Yoʻlovchilarni avtomobilda tashish xavfsizligini taʼminlash, odamlar hayoti va sogʻligʻini, avtovokzal va avtostansiyalarning texnologik kompleksi obyektlarini noqonuniy aralashuv harakatlaridan muhofaza qilish hamda yoʻlovchilarning avtomobil transportida xizmat koʻrsatish xavfsizligi darajasini oshirish maqsadida Oʻzbekiston Respublikasi Ichki ishlar vazirligi va Oʻzbekiston avtomobil va daryo transporti agentligi qaror qiladi:

1. Avtovokzallar va avtostansiyalar hududiga yoʻlovchilar va boshqa shaxslarni kiritish tartibi toʻgʻrisidagi yoʻriqnoma ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Yoʻriqnoma avtotransport vositalarida yoʻlovchilar tashish xavfsizligini taʼminlash, odamlarning hayoti va sogʻligʻini hamda avtovokzallar va avtostansiyalar obyektlarini noqonuniy xatti-harakatlardan himoya qilish maqsadida yoʻlovchilar va boshqa shaxslarning qoʻl yukini, bagajini va oʻzini nazoratdan oʻtkazish tartibini, shuningdek nazoratdan oʻtkazish vakolatiga ega boʻlgan shaxslarning huquq va majburiyatlarini belgilaydi.

1. Mazkur Yoʻriqnomada quyidagi tushunchalardan foydalaniladi:

avtovokzal – yirik shaharlarning xalqaro, shaharlararo va shahar atrofi yoʻnalishlari boʻyicha yoʻlovchilar uchun xizmat koʻrsatishga hamda ularga xizmat koʻrsatuvchi xodimlarni joylashtirishga moʻljallangan zaruriy xizmat, madaniy-maishiy va sanitariya-gigiyenik binolarni, yoʻlovchilarni avtotransport vositalarga chiqarish va tushirish, shuningdek avtotransport vositalarini qabul qilish va joʻnatishga moʻljallangan perronlarni, reyslar oraligʻida avtotransport vositalari toʻxtab turishi uchun maydonchalarni, avtotransport vositalarini texnik koʻrikdan oʻtkazish va tozalash uchun postlarni, shahar, shahar atrofi avtotransport vositalari kelib toʻxtashi va yoʻlovchilarni turishi uchun avtovokzal oldi maydoni, haydovchilarni reys oldi tibbiy koʻrikdan oʻtkazish xonasini oʻz ichiga qamrab oluvchi inshootlar majmuasi;

avtostansiya – avtotransport vositalarini qabul qilish va joʻnatish, yoʻlovchilarni avtotransport vositalariga chiqarish va tushirish, ularga xizmat koʻrsatish va xizmat koʻrsatuvchi xodimlarni joylashtirish, odatda, shaharlararo va shahar atrofi yoʻnalishlarida qatnovchi yoʻlovchilarga xizmat koʻrsatish uchun moʻljallangan, sanitariya-gigiyena inshootlari, reyslar oraligʻida avtotransport vositalari toʻxtab turishi uchun moʻljallangan xonalar bilan jihozlangan inshoot;

nazoratdan oʻtkazish vakolatiga ega boʻlgan shaxslar – ichki ishlar organlarining xodimlari hamda avtovokzallar va avtostansiyalar maʼmuriyati tomonidan tayinlangan nazoratchilar.

2. Avtovokzallar va avtostansiyalar hududiga yoʻlovchilar va boshqa shaxslarni kiritish nazoratdan oʻtkazish orqali amalga oshiriladi.

3. Yoʻlovchilar va boshqa shaxslarga mazkur Yoʻriqnomaning ilovasida nazarda tutilgan xavfli moddalar va buyumlarni avtovokzallar va avtostansiyalar hududiga olib kirish va ularni avtotransport vositalarida tashish taqiqlanadi.

4. Avtovokzallar va avtostansiyalar maʼmuriyati avtotransport vositalarida tashish taqiqlangan xavfli moddalar va buyumlar, nazorat qilinadigan hududda yurish-turish qoidalari, nazoratdan oʻtkazish vakolatiga ega boʻlgan shaxslarning huquq va majburiyatlari toʻgʻrisidagi maʼlumotlarni yoʻlovchilar va boshqa shaxslarga tezkorlik bilan xabardor qilish borasidagi ishlarni tashkil etadi.

