Oʻzbekiston Respublikasi Vazirlar Mahkamasining “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasining Mehnat kodeksiga oʻzgartish va qoʻshimchalar kiritish haqida”gi Oʻzbekiston Respublikasi Qonunini amalga oshirish uchun zarur boʻlgan normativ-huquqiy hujjatlarni tasdiqlash haqida” 2011-yil 7-apreldagi 107-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Davlat pensiyalarini tayinlash va toʻlash tartibi toʻgʻrisidagi Nizom 1-ilovaga muvofiq;

Pensiyani hisoblash uchun qabul qilinadigan ish haqini ish haqining yakka tartibdagi koeffitsiyentlarini qoʻllagan holda qayta hisoblab chiqish tartibi toʻgʻrisidagi Nizom 2-ilovaga muvofiq tasdiqlansin va 2011-yil 1-oktabrdan boshlab amalga kiritilsin.

2. Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi manfaatdor vazirliklar va idoralar bilan birgalikda uch oy muddatda:

chet elda ishlagan Oʻzbekiston Respublikasi fuqarolari va ish vaqtini hisobga olib boʻlmaydigan shaxslarning ayrim toifalari tomonidan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlash tartibini, shuningdek ularning pensiyani hisoblash uchun qoʻllanadigan mehnat stajini va amaldagi ish haqi miqdorini hisobga olish tartibini nazarda tutadigan qaror loyihasini koʻrib chiqish uchun Vazirlar Mahkamasiga kiritsinlar;

Imtiyozli shartlarda pensiya olish huquqini beradigan ishlab chiqarishlar, muassasalar, ishlar, kasblar, lavozimlar va koʻrsatkichlar roʻyxatlarini qoʻllashga doir yoʻriqnomani ishlab chiqsinlar va belgilangan tartibda tasdiqlasinlar.

3. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

4. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga (keyingi oʻrinlarda Qonun deb ataladi) muvofiq davlat pensiyalarini tayinlash va toʻlash, pensiya imtiyozlarini qoʻllash va fuqarolarni pensiya bilan taʼminlashga bogʻliq boshqa masalalarni hal qilish tartibini belgilaydi.

2. Ushbu Nizom maqsadlarida quyidagi atamalar va taʼriflardan foydalaniladi:

yashash joyi — turar joy, kvartira, xizmat turar joyi, ixtisoslashtirilgan uylar (yotoqxona, pansionat, yolgʻiz keksalar uchun maxsus uy, nogironlar, faxriylar uchun internat uy va boshqalar), shuningdek pensiya uchun murojaat qilgan jismoniy shaxs ijaraga olish shartnomasi (ikkilamchi ijara), ijara shartnomasi yoxud qonun hujjatlarida nazarda tutilgan boshqa asoslar boʻyicha mulkdor sifatida doimiy yashaydigan (doimiy roʻyxatdan oʻtgan) boshqa turar joy, doimiy yashash joyi mavjud boʻlmagan (doimiy roʻyxatdan oʻtmagan) taqdirda – vaqtincha yashash (vaqtincha roʻyxatdan oʻtish) joyi;

pensiya — uni olish huquqi Qonunda belgilangan shartlarga va meʼyorlarga muvofiq aniqlanadigan hamda shaxslarga pensiya yoshiga toʻlish, nogironlik yoki boquvchisini yoʻqotganlik munosabati bilan beriladigan oylik pul toʻlovi;

qonuniy vakil — qonun hujjatlarida belgilangan tartibda shunday deb eʼtirof etilgan farzandlikka oluvchi, vasiy yoki homiylik qiluvchi;

pensiyaga oid hujjatlar yigʻmajildi turadigan joy — pensiya olish joyi boʻyicha Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimi;

pensiya tayinlashni soʻrab murojaat etish — pensiya tayinlash, pensiya miqdorini qayta hisoblab chiqish, pensiyaning bir turidan boshqa turiga oʻtkazish, shuningdek ilgari toʻxtatib qoʻyilgan (toʻxtatilgan) pensiya toʻlashni belgilangan tartibda tiklash (qayta tiklash) toʻgʻrisida Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimiga ariza berish;

pensiyaga oid hujjatlar yigʻmajildi — ular asosida pensiya soʻrab murojaat qilgan shaxsga pensiya tayinlangan hujjatlarning tikilgan turkumi;

