Oʻzbekiston Respublikasi Hukumati bilan Belarus Respublikasi Hukumati, bundan keyin Tomonlar deb ataluvchilar,

ikki davlat va ularning xalqlari oʻrtasidagi doʻstona munosabatlarni yanada rivojlantirish maqsadida,

ikki davlat fuqarolarining oʻzaro qatnovlari rejimini tartibga solish istagiga amal qilib,

quyidagilar toʻgʻrisida ahdlashib oldilar:

Bir Tomon davlatining fuqarolari ushbu Bitimning Ilovasida sanab oʻtilgan, ularning shaxslari toʻgʻrisida guvohlik beruvchi va fuqaroliklarini tasdiqlovchi hujjatlar asosida boshqa Tomon davlatining hududiga vizasiz kirish, chiqish, unda boʻlish va tranzit harakatlanish huquqiga egadirlar.

Tomonlar davlatlarining fuqarolari chegarani kesib oʻtish uchun zarur boʻlgan protseduralarga amal qilgan holda, Tomonlar davlatlarining milliy qonun hujjatlariga muvofiq chegarani kesib oʻtish huquqini beruvchi amaldagi va rasmiylashtirilgan hujjatlar boʻyicha xalqaro oʻtkazish punktlari orqali uchinchi davlatlarga kirish, chiqish, unda boʻlish va tranzit harakatlanish huquqiga egadirlar.

Bir Tomon davlatining fuqarolari boshqa Tomon davlati hududida boʻlgan vaqtlarida bu Tomon davlatining qonun va qoidalariga, shu jumladan xorijiy fuqarolar uchun oʻrnatilgan roʻyxatdan oʻtish (vaqtincha propiska), boʻlish va harakatlanishning qoidalariga rioya etishga majburdirlar.

Tomonlarning har biri oʻz davlati hududiga boshqa Tomon davlati fuqarosining kirishini rad etish yoki boʻlish muddatini qisqartirish va bunda oʻz qarorining sababini izohlamaslik huquqiga ega.

Tomonlar ushbu Bitim kuchga kirgan sanadan boshlab oʻttiz (30) kun davomida diplomatik kanallar orqali ushbu Bitimning Ilovasida sanab oʻtilgan hujjatlarning namunalarini almashadilar.

Tomonlar yangi hujjatlar joriy qilingani yoki ushbu Bitim maqsadlarida foydalaniladigan hujjatlarga oʻzgartishlar kiritilgani toʻgʻrisida bir-birlarini diplomatik kanallar orqali xabardor qiladilar va ularning namunalarini bir-birlariga ular kuchga kirishidan kamida oʻttiz (30) kun ilgari yuboradilar.

Tomonlar diplomatik kanallar orqali xorijiy fuqarolarning kirishlari, chiqishlari, boʻlishlari tartibotiga doir amaldagi qonun hujjatlari toʻgʻrisida axborot va ushbu sohadagi boshqa axborotni almashadilar.

Tomonlar zaruratga koʻra ushbu Bitimni bajarish bilan bogʻliq masalalarni muhokama qilish maqsadida maslahatlashuvlar olib boradilar.

Ushbu Bitimning qoidalarini bajarish yoki qoʻllash davomida yuzaga keladigan kelishmovchilik yoxud bahsli masalalar Tomonlar oʻrtasida muzokaralar orqali hal qilinadi.

Tomonlarning kelishuvlariga koʻra ushbu Bitimga alohida bayonnomalar bilan rasmiylashtiriladigan va ushbu Bitimning ajralmas qismi hisoblanadigan hamda uning 10-moddasida nazarda tutilgan tartibda kuchga kiradigan oʻzgartish va toʻldirishlar kiritilishi mumkin.

Tomonlar davlat xavfsizligiga, jamoat tartibiga tahdid soladigan, tabiiy ofatlar, texnogen falokatlar yoki fuqarolarning sogʻliqlariga zararli hollarda ushbu Bitimning amal qilishini butunlay yoki qisman toʻxtatib quyish huquqiga egadirlar.

Ushbu Bitim amal qilishining toʻxtatilishi toʻgʻrisida, shuningdek uning amal qilishini qayta tiklash toʻgʻrisida bu qarorni qabul qilgan Tomon oldindan, lekin bunday qaror qabul qilingan paytdan boshlab 72 soatdan kechiktirmasdan bu toʻgʻrida boshqa Tomonni diplomatik kanallar orqali xabardor qiladi.

Ushbu Bitim Tomonlarning ular ishtirok etgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

Ushbu Bitim belgilanmagan muddatga tuzilgan va Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida oxirgi yozma xabarnoma olingan sanadan boshlab kuchga kiradi.

Tomonlarning har biri boshqa Tomonni diplomatik kanallar orqali yozma ravishda xabar qilgan holda ushbu Bitimning amal qilishini toʻxtatishi mumkin. Bu holda boshqa Tomon bunday xabarnomani olgandan soʻng toʻqson (90) kun oʻtgach Bitim amal qilishdan toʻxtaydi.

Toshkent shahrida 2005-yil 19-yanvarda ikki nusxada, har biri oʻzbek va rus tillarida tuzildi, bunda barcha matnlar bir xil kuchga ega.

Ushbu Bitimning qoidalarini talqin qilishda kelishmovchiliklar yuzaga kelgan holda, Tomonlar rus tilidagi matnga amal qiladilar.

Oʻzbekiston Respublikasi fuqarosining pasporti;

diplomatik pasport;

16 yoshga toʻlmagan Oʻzbekiston Respublikasi fuqarosining guvohnomasi;

havo kemasi ekipaji aʼzosining guvohnomasi (parvoz vazifasi qayd etilgan holda);

Oʻzbekiston Respublikasiga qaytishga guvohnoma (faqat Oʻzbekiston Respublikasiga qaytish uchun).

Belarus Respublikasi fuqarosining pasporti;

diplomatik pasport;

xizmat pasporti;

havo kemasi ekipaji aʼzosining uchish guvohnomasi (parvoz vazifasi qayd etilgan holda);

dengizchining shaxsiy milliy guvohnomasi (kema roli yoki undan olingan qaydnoma mavjud boʻlgan holda);

Belarus Respublikasiga qaytishga guvohnoma (faqat Belarus Respublikasiga qaytish uchun).