Oʻzbekiston Respublikasi Vazirlar Mahkamasining 2011-yil 28-fevraldagi 50-son “Maktabdan tashqari taʼlim tizimini yanada takomillashtirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2011-yil, 9-son, 89-modda) qaroriga muvofiq Oʻzbekiston Respublikasi Moliya vazirligi va Xalq taʼlimi vazirligi qaror qiladi:

1. “Barkamol avlod” bolalar markazlarida bolalar oʻqiganligi uchun ota-onalar toʻlovini undirish va undan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Ushbu Nizom Oʻzbekiston Respublikasi Vazirlar Mahkamasining 2011-yil 28-fevraldagi 50-son “Maktabdan tashqari taʼlim tizimini yanada takomillashtirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2011-yil, 9-son, 89-modda) qaroriga muvofiq “Barkamol avlod” bolalar markazlarida oʻqiganligi uchun ota-onalar toʻlovini (keyingi oʻrinlarda — toʻlov) undirish va undan foydalanish tartibini belgilaydi.

1. Toʻlov qonunchilik hujjatlarida belgilanadigan miqdorlarda undiriladi.

2. Toʻlov ota-ona (ularning oʻrnini bosuvchi shaxslar) va “Barkamol avlod” bolalar markazi oʻrtasida tuzilgan shartnomaga asosan toʻlanadi. Ushbu shartnomada toʻlov belgilangan miqdorda va uzrli sabablarsiz toʻlanmagan taqdirda bolaning taʼlim olishini toʻxtatish va bekor qilish shartlari koʻrsatilishi shart.

3. Har oyda joriy oy uchun toʻlov mazkur oyning 10-sanasidan kechikmasdan toʻlanadi.

4. Mazkur Nizomning 3-bandida koʻrsatilgan muddatdan soʻng toʻlov ikki hafta mobaynida belgilangan miqdorda va uzrli sabablarsiz toʻlanmagan taqdirda, bolaning oʻqishi toʻxtatiladi, agar toʻlov boʻyicha qarzdorlik ushbu qarzdorlik yuzaga kelgan kundan boshlab 30 kalendar kun mobaynida toʻlangan boʻlsa, bolaning oʻqishi qayta tiklanadi.

5. Toʻlov boʻyicha qarzdorlik u yuzaga kelgan kundan boshlab 30 kalendar kun mobaynida qoplanmasa, bola belgilangan tartibda “Barkamol avlod” bolalar markazida taʼlim oluvchilar safidan chiqariladi. Bu holda bolaning “Barkamol avlod” bolalar markazida oʻqishini qayta tiklash yangi qabul qilinadigan bolalar uchun belgilangan tartibda amalga oshiriladi.

6. Toʻlov bank muassasalariga toʻlanadi. Bunda toʻlovni tasdiqlaydigan hujjat (kvitansiya) nusxasi “Barkamol avlod” bolalar markaziga taqdim etiladi.

Toʻlov naqd pulsiz shaklda amalga oshirilgan holda (plastik kartochkalardan toʻlashdan tashqari) “Barkamol avlod” bolalar markaziga toʻlov topshiriqnomasining nusxasi (toʻlov toʻlanganlik toʻgʻrisidagi bank belgisi qoʻyilgan holda) taqdim etiladi.

7. Toʻlov “Barkamol avlod” bolalar markaziga xizmat koʻrsatuvchi tegishli Gʻaznachilik boʻlimining hududiy gʻaznachilik hisob raqamlariga oʻtkaziladi va tegishli “Barkamol avlod” bolalar markazining shaxsiy gʻaznachilik hisob raqamida undan keyinchalik foydalanish uchun hisobga olinadi.

8. Bolaning “Barkamol avlod” bolalar markaziga qatnashi bekor qilinganda joriy oy toʻlovi ota-ona (ularning oʻrnini bosuvchi shaxslar)ning bola “Barkamol avlod” bolalar markaziga qatnashi bekor qilinguniga qadar kamida uch kun oldin bergan yozma arizasiga asosan toʻliq boʻlmagan oy uchun (yaʼni qatnashi bekor qilingan kunga qadar) toʻlanishi mumkin. Bunday ariza mavjud boʻlmaganida toʻlov toʻliq oy uchun toʻlanishi shart.

Bunda, bolaning “Barkamol avlod” bolalar markaziga qatnashiga ushbu oy uchun toʻlovning qolgan qismi toʻlanmagunicha ruxsat berilmaydi.

9. Bir kunlik toʻlov miqdorini aniqlash uchun oylik toʻlov miqdori “Barkamol avlod” bolalar markazining bola joriy oyda qatnaydigan toʻgaragi ish kunlarining rejadagi soniga boʻlinadi.

Bunda, bola “Barkamol avlod” bolalar markazidagi bittadan ortiq toʻgarakda oʻqiydigan boʻlsa, toʻlov har bir toʻgarakda oʻqiganlik uchun belgilangan miqdorda alohida undiriladi.

