Zamonaviy talablar va xalqaro standartlarni hisobga olgan holda respublika ta’lim va tibbiyot muassasalarining moddiy-texnika bazasini tizimli asosda rivojlantirish hamda mustahkamlash, ularni eng ilg‘or o‘quv, tashxis va davolash uskunalari, axborot-kompyuter texnikasi bilan jihozlash, buning uchun jamlanadigan budjetdan tashqari va grant mablag‘laridan o‘rinli hamda samarali foydalanish maqsadida:

1. O‘zbekiston Respublikasi Moliya vazirligi, Iqtisodiyot vazirligi, Oliy va o‘rta maxsus ta’lim vazirligi, Xalq ta’limi vazirligi hamda Sog‘liqni saqlash vazirligining 2012-yil 1-yanvaridan boshlab O‘zbekiston Respublikasi Moliya vazirligi huzuridagi budjetdan tashqari Ta’lim muassasalarini rekonstruksiya qilish, mukammal ta’mirlash va jihozlash jamg‘armasini O‘zbekiston Respublikasi Moliya vazirligi huzuridagi budjetdan tashqari Ta’lim va tibbiyot muassasalarini rekonstruksiya qilish, mukammal ta’mirlash va jihozlash jamg‘armasi etib qayta tashkil qilish to‘g‘risidagi taklifi qabul qilinsin.

2. O‘zbekiston Respublikasi Prezidentining 2010-yil 10-noyabrdagi PQ-1432-sonli qarorida avval belgilangan vazifalar bilan bir qatorda budjetdan tashqari budjetdan tashqari umumta’lim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal ta’mirlash va jihozlash jamg‘armasining asosiy vazifalari etib quyidagilar belgilansin:

tasdiqlangan manzilli dasturlarga muvofiq sog‘liqni saqlash muassasalarini qurish, rekonstruksiya qilish va mukammal ta’mirlash bo‘yicha ishlarni moliyalashtirish;

zamonaviy talablar va belgilangan normativlardan kelib chiqqan holda tibbiyot muassasalarini eng yangi laboratoriya, tashxis va davolash uskunalari, kompyuter texnikasi hamda boshqa tibbiyot apparatlari, maxsus mebel va anjomlar bilan jihozlash hamda doimiy asosda tizimli qayta jihozlashni moliyalashtirish.

3. Belgilab qo‘yilsinki, qayta tashkil etilayotgan budjetdan tashqari Umumta’lim maktablari, kasb-hunar kollejlari, akademik litseylar muassasalarini rekonstruksiya qilish, mukammal ta’mirlash va jihozlash jamg‘armasining barcha aktivlari va passivlari 2012-yilning 1-yanvaridan boshlab O‘zbekiston Respublikasi Moliya vazirligi huzuridagi budjetdan tashqari Umumta’lim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal ta’mirlash va jihozlash jamg‘armasiga topshiriladi.

4. Quyidagilar Jamg‘armaning daromadlarini shakllantirish manbalari etib belgilansin:

xo‘jalik yurituvchi subyektlar tomonidan Jamg‘armaga qonun hujjatlarida belgilangan tartibda majburiy ajratmalarni to‘lashdan tushadigan mablag‘lar;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablag‘lari;

xalqaro moliya institutlari hamda boshqa xorijiy donorlarning imtiyozli kreditlari (qarzlari) va grantlari;

sog‘liqni saqlash sohasi va markazlashtirilgan investitsiyalar xarajatlari hisobiga alohida bo‘lim bilan ajratiladigan O‘zbekiston Respublikasi Davlat budjeti mablag‘lari;

xayriya qiluvchilar — yuridik va jismoniy shaxslar, shu jumladan O‘zbekiston Respublikasi norezidentlarining mablag‘lari;

Jamg‘armaning vaqtincha bo‘sh mablag‘larini joylashtirishdan olinadigan daromadlar va qonun hujjatlarida taqiqlanmagan boshqa tushumlar.

