlari ushbu Bitim doirasida bojxona qonunlarini risoladagidek qoʻllash hamda bojxona huquqbuzarligining oldini olish, taftish etish va unga qarshi kurashishda hamkorlik qiladilar va bir- biriga oʻzaro koʻmaklashadilar. Bunday koʻmaklashish barcha yuridik, maʼmuriy va boshqa sud ishlab chiqarishiga taqdim etilishi mumkin.

3. Ushbu Bitim faqat Tomonlar oʻrtasida oʻzaro maʼmuriy koʻmaklashishni amalga oshirishga moʻljallangan; ushbu Bitimning qoidalari biron-bir alohida shaxsga har qanday dalilni olish, yashirish yoki yoʻq qilish, shuningdek soʻrovni bajarishga toʻsqinlik qilish huquqini bermaydi.

1. Soʻrovga binoan yoki bir Tomon bojxona maʼmuriyatining oʻz tashabbusiga koʻra boshqa Tomon bojxona maʼmuriyati bojxona qonunlariga rioya qilinishini taʼminlashga yordam berishi mumkin boʻlgan barcha axborotni beradi, jumladan:

a) bojxona bojlari, soliq va yigʻimlarini oʻrinli ravishda solishni taʼminlashga;

b) tovarlar qiymatini bojxona maqsadlari uchun aniq belgilash, shuningdek notoʻgʻri toʻldirilgan deklaratsiyalarni aniqlash;

c) tovarlarning toʻgʻri tarif tasnifoti va kelib chiqishini aniqlash;

d) sertifikatlar, hisoblar hamda boshqa hujjatlarning haqiqiyligini aniqlash yoki ulardagi xato va buzilishlarni belgilash.

2. Ushbu Bitim doirasidagi hamkorlik quyidagi axborotlarni ham oʻz ichiga oladi:

a) bojxona huquqbuzarligining oldini olishda foydasi tegishi mumkin boʻlgan huquqni himoya qilish harakatlari, xususan, bojxona huquqbuzarligiga qarshi kurashishning alohida metodlariga oid;

b) bojxona qonunbuzarligini amalga oshirishning yangi metodlariga oid;

c) bojxona huquqbuzarligiga qarshi kurashda yangi texnikaviy vositalari va metodlarini qoʻllashda qoʻlga kiritilgan tajriba va muvaffaqiyatlarga oid; hamda

d) yoʻlovchilar va yuklarni rasmiylashtirishning yangi usul va metodlariga oid.

1. Bir Tomon bojxona maʼmuriyatining soʻroviga koʻra boshqa Tomonning bojxona maʼmuriyati ushbu bojxona maʼmuriyatiga quyidagilar borasida axborot beradi:

a) soʻrayotgan maʼmuriyatning yuk uchun berilgan bojxona deklaratsiyasi bilan birgalikda taqdim etilgan rasmiy hujjatlarining muvofiqligi;

b) soʻrayotgan maʼmuriyatning davlati hududiga olib kirilayotgan tovar haqiqatan ham boshqa Tomon davlati hududidan qonuniy eksport qilinayotganligi yoki yoʻqligi;

c) soʻrayotgan maʼmuriyatning davlati hududidan olib chiqilayotgan tovar soʻralayotgan maʼmuriyat davlati hududiga chindan ham import qilinayotganligi yoki yoʻqligi.

2. Bunday axborotda tovarlarni bojxona tozalovidan oʻtkazishda qoʻllanadigan bojxona protseduralari ham koʻrsatilishi lozim.

1. Ushbu Bitim doirasida beriladigan yoki olinadigan har qanday axborot yoxud oshigʻich maʼlumot maxfiylik rejimida boʻladi va ulardan faqat ushbu Bitimda koʻrsatilgan maqsadlardagina foydalaniladi. Ularni qabul qilib oladigan mamlakatda ham bu mamlakatda uning oʻz hududidan olinadigan shu kabi axborot, hujjatlar va boshqa maʼlumotlarga joriy etiladigan muhofaza vositalari va rasmiy maxfiylik darajasi joriy etiladi.

2. Bunday axborot va hujjatlardan faqat tekshiruv oʻtkazilganida, maʼmuriy yoki sud ishlab chiqarishida foydalanilishi mumkin.

