Davlat mulkini ijaraga berish tartibini yanada takomillashtirish hamda davlat mulkini ijaraga berishdan tushayotgan mablagʻlardan samarali foydalanish maqsadida Vazirlar Mahkamasi qaror qiladi:

1. Vazirlar Mahkamasining “Davlat mulkini ijaraga berish tartibini takomillashtirish chora-tadbirlari toʻgʻrisida” 2009-yil 8-apreldagi 102-son qaroriga (Oʻzbekiston Respublikasi QT, 2009-y., 4-son, 26-modda) ilovaga muvofiq oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining “Davlat mulkini ijaraga berish tartibini takomillashtirish chora-tadbirlari toʻgʻrisida” 2009-yil 8-apreldagi 102-son qarorida (Oʻzbekiston Respublikasi QT, 2009-y., 4-son, 26-modda):

a) 2-bandning yettinchi xatboshidagi “respublika va viloyat”, “Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi” soʻzlari chiqarib tashlansin, “har chorakda eʼlon qilish” soʻzlari “joylashtirish” soʻzi bilan almashtirilsin;

b) 3-bandning toʻrtinchi va beshinchi xatboshilari quyidagi mazmundagi toʻrtinchi — yettinchi xatboshilar bilan almashtirilsin:

“markazlarning tranzit hisob raqamlariga tushadigan ijara toʻlovi mablagʻlarining 50 foizi tegishli budjet daromadiga, 40 foizi — davlat mulkini balansida saqlovchiga va 10 foizi — tegishli markazga yoʻnaltiriladi;

ijara toʻlovi muddatini oʻtkazib yuborganlik uchun undirilgan penya summasining va shartnoma majburiyatlarini buzganlik uchun jarima summasining 50 foizi markazlar ixtiyorida qoladi, qolgan qismi esa tegishli budjet daromadiga yoʻnaltiriladi.

Belgilab qoʻyilsinki, tegishli markazning Qoraqalpogʻiston Respublikasi Davlat mulki qoʻmitasi, Oʻzbekiston Respublikasi Davlat mulki qoʻmitasining viloyatlar va Toshkent shahar hududiy boshqarmalari tomonidan qonun hujjatlarida belgilangan tartibda olinayotgan sof foydasining bir qismi yoki hammasi Oʻzbekiston Respublikasi Davlat mulki qoʻmitasining budjetdan tashqari jamgʻarmasida jamlanadi.

Oʻzbekiston Respublikasi Davlat mulki qoʻmitasining budjetdan tashqari jamgʻarmasida jamlanadigan mablagʻlar Oʻzbekiston Respublikasi Moliya vazirligida roʻyxatdan oʻtkazilgan budjetdan tashqari jamgʻarmaning daromadlar va xarajatlar smetasiga muvofiq belgilangan tartibda sarflanadi”;

v) 3-1-bandga quyidagi mazmundagi xatboshi qoʻshilsin:

“Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari har yili koʻchmas davlat mulkidan foydalanganlik uchun ijara toʻlovining eng kam stavkalarini tasdiqlashda davlat mulki boʻlgan binolar va xonalarda joylashgan budjet tashkilotlari uchun ijara toʻlovining nol stavkasini belgilashni nazarda tutsinlar”;

g) quyidagi mazmundagi 4-1-band qoʻshilsin:

“4-1. Belgilab qoʻyilsinki, ijaraga berilgan davlat mulkiga zarar yetkazganlik belgilari aniqlangan taqdirda yetkazilgan zarar summasi baholash tashkiloti tomonidan uni baholash yoʻli bilan aniqlanadi va aybdor shaxslardan belgilangan tartibda undiriladi.

Zarar summasi tegishli markazning tranzit hisob raqamida jamlanadi hamda markazning baholashni oʻtkazish bilan bogʻliq xarajatlari va sud xarajatlari chegirilgan holda davlat mulkini balansida saqlovchiga yoʻnaltiriladi”;

d) 6-bandga quyidagi mazmundagi ikkinchi va uchinchi xatboshilar qoʻshilsin:

“Davlat mulkini ijara shartnomasi tuzmasdan ijaraga berish, ijara shartnomasida ijaraga berilgan mulkning parametrlari va soni ataylab notoʻgʻri qayd etilganligi, buning natijasi ijara toʻlovining yashirilishiga olib kelganligi holati aniqlangan taqdirda markaz buzilish aniqlangan sanadan boshlab uch ish kuni mobaynida, belgilangan tartibda davlat mulkidan foydalanganlik davri uchun ijara toʻlovini ikki baravar miqdorda hisoblab chiqadi va uni undirish uchun tegishli hujjatlarni balansida saqlovchiga taqdim etadi.

