Iqtisodiy islohotlarni chuqurlashtirish, tovar ishlab chiqaruvchilarning, isteʼmolchilar va tadbirkorlarning tovar resurslari bozorida erkin hamda teng huquqli tarzda ishtirok etishi uchun zarur tarmoqlar majmuini vujudga keltirish maqsadida:

1. Oʻzbekiston shartnomalar va savdo boʻyicha davlat-aksionerlik uyushmasi tugatilib, uyushmaning tarkibiy boʻlinmalari va obyektlari amaldagi qonunlarga muvofiq ochiq usuldagi aksionerlik jamiyatlariga aylantirilsin.

2. Tovar resurslarini xarid qilish — sotishni va boshqa xizmatlar koʻrsatishni tashkil qilishda korxonalarga, muassasalar va tadbirkorlarga koʻrsatiladigan xizmatlarni kengaytirish maqsadida, yuqorida koʻrsatilgan aksionerlik jamiyatlarining, boshqa huquqiy va jismoniy shaxslarning ishtirokida ulgurji va birja savdosi boʻyicha respublika aksionerlik uyushmasi “Oʻzulgurjibirjasavdo”ni taʼsis etish maqsadga muvofiq deb topilsin hamda uning tarkibi quyidagilardan iborat boʻlsin:

respublika aksionerlik tovar-xomashyo birjasi;

aksionerlik birja banki;

hududiy aksionerlik tijorat-vositachilik kompaniyalari.

3. Belgilab qoʻyilsinki, Oʻzbekiston ulgurji va birja savdosi boʻyicha respublika aksionerlik uyushmasi “Oʻzulgurjibirjasavdo”:

Ustavga muvofiq oʻzini oʻzi toʻla pul bilan taʼminlash va oʻzini oʻzi bajarish prinsiplari asosida ish koʻradi;

mulkchilik shakllaridan qatʼi nazar, korxonalarga, tashkilotlarga va jismoniy shaxslarga bitim-shartnoma asosida tijorat-vositachilik, savdo, ishlab chiqarish, moliya, transport, marketing, axborot, auditorlik xizmatlari hamda boshqa xizmatlarni amalga oshiradi;

ichki bozorni tovar-xomashyo resurslari bilan toʻldirishda uyushma qatnashchilarning oʻzaro yaqin harakat qilishlarini taʼminlaydi, barcha korxonalar, tashkilotlar, huquqiy va jismoniy shaxslar uchun, shu jumladan xorijiy tadbirkorlar va biznesmenlar uchun birja savdosida teng huquqli shart-sharoitlarni yaratadi;

Hukumat buyurtmalari boʻyicha trast bitim-shartnoma asosida davlat ehtiyojlari uchun mahsulot xarid qiladi va sotadi.

4. Oʻzbekiston Respublikasining Istiqbolni belgilash va statistika davlat qoʻmitasi zimmasiga quyidagi vazifalar yuklatilsin:

eng muhim mahsulot turlari, xomashyo va materiallar ishlab chiqarish, ularga boʻlgan ehtiyoj va takliflarning balanslarini ishlab chiqish;

xalq xoʻjaligini moddiy resurslar bilan taʼminlashning ustuvor yoʻnalishlarini, davlat ehtiyojlari uchun mahsulot yetkazib berishning eksport-import kvotalari va hajmlarining miqdorlarini aniqlab, soʻngra respublika Hukumatining koʻrib chiqishi uchun taqdim etish.

5. Oʻzbekiston Respublikasi tashqi iqtisodiy aloqalar vazirligining zimmasiga:

“Istiqbolstat” bilan birgalikda hukumatlararo savdo-iqtisodiy bitimlarning loyihalarini tuzishga oid ishlarni tashkil etish, hukumatlararo majburiyatlar boʻyicha mahsulot yetkazib berilishini tartibga solish va uni nazorat qilishni taʼminlash;

Oʻzbekiston Respublikasining Hukumati tomonidan belgilanadigan roʻyxatga muvofiq respublikadan tashqariga mahsulot olib chiqib ketish uchun litsenziya (ruxsatnoma)lar berish vazifasi yuklatilsin.

6. Oʻzbekiston Respublikasining Vazirlar Mahkamasi ushbu Farmonni bajarish yuzasidan 10 kun muddat ichida tegishli qaror qabul qilsin.

7. Oʻzbekiston Respublikasi Prezidentining “Oʻzbekiston shartnomalar va savdo boʻyicha davlat-aksionerlik uyushmasi (“Oʻzshartnomasavdo”)ni tashkil qilish toʻgʻrisida” 1992-yil 28-fevraldagi Farmoni oʻz kuchini yoʻqotgan deb topilsin.