Oʻzbekiston Respublikasi Vazirlar Mahkamasining 2012-yil 16-martdagi 73-sonli “Chet elda koʻrgazma-yarmarka faoliyatini yanada rivojlantirish chora-tadbirlari toʻgʻrisida”gi qarorining (Oʻzbekiston Respublikasi qonun hujjatlari toʻplami, 2012-yil, 12-son, 131-modda) 4-bandiga muvofiq Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi va Iqtisodiyot vazirligi qaror qiladilar:

1. Chet elda oʻtkazilayotgan Oʻzbekistonning milliy koʻrgazma-yarmarkalari va xalqaro koʻrgazma-yarmarkalar doirasida qatnashishni tashkil etish va eksport kontraktlar tuzish ishlari natijalari boʻyicha mahalliy xoʻjalik yurituvchi subyektlarning mutaxassislarini ragʻbatlantirish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi Vazirlar Mahkamasining 2012-yil 16-martdagi 73-sonli “Chet elda koʻrgazma-yarmarka faoliyatini yanada rivojlantirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2012-yil, 12-son, 131-modda) muvofiq, chet elda oʻtkazilayotgan Oʻzbekistonning milliy koʻrgazma-yarmarkalari va xalqaro koʻrgazma yarmarkalar doirasida qatnashishni tashkil etish va eksport kontraktlar tuzish ishlari natijalari boʻyicha mahalliy xoʻjalik yurituvchi subyektlarning mutaxassislarini ragʻbatlantirish tartibini belgilaydi.

1. Chet elda oʻtkazilayotgan Oʻzbekistonning milliy koʻrgazma-yarmarkalari va xalqaro koʻrgazma-yarmarkalar doirasida qatnashishni tashkil etish va eksport kontraktlar tuzish ishlari natijalari boʻyicha mahalliy xoʻjalik yurituvchi subyektlarning mutaxassislarini ragʻbatlantirish pul mukofoti shaklida amalga oshiriladi.

2. Mahalliy xoʻjalik yurituvchi subyektlar tomonidan chet elda oʻtkazilayotgan Oʻzbekistonning milliy koʻrgazma-yarmarkalari va xalqaro koʻrgazma-yarmarkalar doirasida qatnashishni tashkil etish va eksport kontraktlar tuzish ishlari natijalari boʻyicha tuzilgan eksport kontraktlaridan tushgan mablagʻlar mukofotlash manbalari hisoblanadi.

3. Ragʻbatlantirish mahalliy xoʻjalik yurituvchi subyektlarning mutaxassislariga chet elda oʻtkazilgan Oʻzbekistonning milliy koʻrgazma-yarmarkalari va xalqaro koʻrgazma-yarmarkalar doirasida qatnashishni tashkil etish va eksport kontraktlar tuzish ishlari jarayonida faol ishtirok etganlik uchun belgilanadi.

4. Mahalliy xoʻjalik yurituvchi subyektlarning mutaxassislari chet elda oʻtkazilgan Oʻzbekistonning milliy koʻrgazma-yarmarkalari va xalqaro koʻrgazma-yarmarkalar doirasida qatnashishni tashkil etish va eksport kontraktlar tuzish ishlari natijalari boʻyicha eng kam oylik ish haqining 20 baravarigacha boʻlgan miqdorda ragʻbatlantiriladi va ragʻbatlantirish bir moliyaviy yil uchun faqat bir marta qoʻllaniladi. Ragʻbatlantirish uchun sarflangan xarajatlar mehnatga haq toʻlash xarajatlariga kiritiladi.

5. Quyidagilar mahalliy xoʻjalik yurituvchi subyektlarning mutaxassislarni ragʻbatlantirishning asosiy mezonlari hisoblanadi:

samarali reklama kampaniyasini ishlab chiqish va koʻrgazma stendini tashkil etish;

mahalliy mahsulotlarni eksport qilishda tashabbuskorlik, uyushqoqlik va qatʼiyatlilik bilan ishtirok etish;

chet elda oʻtkazilayotgan Oʻzbekistonning milliy koʻrgazma-yarmarkalari va xalqaro koʻrgazma yarmarkalarda qatnashishga yuqori darajada tayyorgarlik koʻrish;

eksport kontraktlari loyihalarini tayyorlash va amalda tuzish hamda mahsulotlar eksportini amalga oshirish jarayonida qoʻshgan hissasi.

6. Mukofotlarning aniq miqdori va chet elda oʻtkazilayotgan Oʻzbekistonning milliy koʻrgazma-yarmarkalari va xalqaro koʻrgazma-yarmarkalar doirasida imzolangan har bir eksport kontrakti boʻyicha ragʻbatlantiriladigan mutaxassislar xoʻjalik yurituvchi subyekt rahbarining buyrugʻi bilan rasmiylashtiriladi.

7. Mazkur Nizom Oʻzbekiston Respublikasi Savdo-sanoat palatasi bilan kelishilgan.