5. Quyidagilar:

budjetdan tashqari umumta’lim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal ta’mirlash va jihozlash jamg‘armasini boshqarish bo‘yicha Kengash tarkibi 1-ilovaga* muvofiq;

O‘zbekiston Respublikasi Moliya vazirligi markaziy apparatining boshqaruv xodimlari soni doirasida, O‘zbekiston Respublikasi Moliya vazirligining markaziy apparati tarkibida boshqaruv xodimlari soni 9 nafardan iborat Jamg‘arma Ijroiya direksiyasining tuzilmasi 2-ilovaga* muvofiq tasdiqlansin.

6. O‘zbekiston Respublikasi Sog‘liqni saqlash vazirligi tuzilmasining markaziy apparatida boshqaruv xodimlari soni 3 nafardan iborat tibbiyot muassasalarini qurish, mukammal ta’mirlash va jihozlash (to‘liq jihozlash) manzilli ro‘yxatlarini shakllantirish va monitoring qilish bo‘yicha guruh hamda Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalarida belgilangan boshqaruv xodimlari umumiy soni doirasida 2 nafar xodimdan iborat tegishli shu’balar tashkil qilinsin.

7. Shunday tartib o‘rnatilsinki, unga muvofiq:

O‘zbekiston Respublikasi Sog‘liqni saqlash vazirligi Qoraqalpog‘iston Respublikasi Vazirlar Kengashining, viloyatlar va Toshkent shahar hokimliklarining ishtirokida har yili hududlar bo‘yicha tibbiyot muassasalarini qurish, rekonstruksiya qilish, mukammal ta’mirlashga oid takliflarni shakllantiradi hamda O‘zbekiston Respublikasining Investitsiya dasturini tasdiqlash uchun belgilangan muddatdan uch oy oldin mana shu takliflarni O‘zbekiston Respublikasi Iqtisodiyot vazirligiga kiritadi;

O‘zbekiston Respublikasi Moliya vazirligi Jamg‘armaga kelib tushadigan mablag‘lar doirasida Iqtisodiyot vazirligi bilan birgalikda Tibbiyot muassasalarini qurish, rekonstruksiya qilish, mukammal ta’mirlash Dasturining uzil-kesil parametrlarini shakllantiradi hamda uni O‘zbekiston Respublikasi Davlat budjetining loyihasi kiritiladigan muddatlarda Vazirlar Mahkamasiga taqdim etadi;

Tibbiyot muassasalarini qurish, rekonstruksiya qilish, mukammal ta’mirlash Dasturi har yili tasdiqlanadigan Investitsiya dasturiga mustaqil bo‘lim sifatida kiritiladi.

8. Quyidagilar:

Qoraqalpog‘iston Respublikasi budjeti, viloyatlar va Toshkent shahar mahalliy budjetlari hisobidan ta’minlanadigan sog‘liqni saqlash muassasalarini qurish, rekonstruksiya qilish va mukammal ta’mirlash bo‘yicha buyurtmachi vazifasi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmati zimmasiga, O‘zbekiston Respublikasining respublika budjeti mablag‘lari hisobidan ta’minlanadiganlari esa O‘zbekiston Respublikasi Sog‘liqni saqlash vazirligining qurilish bo‘yicha Birlashgan direksiyasi zimmasiga;

tibbiyot muassasalarini jihozlash (to‘liq jihozlash) bo‘yicha buyurtmachi vazifasi, berilgan vakolatlar doirasida, O‘zbekiston Respublikasi Sog‘liqni saqlash vazirligi zimmasiga yuklansin.

9. O‘zbekiston Respublikasi Moliya vazirligi manfaatdor vazirliklar va idoralar bilan hamkorlikda bir oy muddatda O‘zbekiston Respublikasi Vazirlar Mahkamasiga:

O‘zbekiston Respublikasi Moliya vazirligi huzuridagi Ta’lim va tibbiyot muassasalarini rekonstruksiya qilish, mukammal ta’mirlash va jihozlash jamg‘armasining 2012-yilgi daromadlari va xarajatlarining yangilangan parametrlarini, shuningdek tibbiyot muassasalarini qurish, rekonstruksiya qilish va mukammal ta’mirlashning 2012-yilgi Dasturini;

qonun hujjatlariga mazkur qarordan kelib chiqadigan o‘zgartish va qo‘shimchalar to‘g‘risidagi takliflarni kiritsin.

10. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.