5. Yoʻlovchilar va boshqa shaxslarni mazkur Yoʻriqnomaning 4-bandida koʻrsatilgan maʼlumotlar bilan xabardor qilish borasidagi ishlar:

avtovokzallar va avtostansiyalarning oldi maydonida oʻrnatilgan koʻrgazmali maʼlumotlar, plakatlar, yoritqichli tablolar orqali;

maʼlumotlar byurosida berilgan savollarga javob berish orqali;

radiouzatish tarmogʻi orqali amalga oshiriladi.

6. Yoʻlovchilar va boshqa shaxslarning qoʻl yukini, bagajini va oʻzini nazoratdan oʻtkazish quyidagi tartibda amalga oshiriladi:

avtovokzallar va avtostansiyalar hududiga kiruvchi yoʻlovchilar va boshqa shaxslar nazoratdan oʻtkazish punkti orqali oʻtadilar, bu yerda ularga mavjud metall buyumlari, avtotransport vositalarida qoʻl yuki va bagaj shaklida tashish taqiqlangan xavfli moddalar va buyumlar, shuningdek tashish uchun berilgan oʻzga shaxslarning ashyolari (joʻnatmalar, banderollar, tugunlar, paketlar va shu kabilar) toʻgʻrisida maʼlumot berish taklif etiladi;

nazoratdan oʻtkazilayotgan shaxsga kiyimdagi mavjud metall buyumlarni (portsigar, kalitlar, folgali pachkalardagi sigaretlar, tangalar va shu kabilarni) nazarda tutilgan idishga qoʻyish va odamlarning toʻplanib qolishiga yoʻl qoʻymay navbati bilan turgʻun metall detektor ramkasi orqali oʻtish taklif etiladi, metall buyumlar mavjudligi toʻgʻrisida signal tushgan taqdirda qoʻlda ishlatiladigan metall detektor qoʻllaniladi, u boʻlmaganda esa – belgilangan tartibda shaxsiy koʻzdan kechiriladi;

nogabarit buyumlar, yoʻlovchilar va boshqa shaxslarning qoʻlidagi ustki kiyimlar va ichida nimalar borligini metall detektor bilan aniqlab boʻlmaydigan qoʻl yuki va bagaji qoʻlda koʻzdan kechiriladi;

qidiruvdagi shaxslarni aniqlash va ushlash maqsadida koʻzdan kechirilayotganlarning pasportga oid maʼlumotlari tanlab tekshiriladi, shuningdek shubhali shaxslar shaxsan koʻzdan kechiriladi;

texnik sabablarga koʻra turgʻun metall detektordan foydalanish mumkin boʻlmagan holatda shaxslarni, shuningdek ularning qoʻl yuki va bagajini koʻzdan kechirish shaxsan koʻzdan kechirib chiqish yoʻli bilan qoʻlda ishlatiladigan metall detektor yordamida amalga oshiriladi.

Zarurat boʻlganda nazoratdan oʻtkazish xizmat itlaridan foydalangan holda amalga oshiriladi.

7. Yurak faoliyatini ragʻbatlantiruvchi implantirlangan apparatlarga ega boʻlgan yoʻlovchilar va boshqa shaxslar maxsus texnik vositalar qoʻllanilmasdan qoʻlda yoki shaxsan koʻzdan kechiriladi.

8. Yoʻlovchilar va boshqa shaxslarning yonidagi qoʻl yuki va bagajini nazoratdan oʻtkazish ular ishtirokida amalga oshiriladi.

9. Nazoratdan oʻtkazishdan bosh tortgan yoʻlovchilar va boshqa shaxslar avtovokzallar va avtostansiyalar hududiga kiritilmaydi.

10. Avtotransport vositalarida uy hayvonlari, parrandalar boshqa vakillarini tashiydigan yoʻlovchilar tegishli veterinariya maʼlumotnomalariga, shuningdek ular tashiladigan qafaslar yoki boshqa moslamalarga ega boʻlishlari kerak.

