Tadbirkorlik subyektlarini ularning ishlab chiqarish faoliyati ehtiyojlari uchun tabiiy gaz bilan uzluksiz taʼminlash yuzasidan gaz bilan taʼminlovchi tashkilotlarning shartnoma majburiyatlari bajarilishi uchun masʼuliyatini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga qoʻshimchalar kiritilsin.

2. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

“Oʻzbekneftgaz” milliy xolding kompaniyasi Oʻzbekiston Respublikasi Adliya vazirligi bilan birgalikda:

ikki oy muddatda tabiiy gaz isteʼmolchilari bilan tuzilgan shartnomalarning ushbu qarorga muvofiqlashtirilishini taʼminlasin;

ushbu qarorda nazarda tutilgan normalarni amalga oshirish maqsadida Isteʼmolchilar bilan oʻzaro hamkorlik mexanizmi toʻgʻrisidagi metodik tavsiyalarni bir oy muddatda tasdiqlasin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Vazirlar Mahkamasining 2000-yil 10-yanvardagi 8-son qarori (Oʻzbekiston Respublikasi QT, 2000-y., 1-son, 2-modda) bilan tasdiqlangan Oʻzbekiston Respublikasi isteʼmolchilariga gaz yetkazib berish qoidalariga quyidagi mazmundagi 6.8-band qoʻshilsin:

“6.8. Gaz yetkazib beruvchi, gaz uzatish tashkiloti yoki hududiy gaz taʼminoti korxonasi gaz yetkazib berish shartnomasiga koʻra, ushbu Qoidalarda nazarda tutilgan qoidalarni hisobga olgan holda, isteʼmolchiga gaz yetkazib berilmasligi yoki toʻliq yetkazib berilmasligi oqibatida yetkazilgan real zararni va boy berilgan foydani belgilangan tartibda qoplaydi”.

2. Vazirlar Mahkamasining 2005-yil 26-maydagi 132-son qarori (Oʻzbekiston Respublikasi QT, 2005-y., 5-son, 28-modda) bilan tasdiqlangan Tabiiy gaz isteʼmolchilari va gaz bilan taʼminlovchi tashkilotlar oʻrtasidagi oʻzaro hisob-kitoblar tartibi toʻgʻrisidagi nizomning 9-bandiga quyidagi mazmundagi xatboshi qoʻshilsin:

“Gaz yetkazib beruvchi yoki gaz bilan taʼminlovchi tashkilot shartnomaga koʻra isteʼmolchiga gaz yetkazib berilmasligi yoki toʻliq yetkazib berilmasligi oqibatida yetkazilgan real zararni va boy berilgan foydani qoplaydi”.