band shaxs — oʻzini ish bilan mustaqil taʼminlaydigan va ish vaqtini hisobga olish mumkin boʻlmagan jismoniy shaxs, tadbirkor, shu jumladan yuridik shaxs tashkil etmasdan tadbirkorlik faoliyati bilan shugʻullanuvchi, bevosita qoramol oʻstiradigan hamda chorvachilik mahsulotlari va boshqa qishloq xoʻjaligi mahsulotlari sotadigan shaxsiy yordamchi va dehqon xoʻjaligida band boʻlgan shaxs, shuningdek oilaviy tadbirkorlik va hunarmandchilik subyekti;

shaxs — Oʻzbekiston Respublikasi fuqarosi, shuningdek Oʻzbekiston Respublikasida doimiy yashaydigan va belgilangan tartibda istiqomat uchun berilgan guvohnoma olgan xorijiy fuqaro yoki fuqaroligi boʻlmagan shaxs;

ish haqi — shaxsning pensiyani hisoblash uchun qabul qilinadigan ish haqi;

ish staji — mehnat daftarchasi va ish joyidan, xizmatdan, oʻqishdan yoki arxivdan berilgan boshqa hujjatlar boʻyicha aniqlangan, ishdagi tanaffuslardan qatʼi nazar, qonun hujjatlariga muvofiq pensiya taʼminoti huquqini beradigan mehnat faoliyati va boshqa faoliyatning umumiy davomiyligi;

maxsus ish staji — xalq xoʻjaligining muayyan tarmoqlarida, kasblar va lavozimlarda qonun hujjatlariga muvofiq imtiyozli pensiya taʼminoti huquqini beradigan mehnat faoliyatining davomiyligi.

3. Bir vaqtning oʻzida qonun boʻyicha va harbiy xizmatchilarning pensiya taʼminoti toʻgʻrisidagi qonun hujjatlariga muvofiq pensiya olish huquqiga ega boʻlgan shaxsga pensiyaning bir turi uning tanlashi boʻyicha tayinlanadi.

4. Pensiya tayinlash va toʻlash, shuningdek fuqarolarning pensiya taʼminoti bilan bogʻliq boshqa masalalarni koʻrib chiqish ushbu Nizomga muvofiq Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimi (keyingi oʻrinlarda Pensiya jamgʻarmasi boʻlimi deb ataladi) tomonidan amalga oshiriladi.

5. Tashkilot maʼmuriyati har yili dekabr oyida shaxsiy varaqchalar va mehnat daftarchalari asosida keyingi yilda ham umumiy, ham imtiyozli shartlarda pensiya olish huquqiga ega boʻladigan xodimlar roʻyxatini tuzadi.

Roʻyxatda xodimning familiyasi, ismi, otasining ismi; tugʻilgan yili, oyi, kuni, shuningdek xodim yashaydigan joy; tarkibiy boʻlinmaning nomi; lavozimi (kasbi); pensiya tayinlash uchun murojaat qilish uchun asoslar; hujjatlar bilan tasdiqlangan umumiy ish staji; imtiyozli shartlarda yoshga doir pensiya tayinlash huquqini beruvchi maxsus ish staji koʻrsatilgan boʻlishi kerak.

6. Koʻrsatib oʻtilgan roʻyxatga kiritilgan xodimlarga nisbatan tashkilot maʼmuriyati pensiya tayinlash uchun hujjatlarni oldindan tayyorlashga kirishadi. Zarur boʻlganda tashkilot maʼmuriyati yetishmayotgan hujjatlarni soʻrab olish choralarini koʻrishi kerak.

Tashkilot maʼmuriyati toʻplangan barcha hujjatlar asosida pensiya tayinlash uchun taqdimnomani rasmiylashtiradi.

7. Tashkilot maʼmuriyati xodim pensiya yoshiga yetgan kundan kechiktirmay uning pensiya olish huquqiga ega boʻlganligini bildirishga majbur,

Xodim pensiya tayinlash toʻgʻrisida ariza bergan taqdirda tashkilot maʼmuriyati mazkur ariza roʻyxatga olingan vaqtdan boshlab 10 kun mobaynida zarur hujjatlarni va taqdimnomani toʻliq rasmiylashtiradi va ariza beruvchini ular bilan (taqdimnomaga imzo qoʻydirgan holda) tanishtiradi.

