Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi (Oʻzbekiston Respublikasi Oliy Majlisining Axborotnomasi, 1995-y., 12-son, 247-modda), “Banklar va bank faoliyati toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-y., 5-6-son, 54-modda) qonunlariga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2004-yil 1-martdagi 563-son qarori (roʻyxat raqami 1337, 2004-yil 16-aprel) (Oʻzbekiston Respublikasi qonun hujjatlari toʻplami, 2004-y., 15-son, 182-modda) bilan tasdiqlangan “Tijorat banklari tomonidan fermer xoʻjaliklariga boʻlgʻusi hosilni garovga olgan holda kredit berish tartibi toʻgʻrisida”gi nizomga ilovaga muvofiq oʻzgartirishlar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. 5-bandning beshinchi xatboshisidagi “SFU (Suvdan foydalanuvchilar uyushmasi)” degan soʻzlar “SIU (suv isteʼmolchilari uyushmalari)” degan soʻzlar bilan almashtirilsin.

2. 6-bandning beshinchi xatboshisidagi “Davlat soliq xizmatining mahalliy (tuman) idorasi tomonidan tasdiqlangan” degan soʻzlar “tuman (shahar) davlat soliq inspeksiyasi tomonidan qabul qilingan” degan soʻzlar bilan almashtirilsin.

3. 11-band quyidagi tahrirda bayon etilsin:

“11. Berilgan kreditlar 13301 — “Davlat ehtiyojlari uchun xarid qilinadigan gʻallani yetishtirish uchun berilgan qisqa muddatli kreditlar” va 14301 — “Davlat ehtiyojlari uchun xarid qilinadigan paxta xomashyosini yetishtirish uchun berilgan uzoq muddatli kreditlar” balans hisobvaraqlarida hisobga olinadi.”.

4. 12-band quyidagi tahrirda bayon etilsin:

“12. Alohida ssuda hisobvaraqlari boʻyicha berilgan kreditlar kredit boʻlimining farmoyishiga binoan muddatli majburiyatlar bilan rasmiylashtiriladi, ular toʻliq soʻndirilgunga qadar kreditlash muddatlariga bogʻliq holda 91901 — “Qarzdorlarning qisqa muddatli kreditlar boʻyicha majburiyatlari”, 91905 — “Qarzdorlarning uzoq muddatli kreditlar va lizinglar boʻyicha majburiyatlari” deb nomlangan hisobvaraqlarida hisobga olinadi.”.

5. 17-band quyidagi tahrirda bayon etilsin:

“17. Qarzdorning asosiy talab qilib olinguncha depozit hisobvaragʻida hisoblangan foizlar va kredit qoldigʻini undirish uchun mablagʻlar yetarli boʻlmagan taqdirda qarzdorlik Xoʻjalik yurituvchi subyektlarning bank hisobvaraqlaridan pul mablagʻlarini hisobdan chiqarish tartibi toʻgʻrisidagi yoʻriqnomada (roʻyxat raqami 2342, 2012-yil 15-mart) (Oʻzbekiston Respublikasi qonun hujjatlar toʻplami, 2012-y., 11-son, 127-modda) belgilangan tartibda undiriladi. Kreditlarni qaytarishda birinchi navbatda foizlar undiriladi.”.

6. Mazkur oʻzgartirishlar Oʻzbekiston Respublikasi Moliya vazirligi, Qishloq va suv xoʻjaligi vazirligi, Davlat mulkini boshqarish davlat qoʻmitasi, Yer resurslari, geodeziya, kartografiya va davlat kadastri davlat qoʻmitasi hamda Oʻzbekiston fermer xoʻjaliklari uyushmasi bilan kelishilgan.