Oʻzbekiston Respublikasi Hukumati bilan Avstriya Respublikasi Federal Hukumati, bundan keyin “Ahdlashuvchi Tomonlar” deb ataluvchilar,

ikki tomonlama munosabatlarning rivojlanishiga koʻmaklashishga intilib,

xalqaro jinoyatchilikka qarshi kurashda hamkorlikning ikki davlat uchun muhim ahamiyatga ega ekanligini tushunib,

giyohvandlik vositalari va psixotrop moddalarning noqonuniy savdosi, ikki davlatning xavfsizligiga va boshqa muhim manfaatlariga tahdid solayotgan xalqaro jinoyatchilikning boshqa koʻrinishlarini tarqalishidan tashvishlanayotganliklarini izhor qilib,

uyushgan xalqaro jinoyatchilikka qarshi kurashda qoʻshma faoliyatni muvofiqlashtirishni istab va;

BMT Bosh Assambleyasining uyushgan jinoyatchilikka qarshi kurashda xalqaro hamkorlik toʻgʻrisida 1990-yil 14-dekabrdagi 45/123 Rezolyutsiyasi, shuningdek giyohvandlik vositalari toʻgʻrisida 1961-yil 30-martdagi Umumiy Konvensiyasi, Bayonnoma orqali 1972-yil 25-martda unga kiritilgan oʻzgartishlar, psixotrop moddalar toʻgʻrisida 1971-yil 21-fevraldagi Konvensiya hamda BMTning giyohvandlik vositalari va psixotrop moddalarning noqonuniy aylanishiga qarshi kurash toʻgʻrisida 1988-yil 20-dekabrdagi Konvensiyasidan kelib chiqqan holda,

quyidagilar toʻgʻrisida ahdlashib oldilar:

1. Ahdlashuvchi Tomonlar oʻz davlatlarining qonunchiligi va xalqaro majburiyatlariga asoslanib, oʻzlarining vakolatli idoralari orqali mazkur Bitimning bandlariga muvofiq, jinoyatchilikka qarshi kurashda hamkorlikni olib boradilar.

2. Ahdlashuvchi Tomonlar oʻzlarining vakolatli idoralarining roʻyxatlarini almashadilar va ushbu roʻyxatlardagi oʻzgarishlar toʻgʻrisida bir-birlarini diplomatik kanallar orqali xabardor qiladilar.

3. Ushbu Bitimni bajarish maqsadida vakolatli idoralar bir-birlari bilan toʻgʻridan toʻgʻri hamkorlik qiladilar.

1. Ahdlashuvchi Tomonlar oʻz davlatlarining qonunchiligi va xalqaro majburiyatlariga asoslanib oʻzlarining vakolatli idoralari orqali birinchi navbatda, quyidagi jinoiy koʻrinishlarga qarshi kurashda hamkorlikni olib boradilar:

a) giyohvand vositalar, psixotrop moddalar va prekursorlarni noqonuniy oʻstirish, ishlab chiqarish, olib kirish, olib chiqish, tashish va savdo qilish;

b) xalqaro ekstremizm va terrorizm, garovga olish va jamoat xavfsizligiga tahdid solayotgan boshqa xavfli tajovuzlar;

v) kishining hayoti, sogʻligʻi va erkinligiga qarshi jinoyatlar;

g) qurol-yarogʻ, oʻq-dori, portlovchi moddalar, yadroviy va radioaktiv moddalarni noqonuniy ishlab chiqarish va noqonuniy savdo qilish hamda man etilgan zaharli va xavfli chiqindilarning tashib oʻtilishi;

d) pul va boshqa toʻlov vositalari, qimmatbaho qogʻozlar va hujjatlarni qalbakilashtirish, hamda ularning noqonuniy tarqalishi;

e) sanʼat asarlari va antikvar buyumlarning noqonuniy savdosi va kontrabandasi;

yo) iqtisodiyot sohasidagi jinoyatlar va jinoiy faoliyat natijasida olingan daromadlarni qonuniylashtirish;

j) fohishabozlikdan foydalanish va odamlarni sotish;

z) shaxslarni chegaradan noqonuniy olib oʻtish;

i) avtotransport vositalari va boshqa qimmatbaho tovarlarning noqonuniy operatsiyalari;

k) tovlamachilik;

l) kompyuter sohasidagi jinoyatchilik.