Hisoblab yozilgan toʻlov summasi balansida saqlovchi tomonidan toʻlanmagan taqdirda davlat mulki joylashgan joydagi markaz hujjatlar balansida saqlovchiga taqdim etilgan sanadan boshlab oʻn ish kuni oʻtgach hisoblab yozilgan toʻlov summasini belgilangan tartibda undirish uchun materiallarni sudga topshiradi”.

2. Ilova (Davlat mulkini ijaraga berish tartibi toʻgʻrisidagi nizom)da:

a) 2-bandda:

quyidagi mazmundagi ikkinchi xatboshi qoʻshilsin:

“davlat mulki — davlat korxonalari va budjet tashkilotlari balansidagi mol-mulk, shuningdek yuridik shaxslarning ommaviy mulkni boshqaruvchi yoxud vakolatli davlat organi tomonidan tasarruf etish huquqisiz ularga berilgan mol-mulki (davlat mulki obyektlarini investitsiya majburiyatlari va boshqa majburiyatlar bilan sotish hollari bundan mustasno)”;

ikkinchi—toʻrtinchi xatboshilar tegishli ravishda uchinchi — beshinchi xatboshilar deb hisoblansin;

b) 10-bandda:

quyidagi mazmundagi ikkinchi va uchinchi xatboshilar qoʻshilsin:

“Binolar va inshootlar boʻyicha ijara toʻlovining eng kam stavkalari hisob-kitoblari Oʻzbekiston Respublikasi Davlat mulki qoʻmitasi tomonidan har yili 1-noyabrgacha tayyorlanadi hamda kelishish uchun Oʻzbekiston Respublikasi Moliya vazirligi va Iqtisodiyot vazirligiga taqdim etiladi, ular oʻn ish kuni mobaynida ularni kelishadilar yoki qayta ishlash va keyinchalik Oʻzbekiston Respublikasi Moliya vazirligi va Iqtisodiyot vazirligining mulohazalari va takliflari olingan sanadan boshlab oʻn ish kunidan ortiq boʻlmagan muddatda kelishishga kiritish uchun Oʻzbekiston Respublikasi Davlat mulki qoʻmitasiga qaytaradilar.

Joriy yilning 15-dekabridan kechikmay binolar va inshootlar boʻyicha ijara toʻlovi eng kam stavkalarining kelishilgan hisob-kitoblari Oʻzbekiston Respublikasi Davlat mulki qoʻmitasi tomonidan tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga tasdiqlash uchun yuboriladi”;

ikkinchi—beshinchi xatboshilar tegishli ravishda toʻrtinchi — yettinchi xatboshilar deb hisoblansin;

quyidagi mazmundagi sakkizinchi xatboshi qoʻshilsin:

“balansida saqlovchining rahbari va bosh buxgalteri ijaraga berilayotgan mol-mulkning tiklangan qiymati toʻgʻrisida taqdim etilgan axborotning ishonchliligi uchun javob beradilar”;

v) quyidagi mazmundagi 10-1-band qoʻshilsin:

“10-1. Ijara shartnomasini tuzishda isitish, sovutish, elektr energiyasi bilan taʼminlash, sovuq va issiq suv taʼminoti, yongʻin xavfsizligi va qoʻriqlash (hisoblagich, dizel generatori, sovutish mashinasi (chiller, fankoyl va boshqalar), tortish ventilyatorlari, nasoslar, transformator va taqsimlash kichik stansiyalari, yongʻin xavfsizligi va qoʻriqlash tizimlari, koʻtarish mexanizmlari (shu jumladan liftlar va boshqalar) zinapoya panjaralari, zinapoyalar, lift shaxtalari va boshqa shaxtalar, shuningdek balansida saqlovchi va ijaraga oluvchilarning xodimlari va/yoki oʻquvchilari oshxonalar va bufetlarda ovqatlanishi uchun foydalanadigan maydonchalar boʻyicha muhandislik tarmoqlari va kommunikatsiyalar, mexanik, elektr, sanitariya-texnik asbob-uskunalar va boshqa asbob-uskunalar va qurilmalar boʻyicha ijara toʻlovi belgilanmaydi.

Davlat mulkining koʻrsatib oʻtilgan turlari boʻyicha shartnomada kommunal va foydalanish toʻlovlari, shu jumladan amortizatsiya ajratmalari (mavjud boʻlganda) nazarda tutiladi”;

g) quyidagi mazmundagi 10-2-band qoʻshilsin:

“10-2. Turli sport, madaniy, oʻquv, tibbiyot tadbirlari va boshqa ijtimoiy tadbirlar (toʻgaraklar)ni tashkil etish, shuningdek darsdan tashqari (ishdan tashqari) vaqtda balansida saqlovchi va ijaraga oluvchilarning xodimlari ovqatlanishi va/yoki davolanishini tashkil etish maqsadida ijaraning ayrim obyektlari (oshxonalar va bufetlar, zallar (xonalar), sport inshootlari 270 ish kuni va 8 soatlik ish kuni hisobidan kelib chiqib ijara toʻlovining soatbay stavkasi toʻlangan holda ijaraga berilishi mumkin”;

d) 12-bandda:

birinchi xatboshi quyidagi tahrirda bayon qilinsin:

“Davlat mulki davriy nashrlarda, shuningdek Oʻzbekiston Respublikasi Davlat mulki qoʻmitasi va Savdo-sanoat palatasining veb-saytlarida foydalanilmayotgan davlat mulki ijaraga berilishi toʻgʻrisida majburiy tarzda eʼlon qilish sharti bilan (chorakda kamida bir marta) ijaraga beriladi”;

sakkizinchi xatboshi quyidagi tahrirda bayon qilinsin:

“Ijaraga oluvchi ijara shartnomasi muddatini uzaytirish toʻgʻrisida yozma murojaat qilgan taqdirda shartnoma ushbu Nizomning 7-bandida nazarda tutilgan davlat mulki ijarasining eng koʻp muddatidan ortiq boʻlmagan muddatga, ushbu ijara obyekti boʻyicha majburiy eʼlon berilmasdan, belgilangan tartibda uzaytiriladi. Ushbu eng koʻp muddat tugagach davlat mulki umumiy asoslarda ijaraga beriladi”;

e) 13-band quyidagi tahrirda bayon qilinsin:

“13. Har bir ijara shartnomasi boʻyicha buyurtmanomalar ijaraga beruvchi tomonidan foydalanilmayotgan davlat mulkini ijaraga berish toʻgʻrisida eʼlon berilgandan keyin birinchi buyurtmanoma roʻyxatdan oʻtkazilgan sanadan boshlab, har bir buyurtmanomaga tartib raqami berilgan hamda buyurtmanoma berilgan sana va vaqt koʻrsatilgan holda, besh ish kuni mobaynida maxsus daftarda roʻyxatdan oʻtkaziladi.

Koʻrsatib oʻtilgan muddat tamom boʻlgandan keyin tushgan talabnomalarni (buyurtmanomalarni) koʻrib chiqish ikki ish kunidan oshmaydigan muddat mobaynida amalga oshiriladi.

Talabgorlar (talabgor) talabnomalarni (buyurtmanomalarni) koʻrib chiqishda qatnashishi mumkin. Buyurtmanomalarni koʻrib chiqishda qatnashmagan talabgor koʻrib chiqish natijalari toʻgʻrisida yozma ravishda (faks, elektron pochta, pochta orqali) xabardor qilinadi”;

j) 15-bandda:

ikkinchi xatboshi quyidagi tahrirda bayon qilinsin:

“Talabgorlarning takliflari teng boʻlgan taqdirda ijara shartnomasi, agar talabgorlardan biri buyurtmanomalarni koʻrib chiqish jarayonida ijara toʻlovining dastlabki taklifidan ortiq boʻlgan miqdorda ijara toʻlovini taklif etmasa, boshqalardan oldin buyurtmanoma bergan talabgor bilan tuziladi. Ushbu holatda shartnoma ijara toʻlovining eng yuqori miqdorini taklif etgan talabgor bilan tuziladi”;

toʻrtinchi xatboshiga “tuziladi” soʻzidan keyin “yoxud unga ijara shartnomasi tuzishning sabablari asoslangan rad javobi yuboriladi” soʻzlari qoʻshilsin;

quyidagi mazmundagi beshinchi — oʻninchi xatboshilar qoʻshilsin:

“Bunda navbatma-navbatlik tartibida:

budjet tashkilotlari;

xalqaro tashkilotlar vakolatxonalari, Oʻzbekiston Respublikasining xalqaro shartnomalari doirasida oʻz faoliyatini amalga oshiruvchi qoʻshma loyihalarni amalga oshirish boʻyicha guruhlar davlat mulki ijara shartnomasini tuzishning ustunlik huquqiga ega boʻladilar, ular Oʻzbekiston Respublikasining xalqaro shartnomalari shartlariga, Oʻzbekiston Respublikasi Prezidentining, Oʻzbekiston Respublikasi Hukumatining qarorlariga muvofiq davlat mulki boʻlgan binolar va xonalarda joylashtiriladi, ular uchun ijara toʻlovining nul stavkasi belgilangan, qonun hujjatlarida nazarda tutilgan hollar bundan mustasno;

balansida saqlovchining yuritishida boʻlgan tashkilotlar, shuningdek balansida saqlovchining yuqori tashkiloti (muassasasi) hisoblangan vazirliklar (idoralar)ning tarkibiy boʻlinmalari;

kichik tadbirkorlik subyektlari;

nodavlat notijorat tashkilotlari davlat mulki ijara shartnomasini tuzishning ustunlik huquqiga ega boʻladilar”;

z) quyidagi mazmundagi 15-1-band qoʻshilsin:

“15-1. Amal qilish muddati navbatdagi yilga oʻtadigan koʻchmas davlat mulki ijara shartnomasi boʻyicha boʻlajak yil davri uchun ijara toʻlovi belgilangan tartibda boʻlajak yilga ijara toʻlovining eng kam stavkalariga muvofiq belgilanadi.