Hujjatlar va taqdimnoma xodimning arizasi bilan birga ariza beruvchining yashash joyidagi Pensiya jamgʻarmasi boʻlimiga yuboriladi. Tashkilot maʼmuriyati pensiya tayinlash uchun zarur boʻlgan barcha hujjatlarni toʻplay olmagan hollarda Pensiya jamgʻarmasi boʻlimiga bor hujjatlar topshiriladi, yetishmagan hujjatlar esa ushbu Nizomning 10-bandida nazarda tutilgan muddatlarda qoʻshimcha ravishda taqdim etiladi.

Agar xodimga pensiya tayinlash rad etilgan boʻlsa, bu haqda unga rad etish sabablari koʻrsatilib, yozma ravishda xabar beriladi. Pensiya soʻrab murojaat qilgan kishi maʼmuriyat qaroridan norozi boʻlsa, u pensiya tayinlash toʻgʻrisidagi arizani yashash joyidagi Pensiya jamgʻarmasi boʻlimiga bevosita berishi mumkin.

8. Pensiya tayinlash toʻgʻrisidagi ariza pensiya tayinlashni soʻrab murojaat qilgan shaxsning yashash joyi boʻyicha Pensiya jamgʻarmasi boʻlimiga beriladi.

Xodimga va uning oila aʼzolariga pensiya (boquvchisini yoʻqotganlik pensiyasi) tayinlangan taqdirda pensiya tayinlash toʻgʻrisidagi ariza xodimning yoki vafot etgan boquvchining (uning oila aʼzolariga boquvchisini yoʻqotganlik pensiyasi tayinlangan taqdirda) oxirgi ish joyi boʻyicha tashkilotning maʼmuriyati orqali ariza beruvchining yashash joyi boʻyicha Pensiya jamgʻarmasi boʻlimiga berilishi mumkin.

Pensiya tayinlanadigan shaxs balogʻatga yetmagan yoki huquqiy muomalaga layoqatsiz boʻlgan taqdirda, ariza uning ota-onasi yoki vasiysi tomonidan ularning yashash joyi orqali beriladi.

9. Pensiya tayinlashni soʻrab pensiya olish huquqi paydo boʻlgan kundan boshlab istalgan vaqtda, biror muddat bilan cheklanmagan holda murojaat etish mumkin.

10. Barcha zarur hujjatlar bilan birga ariza qabul qilingan kun pensiya soʻrab murojaat etilgan kun hisoblanadi.

Agar ariza pochta orqali yuborilsa va bunda barcha zarur hujjatlar ham ilova qilingan boʻlsa, ushbu arizani joʻnatishning pochta shtempelida koʻrsatilgan sanasi pensiya soʻrab murojaat etilgan kun hisoblanadi.

Arizaga barcha zarur hujjatlar ilova qilinmagan hollarda Pensiya jamgʻarmasi boʻlimi qoʻshimcha yana qanday hujjatlar taqdim etilishi lozimligini tashkilot maʼmuriyatiga yoki ariza beruvchiga maʼlum qiladi. Agar ular qoʻshimcha hujjatlar taqdim etilishi lozimligi toʻgʻrisida xabarnoma olingan kundan boshlab uch oydan kechikmay taqdim etilsa, pensiya tayinlash toʻgʻrisidagi ariza qabul qilingan kun pensiya tayinlash uchun murojaat qilingan kun hisoblanadi.

11. Ariza beruvchi tomonidan taqdim etilgan hujjatlarning asoslanganligi va ishonchliligi uchun shubha paydo boʻlgan taqdirda Pensiya jamgʻarmasi boʻlimi pensiya tayinlash uchun taqdim etilgan hujjatlarni tekshirish toʻgʻrisida qaror chiqarishi mumkin. Tekshirish tasdiqlovchi hujjatlarni bergan tashkilotda yoki arxivda amalga oshiriladi. Tekshirish natijalari boʻyicha ikki nusxada dalolatnoma tuziladi, u tekshiruvchining va tashkilot yoki arxiv mansabdor shaxsining imzosi, shuningdek tashkilot yoki arxivning muhri bilan tasdiqlanadi. Dalolatnomaning bir nusxasi tashkilot yoki arxivda, ikkinchi nusxasi Pensiya jamgʻarmasi boʻlimida qoladi. Dalolatnomada tasdiqlovchi hujjatlarning kim tomonidan berilganligi va tekshirish vaqtida hujjatlarning joylashgan joyi toʻgʻrisidagi maʼlumot majburiy tartibda koʻrsatiladi.

