Oʻzbekiston Respublikasi Vazirlar Mahkamasining 1998-yil 13-maydagi 203-son “Oʻzbekiston Respublikasida umumiy oʻrta taʼlimni tashkil etish toʻgʻrisida”gi, 2004-yil 5-avgustdagi 372-son “Oʻzbekiston Respublikasi Xalq taʼlimi vazirligi faoliyatini takomillashtirish toʻgʻrisida”gi (Oʻzbekiston Respublikasi qonun hujjatlari toʻplami, 2004-yil, 31-son, 356-modda) hamda 2007-yil 25-oktabrdagi 225-son “Maktabgacha taʼlim sohasidagi normativ-huquqiy hujjatlarni tasdiqlash toʻgʻrisida”gi (Oʻzbekiston Respublikasi qonun hujjatlari toʻplami, 2007-yil, 43-son, 431-modda) qarorlariga muvofiq buyuraman:

1. Xalq taʼlimi muassasasining Vasiylik kengashi toʻgʻrisidagi namunaviy nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi Vazirlar Mahkamasining 1998-yil 13-maydagi 203-son “Oʻzbekiston Respublikasida umumiy oʻrta taʼlimni tashkil etish toʻgʻrisida”gi, 2004-yil 5-avgustdagi 372-son “Oʻzbekiston Respublikasi Xalq taʼlimi vazirligi faoliyatini takomillashtirish toʻgʻrisida”gi (Oʻzbekiston Respublikasi qonun hujjatlari toʻplami, 2004-y., 31-son, 356-modda) hamda 2007-yil 25-oktabrdagi 225-son “Maktabgacha taʼlim sohasidagi normativ-huquqiy hujjatlarni tasdiqlash toʻgʻrisida”gi (Oʻzbekiston Respublikasi qonun hujjatlari toʻplami, 2007-y., 43-son, 431-modda) qarorlariga muvofiq, Vasiylik kengashining (keyingi oʻrinlarda Kengash deb yuritiladi) maqsad va vazifalari, huquq va majburiyatlari hamda uning faoliyatini tashkil etish tartibini belgilaydi.

1. Mazkur Nizom davlat budjeti mablagʻlari hisobidan moliyalashtiriladigan xalq taʼlimi muassasalariga (maktabgacha taʼlim, umumiy oʻrta taʼlim, maktabdan tashqari taʼlim) (keyingi oʻrinlarda taʼlim muassasasi deb yuritiladi) nisbatan tatbiq etiladi.

2. Kengash har bir taʼlim muassasasida jamoatchilik asosida taʼlim-tarbiya jarayonlarini qoʻllab-quvvatlash hamda unga moliyaviy va huquqiy sohalarda koʻmaklashish uchun tashkil etiladi. Kengash yuridik shaxs hisoblanmaydi.

3. Kengash oʻz faoliyatini Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining qarorlari, farmonlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlari hamda boshqa qonun hujjatlari, shuningdek taʼlim muassasasining Ustavi hamda mazkur Nizom asosida amalga oshiradi.

4. Kengashning maqsadlari quyidagilardan iborat:

taʼlim muassasasida oʻquvchilar (tarbiyalanuvchilar)ning toʻlaqonli taʼlim-tarbiya olishlari uchun qulay sogʻlom muhitni yaratish;

taʼlim muassasasining oʻquv va moddiy-texnik bazasini mustahkamlash, uning faoliyatini rivojlantirishga koʻmaklashish;

taʼlim muassasasi oʻquvchilari (tarbiyalanuvchilari)ning oʻqishi va maʼnaviy-maʼrifiy, madaniy hamda sport tadbirlarida ishtirok etishlari uchun shart-sharoitlarni yaxshilashda taʼlim muassasasi rahbariyati bilan hamkorlik qilish;

taʼlim muassasasida darsdan tashqari mashgʻulotlarni tashkil etish va takomillashtirishga koʻmaklashish.

5. Quyidagilar Kengashning asosiy vazifalari hisoblanadi:

taʼlim-tarbiya ishlarini shaxs, jamiyat va davlat manfaatlarini koʻzlagan holda amalga oshirishda, shuningdek oʻquvchilar (tarbiyalanuvchilar)ning har tomonlama kamol topishi uchun shart-sharoitlarni yaxshilashda taʼlim muassasasiga koʻmak va tavsiyalar berish;

homiylik mablagʻlari hisobidan taʼlim muassasasini moddiy-texnika bazasini rivojlantirish, uning binosini taʼmirlash va hududini obodonlashtirishga koʻmaklashish;

homiylik mablagʻlarini taʼlim muassasasida ijodkor va iqtidorli oʻquvchilarni (fan olimpiadalari, sport musobaqalari, turli koʻrik-tanlovlar gʻoliblarini) ragʻbatlantirish ishlariga yoʻnaltirish boʻyicha taʼlim muassasasi rahbariyatiga tavsiyalar berish;

oʻquvchilar (tarbiyalanuvchilar) bilan turli ommaviy tadbirlar, sayohatlar, uchrashuvlar, sport-sogʻlomlashtiruvchi tadbirlarni tashkil etish va oʻtkazishda taʼlim muassasasi rahbariyatiga koʻmaklashish.