11. Shaxslarni tanlab shaxsiy koʻzdan kechirish buning uchun maxsus jihozlangan xonalarda:

tayyorlanayotgan noqonuniy aralashish harakati toʻgʻrisida xabar kelgan;

koʻzdan kechirilayotgan shaxsda yoʻlovchilar va boshqa shaxslarga avtotransport vositalarida qoʻl yuki va bagaj shaklida tashish taqiqlangan xavfli moddalar va buyumlar mavjudligi toʻgʻrisida xabar olingan;

koʻzdan kechirilayotgan shaxsning yuk xatida yoʻlovchilar va boshqa shaxslarga avtotransport vositalarida qoʻl yuki va bagaj shaklida tashish taqiqlangan xavfli moddalar va buyumlar aniqlangan;

nazoratdan oʻtkazish vakolatiga ega boʻlgan shaxslar tomonidan shaxsan kuzatish yoʻli bilan koʻzdan kechirilayotgan shaxsning shubhali oʻzini tutishi va xatti-harakatlari belgilari, balkim uning jinoiy niyatlaridan dalolat beruvchi yoki unda yoʻlovchilar va boshqa shaxslarga avtotransport vositalarida qoʻl yuki va bagaj shaklida tashish taqiqlangan xavfli moddalar va buyumlar boʻlishi mumkinligi toʻgʻrisida shubha tugʻdiruvchi belgilar aniqlangan hollarda amalga oshiriladi.

12. Shaxslarni shaxsiy koʻzdan kechirish Oʻzbekiston Respublikasining Maʼmuriy javobgarlik toʻgʻrisidagi kodeksining (Oʻzbekiston Respublikasi Oliy Kengashining Axborotnomasi, 1995-yil, 3-son) 289-moddasiga muvofiq va yoʻlovchilar va boshqa shaxslarga avtotransport vositalarida qoʻl yuki va bagaj shaklida tashish taqiqlangan xavfli moddalar va buyumlarni aniqlash uchun zarur boʻlgan doirada amalga oshiriladi.

13. Nazoratdan oʻtkazish vakolatiga ega boʻlgan shaxslar:

nazorat qilinadigan hududga kirgan yoʻlovchilar va boshqa shaxslardan ushbu Yoʻriqnoma talablarini soʻzsiz bajarishni talab qilish;

nazorat hududiga kirgan yoʻlovchilar va boshqa shaxslarda nazoratdan oʻtkazish jarayonida aniqlangan yoʻlovchilarning avtotransport vositalarida tashish taqiqlangan qoʻl yuki va bagaj shaklidagi xavfli moddalar va buyumlarni ichki ishlar organlari xodimlari tomonidan olib qoʻyish bayonnomasi tuzilgan holda (nusxasi yoʻlovchini qoʻliga beriladi) belgilangan tartibda olib qoʻyish;

zaruriyat boʻlganda, noqonuniy aralashish harakatini yoki boshqa jinoiy harakatlarni sodir etish niyatidagi shaxslar uchun xarakterli boʻlgan bir qancha oʻzini tutish belgilari boʻyicha potensial xavfli shaxslarni aniqlash maqsadida nazoratdan oʻtkazilayotganlarni psixologik soʻrov oʻtkazish;

Oʻzbekiston Respublikasi Ichki ishlar vazirligining axborot-izlash maʼlumotlar bazalari boʻyicha shubhali shaxslarni tekshirish;

ayrim shaxslar tomonidan qurol-yarogʻ, patronlar va oʻqlarni tashishning belgilangan tartibiga rioya qilinishi ustidan nazorat qilish;

zaruriyat boʻlganda, nazorat qilinadigan butun hududini koʻzdan kechirib chiqish huquqiga ega.

14. Nazoratdan oʻtkazish vakolatiga ega boʻlgan shaxslar:

ushbu Yoʻriqnoma, avtovokzallar va avtostansiyalarda yoʻlovchilar xavfsizligini taʼminlashga, fuqarolarning hayoti, sogʻligʻi va huquqlarini muhofaza qilishga qaratilgan qonun hujjatlari talablariga rioya qilishga;

nazoratdan oʻtkazilayotgan yoʻlovchilar va boshqa shaxslarga nisbatan hushyor, eʼtiborli va iltifotli munosabatda boʻlishga hamda ularning shaʼni va qadr-qimmatini kamsituvchi harakatlarga yoʻl qoʻymaslikka;

nazoratdan oʻtkazilayotgan yoʻlovchilar va boshqa shaxslarga oʻzlarida boʻlishi mumkin boʻlgan qoʻl yuki va bagaj shaklida tashish taqiqlangan xavfli moddalar va buyumlarni ixtiyoriy ravishda koʻrsatishni taklif etishga;

nazoratdan oʻtkazish sababli yoʻlovchilar va boshqa shaxslarning asossiz ravishda ushlanib qolishiga yoʻl qoʻymaslikka;

