Oʻzbekiston Respublikasining “Oʻzbekiston Respublikasi Konsullik ustavini tasdiqlash toʻgʻrisida”gi Qonuniga (Oʻzbekiston Respublikasi Oliy Majlisi Axborotnomasi, 1996-y., 9-son, 124-modda), Oʻzbekiston Respublikasi Prezidentining 2010-yil 24-dekabrdagi PQ-1449-sonli “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2010-y., 52-son, 513-modda) va Oʻzbekiston Respublikasi Vazirlar Mahkamasining 1993-yil 19-avgustdagi 423-sonli “Xorijiy valyutadagi davlat bojlari, yigʻimlar hamda soliq boʻlmagan boshqa toʻlovlar stavkalari toʻgʻrisida”gi (Oʻzbekiston Respublikasi Hukumati qarorlari toʻplami, 1994-y., 3-son, 16-modda) qaroriga muvofiq buyuraman:

1. Konsullik yigʻimlari tarifini AQSh dollari kursiga nisbatan qayta hisoblash tartibi toʻgʻrisidagi nizom ilovaga muvofiq tasdiqlansin.

2. Ushbu buyruq Oʻzbekiston Respublikasi Adliya vazirligida davlat roʻyxatidan oʻtgan vaqtdan boshlab oʻn kundan keyin kuchga kiradi.

Mazkur Nizom Oʻzbekiston Respublikasining “Oʻzbekiston Respublikasi Konsullik ustavini tasdiqlash toʻgʻrisida”gi Qonuniga (Oʻzbekiston Respublikasi Oliy Majlisi Axborotnomasi, 1996-y., 9-son, 124-modda), Oʻzbekiston Respublikasi Prezidentining 2010-yil 24-dekabrdagi PQ-1449-sonli “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2010-y., 52-son, 513-modda) va Oʻzbekiston Respublikasi Vazirlar Mahkamasining 1993-yil 19-avgustdagi 423-sonli “Xorijiy valyutadagi davlat bojlari, yigʻimlar hamda soliq boʻlmagan boshqa toʻlovlar stavkalari toʻgʻrisida”gi (Oʻzbekiston Respublikasi Hukumati qarorlari toʻplami, 1994-y., 3-son, 16-modda) qaroriga muvofiq AQSh dollarida belgilangan konsullik yigʻimlarini boshqa erkin almashtiriladigan valyutaga hamda Oʻzbekiston Respublikasi Tashqi ishlar vazirligining chet eldagi diplomatik vakolatxonalari uchun ular joylashgan mamlakatining milliy valyutasiga nisbatan tarifini qayta hisoblash tartibini belgilaydi.

1. Mazkur Nizom maqsadida quyidagi asosiy tushunchalardan foydalaniladi:

konsullik yigʻimlari tarifi — Oʻzbekiston Respublikasi Vazirlar Mahkamasining 1993-yil 19-avgustdagi 423-sonli “Xorijiy valyutadagi davlat bojlari, yigʻimlar hamda soliq boʻlmagan boshqa toʻlovlar stavkalari toʻgʻrisida”gi qarorining 3-ilovasiga muvofiq oʻrnatilgan konsullik yigʻimlari tarifi;

diplomatik vakolatxonalar — Oʻzbekiston Respublikasi Tashqi ishlar vazirligining diplomatik vakolatxonalari va konsullik muassasalari.

2. Oʻzbekiston Respublikasining konsullik yigʻimlari tarifiga muvofiq konsullik yigʻimlari quyidagi valyutalarda toʻlanadi:

a) AQSh dollarida;

b) boshqa erkin almashtiriladigan valyutada;

v) Oʻzbekiston Respublikasining xalqaro shartnomalariga muvofiq yoki oʻzaro tenglik prinsiplariga rioya qilish asosida vakolatxonalar joylashgan davlatlarning milliy valyutasida (milliy valyuta erkin almashtiriladigan valyuta boʻlmagan joylarda).

3. Diplomatik vakolatxona rahbari tomonidan konsullik yigʻimlari tarifi uchun toʻlanadigan valyuta toʻgʻrisida buyruq chiqariladi. Konsullik yigʻimlari tarifini valyutada toʻlovini qayta hisoblash uchun Oʻzbekiston Respublikasi Tashqi ishlar vazirligi bilan kelishilgan holda diplomatik vakolatxona rahbari tomonidan konsullik yigʻimlarining qayta hisoblangan hisob-kitob kursi oʻrnatiladi. Qayta hisoblangan hisob-kitob kursi miqdorini belgilashda quyidagi omillar taʼminlanishi lozim:

boshqa mamlakatlar tomonidan Oʻzbekiston Respublikasi fuqarolari uchun belgilangan konsullik yigʻimlari miqdori boʻyicha oʻzaro tenglik prinsipiga rioya qilish;

milliy valyuta kursining AQSh dollariga nisbatan oʻzgarishi natijasida konsullik yigʻimlaridan olinadigan daromadlar kamayishining oldini olish.

4. Konsullik yigʻimlari tarifining qayta hisoblangan kursi diplomatik vakolatxona rahbari tomonidan, odatda, har chorakda buyruq bilan tasdiqlanadi. Zaruriyat tugʻilganda qayta hisoblangan hisob-kitob kursi chorak mobaynida oʻzgartirilishi mumkin.

5. Konsullik yigʻimlari tarifining qayta hisoblangan kursi konsullik yigʻimlarining tushumi va xarajatlari bilan bogʻliq operatsiyalarni buxgalteriya hisobidan oʻtkazish maqsadida qoʻllanilmaydi.

6. Konsullik yigʻimlari tarifini diplomatik vakolatxonalar joylashgan mamlakatlarning milliy valyutalariga nisbatan qayta hisoblashda hisob-kitob kursining toʻgʻri qoʻllanishi uchun javobgarlik diplomatik vakolatxonalar rahbarlari va buxgaltyerlari zimmasiga yuklatiladi.

7. Mazkur Nizom Oʻzbekiston Respublikasi Moliya vazirligi bilan kelishilgan.