Oʻzbekiston Respublikasi Vazirlar Mahkamasining 2010-yil 5-apreldagi “Avtotransport vositalarini vaqtincha saqlash boʻyicha pulli xizmatlar koʻrsatuvchi yuridik shaxslar faoliyatini tartibga solish chora-tadbirlari toʻgʻrisida”gi 63-sonli qarori bilan tasdiqlangan nizomning 12-bandi ijrosini taʼminlash maqsadida hamda “Toshbozortayyorlovsavdo” uyushmasining 2010-yil 28-iyuldagi “Bozorlar balansidagi avtotoʻxtash joylarida “koʻrsatilayotgan xizmat uchun” undiriladigan toʻlovlarning yangi miqdorlarini joriy etish toʻgʻrisida”gi 654-sonli taklifini inobatga olib qaror qilaman:

1. 2010-yil 15-avgustdan boshlab, Toshkent shahri boʻyicha mulkchilik shaklidan qatʼi nazar, yuridik shaxslar tomonidan avtotransport vositalarini vaqtincha saqlash boʻyicha pulli xizmatlar koʻrsatish uchun toʻlovlarning cheklangan miqdori ilovaga muvofiq tasdiqlansin.

2. Toshkent shahar Davlat soliq boshqarmasi (Sh. Rahimov):

tasdiqlangan avtotransport vositalarini vaqtincha saqlash boʻyicha pulli xizmatlar koʻrsatish uchun toʻlovlarning cheklangan miqdori mulkchilik shaklidan qatʼi nazar, ushbu faoliyat bilan shugʻullanuvchi barcha yuridik shaxslar eʼtiboriga yetkazilishi taʼminlansin;

avtotransport vositalarini vaqtincha saqlash boʻyicha pulli xizmat koʻrsatuvchi mulkchilik shaklidan qatʼiy nazar barcha yuridik shaxslar tomonidan ushbu xizmat uchun belgilanadigan tariflar tasdiqlangan cheklangan miqdordan oshmasligi nazoratga olinsin.

3. Savdo, xizmat koʻrsatish sohasi va xalq isteʼmol mollari ishlab chiqarish departamenti (R. Abdumajitov), “Toshbozortayyorlovsavdo” uyushmasi (E. Inogʻomov): Bozorlar maʼmuriyati bilan birgalikda avtotoʻxtash joylarida koʻrsatiladigan xizmatlar uchun undiriladigan toʻlovlarning yangi miqdorlarini joriy etish boʻyicha belgilangan tartibda zarur tashkiliy tadbirlar oʻtkazilishi taʼminlansin.

4. Mazkur qaror Xalq deputatlari Toshkent shahar Kengashining navbatdagi sessiyasi tasdigʻiga kiritilsin.

5. Ushbu qarorning bajarilishini nazorat qilish Toshkent shahar hokimining oʻrinbosari F.T. Ziyayev va Savdo, xizmat koʻrsatish sohasi va xalq isteʼmol mollari ishlab chiqarish departamenti boshligʻi R.A. Abdumajitov zimmalariga yuklatilsin.