qoida buzilishiga barham berilishi choralarini koʻrishga;

nazoratdan oʻtkazishdan bosh tortgan yoʻlovchilar va boshqa shaxslarni nazorat qilinadigan hududga kiritmaslikka;

yoʻlovchilarga avtotransport vositalarda qoʻl yuki va bagaj shaklida tashish taqiqlangan xavfli moddalar va buyumlarni aniqlashning zarur koʻnikmalariga ega boʻlishga;

tabiiy va texnogen tusdagi avariyalar, halokatlar, yongʻin yoki tabiiy ofatlar yuz bergan taqdirda jabrlanganlarni qutqarish va ularga birinchi yordam koʻrsatish, maxsus qutqaruvchi xizmatlarni chaqirish choralarini koʻrishga;

qonunchilik hujjatlarida belgilangan tartibda maʼmuriy huquqbuzarlik toʻgʻrisida bayonnomalar tuzishga majburdirlar.

15. Ushbu Yoʻriqnoma talablarini buzganlikda aybdor boʻlgan shaxslar qonunchilik hujjatlarida belgilangan tartibda javobgar boʻladilar.

1. Tegishli ruxsat berilgan hujjat boʻlmagan barcha turdagi oʻq otar va tigʻli qurollar:

toʻpponchalar, revolverlar, soyli miltiqlar, karabinlar, boshqa oʻq otar qurollar va ularga oʻq-dorilar;

arbaletlar va suv osti ovi quroli, qilichlar, xanjarlar, dudama qilichlar, egri qilichlar, uzun va ogʻir qilichlar, tigʻlar, qilichsimon nayzalar, nayzalar, xanjarlar, kortiklar, xanjarchalar, pichoqlar: harbiy, desant, fin pichoqlari, piskalar otilib chiqadigan, qulflanadigan dudama qilichlar.

2. Tegishli ruxsat berilgan hujjat boʻlmagan barcha turdagi portlovchi moddalar va ular bilan toʻldirilgan buyumlar, portlatish vositalari:

har qanday oʻramdagi barcha ov poroxlari;

ov kapsulalari (pistonlari) va kapsula-detonatorlar;

pirotexnika vositalari: signalli va yorituvchi raketalar, posadkali shashkalar, tutun chiqaruvchi patronlar;

dinamit, tol, ammonal, trotil va boshqa portlovchi moddalar.

3. Siqilgan va suyultirilgan gazlar.

4. Tez yonuvchan qattiq moddalar:

suv taʼsirida issiqlik va issiq gaz chiqaradigan, natijada oʻzidan oʻzi yonadigan va yongʻin keltirib chiqarishi mumkin boʻlgan moddalar: kaliy, natriy, metalli kalsiy va ularning qotishmalari, kalsiy, fosforit va boshqalar;

oq, sariq va qizil fosfor hamda tez yonuvchan qattiq moddalar toifasiga tegishli boʻlgan boshqa barcha moddalar;

organik peroksidlar;

donador yoki parcha-parcha, quruq yoki nam, tarkibida kamida 25 foiz suv yoki erituvchi suyuqlik boʻlgan kolloid nitrotsellyuloza;

quruq va nam, tarkibida kamida 30 foiz suv yoki erituvchi suyuqlik boʻlgan nitrotsellyuloza.

5. Tegishli ruxsatnoma berilgan hujjat boʻlmagan barcha turdagi zaharli va zaharlovchi moddalar:

har qanday idishga joylashtirilgan suyuq va qattiq holatdagi har qanday zaharli, kuchli taʼsir qiladigan va zaharlovchi moddalar;

brutsin;

nikotin;

strixnin

tetragidrofurfuril spirti;

etilenglikol;

simob;

sianid kislotaning barcha tuzlari va sianid preparatlar;

siklon, sianplav, margimush angidrid va boshqa kuchli taʼsir qiladigan, zaharli, zaharlovchi moddalar.

6. Germetik idishlarsiz va oʻramlarsiz tashiladigan oʻyuvchi, badboʻy va yemiruvchi moddalar:

kuchli va noorganik kislotalar: xlorid, sulfat, azot kislotalar va boshqa kislotalar;

ftorli-vodorod (shishani oʻyish qobiliyatiga ega boʻlgan) kislotasi va boshqa kuchli kislotalar va yemiruvchi moddalar.