Kengash qonun hujjatlariga muvofiq boshqa vazifalarni ham amalga oshirishi mumkin.

6. Taʼlim muassasasi rahbariyati tomonidan Kengashni tashkil etish boʻyicha yigʻilish oʻtkazilishidan oʻn kun oldin yigʻilish oʻtkazish sanasi, vaqti va joyi toʻgʻrisida eʼlon, shuningdek mazkur Nizomning nusxasi barchaning tanishib chiqishi uchun taʼlim muassasasida osib qoʻyiladi.

7. Kengash yetti kishidan kam boʻlmagan toq sondan iborat tarkibda oʻquvchilar (tarbiyalanuvchilar)ning ota-onalari (qonuniy vakillari), taʼlim muassasasi faoliyatini rivojlantirishga katta hissa qoʻshgan faxriylar bilan oʻtkaziladigan umumiy yigʻilishda barcha aʼzolarining teng huquqliligi asosida tashkil etiladi. Kengash tarkibi aʼzolarining soni cheklanmaydi.

Kengash tarkibiga taʼlim muassasasi faoliyatiga ulkan hissa qoʻshib kelayotgan jismoniy va yuridik shaxslarning, shu jumladan, fuqarolar oʻzini oʻzi boshqarish organlari va jamoat tashkilotlarining vakillari kirishi mumkin.

8. Kengash aʼzolarining roʻyxati uning birinchi Umumiy yigʻilishida tuziladi, Kengash raisi, uning oʻrinbosari va kotib saylangandan soʻng Kengash qarori bilan tasdiqlanadi.

9. Kengash har yili rais, rais oʻrinbosari, kotib va kengash aʼzolaridan iborat tarkibda shakllantiriladi.

Taʼlim muassasasi rahbari, uning oʻrinbosarlari hamda ularning yaqin qarindoshlari Kengash aʼzolari boʻlishi mumkin emas.

10. Kengash raisi, uning oʻrinbosari va kotib Kengash aʼzolarining koʻpchilik ovozi bilan saylanadi.

11. Kengash raisi va uning oʻrinbosari oʻz navbatida taʼlim muassasasining pedagogik kengashi aʼzosi hisoblanadi.

12. Kengash kotibi Kengash hujjatlarini yuritish va saqlashni taʼminlaydi.

13. Kengash quyidagi huquqlarga ega:

Kengash raisi, uning oʻrinbosarini va kotibni saylash;

Kengash faoliyatining asosiy yoʻnalishlarini belgilash;

homiylik mablagʻlaridan foydalanish yoʻnalishlarini belgilash hamda uning ijrosi boʻyicha har chorakda taʼlim muassasasi hisobchisining hisobotini eshitish;

yuridik va jismoniy shaxslar tomonidan koʻrsatilayotgan homiylik mablagʻlarini belgilangan tartibda taʼlim muassasasining gʻaznachilikda ochilgan hisob raqamiga kirim qilinishini nazorat qilish;

har chorakda Kengash raisining Kengash faoliyati yuzasidan hisobotini eshitish va tasdiqlash;

Kengash tomonidan qabul qilingan qarorlar ijrosini, shuningdek homiylik mablagʻlari hisobiga amalga oshirilgan ishlarning bajarilishi ustidan jamoatchilik nazoratini amalga oshirish;

taʼlim muassasasi ichki tartib qoidalarini ishlab chiqishda ishtirok etish, shuningdek pedagogik kengashga tegishli taklif va mulohazalar kiritish;

yakuniy davlat attestatsiyasi jarayonida jamoatchilik asosida kuzatuvchi sifatida ishtirok etish;

maktabgacha taʼlim muassasalarida moliyaviy yil boshlangunga qadar Kengash yigʻilishi bayonnomasiga asosan toʻlovlardan ozod qilinadigan kam taʼminlangan oilalarning bolalari (tarbiyalanuvchilar) roʻyxatini tasdiqlashda ishtirok etish;

Kengash qonun hujjatlariga muvofiq boshqa huquqlarga ham ega boʻlishi mumkin.

Quyidagilar Kengashning majburiyatlari hisoblanadi:

har chorakda oʻz faoliyati toʻgʻrisida pedagogik kengashga hisobot taqdim etish;

taʼlim muassasasida muammoli masalalar yechimini topishda oʻz vakolatlari doirasida koʻmaklashish;

Kengash zimmasiga qonun hujjatlariga muvofiq boshqa majburiyatlar ham yuklatilishi mumkin.