Pensiya jamgʻarmasi boʻlimi pensiya tayinlash uchun taqdim etilgan hujjatlarni tekshirish toʻgʻrisida qaror chiqargan hollarda, tekshirish tamom boʻlish muddatidan qatʼi nazar, pensiya tayinlash uchun dastlab murojaat qilingan sana pensiya tayinlash uchun murojaat qilingan sana hisoblanadi.

12. Yoshga doir pensiya tayinlash uchun murojaat qilgan shaxsning arizasiga quyidagilar ilova qilinishi kerak:

ish stajini, shu jumladan maxsus ish stajini tasdiqlaydigan hujjat;

ish haqi toʻgʻrisidagi maʼlumotnoma;

ariza beruvchining jamgʻarib boriladigan pensiya daftarchasi nusxasi (2005-yil 1-yanvardan keyin).

Bundan tashqari, zarur hollarda quyidagilar taqdim etiladi:

a) tegishli organ tomonidan berilgan harbiy xizmatni, partizan otryadlari va qoʻshilmalarda boʻlganlikni, davlat xavfsizligi organlarida va ichki ishlar organlarida xizmat qilganlikni tasdiqlaydigan maʼlumotnoma;

b) tegishli organ tomonidan berilgan, idoraviy boʻysunuvidan qatʼi nazar, harbiylashtirilgan soqchilikdagi, maxsus aloqa organlari va kon-qutqaruv qismlaridagi xizmatni tasdiqlaydigan maʼlumotnoma;

v) band boʻlgan shaxsga Oʻzbekiston Respublikasi davlat soliq organlari tomonidan taqdim etilgan maʼlumotlar asosida Pensiya jamgʻarmasi boʻlimi tomonidan berilgan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlanganligini tasdiqlaydigan maʼlumotnoma;

g) Oʻzbekiston Respublikasi Sogʻliqni saqlash vazirligining davolash-profilaktika muassasasi tibbiy-maslahat komissiyasi (keyingi oʻrinlarda TMK deb yuritiladi) tomonidan berilgan ariza beruvchining bolasi 16 yoshgacha nogiron bola deb eʼtirof etilishini tasdiqlaydigan tibbiyot xulosasi yoki Tibbiy-mehnat ekspert komissiyasi (keyingi oʻrinlarda TMEK deb yuritiladi) tomonidan berilgan parvarish ostidagi shaxs I guruh nogironi deb tan olinishini tasdiqlaydigan nogironlik toʻgʻrisidagi maʼlumotnomaning tegishli qismi;

d) davolash-profilaktika muassasasining xulosasi asosida fuqarolarning oʻzini oʻzi boshqarish organi tomonidan berilgan oʻzgalarning parvarishiga muhtoj boʻlgan 80 yoshga toʻlgan keksalarga qarab turilgan vaqtni tasdiqlaydigan maʼlumotnoma;

e) oliy taʼlim muassasalarida (shu jumladan oʻqish harbiy xizmatga tenglashtiriladigan harbiy taʼlim muassasalarida, shuningdek partiya maktablarida), aspiranturada (stajorlar-tadqiqotchilar-izlanuvchilar institutida), doktoranturada (katta ilmiy xodimlar — izlanuvchilar institutida) va klinik ordinaturada kunduzgi oʻqishni, shu jumladan chet elda oʻqishni tasdiqlaydigan diplom yoki maʼlumotnoma;

j) bolani parvarish qilish boʻyicha taʼtil berilganligi va taʼtildan qaytilganligi toʻgʻrisidagi buyruqlarning nusxalari ilova qilingan holda ayol kishi bola tugʻilgandan boshlab u uch yoshga toʻlgungacha boʻlgan davrda mehnat munosabatlarida boʻlgan tashkilot (tashkilotlar) tomonidan berilgan bola uch yoshga toʻlgunga qadar uni parvarish qilish vaqtini tasdiqlaydigan maʼlumotnoma;

z) ofitserlar tarkibidan boʻlgan shaxslar, praporshchiklar, michmanlar va muddatdan tashqari xizmat qiluvchi harbiy xizmatchilarning xotinlari, ularni ishga joylashtirish imkoniyati boʻlmagan joylarda erlari bilan yashagan vaqtni tasdiqlaydigan maʼlumotnoma;

i) ariza beruvchi urush qatnashchisi yoki unga tenglashtirilgan shaxs hisoblanishini tasdiqlaydigan hujjat;

