O‘zbekiston Respublikasining “O‘zbekiston Respublikasining Markaziy banki to‘g‘risida” (O‘zbekiston Respublikasi Oliy Majlisining Axborotnomasi, 1995-y., 12-son, 247-modda), “Kredit axboroti almashinuvi to‘g‘risida”gi (O‘zbekiston Respublikasi qonun hujjatlari to‘plami, 2011-y., 40-son, 412-modda) qonunlariga muvofiq, O‘zbekiston Respublikasi Markaziy banki Boshqaruvi qaror qiladi:

1. Kredit byurolarida ichki audit o‘tkazishga va kredit byurolarining yillik hisobotlariga nisbatan qo‘yiladigan talablar to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Nizom O‘zbekiston Respublikasining “O‘zbekiston Respublikasining Markaziy banki to‘g‘risida”gi (O‘zbekiston Respublikasi Oliy Majlisining Axborotnomasi, 1995-y., 12-son, 247-modda) va “Kredit axboroti almashinuvi to‘g‘risida”gi (O‘zbekiston Respublikasi qonun hujjatlari to‘plami, 2011-y., 40-son, 412-modda) qonunlariga muvofiq, kredit byurolarida ichki audit o‘tkazishga va ularning yillik hisobotlariga nisbatan qo‘yiladigan talablarni belgilaydi.

1. Mazkur Nizomda kuyidagi atamalardan foydalaniladi:

ichki audit — kredit byurosi tomonidan O‘zbekiston Respublikasi qonunchilik hujjatlariga, ta’sis hujjatlariga va ichki hujjatlarga, shuningdek xo‘jalik operatsiyalarini amalga oshirishning belgilangan qoidalari va taomillariga rioya qilinishini tekshirish va monitoring olib borish yo‘li bilan uning ishini nazorat qilish va baholash, ma’lumotlarning buxgalteriya hisobi va moliyaviy hisobotda aks ettirilishining to‘liqliligi va ishonchliligini ta’minlash bo‘yicha kredit byurosi tarkibiy bo‘linmasining faoliyati;

ichki audit xizmati — kredit byurosining yuqori boshqaruv organi (keyingi o‘rinlarda vakolatli organ deb yuritiladi) qarori bilan tashkil etiladigan kredit byurosining ichki auditni amalga oshiradigan tarkibiy bo‘linmasi.

2. Ichki audit xizmati o‘z faoliyatini mazkur Nizom va boshqa qonunchilik hujjatlari asosida olib boradi.

3. Har bir kredit byurosi ichki audit xizmatini tuzishi, vakolatli organ tasdiqlaydigan “Ichki audit xizmati to‘g‘risida”gi nizomni va ichki audit xizmati xodimlari mansab yo‘riqnomalarini ishlab chiqishi shart.

4. Ichki audit xizmati mustaqildir va u bevosita vakolatli organga bo‘ysunadi.

5. Ichki audit faqat ichki audit xizmati xodimlari tomonidan har chorakda o‘tkazilishi lozim.

6. Ichki audit bosh auditor tomonidan ishlab chiqilgan va vakolatli organ tomonidan tasdiqlangan Ichki audit rejasiga muvofiq o‘tkaziladi. Ichki audit rejasi tegishli yilning 1-yanvariga qadar tasdiqlanishi shart.

7. Ichki audit xizmati qonunchilik hujjatlariga muvofiq moliyaviy hisobotning ishonchliligi va to‘g‘riligini, shuningdek kredit axborotini saqlash usullarini va zarurat tug‘ilganda ularning mavjudligini tekshirishi lozim.

8. Ichki audit xizmati xodimlari ichki auditni o‘tkazish jarayonida quyidagilarga haqli:

kredit byurosining rahbari va xodimlaridan kredit byurosi faoliyatiga bog‘liq bo‘lgan barcha zarur hujjatlarni yoki audit predmeti hisoblangan hujjatlarni talab qilish;

ichki audit jarayonida yuzaga kelgan savollar bo‘yicha kredit byurosining rahbari va xodimlaridan og‘zaki yoki yozma tushuntirishlar olish;

belgilangan tartibda tegishli hujjatlarning aslini yoki ulardan nusxalar olish;

kredit byurosi binosining barcha xonalariga erkin kirib-chiqish, barcha sanalarga tegishli hujjatlardan, arxiv va elektron baza ma’lumotlaridan erkin foydalanish;

ichki audit o‘tkazilgandan so‘ng audit jarayonida aniqlangan huquqbuzarliklarni bartaraf etish bo‘yicha chora-tadbirlarning bajarilishini nazorat qilish.

9. Ichki audit xizmati xodimlari:

ichki audit natijalarini buzib ko‘rsatmaslikka;

qonunchilik hujjatlariga muvofiq tijorat, bank siri yoki qonunchilik bilan qo‘riqlanadigan boshqa sirlarni tashkil etuvchi har qanday ma’lumotlarni oshkor etmaslikka;

kredit byurosining boshqa bo‘limlaridan olingan tegishli hujjatlarning butunligini ta’minlashga va qaytarishga mas’uldir.

10. Ichki audit yakunlanganidan so‘ng auditorlik hisoboti tayyorlanadi va vakolatli organga ko‘rib chiqish uchun taqdim etiladi.

11. Auditorlik hisobotida ichki audit natijasida aniqlangan muammo va kamchiliklar bilan bir qatorda ularni bartaraf etish bo‘yicha aniq tavsiyalar berilishi lozim.

12. Tavsiyalarda aniqlangan muammolarning qisqacha izohi, ularni bartaraf qilishga doir talab etiladigan chora-tadbirlar va ularni bajarish muddatlari aks ettirilishi lozim. Bunda, bosh auditor chora-tadbirlarning bajarilishini nazorat qilib boradi.

13. Auditorlik hisobotiga uni to‘liq tasdiqlovchi ish hujjatlari to‘plami ilova qilinadi. Ish hujjatlari ichki audit xizmati xodimlari tomonidan tayyorlanadi va bosh auditor tomonidan tekshiriladi.

14. Kredit byurosi har chorakda hisobot choragidan keyingi oyning 20-kunidan kechiktirmay O‘zbekiston Respublikasi Markaziy bankiga vakolatli organ tomonidan tasdiqlangan holda auditorlik hisobotining nusxasini taqdim etishi lozim.

15. Kredit byurosining yillik hisobotlari quyidagilarni o‘z ichiga oladi:

buxgalteriya balansini;

moliyaviy natijalar to‘g‘risidagi hisobotni.

16. Kredit byurosining o‘z faoliyati natijalari to‘g‘risidagi yillik hisoboti hisobot yilidan keyingi yilning 1-mayidan kechiktirmasdan ommaviy axborot vositalarida e’lon qilinishi kerak.

17. Kredit byurosining yillik hisoboti ommaviy axborot vositalarida e’lon qilingandan so‘ng uch kun ichida ushbu nashr nusxasi O‘zbekiston Respublikasi Markaziy bankiga taqdim etiladi.

18. Mazkur Nizomning buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladi.