Oʻzbekiston Respublikasi Hukumati bilan Turkmaniston Hukumati, bundan keyin Tomonlar deb ataluvchi,

Oʻzbekiston Respublikasi Hukumati bilan Turkmaniston Hukumati oʻrtasida 2004-yilning 19-noyabrida (Sandjar) Buxoro shahrida imzolangan fuqarolarning oʻzaro qatnovlari va chegara boʻyi viloyatlarida yashovchi fuqarolarga yengillashtirilgan qatnov tartibi toʻgʻrisida va chegara boʻyi viloyatlari hududida joylashgan xoʻjalik obyektlarida xizmat qiluvchi shaxslar tomonidan oʻzbek-turkman chegarasini kesib oʻtishlari toʻgʻrisida bitimlarni rivojlantirib,

fuqarolarni, transport vositalarini, yuklarni, tovarlarni, hayvonlarni va boshqa mulkni oʻzbek-turkman chegarasidan oʻtkazish tartibini takomillashtirish zaruratiga amal qilib,

noqonuniy migratsiya, qurol, narkotik vositalari, psixotrop moddalar va prekursorlari kontrabandasini aniqlash va oldini olish, shuningdek epidemiya va epizootiyalar tarqalishining oldini olish boʻyicha birgalikda va oʻz vaqtida choralar koʻrish maqsadida,

quyidagilar toʻgʻrisida kelishib oldilar:

Shaxslarning va transport vositalarining oʻzbek-turkman davlat chegarasini kesib oʻtishlari va shuningdek tovarlarni, hayvonlarni va boshqa mulklarni olib oʻtkazish uchun Tomonlar davlat chegarasidan xalqaro, ikki tomonlama va soddalashtirilgan, ushbu Bitimning ajralmas qismi hisoblanadigan ilovasida koʻrsatilgan oʻtkazish punktlarini (bundan keyin-oʻtkazish punktlari) oʻrnatadilar.

Xalqaro oʻtkazish punktlari shaxslarni, transport vositalarini, tovarlarni, yuklarni, hayvonlarni va boshqa mulkni oʻtkazishga xizmat qiladi.

Ikki tomonlama punktlar Tomonlar davlatlarining fuqarolarini, transport vositalarini, tovarlarini, yuklarini, hayvonlarini va boshqa mulkini oʻtkazishga xizmat qiladi.

Soddalashtirilgan oʻtkazish punktlari Tomonlar davlatlarining yayov yuruvchi fuqarolarini oʻzbek-turkman davlat chegarasidan oʻtkazish uchun xizmat qiladi.

Tomonlar davlatlarining fuqarolari Oʻzbekiston Respublikasi Hukumati bilan Turkmaniston Hukumati oʻrtasida 2004-yilning 19-noyabrida (Sandjar) Buxoro shahrida imzolangan fuqarolarning oʻzaro qatnovlari va chegara boʻyi viloyatlarida yashovchi fuqarolarga yengillashtirilgan qatnov tartibi toʻgʻrisida va chegara boʻyi viloyatlari hududida joylashgan xoʻjalik obyektlarida xizmat qiluvchi shaxslar tomonidan oʻzbek-turkman chegarasini kesib oʻtishlari toʻgʻrisidagi bitimlarida nazarda tutilgan shartlar asosida haqiqiy yoʻl hujjatlari bilan Bitimda koʻrsatilgan oʻtkazish punktlari orqali Tomonlar davlatlari hududiga (hududidan) kiradilar va chiqadilar.

Oʻtkazish punktlarining ishi (ish rejimi) Tomonlarning kelishuvlariga muvofiq ushbu Bitimning ilovasiga binoan, kechayu kunduz yoki sutkaning yorugʻ vaqti davomida amalga oshiriladi.

Ish rejimiga rioya etishni nazorat qilish va shuningdek fuqarolarni, transport vositalarini, tovarlarni, yuklarni, boshqa mulkni va hayvonlarni oʻtkazish tartibi Tomonlar davlatlarining vakolatli organlari kelishuviga koʻra oʻrnatiladi.