3. Ushbu Bitim doirasida shaxslar toʻgʻrisida maʼlumot almashinganida Tomonlar ulardan faqat muayyan maqsaddagina hamda soʻralayotgan maʼmuriyat qoʻygan har qanday talabga amal qilingan holdagina foydalanilishiga yoʻl qoʻyadilar.

4. Soʻrayotgan maʼmuriyat oldindan kelishib olmasdan turib, ushbu Bitim doirasida olingan ashyoviy dalil hamda axborotdan soʻrovda koʻrsatilganidan boshqa maqsadda foydalanmaydi.

1. Soʻralayotgan maʼmuriyat soʻrovni bajarish uning davlati suvereniteti, xavfsizligi hamda boshqa oʻta muhim milliy manfaatlariga ziyon yetkazadi yoki sanoat, tijorat yoxud professional sirlarga daxl qiladi, deb hisoblasa, u koʻmaklashishni rad etishi yoki muayyan shartlar va talablarga amal qilinganidagina koʻmaklashishi mumkin.

2. Koʻmaklashish toʻgʻrisidagi soʻrov rad etiladigan boʻlsa, soʻralayotgan maʼmuriyatga buning sababini koʻrsatib, yozma ravishda xabar beriladi.

3. Soʻrovni bajarish oʻtkazilayotgan tekshiruv, jazo yoki protsessni amalga oshirishga xalaqit beradigan boʻlsa ham, maʼmuriyat koʻmaklashishni rad etishi mumkin. Bunday hollarda soʻralayotgan maʼmuriyat soʻrayotgan maʼmuriyat bilan koʻmaklashish soʻralayotgan maʼmuriyat qoʻyishi mumkin boʻlgan muayyan talablarga amal qilingan holda soʻrovni bajarishga koʻmaklashish mumkinligi toʻgʻrisida maslahatlashuv oʻtkazadi.

4. Soʻrayotgan maʼmuriyatning oʻzi soʻralayotgan maʼmuriyatdan xuddi shunday soʻrovnoma olingan taqdirda uni bajarishga qodir boʻlmasa, u oʻz soʻrovida bunga eʼtibor qaratishi lozim. Bunday soʻrovni bajarish bajarmaslik soʻralayotgan maʼmuriyatning ixtiyorida boʻladi.

1. Koʻmaklashish toʻgʻrisidagi soʻrovning shakli va mazmuni:

a) Ushbu Bitimga muvofiq soʻrovlar yozma ravishda yuboriladi. Bunday soʻrovlarni bajarish uchun zarur hujjatlar soʻrovga ilova qilinadi. Zarurat tugʻilsa, shoshilinch hollarda oshigʻich soʻrovlar ham qabul qilinadi, biroq ular darhol yozma shaklda tasdiqlanishi lozim;

b) yozma ravishdagi soʻrovlar ingliz tilida bitiladi. Bunday soʻrovlarga ilova etilayotgan har qanday hujjatlar ham, lozim boʻlsa, ingliz tiliga tarjima qilinadi;

c) ushbu moddaning 1-bandida koʻzda tutilgan soʻrovlar quyidagi axborotni oʻz ichiga oladi:

1) soʻrayotgan maʼmuriyat;

2) soʻralayotgan koʻmakning tarzi;

3) soʻrovdan maqsad va uning sababi;

4) agar maʼlum boʻlsa, koʻrib chiqilayotgan ishga jalb etilgan Tomonlarning nomi va manzili;

5) koʻrib chiqilayotgan ishning qisqa tafsiloti va koʻtarilayotgan huquqiy meʼyor, hamda

6) soʻralayotgan koʻmak bilan uni taqozo etayotgan ish orasidagi bogʻliqlik.

2. Aloqa kanallari:

a) koʻmak tegishli bojxona maʼmuriyatlari orasidagi toʻgʻridan toʻgʻri aloqa orqali bevosita beriladi;

b) soʻralayotgan maʼmuriyat soʻrovni oʻzi qondirishga qodir tashkilot boʻlmasa, ushbu Bitim tegishli maslahatlashuvlardan keyin, yo uni amaldagi qonunlarga muvofiq, oʻz vakolati doirasida bajara oladigan tegishli tashkilotga beradi yoki bunday soʻrovning bajarilishi uchun amal qilinishi lozim boʻlgan protsedurani koʻrsatib, soʻrayotgan maʼmuriyatni xabardor qiladi.