2. Ahdlashuvchi Tomonlar oʻzlarining milliy qonunchiligiga muvofiq, shaxs va buyum qidiruvi, shuningdek nomaʼlum jasadlarning shaxsini aniqlash borasida bir-birlarini qoʻllab-quvvatlaydilar.

1. Ahdlashuvchi Tomonlar oʻrtasidagi hamkorlik ushbu Bitimga koʻra Ahdlashuvchi Tomonlar davlatlarining milliy qonunchiligiga muvofiq amalga oshiriladi va quyidagilarni oʻz ichiga oladi:

a) jinoyatlarni fosh etish va tergov qilish hamda jamoat xavfsizligiga katta xavf tugʻdiruvchi jinoyatni bartaraf qilish maqsadida axborot almashish;

b) huquqiy qoidalarni qoʻllash, jinoyatchilikning oldini olish, shuningdek kriminalistikadagi usullar, vositalar va texnikani qoʻllash borasidagi tajriba almashish;

v) jinoyatchilikning maʼlum bir sohasidagi ekspertlar tajribasini almashish va ekspertlar uchrashuvlarini tashkillashtirish;

2. Ahdlashuvchi Tomonlar ushbu Bitimga koʻra va oʻz davlatlarining milliy qonunchiligiga muvofiq quyidagilar toʻgʻrisida axborot almashadilar:

a) giyohvand vositalarni topish va aniqlashda yangi usullarni qoʻllash, ularning noqonuniy olib oʻtishdagi yangi yoʻnalishlari, noqonuniy aylanishga kelib tushayotgan giyohvand moddalarning yangi koʻrinishlari, ularning xususiyatlari va tayyorlash texnologiyasi;

b) uyushgan guruhlar tomonidan jinoyatlarni sodir etish usullari, ularning tarkibi, tuzilishi, faoliyat doirasi va jinoiy aloqalari;

v) jinoiy faoliyatdan olingan daromadlarni qonuniylashtirish usullari va shu kabi faoliyatga aloqadorligi gumon qilinayotgan tashkilotlar, bank muassasalari va firmalar;

g) boshqa Ahdlashuvchi Tomon davlatining hududida doimiy istiqomat qiladigan yoki vaqtincha boʻlib turgan, ushbu Bitimning 2-moddasida koʻzda tutilgan jinoyatlarni sodir etganlikda gumon qilinayotgan shaxslar.

1. Ahdlashuvchi Tomonlar ushbu Bitim doirasida hamkorlikni yozma soʻrovlarga muvofiq olib boradilar.

2. Zarurat tugʻilganda soʻrovga lozim boʻlgan hujjatlar ilova qilinadi. Ahdlashuvchi Tomonlar soʻrovning bajarilishini yengillashtirish maqsadida, qoʻshimcha maʼlumot soʻrash huquqiga egalar.

3. Agar maʼlumot boshqa Ahdlashuvchi Tomon uchun qiziqish uygʻotdi dyeyishga asos boʻlsa, Ahdlashuvchi Tomonlar soʻrovsiz oʻz tashabbuslariga koʻra bir-birlariga maʼlumot yuborishlari mumkin.

4. Ahdlashuvchi Tomonlar oʻrtasidagi hamkorlik aloqa zobitlari orqali ham olib borilishi mumkin. Aloqa zobiti maʼlumot va axborot berish faoliyati bilan shugʻullanadi va ijro etuvchi huquqlarga ega boʻlmaydi.

1. Ahdlashuvchi Tomonlar oʻrtasidagi jismoniy shaxslar toʻgʻrisida oʻzaro maʼlumot berish berayotgan tomon davlatining qonunchiligiga muvofiq quyidagi tamoyillarga koʻra amalga oshiriladi:

a) olingan maʼlumotlarni ular belgilanmagan boshqa maqsadlarda, taqdim etayotgan vakolatli idoraning roziligisiz foydalanish mumkin emas;

b) noaniq maʼlumotlar berilgan yoki berish uchun moʻljallanmagan maʼlumotlar berib yuborilgani aniqlansa, olingan maʼlumotlarni oʻchirish yoki toʻgʻrilash zarur. Oluvchi vakolatli idora bu toʻgʻrida darhol xabardor qilinadi.