k) davolash-profilaktika muassasasining ariza beruvchi gipofizar nanizm bemori (liliput) yoxud disproporsional pakana ekanligi toʻgʻrisidagi maʼlumotnomasi;

l) familiya, ism, ota ismi oʻzgartirilganligi toʻgʻrisidagi hujjat;

m) TMEKning nogironlik toʻgʻrisidagi maʼlumotnomasining tegishli qismi — mehnatda yoki kasb kasalligiga chalinganlik oqibatida I va II guruhlar nogironi boʻlgan vaqt stajga hisoblanadigan hollarda;

n) fuqarolarning oʻzini oʻzi boshqarish organi tomonidan berilgan nogiron bola 8 yoshga toʻlgunga qadar uni parvarish qilish vaqtini tasdiqlaydigan maʼlumotnoma, shuningdek bola 8 yoshgacha nogiron bola deb eʼtirof etilishini tasdiqlaydigan TMK tomonidan berilgan tibbiyot xulosasi, yoki TMK tomonidan berilgan nogironlikni belgilash uchun asos hisoblanadigan kasallik boʻyicha davolash-profilaktika muassasasida hisobda turganlik toʻgʻrisidagi maʼlumotnoma;

o) oqlov hukmi yoki ish toʻxtatilganligi toʻgʻrisida sudning ajrimi (qarori) yoki prokuror (tergovchi)ning ish toʻxtatilganligi toʻgʻrisidagi qarori, shuningdek oldini olish chorasi sifatida shaxsni tergov izolyatoriyada (turmada) qamoqda saqlash, qamoq yoki ozodlikdan mahrum etish shaklida jazoni oʻtash davri toʻgʻrisida tergov organlari yoki ichki ishlar organlarining maʼlumotnomasi, shuningdek reabilitatsiya toʻgʻrisidagi hujjatlar (sud organlari, prokuratura organlari, surishtiruv va tergov organlarining oqlov hukmi chiqarilganligi toʻgʻrisidagi maʼlumotnomasi yoki reabilitatsiya qiluvchi asoslar boʻyicha jinoyat ishi toʻxtatilganligi toʻgʻrisidagi qarori (ajrimi);

p) Oʻzbekiston Respublikasi Mehnat va aholini ijtimoiy muhofaza qilish vazirligi tuman (shahar) Bandlik va aholini ijtimoiy muhofaza qilish markazining shaxsni ishsiz deb eʼtirof etish toʻgʻrisidagi taqdimnomasi.

13. Nogironlik pensiyasini tayinlashni soʻrab murojaat qilgan shaxsning arizasiga quyidagi hujjatlar ilova qilinishi kerak:

ish stajini, shu jumladan maxsus ish stajini tasdiqlaydigan hujjat;

ish haqi toʻgʻrisidagi maʼlumotnoma;

ariza beruvchining jamgʻarib boriladigan pensiya daftarchasi nusxasi (2005-yil 1-yanvardan keyin);

baxtsiz hodisa va sogʻliqning ishlab chiqarishda boshqa shikastlanishi toʻgʻrisidagi hujjat yoki agar nogironlik mehnatda mayiblanish oqibatida sodir boʻlgan boʻlsa — boshqa rasmiy hujjat.

Bundan tashqari, zarur hollarda quyidagilar taqdim etiladi:

fuqarolarning oʻzini oʻzi boshqarish organi tomonidan berilgan ariza beruvchi yashash joyi boʻyicha bir oʻzi yashashi (roʻyxatdan oʻtkazilganligi) toʻgʻrisidagi maʼlumotnoma;

ushbu Nizomning 12-bandi “a”—“o” kichik bandlarida koʻrsatilgan hujjatlar.

14. Boquvchisini yoʻqotganlik pensiyasini tayinlashni soʻrab murojaat qilgan shaxsning arizasiga quyidagi hujjatlar ilova qilinishi kerak:

pensiya tayinlanayotgan shaxsning yoshini tasdiqlovchi tugʻilganlik haqidagi guvohnoma yoki pasport;

oila aʼzosining vafot etgan boquvchi bilan qarindoshlik munosabatlarini tasdiqlovchi hujjatlar (nikoh toʻgʻrisidagi guvohnoma, nikoh bekor qilinganligi toʻgʻrisidagi guvohnoma, u boʻlmagan taqdirda — fuqarolik holati dalolatnomalaridagi yozuvdan koʻchirma, vakolatli tashkilotlarning yoki xorijiy davlatlar mansabdor shaxslarining maʼlumotnomasi);