3. Har qanday bojxona maʼmuriyatining muayyan protsedurani bajarish toʻgʻrisidagi soʻrovi soʻralayotgan Tomonning milliy, huquqiy va maʼmuriy nizomlariga muvofiq amalga oshiriladi.

4. Tomonlarning bojxona maʼmuriyatlari ushbu Bitimni bajarish maqsadida bunday aloqani roʻyobga chiqarishga masʼul boʻlgan xodimlarni tayinlaydilar va bu xodimlarning nomlari, lavozimlari, telefon va faks nomyerlari roʻyxatini almashadilar. Ular oʻz tekshiruv boʻlinmalari oʻrtasida bevosita aloqani yoʻlga qoʻyishlari mumkin.

1. Soʻralayotgan maʼmuriyat oʻz milliy qonunlariga muvofiq, soʻrovni qoniqarli muddatlarda bajarish uchun maqbul tadbirlarni amalga oshiradi.

2. Bir Tomonning bojxona maʼmuriyati boshqa Tomonning bojxona maʼmuriyati soʻroviga binoan har qanday zarur soʻrovlarni amalga oshiradi, jumladan ekspertlar hamda guvohlarni yoxud bojxona huquqbuzarligini amalga oshirishda gumon qilinayotgan shaxslarni soʻroq qiladi.

1. Agar nusxalarning mavjudligi kifoya qilmasa, ishlar, hujjatlar va boshqa materiallarning asl nusxalari soʻrab olinadi. Maxsus soʻrovga koʻra, bunday ishlar, hujjatlar va boshqa materiallarning nusxalari lozim tarzda tasdiqlanadi.

2. Berib turilgan ishlar, hujjatlar va boshqa materiallarning asl nusxalari darhol qaytarilishi shart. Soʻrovga binoan sudga taqdim etish yoki shu kabi boshqa maqsadlar uchun zarur boʻlgan hujjatlar kechiktirmay qaytarilishi shart.

3. Ushbu Bitimda koʻrsatilgan hujjatlar xuddi shu maqsadda istalgan shakldagi kompyuter axboroti bilan almashtirilishi mumkin. Axborotni talqin qilish yoki sharhlash boʻyicha barcha zarur materiallar bir vaqtning oʻzida taqdim etiladi.

4. Bir maʼmuriyatning soʻroviga binoan boshqa maʼmuriyat oʻz ixtiyoriga koʻra oʻz xodimlarini boshqa Tomon davlati hududida olib borilayotgan jinoiy yoki maʼmuriy ishda guvoh va/yoki ekspert boʻlib ishtirok etish uchun vakil etib tayinlashi hamda ularni bajarishda muhim ahamiyat kasb etadigan ishlar, hujjatlar va boshqa materiallar yoxud ularning tasdiqlangan nusxalarini taqdim etishi mumkin. Bunday soʻrovda sud boʻlib oʻtadigan vaqt, uning joyi hamda turi, shuningdek xodimlarning kim sifatida ishtirok etishlari koʻrsatiladi.

5. Bir Tomon bojxona maʼmuriyatining rasmiy shaxslari ushbu Bitimda koʻzda tutilgan holatlar yuzasidan boshqa Tomon davlati hududida boʻlgan chogʻlarida ular har qanday vaqtda oʻz rasmiy vakolatlarini isbotlay olishlari lozim. Bu joyda ular boshqa Tomonning amaldagi qonunlariga muvofiq, bojxona mansabdor shaxslari foydalanadigan muhofaza darajasidan foydalanadilar va yoʻl qoʻyadigan qoidabuzarliklari uchun javobgar boʻladilar.

1. Tomonlar ushbu Bitim qoidalarini bajarishga aloqador xarajatlar qoplanishini talab qilishdan voz kechadilar, faqat davlat xizmatchisi boʻlmagan guvohlarni joʻnatish, ekspertlar va tarjimonlarga haq toʻlashga bogʻliq xarajatlar bundan mustasno.

2. Agar soʻrovni bajarish xiyla katta sarf-xarajatni taqozo etadigan boʻlsa, Tomonlar ularni bajarishning shart-sharoitlari hamda xarajatlar qoplanishi tarzini maslahatlashib oladilar.

