Umumta’lim maktablaridagi iqtidorli o‘quvchilarni aniqlash va ularni rag‘batlantirish hamda davlat ixtisoslashtirilgan umumta’lim muassasalariga o‘quvchilar qabul qilishni takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Vazirlar Mahkamasining 2008-yil 7-avgustdagi 173-son qarori (O‘zbekiston Respublikasi QT, 2008-y., 8-son, 43-modda) bilan tasdiqlangan Ayrim fanlar chuqur o‘rganiladigan davlat umumta’lim muassasalarining ixtisoslashtirilgan sinflari, davlat ixtisoslashtirilgan umumta’lim muassasalari to‘g‘risidagi Nizomga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Xalq ta’limi vazirligi manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.

1. Quyidagi mazmundagi 7¹-band qo‘shilsin:

“7¹. Ixtisoslashtirilgan sinflar va ixtisoslashtirilgan umumta’lim muassasalarida hujjatlarni qabul qilish, rasmiylashtirish va tegishli fanlardan og‘zaki va yozma sinovlar o‘tkazish hamda ota-onalarning murojaatlarini ko‘rib chiqish Komissiyasi tuziladi (keyingi o‘rinlarda Komissiya deb yuritiladi).

Komissiya tarkibi 5 nafardan kam bo‘lmagan toq miqdorda tashkil etilib, uning tarkibiga ixtisoslashtirilgan umumta’lim muassasasi (ixtisoslashtirilgan sinfi mavjud umumta’lim maktab) direktori, xalq ta’limi muassasalari faoliyatini metodik ta’minlash va tashkil etish tuman (shahar) bo‘limi vakili hamda umumta’lim muassasasi o‘qituvchilari kiritiladi.

Ixtisoslashtirilgan umumta’lim muassasasi (ixtisoslashtirilgan sinfi mavjud umumta’lim maktab) direktori Komissiya raisi hisoblanadi”.

2. 8-bandning ikkinchi—beshinchi xatboshilari quyidagi tahrirda bayon qilinsin:

“Quyidagilar:

o‘quv yili tamom bo‘lgandan keyin 1-sinf o‘quvchilarini Komissiya tomonidan tegishli fanlar bo‘yicha og‘zaki va yozma sinovdan o‘tkazish;

1-sinfni tamomlagan o‘quvchilarning qobiliyatlarini aniqlash maqsadida O‘zbekiston Respublikasi Sog‘liqni saqlash vazirligi hududiy organlarining vakillari ishtirokida Xalq ta’limi vazirligining hududiy organlari tomonidan o‘tkaziladigan psixologik-pedagogik diagnostika natijalari ixtisoslashtirilgan sinf tashkil etish mezonlari hisoblanadi.

Tegishli fanlar bo‘yicha o‘tkaziladigan og‘zaki va yozma sinovlar hamda psixologik-pedagogik diagnostika materiallari va metodikasi boshlang‘ich ta’lim sohasidagi yetakchi mutaxassislarni jalb etgan holda O‘zbekiston Respublikasi Xalq ta’limi vazirligi tomonidan shakllantiriladi”.

3. 10-bandi to‘rtinchi xatboshidagi “Sog‘liqni saqlash vazirligi ishtirokida Xalq ta’limi vazirligi” so‘zlari “Sog‘liqni saqlash vazirligi hududiy organlarining vakillari ishtirokida Xalq ta’limi vazirligining hududiy organlari” so‘zlari bilan almashtirilsin.

4. 13-bandning uchinchi xatboshidagi “8” raqami “10” raqami bilan almashtirilsin.

5. 14-bandidagi “test sinovi va” so‘zlari “tegishli fanlar bo‘yicha o‘tkazilgan og‘zaki va yozma sinovlar (yoki test sinovi) hamda psixologik-pedagogik” so‘zlari bilan almashtirilsin.

6. 19-bandidagi “qayta ixtisoslashtiriladi” so‘zlari “aylantiriladi” so‘zi bilan almashtirilsin.