Koʻrsatilgan qoidalar, shuningdek ular yuborilgan maqsadlarni bajarishda maʼlumotlar kerak boʻlmagan holda ham qoʻllaniladi.

s) Ahdlashuvchi Tomonlardan birining vakolatli idorasining soʻrovi kelib tushgan holda, ushbu maʼlumotlarning har qanday qoʻllanilishi toʻgʻrisida xabardor qilinishi zarur.

2. Ahdlashuvchi Tomonlarning vakolatli idoralari shaxslar toʻgʻrisida maʼlumotlarga nisbatan taʼsir qilishi yoki oʻzgarishga olib kelishi mumkin boʻlgan shart-sharoitlar toʻgʻrisida bir-birlarini xabardor qiladilar.

3. Shaxslar toʻgʻrisida maʼlumotlarni taqdim etuvchi va oluvchi vakolatli idoralar ularning berilishi va qabul qilinishini roʻyxatga olish majburiyatiga ega.

4. Taqdim etuvchi tomonning roziligiga koʻra manfaatdor shaxsga uning iltimosiga binoan milliy qonunlarga muvofiq u toʻgʻridagi mavjud maʼlumotlar toʻgʻrisida maʼlumotnoma beriladi.

5. Qabul qilib oluvchi vakolatli idora shaxslar toʻgʻrisida berilgan maʼlumotlarni noqonuniy tarzda ega boʻlish, oʻzgartirish yoki oshkora qilishdan samarali himoya qilish majburiyatiga ega.

1. Ahdlashuvchi Tomonlardan biri soʻrovning bajarilishi oqibatida davlatning suvereniteti, xavfsizligi, jamoat tartibi (ordre public) yoki uning davlatining boshqa muhim manfaatlarini buzadi deb hisoblasa, butunlay yoki vaqtincha yordam berishdan bosh tortishi yoki maʼlum bir shartlar qoʻyishi mumkin.

2. Soʻrovning bajarilishini rad etish qarori qabul qilingan holda soʻralayotgan Ahdlashuvchi Tomonning vakolatli idoralari soʻrayotgan Ahdlashuvchi Tomonni bu toʻgʻrida rad javobining sababini koʻrsatgan holda yozma xabardor qiladilar.

Ushbu Bitim Ahdlashuvchi Tomonlarning boshqa ikki tomonlama yoki koʻp tomonlama shartnomalaridan kelib chiqadigan huquq va majburiyatlariga daxl qilmaydi.

Ushbu Bitim jinoiy ishlar boʻyicha huquqiy yordam koʻrsatish va ekstraditsiya masalalariga, shuningdek soliq hamda bojxona qonunchiliklarini buzish bilan bogʻliq ishlarga daxl qilmaydi.

Zarur hollarda Tomonlar vakolatli idoralarining boshqaruv xodimlari ushbu Bitimni samarali qoʻllash vositalari va yoʻllarini muhokama qilish uchun uchrashishlari, shuningdek hamkorlikni rivojlantirish va mukammallashtirish boʻyicha mumkin choralarni koʻrishlari mumkin.

Tomonlarning oʻzaro roziligiga koʻra ushbu Bitimga oʻzgartishlar kiritilishi mumkin.

1. Ushbu Bitim uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida Tomonlarning oʻzaro xabar qilganlaridan soʻng 60 kun oʻtgach kuchga kiradi.

2. Ushbu Bitim nomaʼlum muddatga tuziladi.

3. Ushbu Bitim Tomonlar tarafidan diplomatik kanallar orqali denonsatsiya qilinishi mumkin, Tomonlardan biri boshqa Tomondan xabarnoma olganidan soʻng olti oy oʻtgach, ushbu Bitim amal qilishini toʻxtatadi.

Toshkent shahrida 2001-yil 2-noyabrda ikki nusxada, har biri oʻzbek va nemis tillarida tuzildi, bunda barcha matnlar bir xil kuchga ega.