10. Bolaning “Barkamol avlod” bolalar markaziga oʻzi yoki oila aʼzolarining kasalligi (karantin) oqibatida, shuningdek ota-ona (ularning oʻrnini bosuvchi shaxslar)ning mehnat taʼtili paytida uch kundan ortiq ketma-ket kelmaganligi davri uchun toʻlov keyingi oylar uchun toʻlov hisobiga hisoblanadi. Bunda, “Barkamol avlod” bolalar markazining tegishli ish kunlari soni hisobga olinadi.

Bolaning “Barkamol avlod” bolalar markaziga oʻzining yoki oila aʼzolarining kasalligi (karantin) oqibatida uzrli sababga koʻra kelmasligi tegishli davolash muassasasi tomonidan berilgan maʼlumotnoma bilan tasdiqlanishi shart.

11. Bolalarning “Barkamol avlod” bolalar markaziga kelmagan boshqa barcha hollarida toʻlov umumiy asoslarda undiriladi.

12. “Barkamol avlod” bolalar markazlarida taʼlim oluvchilarning tegishli kontingenti umumiy sonining 15 foizi doirasida kam taʼminlangan oila bolalari toʻlovdan ozod qilinadi.

Bunda, birinchi navbatda ota-onasi (bittasi yoki ikkalasi) I yoki II guruh nogironi boʻlgan kam taʼminlangan oila bolalari, shuningdek har bir oila aʼzosi uchun hisoblaganda oʻrtacha oylik daromadi eng past darajada boʻlgan kam taʼminlangan oila bolalari toʻlovdan ozod qilinadi.

13. Fuqarolarning oʻzini oʻzi boshqarish organi tomonidan oilaning kam taʼminlanganligi toʻgʻrisida “Barkamol avlod” bolalar markaziga taqdim etilgan maʼlumotnoma bolani toʻlovdan ozod qilish uchun asos boʻladi.

14. Toʻlovdan ozod qilinadigan kam taʼminlangan oila farzandlari roʻyxati (keyingi oʻrinlarda Roʻyxat deb yuritiladi) moliyaviy yil boshlanguniga qadar “Barkamol avlod” bolalar markazi rahbarining buyrugʻi bilan tasdiqlanadi.

15. Bolalar “Barkamol avlod” bolalar markazida taʼlim oluvchilar safidan chiqarilishi oqibatida Roʻyxat oʻzgargan taqdirda ilgari Roʻyxatga kirmagan kam taʼminlangan oila bolalaridan shakllantiriladigan zaxira hisobiga toʻldiriladi. Roʻyxatni toʻldirishda ushbu Nizomning 12-bandining ikkinchi xatboshisida koʻrsatilgan birinchi navbatlilik talablariga rioya qilinadi.

16. Imkoniyati cheklangan bolalar uchun ixtisoslashtirilgan taʼlim muassasalari oʻquvchilari va ichki ishlar organlarining profilaktik hisobiga olingan oʻquvchilar, shuningdek, “Mehribonlik” uylari, bolalar shaharchalari, “SOS — Oʻzbekiston bolalar mahallalari” uyushmasi tarbiya muassasalari tarbiyalanuvchilari toʻlovdan ozod qilinadi.

Toʻlovdan ozod qilinadigan oʻquvchilar va tarbiyalanuvchilar roʻyxati imkoniyati cheklangan bolalar uchun ixtisoslashtirilgan taʼlim muassasalari, “Mehribonlik” uylari, bolalar shaharchalari, “SOS — Oʻzbekiston bolalar mahallalari” uyushmasi tarbiya muassasalari, xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari hamda tegishli tuman (shahar) hokimliklari moliya boʻlimi rahbarlari bilan kelishilgan holda “Barkamol avlod” bolalar markazi rahbari tomonidan tasdiqlanadi.

17. Toʻlov sifatida tushgan mablagʻlar:

toʻgarak faoliyati uchun zarur boʻlgan xom ashyo va materiallar, moddiy boyliklar (mebel, asbob-uskuna va jihozlar, kompyuter texnikasi va boshqalar) xarid qilishga;

madaniy ommaviy tadbirlarni oʻtkazish va ularda qatnashish bilan bogʻliq xarajatlarga;

oʻquvchilari respublika miqyosida oʻtkaziladigan koʻrik-tanlovlar va festivallarda 1, 2, 3-oʻrinlarni egallagan toʻgarak rahbarlarini tegishincha eng kam oylik ish haqining besh, toʻrt, uch barobari miqdorida moddiy ragʻbatlantirishga yoʻnaltiriladi.

18. Buxgalterlik hisobini yuritish, shuningdek toʻlovlardan tushadigan mablagʻlarning kirim qilinishi va sarflanishi hisobotlarini tuzish qonunchilik hujjatlarida belgilangan tartibda amalga oshiriladi.

19. Toʻlovlarning oʻz vaqtida tushishi va toʻgʻri hisoblanishi, hisob va hisobot yuritilishi, shuningdek tushgan mablagʻlardan maqsadli foydalanilishi ustidan nazorat Oʻzbekiston Respublikasi Iqtisodiyot va moliya vazirligi nazorat-taftish bosh boshqarmasi va uning joylardagi hududiy boshqarmalari tomonidan amalga oshiriladi.

20. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.

21. Ushbu Nizom “SOS — Oʻzbekiston bolalar mahallalari” uyushmasi bilan kelishilgan.