Oʻzbekiston Respublikasining Soliq kodeksi va “Davlat soliq xizmati toʻgʻrisida”gi Qonuniga muvofiq Oʻzbekiston Respublikasi Davlat soliq qoʻmitasi qaror qiladi:

1. Qimmatli qogʻozlar markaziy depozitariysi tomonidan oʻzi va investitsiya vositachilari tomonidan roʻyxatga olingan aksiyalarga doir bitimlar toʻgʻrisidagi axborotni Oʻzbekiston Respublikasi Soliq qoʻmitasiga taqdim etish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasining Soliq kodeksiga muvofiq, Qimmatli qogʻozlar markaziy depozitariysi (bundan keyingi oʻrinlarda Markaziy depozitariy deb yuritiladi) tomonidan oʻzi va investitsiya vositachilari tomonidan roʻyxatga olingan aksiyalarga doir bitimlar toʻgʻrisidagi axborotni (bundan keyingi oʻrinlarda bitimlar toʻgʻrisidagi axborot deb yuritiladi) Oʻzbekiston Respublikasi Soliq qoʻmitasiga (bundan keyingi oʻrinlarda Qoʻmita deb yuritiladi) taqdim etish tartibini belgilaydi.

1. Qoʻmitaga taqdim etiladigan bitimlar toʻgʻrisidagi axborot Markaziy depozitariyga investitsiya vositachilari tomonidan taqdim etiladigan bitimlar toʻgʻrisidagi axborot va Markaziy depozitariyda roʻyxatga olingan bitimlar toʻgʻrisidagi axborot asosida shakllantiriladi.

2. Markaziy depozitariy har oyda, hisobot oyidan keyingi oyning 10-sanasidan kechiktirmasdan Qoʻmitaga bitimlar toʻgʻrisidagi axborotni taqdim etadi.

3. Markaziy depozitariy bitimlar toʻgʻrisidagi axborotni Qimmatli qogʻozlar bilan birjadan tashqari bitimlarning hisob registri toʻgʻrisidagi nizomning ilovasida nazarda tutilgan maʼlumotlar doirasida (roʻyxat raqami 1919, 2009-yil 9-mart) Qoʻmitaga taqdim etadi.

4. Elektron raqamli imzoning ochiq kalitlari Markaziy depozitariy va Qoʻmita oʻrtasida oʻzaro almashinadi.

Elektron hujjatni yuborishda Elektron raqamli imzolar kalitlarini roʻyxatga olish markazi tomonidan berilgan elektron raqamli imzolar kalitlari sertifikatiga ega boʻlgan elektron raqamli imzo kalitidan foydalaniladi.

5. Aksiyalarga doir bitimlarni roʻyxatga oluvchi investitsiya vositachilari bitimlar toʻgʻrisidagi axborotni har oyda, hisobot oyidan keyingi oyning birinchi ish kunidan kechiktirmay Markaziy depozitariy tomonidan qimmatli qogʻozlar bozorini tartibga solish boʻyicha vakolatli davlat organi (bundan keyingi oʻrinlarda vakolatli organ deb yuritiladi) bilan kelishilgan holda ishlab chiqiladigan maʼlumotlar formati shifrlangan elektron hujjat koʻrinishida Markaziy depozitariyga taqdim etadi.

6. Zarur boʻlgan hollarda, maʼlumotlar formati Markaziy depozitariy tomonidan Qoʻmita va vakolatli organ bilan kelishilgan holda oʻzgartirilishi mumkin.

7. Markaziy depozitariy va Qoʻmitaga bitimlar toʻgʻrisidagi axborotni taqdim etganlik uchun haq olinmaydi.

8. Investitsiya vositachisi tomonidan Markaziy depozitariyga taqdim etilgan bitimlar toʻgʻrisidagi axborotning notoʻgʻriligi aniqlangan taqdirda, ushbu investitsiya vositachisi bunday holat yuz berganligini bilgan paytdan boshlab besh kun mobaynida:

taqdim etilgan bitimlar toʻgʻrisidagi axborotning notoʻgʻriligi toʻgʻrisida Markaziy depozitariyni xabardor qilishi;

taqdim etilgan bitimlar toʻgʻrisidagi axborotni tuzatishga doir choralar koʻrishi;

tuzatilgan bitimlar toʻgʻrisidagi axborotni Markaziy depozitariyga taqdim etishi lozim.

9. Markaziy depozitariy ikki ish kuni mobaynida:

investitsiya vositachisidan bitimlar toʻgʻrisidagi axborotning notoʻgʻriligi toʻgʻrisidagi xabarnomani olgach, bu haqda Qoʻmita hamda vakolatli organni xabardor qilishi;

tuzatilgan bitimlar toʻgʻrisidagi axborotni olgach, uni belgilangan tartibda Qoʻmitaga taqdim etishi lozim.

9¹. Markaziy depozitariy tomonidan roʻyxatga olingan Qoʻmitaga taqdim etilgan bitimlar toʻgʻrisidagi axborotning notoʻgʻriligi aniqlangan taqdirda, Markaziy depozitariy bunday holat yuz berganligini bilgan paytdan boshlab besh kun mobaynida:

bu haqda Qoʻmita va vakolatli organni xabardor qilishi;

bitimlar toʻgʻrisida taqdim etilgan axborotni tuzatishga doir choralar koʻrishi;

bitimlar toʻgʻrisidagi tuzatilgan axborotni belgilangan tartibda Qoʻmitaga taqdim etishi lozim.

10. Bitimlar toʻgʻrisidagi axborot maxfiy hisoblanadi.

11. Taqdim etilgan bitimlar toʻgʻrisidagi axborotdan Qoʻmita tomonidan soliq toʻlovchilarning yuzaga kelgan majburiyatlarini aniqlash maqsadidagina foydalaniladi.

12. Markaziy depozitariydan olingan bitimlar toʻgʻrisidagi axborotni saqlash va foydalanishning maxsus rejimi Qoʻmita tomonidan taʼminlanadi.

13. Investitsiya vositachilari Markaziy depozitariyga taqdim etiladigan bitimlar toʻgʻrisidagi axborotning toʻliqligi va ishonchliligi uchun javobgardirlar, mazkur Nizomning 8-bandida nazarda tutilgan holat bundan mustasno.

14. Markaziy depozitariy bitimlar toʻgʻrisidagi axborotni Qoʻmitaga taqdim etmaganligi yoki oʻz vaqtida taqdim etmaganligi yoxud buzib koʻrsatgan holda taqdim etganligi uchun javobgar boʻladi.

15. Mazkur Nizomning buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

16. Mazkur Nizom Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi va Qimmatli qogʻozlar markaziy depozitariysi bilan kelishilgan.