Oʻzbekiston Respublikasi Prezidentining 2008-yil 28-noyabrdagi “Iqtisodiyotning real sektori korxonalarini koʻllab-quvvatlash, ularning barqaror ishlashini taʼminlash va eksport salohiyatini oshirish chora-tadbirlari toʻgʻrisida”gi PF-4058-sonli Farmoni talablarini bajarish va Toshkent shahrida kommunal xizmat koʻrsatuvchi korxona va tashkilotlar ishlab chiqarayotgan mahsulotlar, koʻrsatayotgan xizmatlar tannarxini kamaytirish boʻyicha tasdiqlangan reja-topshiriqlarning bajarilishini taʼminlash maqsadida qaror qilaman:

1. “Toshissiqquvvati” ishlab chiqarish birlashmasi (R. A. Abdulin), “Suvsoz tresti” davlat unitar korxonasi (T. Sh. Mirxidoyatov), “Toshkent suv taʼminoti” shoʻba korxonasi (I. K. Tolipov), “Toshkent elektr tarmoqlari korxonasi” aksiyadorlik jamiyati (G. I. Smal), “Toshkentshahargaz” filiali (A. N. Saidvaliyev), “Maxsustrans” davlat unitar korxonasi (S. N. Nigmatov), Yunusobod tuman sanitar tozalash va nazorat qilish boʻyicha yagona buyurtmachi direksiyasi (B. V. Zairov), “Ulugʻbek” shaharchasidagi qurilish-taʼmirlash xizmat koʻrsatish boshqarmasi (A. F. Saidaxmedov), aholidan va xoʻjalik yurituvchi subyektlardan kommunal xizmatlar uchun pul yigʻimi bilan shugʻullanuvchi barcha mustaqil operator rahbarlari:

1.1. 2009-yilning 25-noyabrigacha Toshkent shahar Hududiy kommunal foydalanish birlashmasiga 2009-yilning 1-oktabr holatiga xizmat koʻrsatuvchi abonentlar (aholi va yuridik isteʼmolchilar) boʻyicha maʼlumotlarni 1 va 2-ilovalarga asosan elektron koʻrinishda taqdim etilishi;

1.2. Har chorakning yakuni boʻyicha keyingi oyning 25-sanasigacha qoʻshimcha oʻzgarishlarni hisobga olgan holda abonentlar toʻgʻrisidagi yangilangan toʻliq maʼlumotlarni yuqorida qayd etilgan ilovadagi jadvallar asosida topshirib borilishi taʼminlansin.

2. Belgilab qoʻyilsinki, maʼlumotlarning oʻz vaqtida va sifatli topshirilishiga, ularning toʻliq hamda haqqoniyligiga korxona va tashkilotlarning rahbarlari va bosh hisobchilari masʼuldirlar.

3. Ichki ishlar bosh boshqarmasi (Q. U. Nakibov), “Mahalla” jamgʻarmasi (J. X. Shoxakimov), Xususiy uy-joy mulkdorlari shirkatlari uyushmasi (A. X. Nabiyev), Statistika boshqarmasi (B. P. Magay) va tuman hokimliklari huzuridagi tadbirkorlik subyektlarini roʻyxatdan oʻtkazish inspeksiyalari rahbarlariga:

Xorijga chiqish-kelish va fuqarolik boshqarmasi hamda uning tuman boʻlimlari, xususiy uy-joy mulkdorlari shirkatlari, oʻzini oʻzi boshqarish va statistika organlari tomonidan berilgan maʼlumotlar asosida har chorakdan keyingi oyning 25-sanasigacha Hududiy kommunal foydalanish birlashmasiga begʻaraz ravishda mavjud boʻlgan va oʻzgarayotgan aholi soni toʻgʻrisidagi maʼlumotlarni 3, 4, 5, 6 va 7-ilovalardagi shakl koʻrinishida (elektron) topshirilishi taʼminlansin.

4. Hududiy kommunal foydalanish birlashmasi (I. N. Xolmatov), Moliya bosh boshqarmasi (M. M. Mirmaxmudov) va Iqtisodiyot bosh boshqarmasi (S. S. Nasretdinov):

10 kun muddatda mazkur qarorning 1-bandi talablarini bajarish maqsadida kommunal xizmatlaridan foydalanuvchi abonentlarni hisobga oluvchi yagona elektron bazani yaratish boʻyicha taklif kiritilsin.

5. Hududiy kommunal foydalanish birlashmasi (I. N. Xolmatov):

5.1. Taqdim etilgan maʼlumotlar asosida axborot bazasini shakllantirish va bazani doimiy yangilab borish taʼminlansin.

5.2. Mazkur qarorning 1 va 2-bandlari boʻyicha taqdim etilgan maʼlumot va axborotlarni:

a) doimiy ravishda tahlil qilib borilishi;

b) hisobot choragidan keyingi oyning oxirigacha kommunal xizmat koʻrsatuvchi korxonalar va tashkilotlardan isteʼmolchilar sonidagi oʻzgarishlar haqidagi taqdim qilingan maʼlumotlarni jamlab, tahlil qilib, ular haqidagi aniqlangan maʼlumotlarni begʻaraz ravishda kommunal xizmat koʻrsatuvchi korxonalarga hamda Moliya bosh boshqarmasi va Iqtisodiyot bosh boshqarmasiga taqdim qilinishi taʼminlansin.

6. Hududiy kommunal foydalanish birlashmasiga kommunal xizmat koʻrsatuvchi korxonalar va tashkilotlar, mulkchilik shaklidan qatʼi nazar, kommunal xizmatlar uchun pul yigʻimi bilan shugʻullanuvchi operatorlar tomonidan berilgan maʼlumotlar asosida isteʼmolchilarni toʻliq qamrab olish boʻyicha monitoring oʻtkazish, zarur hollarda taqdim qilingan maʼlumotlarning asl nusxalarini talab qilib olish, ularni tekshirish va tahlil qilish huquqi berilsin.

7. Mazkur qarorning ijrosini nazorat qilish Toshkent shahar hokimining birinchi oʻrinbosari R. J. Usmonov zimmasiga yuklatilsin.