boquvchining vafot etganligi toʻgʻrisidagi guvohnoma yoki uning bedarak yoʻqolganligi toʻgʻrisida sudning qarori;

vafot etgan boquvchining ish stajini, shu jumladan maxsus ish stajini tasdiqlaydigan hujjat;

vafot etgan boquvchining jamgʻarib boriladigan pensiya daftarchasi nusxasi (2005-yil 1-yanvardan keyin);

vafot etgan boquvchining ish haqi toʻgʻrisidagi maʼlumotnoma.

Bundan tashqari, zarur hollarda quyidagilar taqdim etiladi:

fuqarolarning oʻzini oʻzi boshqarish organining vafot etgan boquvchining qaramogʻidagi oila aʼzolari tarkibi toʻgʻrisidagi maʼlumotnomasi;

taʼlim muassasasining vafot etgan boquvchining oila aʼzolari 16 — 18 yoshdagi oʻquvchilar hisoblanishi toʻgʻrisidagi maʼlumotnomasi;

fuqarolarning oʻzini oʻzi boshqarish organining vafot etgan boquvchining ota-onalari, turmush oʻrtogʻi, buvasi, buvisi, akasi (ukasi) yoki opasi (singlisi) vafot etgan boquvchining 3 yoshga toʻlmagan bolalari, aka-ukalari, opa-singillari yoki nabiralariga qarash bilan bandligini va ishlamayotganligini tasdiqlovchi maʼlumotnomasi;

baxtsiz hodisa va sogʻliqning ishlab chiqarishda boshqa shikastlanishi toʻgʻrisidagi hujjat yoki agar boquvchining vafoti mehnatda mayiblanish oqibatida sodir boʻlgan boʻlsa — boshqa rasmiy hujjat;

ushbu Nizomning 12-bandi “a”—”p” kichik bandlarida koʻrsatilgan, vafot etgan boquvchining nomiga rasmiylashtirilgan (yozilgan) hujjatlar.

Boquvchi-pensioner vafot etgan taqdirda ushbu bandda koʻrsatilgan zarur hujjatlar taqdim etilishi kerak, vafot etganning pensiyaga oid hujjatlar yigʻmajildida mavjud boʻlgan hujjatlar bundan mustasno.

Pensiya jamgʻarmasi boʻlimi arizaga boquvchisini yoʻqotganlik pensiyasini olish huquqi nogironlik oqibatida beriladigan oilaning katta yoshdagi aʼzosiga TMEKdan olingan nogironlik toʻgʻrisidagi maʼlumotnomaning tegishli qismini ilova qiladi.

15. Pensiya tayinlashni soʻrab murojaat qilgan shaxs tomonidan pensiya tayinlash uchun zarur boʻlgan hujjatlar taqdim etilmagan taqdirda Pensiya jamgʻarmasi boʻlimi ushbu hujjatlarni tegishli tashkilotlardan talab qilish yuzasidan yordam koʻrsatadi.

16. Pensiyaga ustama haq (qoʻshimcha) belgilash huquqi mavjud boʻlgan taqdirda pensiya tayinlash toʻgʻrisidagi arizaga quyidagilar ilova qilinishi kerak:

a) ariza beruvchi I yoki II guruh urush nogironi ekanligini tasdiqlaydigan hujjat;

b) I guruh nogironlikni belgilash toʻgʻrisida TMEKning nogironlik toʻgʻrisidagi maʼlumotnomasining tegishli qismi;

v) fuqarolarning oʻzini oʻzi boshqarish organi tomonidan berilgan ariza beruvchi yashash joyi boʻyicha bir oʻzi yashashi (roʻyxatdan oʻtkazilganligi) toʻgʻrisidagi maʼlumotnoma, shuningdek II guruh nogironlikni belgilash toʻgʻrisida TMEKning nogironlik toʻgʻrisidagi maʼlumotnomasining tegishli qismi;

g) ariza beruvchining urush qatnashchisi yoki unga tenglashtirilgan shaxs ekanligini tasdiqlaydigan hujjat;

d) ariza beruvchining 1941-yil 22-iyundan 1945-yil 9-maygacha Ikkinchi jahon urushi (keyingi oʻrinlarda Ikkinchi jahon urushi deb yuritiladi) davrida front ortida ishlaganligini va harbiy majburiyatlarni bajarganligini tasdiqlaydigan hujjat;