14. Umumiy yigʻilish Kengashning oliy boshqaruv organi hisoblanadi. Umumiy yigʻilish Kengash faoliyatining barcha yoʻnalishlari boʻyicha qarorlar qabul qiladi.

15. Umumiy yigʻilish har chorakda kamida bir marta chaqiriladi. Umumiy yigʻilish uning aʼzolarining uchdan bir qismining tashabbusiga koʻra navbatdan tashqari chaqirilishi mumkin.

16. Kengash kotibi umumiy yigʻilish oʻtkazilishidan kamida uch kun oldin bu haqda barchaning tanishib chiqishi uchun taʼlim muassasasiga kirish joyida eʼlon osib qoʻyadi. Umumiy yigʻilish chaqirilganda Kengash kotibi uning barcha aʼzolarini xabardor qiladi.

17. Umumiy yigʻilishda Kengash aʼzolaridan tashqari oʻquvchilar (tarbiyalanuvchilar)ning ota-onalari (qonuniy vakillari), taʼlim muassasasi rahbari, uning oʻrinbosarlari, pedagog xodimlar, jamoatchilik vakillari kuzatuvchi sifatida ishtirok etishlari mumkin. Ular yigʻilishda muhokama qilinayotgan barcha masalalar yuzasidan oʻz taklif va mulohazalarini bildirishlari mumkin.

18. Umumiy yigʻilish uning aʼzolarining uchdan ikki qismi ishtirok etganida qaror qabul qilish uchun vakolatli hisoblanadi. Umumiy yigʻilishda qarorlar koʻpchilikning ochiq ovoz berishi orqali qabul qilinadi. Kengash aʼzolarining ovozlari teng kelib qolganda, Kengash raisining ovozi hal qiluvchi hisoblanadi. Taʼlim muassasasining pedagog xodimlari va boshqa kuzatuvchilar ovoz berishda ishtirok etish huquqiga ega emas.

19. Umumiy yigʻilish qarori bayonnoma bilan rasmiylashtiriladi va Kengash raisi, uning oʻrinbosari, kotib hamda aʼzolari tomonidan imzolanadi. Bayonnomada uning sanasi, yigʻilishda ishtirok etgan Kengash aʼzolarining familiyasi, ismi va otasining ismi, ovoz berish natijalari hamda qabul qilingan yakuniy qaror koʻrsatiladi.

20. Kengash aʼzolari roʻyxatini tasdiqlash toʻgʻrisidagi qaror, shuningdek Kengash tomonidan qabul qilingan boshqa qarorlar va hisobotlar uch nusxada qabul qilinadi. Uning bir nusxasi Kengash kotibida, ikkinchisi taʼlim muassasasi rahbarida saqlanadi, uchinchisi esa, barchaning tanishib chiqishi uchun oʻqituvchilar xonasiga osib qoʻyiladi.

21. Taʼlim muassasasi tomonidan umumiy yigʻilishni oʻtkazish, shuningdek Kengash hujjatlarini saqlash uchun alohida xona taʼlim muassasalarida imkoniyatdan kelib chiqqan holda ajratiladi.

22. Taʼlim muassasasining rahbari umumiy yigʻilish tomonidan qabul qilingan qarorlar ijrosini taʼminlash uchun masʼuldir.

23. Kengash kotibi umumiy yigʻilishni oʻtkazish uchun zarur hujjatlarni raisning topshirigʻiga koʻra tayyorlaydi.

Umumiy yigʻilish tomonidan Kengashning alohida faoliyat yoʻnalishlari boʻyicha tegishli komissiyalari tuzilishi mumkin.

24. Taʼlim muassasasida oʻquvchilar (tarbiyalanuvchilar) va ularning ota-onalari (qonuniy vakillari)dan turli xil sabablar bilan taʼlim muassasasi rahbariyati va boshqa xodimlari (sinf rahbarlari, oʻqituvchilar, tarbiyachi, tarbiyachi-yordamchilar va toʻgarak rahbarlari) tomonidan pul mablagʻlarini yigʻish qatʼiyan taqiqlanadi.

Ota-onalar taʼlim muassasasida pul mablagʻlarining yigʻilishi holatlari haqida ogʻzaki yoki yozma ravishda bevosita Kengashga murojaat qilishi mumkin. Bunday holat yuz bergan taqdirda, Kengash tomonidan Xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining rahbar xodimlari ishtirokida muhokama etiladi hamda aybdor shaxslarni qonun hujjatlarida belgilangan tartibda javobgarlikka tortish choralari koʻriladi.

25. Kengash har chorakda taʼlim muassasasining umumiy ota-onalar yigʻilishida oʻz faoliyati va oʻquvchilar (tarbiyalanuvchilar)ni kasb-hunarga yoʻnaltirish ishlari toʻgʻrisida hisobot beradi.

26. Mazkur Nizom Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi, Oʻzbekiston Kasaba uyushmalari Federatsiyasi Kengashi bilan kelishilgan.