Terma jamoalar hamda ularning zaxirasini sport musobaqalariga tayyorlashni, shuningdek ularni moddiy jihatdan qoʻllab-quvvatlash tartibini yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining “Terma jamoalar hamda ularning zaxirasini sport musobaqalariga tayyorlashni, shuningdek ularni moddiy jihatdan qoʻllab-quvvatlash tartibini takomillashtirish chora-tadbirlari toʻgʻrisida” 2011-yil 27-apreldagi 121-son qaroriga (Oʻzbekiston Respublikasi QT, 4-son, 29-modda) ilovaga muvofiq oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

1. Terma jamoalar hamda ularning zaxirasi sportchilari va trenerlarining energiya sarflarini qoplashga va jismoniy resurslarini tiklash uchun maqsadli pul (moliyaviy) mablagʻlarini sarflash tartibi toʻgʻrisida Nizomda:

a) 13-bandning birinchi xatboshi quyidagi tahrirda bayon qilinsin:

“13. Qoplashning har kunlik normasi miqdori terma jamoalar va ularning zaxirasi sportchilari va trenerlari uchun terma jamoalar sportchilari uchun oʻrtacha sutkalik ovqatlanish normalarining shakllanayotgan qiymati hisob-kitobidan kelib chiqib, tegishli moliyaviy yilning 1-yanvarida amalda boʻlgan eng kam oylik ish haqiga foizlarda, biroq eng kam oylik ish haqining 40 foizidan ortiq boʻlmagan miqdorda har yili 15-yanvargacha Oʻzbekiston Respublikasi Madaniyat va sport ishlari vazirligi tomonidan tasdiqlanadi”;

b) 14-bandga quyidagi mazmundagi xatboshi qoʻshilsin:

“Qaytarilgan summa Komissiyaning qarori boʻyicha terma jamoalar va ularning zaxirasi sportchilari va trenerlariga qoplashning kundalik normalari toʻlovi uchun qayta taqsimlanadi”;

v) Nizomga ilova chiqarib tashlansin.

2. Sport va ommaviy-jismoniy tarbiya tadbirlarini oʻtkazish hamda ular ishtirokchilarining moddiy taʼminoti normalarini belgilash tartibi toʻgʻrisidagi Nizomda:

a) 4-bandga “Respublika” soʻzidan oldin “Hududiy” soʻzi qoʻshilsin;

b) 5-bandga “Respublika” soʻzidan oldin “Hududiy” soʻzi qoʻshilsin;

v) Nizomga 1-ilovada:

1-bandda:

birinchi xatboshi quyidagi tahrirda bayon qilinsin:

“1. Oʻzbekiston Respublikasi hududida oʻtkaziladigan sport va ommaviy-jismoniy tarbiya tadbirlari qatnashchilariga ovqatlanishni qoplashga xarajatlarning kundalik normalari har yili 5-yanvargacha vakolatli organlar tomonidan tegishli moliyaviy yilning 1-yanvarida amalda boʻlgan eng kam oylik ish haqiga foizlarda, biroq eng kam oylik ish haqining 40 foizidan ortiq boʻlmagan miqdorda belgilanadi”;

quyidagi mazmundagi ikkinchi xatboshi qoʻshilsin:

“Sport va ommaviy-jismoniy tarbiya tadbirlari qatnashchilarining ovqatlanishi bilan bogʻliq xarajatlar tegishli moliyaviy yilga vakolatli organlarning xarajatlar smetasida sport va ommaviy-jismoniy tarbiya tadbirlarini oʻtkazish uchun nazarda tutilgan mablagʻlar hisobiga va ular doirasida qoplanadi”;

ikkinchi xatboshi uchinchi xatboshi deb hisoblansin;

“Bir kunga ovqatlanishning oʻrtacha sutkalik normalari” jadvali chiqarib tashlansin;

g) Nizomga 3-ilovada:

3-band quyidagi tahrirda bayon qilinsin:

“3. Ommaviy tusdagi sport va ommaviy-jismoniy tarbiya tadbirlarida (festivallar, spartakiadalar, kompleks sport musobaqalari, nogironlar, aqlan zaif sportchilar oʻrtasidagi musobaqalar, aholi, sport faxriylari oʻrtasidagi sport tadbirlari va shu kabilarda) musobaqalar qatnashchilarining sportdagi faoliyatini ragʻbatlantirish maqsadida 1, 2, 3-oʻrinlar uchun sovgʻa mukofotlariga qoʻshimcha ravishda, oʻtkaziladigan sport yoki ommaviy jismoniy tarbiya tadbirlari toʻgʻrisidagi tasdiqlangan nizomlarda nazarda tutilgan nominatsiyalar boʻyicha alohida sovgʻalar taʼsis etilishi mumkin”;

4-bandda:

“a” kichik banddagi “4 baravarigacha” soʻzlari “2 baravarigacha” soʻzlari bilan almashtirilsin;

“b” kichik banddagi “6 baravarigacha” soʻzlari “3 baravarigacha” soʻzlari bilan almashtirilsin;

“v” kichik banddagi “8 baravarigacha” soʻzlari “4 baravarigacha” soʻzlari bilan almashtirilsin.