e) tegishli organ tomonidan berilgan harbiy xizmatchining yoki ichki ishlar organlari xodimining oʻlimi harbiy xizmat majburiyatlarini yoki ichki ishlar organlarida xizmatni bajarish bilan bogʻliq ekanligini tasdiqlaydigan maʼlumotnoma, shuningdek vafot etgan harbiy xizmatchining yoki ichki ishlar organlari xodimining tugʻilganlik toʻgʻrisidagi guvohnoma yoki vafot etgan harbiy xizmatchining yoki ichki ishlar organlari xodimi bilan tuzilgan er-xotin(lar) nikohi toʻgʻrisidagi guvohnoma;

j) “Oʻzbekiston Qahramoni” unvoni berilganligi toʻgʻrisidagi hujjat;

z) faxriy unvon berilganligi toʻgʻrisidagi guvohnoma.

17. Pensiya jamgʻarmasi boʻlimi pensiya tayinlash uchun hujjatlarni rasmiylashtirish va taqdim etish masalalari boʻyicha tushuntirishlar va maʼlumotnomalar berishi shart.

18. Pensiya tayinlashni soʻrab murojaat qilishda pensiya tayinlanayotgan shaxsning pasporti (istiqomat uchun berilgan guvohnoma) taqdim etilishi kerak. Pasporti boʻlmagan voyaga yetmagan bolalarga nisbatan tugʻilganlik toʻgʻrisidagi guvohnoma taqdim etiladi.

19. Qonuniy vakilning arizasiga tuman (shahar) hokimining vasiylik yoki homiylikni tayinlash toʻgʻrisidagi qarori ilova qilinadi. Ota-ona yoki qonuniy vakil pasportni taqdim etadi.

20. Ariza beruvchining urush ishtirokchisi ekanligini tasdiqlovchi hujjat sifatida Ikkinchi jahon urushi qatnashchisining guvohnomasi, baynalmilalchi jangchilarga beriladigan imtiyoz olish huquqi haqidagi guvohnoma, shuningdek, ularning urush ishtirokchisiga tenglashtirilganligini tasdiqlovchi boshqa hujjatlar qabul qilinadi.

Urush qatnashchilariga tenglashtiriladigan shaxslar doirasi ushbu Nizomga 1-ilovada keltirilgan.

21. Familiyasi, ismi, otasining ismi oʻzgartirilganligini tasdiqlaydigan hujjatlar sifatida quyidagilar taqdim etiladi: nikoh toʻgʻrisidagi guvohnoma, familiyasi, ismi, otasining ismi oʻzgartirilganligi toʻgʻrisidagi maʼlumotnoma, nikoh bekor qilinganligi toʻgʻrisidagi guvohnoma, fuqarolik holati dalolatnomasining tegishli yozuvidan koʻchirma, xorijiy davlatlarning vakolatli organlari (mansabdor shaxslari) maʼlumotnomasi.

22. Qaramogʻida mehnatga layoqatsiz oila aʼzolari borligini tasdiqlovchi hujjat sifatida fuqarolarning oʻzini oʻzi boshqarish organlarining maʼlumotnomasi qabul qilinadi. Mazkur maʼlumotnomada har bir oila aʼzosining (Qonunning 19-moddasi “v” bandida koʻrsatilgan bolalar va shaxslar bundan mustasno) familiyasi, ismi, otasining ismi, marhum boquvchiga qarindoshlik aloqasi, ular uning qaramogʻida boʻlganligi koʻrsatiladi.

Koʻrsatib oʻtilgan hujjat yoʻq boʻlsa va uni olishning imkoni boʻlmasa qaramogʻida boʻlganlik masalasi sud qarori bilan hal etilishi mumkin.

23. Ariza beruvchining urush nogironi ekanligini tasdiqlovchi hujjat sifatida TMEKning nogironlik toʻgʻrisidagi maʼlumotnomasining tegishli qismi, shuningdek harbiy gospital tomonidan beriladigan kasallik tarixidan koʻchirma qabul qilinadi.

Urush nogironlariga tenglashtiriladigan shaxslar doirasi ushbu Nizomga 2-ilovada keltirilgan.