Fuqarolarning, transport vositalarining, yuklarning, tovarlarning, boshqa mulkning va hayvonlarning chegara, bojxona tomonidan nazorati va zarurat tugʻilganda nazoratning boshqa turlari (bundan keyin-nazorat) oʻtkazish punktlarida Tomonlar davlatlarining milliy qonunchiligiga va ular ishtirok etayotgan xalqaro shartnomalarga muvofiq amalga oshiriladi.

Oʻtkazish punktining tegishli faoliyatini taʼminlash uchun Tomonlardan har biri oʻz davlati hududida zarur infratuzilma yaratadi.

Yangi oʻtkazish punktlarini ochish, mavjudlarini bekitish (shu jumladan soddalashtirilgan oʻtkazish punktlari) yoki maqomini va ish rejimini oʻzgartirish Tomonlar diplomatik kanallari orqali kelishiladi va mazkur Bitimning ajralmas qismi hisoblanadigan bayonnomalar bilan rasmiylashtiradilar.

Mazkur Bitim kuchga kirgan sanadan 30 kun davomida Tomonlar uning qoidalarini amalga oshirish bilan bogʻliq vakolatli organlar va ularning vazifalari toʻgʻrisida bir-birlarini yozma ravishda diplomatik kanallar orqali xabardor qiladilar.

Tomonlar oʻz vaqtida bir-biriga diplomatik kanallar orqali vakolatli organlarining nomlari yoki ularning vazifalarida har qanday oʻzgartirishlar toʻgʻrisida xabar beradilar.

Mazkur Bitim qoidalarini amalga oshirish bilan bogʻliq masalalar boʻyicha vakolatli organlar bevosita birgalikda harakat qiladilar.

Tomonlar qaroriga koʻra, favqulodda hollarda (epidemiya, epizootiya, tabiiy ofat va h.k.), Tomonlar vaqtincha fuqarolarni, transport vositalarini, yuklarni, tovarlarni, boshqa mulkni va hayvonlarni chegara orqali oʻtkazishni toʻxtatib qoʻyishlari mumkin.

Bu holda bunday choralarni qoʻllagan Tomon oldindan, kechi bilan 24 soat ilgari, boshqa Tomonni bunday choralar qoʻllagani yoki bekor qilingani toʻgʻrisida xabardor qiladi.

Mazkur Bitim Tomonlarning oʻzlari ishtirokchi boʻlgan boshqa xalqaro shartnomalar boʻyicha huquq va majburiyatlariga daxl qilmaydi.

Tomonlarning oʻzaro kelishuviga koʻra mazkur Bitimga oʻzgartirish va qoʻshimchalar kiritilishi mumkin, ular alohida bayonnomalar koʻrinishida rasmiylashtiriladi va mazkur Bitimning ajralmas qismi boʻlib hisoblanadi.

Mazkur Bitim qoidalarini talqin qilish va qoʻllashda bahslar va kelishmovchiliklar paydo boʻlgan taqdirda Tomonlar ularni muzokaralar oʻtkazish yoʻli bilan hal qiladilar.

Mazkur Bitim uning kuchga kirishi uchun zarur boʻlgan davlat ichki protseduralarini Tomonlar bajarganliklari toʻgʻrisida oxirgi xabarnoma olingan kundan kuchga kiradi va 5 yil davomida amal qiladi. Agar tomonlardan biri navbatdagi besh yillik muddat tugunga qadar 6 oy ilgari boshqa Tomonni Bitim amalini toʻxtatish istagi borligi toʻgʻrisida yozma xabardor qilmasa, har safar uning amali navbatdagi 5 yil muddatga oʻz-oʻzidan uzayaveradi.

Ashxobod shahrida 2007-yil 18-oktabrda (Garashsizlik) ikki asl nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Mazkur Bitim qoidalarini talqin qilish uchun rus tilidagi matndan foydalaniladi.