1. Bojxona maʼmuriyati boshqa bojxona maʼmuriyatining soʻroviga koʻra oʻz imkoniyatlaridan kelib chiqib, quyidagilarni maxsus nazorat qiladi:

a) soʻrayotgan maʼmuriyatning mamlakatiga yuborilgan, biroq u noqonuniy yurgizilayapti deb hisoblayotgan tovarlarni;

b) soʻrayotgan maʼmuriyat davlati hududida huquqbuzarlikni amalga oshirishda foydalanilgan deb gumon qilinayotgan transport vositalarini;

c) bojxona huquqbuzarligini amalga oshirgani aniqlangan yoki shunda gumon qilinayotgan konkret shaxslarni;

d) soʻrayotgan maʼmuriyat boshqa Tomon davlati hududida bojxona huquqbuzarligini amalga oshirishda foydalanilayapti deb gumon qilgan binolarni.

2. Tomonlarning bojxona maʼmuriyatlari bir-biriga boshqa Tomon hududida huquqbuzarlik sodir etilishiga olib kelishi mumkin boʻlgan faoliyat toʻgʻrisidagi axborotni berib turadilar. Boshqa Tomonning iqtisodiyoti, odamlar salomatligi, jamoat xavfsizligi va boshqa hayotiy muhim manfaatlariga xiyla katta ziyon yetishi mumkin boʻlgan hollarda bunday axborot soʻrovsiz yuboriladi.

3. Bojxona maʼmuriyatlari oʻz milliy qonunlariga muvofiq ravishda, oʻzaro ahdlashuv va kelishuv boʻyicha oʻz tegishli davlatlari hududida noqonuniy yurgizilishga jalb etilgan tovarlarning importi, eksporti va tranziti yuzasidan birgalikda choralar koʻrishi mumkin. Bunday hamkorlik shu xildagi tovarlarni nazorat ostida oʻtkazishga ruxsat berishni ham oʻz ichiga oladi.

1. Tomonlar ularning bojxona maʼmuriyatlari quyidagilarni amalga oshirishiga rozidirlar:

a) ushbu Bitimdan kelib chiqadigan masalalarni hal etish uchun bevosita aloqani yoʻlga qoʻyishlari;

b) maslahatlashuv oʻtkazilganidan soʻng ushbu Bitimni bajarish uchun har qanday maʼmuriy koʻrsatmalarni ishlab chiqishlari; hamda

c) oʻzaro kelishuvga koʻra, ushbu Bitimni talqin qilish yoki qoʻllashga oid har qanday bahsli masalalarni koʻrib chiqishlari.

2. Hal etishga erishilmagan bahsli masalalar diplomatik kanallar orqali bartaraf qilinadi.

Tomonlarning yozma ravishda oʻzaro kelishuviga binoan, ushbu Bitimga oʻzgartish va qoʻshimchalar kiritilishi mumkin. Ular alohida bayonnomalar tarzida rasmiylashtiriladi va ushbu Bitimning tarkibiy qismi hisoblanadi.

1. Ushbu Bitim uni kuchga kiritish uchun zarur davlat ichki protseduralari bajarilgani toʻgʻrisida diplomatik kanallar orqali oxirgi xabar olinganidan soʻng 30 kun oʻtgach kuchga kiradi.

2. Ushbu Bitimning muddati cheklanmagan. Tomonlardan birontasi diplomatik kanallar orqali boshqa Tomonni ushbu Bitim faoliyatini toʻxtatish toʻgʻrisidagi niyatidan yozma ravishda xabardor qilganidan soʻng uch oy oʻtgach oʻz faoliyatini toʻxtatadi. Ushbu Bitimning amal qilish muddati tugagan paytda yakunlanmay qolgan ishlar uning qoidalariga muvofiq yakunlanadi.

3. Tomonlar soʻrovga koʻra ushbu Bitimni qayta koʻrib chiqish maqsadida uchrashadilar, agar ular bunday qayta koʻrib chiqishga ehtiyoj yoʻqligi toʻgʻrisida bir-biriga yozma ravishda xabar qilsalar, uchrashuv Bitim kuchga kirganidan keyingi besh yillik muddat oxirida oʻtkaziladi.

Dehli shahrida, 2000-yil 2-mayda ikki nusxada, oʻzbek, hind va ingliz tillarida tuzildi, bunda barcha matnlar bir xil kuchga ega. Talqinda har xilliklar kelib chiqqan hollarda ingliz tilidagi matn qoʻllanadi.