Ushbu Nizom 15-bandining birinchi va ikkinchi xatboshilarida koʻrsatilgan shartlarga muvofiq tuzilgan, amal qilish muddati keyingi yilga oʻtadigan koʻchmas davlat mulki ijara shartnomasi boʻyicha kelgusi yil davri uchun ijara toʻlovi oldingi va kelgusi yil uchun eng kam stavkalardan kelib chiqqan holda hisoblangan ijara toʻlovi tafovutiga mutanosib ravishda koʻpayadi yoki kamayadi.

Ijaraga oluvchi kelishmagan taqdirda ijara shartnomasi bekor qilinadi va ijara obyekti belgilangan tartibda ijaraga beriladi”;

i) 16-bandda:

quyidagi mazmundagi birinchi xatboshi qoʻshilsin:

“Buyurtmanomalarni koʻrib chiqish natijalari toʻgʻrisidagi bayonnoma Komissiya tomonidan qaror qabul qilingan kunda Komissiya aʼzolari tomonidan imzolanadi va uning raisi tomonidan tasdiqlanadi”;

birinchi xatboshi ikkinchi xatboshi deb hisoblansin;

k) 22-bandning uchinchi xatboshiga “toʻlovlari” soʻzidan keyin “shu jumladan amortizatsiya ajratmalari” soʻzlari qoʻshilsin;

l) 23-bandda:

ikkinchi xatboshiga “ijara toʻlovi summasini” soʻzlaridan oldin “balansda saqlovchiga ajratiladigan” soʻzlari qoʻshilsin;

uchinchi va toʻrtinchi xatboshilar quyidagi mazmundagi uchinchi — beshinchi xatboshilar bilan almashtirilsin:

“Ijara toʻlovi, shuningdek bir ish kuni mobaynida ijaraga beruvchilarning tranzit hisob raqamlariga tushgan ijara toʻlovini toʻlash kechiktirilganligi uchun undirilgan penya summasi va shartnoma majburiyatlari buzilganligi uchun jarima quyidagi tartibda taqsimlanishi kerak;

ijara toʻlovi mablagʻlarining 50 foizi — tegishli budjet daromadiga, 40 foizi — davlat mulkini balansida saqlovchiga, 10 foizi — ijaraga beruvchiga yoʻnaltiriladi;

ijara toʻlovini toʻlash kechiktirilganligi uchun undirilgan penya summasi va shartnoma majburiyatlari buzilganligi uchun jarimaning 50 foizi tegishli budjet daromadiga yoʻnaltiriladi va qolgan 50 foizi ijaraga beruvchining tasarrufida qoladi;

beshinchi va oltinchi xatboshilar tegishli ravishda oltinchi va yettinchi xatboshilar deb hisoblansin;

m) 25-bandga “ijara muddati tugagach” soʻzlaridan keyin “yoki ijara shartnomasi muddatidan oldin bekor qilinganda, haqiqiy emas deb hisoblanganda” soʻzlari qoʻshilsin;

n) 35-bandga quyidagi mazmundagi xatboshilar qoʻshilsin:

“Balansida saqlovchi yil choragida kamida bir marta oʻzi uning yuritishida boʻlgan davlat mulkini xatlovdan oʻtkazishga va foydalanilmayotgan davlat mulki aniqlangan taqdirda 10 kun mobaynida ijaraga beruvchiga davlat mulki joylashgan joyni, miqdori, tarkibi va boshqa umumiy tavsiflarini koʻrsatgan holda uning haqidagi maʼlumotlarni taqdim etishga majbur.

Koʻrsatib oʻtilgan maʼlumotlar yashirilganligi, oʻz vaqtida taqdim etilmaganligi, shuningdek ularning buzilganligi uchun balansida saqlovchi va aybdor shaxslar qonun hujjatlariga muvofiq javob beradilar”;

o) quyidagi mazmundagi 38-band qoʻshilsin:

“38. Qamrab olishning toʻliqligi, oʻz vaqtida va zarur tarzda hisoblanishi, ijaraga berilgan davlat mulki boʻyicha ijara toʻlovi toʻlanishini nazorat qilish ijaraga beruvchilar tomonidan, shuningdek belgilangan tartibda tekshirishlar amalga oshirilgan taqdirda — Oʻzbekiston Respublikasi Moliya vazirligining Nazorat-taftish bosh boshqarmasi tomonidan amalga oshiriladi”.