24. Mehnat daftarchasi, tashkilotlar va arxiv maʼlumotnomalari, shuningdek mudofaa ishlari boʻyicha organlarning maʼlumotnomalari ariza beruvchining Ikkinchi jahon urushi davrida ishlaganligi va harbiy majburiyatlarni bajarganligini tasdiqlaydigan hujjat sifatida qabul qilinadi.

25. Ishlamaydigan II guruh nogironining yolgʻiz yashaydigan pensionerga tegishliligi holati fuqarolarning oʻzini oʻzi boshqarish organi tomonidan berilgan ariza beruvchining yashash joyi boʻyicha bir oʻzi yashashi (roʻyxatdan oʻtkazilganligi) toʻgʻrisidagi maʼlumotnoma, shuningdek Pensiya jamgʻarmasi boʻlimi va fuqarolarning oʻzini oʻzi boshqarish tegishli organi vakillari ishtirokida tuzilgan ariza beruvchining yaqin qarindoshlari (ota-onasi, eri yoki xotini va bolalari) yoʻqligini tasdiqlaydigan hujjat asosida belgilanadi.

26. Qonunning 12-moddasi “z” bandiga muvofiq pensiya tayinlanayotganda bola tugʻilganligi holati tugʻilish haqidagi guvohnoma asosida, uni sakkiz yoshgacha tarbiyalaganlik esa — ariza beruvchining yashash joyi boʻyicha fuqarolarning oʻzini oʻzi boshqarish organi tomonidan berilgan bolalikdan nogironni bola tugʻilgan paytdan boshlab u sakkiz yoshga toʻlguniga qadar tarbiyalagan ayolning oila aʼzolari tarkibi toʻgʻrisidagi maʼlumotnoma asosida belgilanadi.

Ariza beruvchining farzandini bolalikdan nogiron yoki 8 yoshgacha nogiron bola deb eʼtirof etish TMKning tibbiy xulosasi yoki TMEKning nogironlik toʻgʻrisidagi maʼlumotnomasi bilan tasdiqlanadi.

27. Pensiya tayinlash uchun zarur hujjatlar ham asl nusxada, ham Pensiya jamgʻarmasi boʻlimi yoki notarius tomonidan tasdiqlangan nusxalarda taqdim etilishi mumkin, faqat asl nusxalarda taqdim etiladigan maʼlumotnomalar (ish haqi, nogironlik, oila aʼzolarining tarkibi toʻgʻrisidagi maʼlumotnomalar va boshqa maʼlumotnomalar) bundan mustasno.

28. Oʻzbekiston Respublikasi hududida doimiy yashaydigan xorijiy fuqarolarning shaxsini, yoshini, yashash joyini, fuqarolikka mansubligini tasdiqlaydigan hujjat sifatida Oʻzbekiston Respublikasi ichki ishlar organlari tomonidan berilgan xorijiy fuqaro uchun istiqomat uchun berilgan ruxsatnoma taqdim etiladi.

Oʻzbekiston Respublikasi hududida doimiy yashaydigan fuqaroligi boʻlmagan shaxslarning shaxsini, yoshini, yashash joyini tasdiqlaydigan hujjat sifatida Oʻzbekiston Respublikasi ichki ishlar organlari tomonidan berilgan fuqaroligi boʻlmagan shaxs uchun istiqomat uchun berilgan ruxsatnoma taqdim etiladi.

29. Chernobil AESdagi halokat oqibatlarini tugatishda qatnashish mudofaa ishlari boʻyicha organ tomonidan berilgan belgilangan namunadagi maʼlumotnoma, shuningdek tugatishda qatnashish uchun oʻz xodimlarini yuborgan tashkilotlarning maʼlumotnomalari bilan tasdiqlanadi.

30. Nikoh munosabatlarini tasdiqlaydigan hujjatlar sifatida quyidagilar taqdim etiladi: nikoh toʻgʻrisidagi guvohnoma, fuqarolik holati dalolatnomasi yozuvidan koʻchirma, xorijiy davlatlarning vakolatli organlari (mansabdor shaxslari) maʼlumotnomalari.

31. Pensiya jamgʻarmasi boʻlimi shaxs tegishli ariza bilan murojaat qilgan taqdirda pensiya tayinlash toʻgʻrisidagi masalani koʻrib chiqadi.

Shaxsning arizasi maxsus daftarda roʻyxatdan oʻtkaziladi. Pensiya jamgʻarmasi boʻlimi tomonidan ariza beruvchiga yoki tashkilotning vakiliga ariza qabul qilingan sana koʻrsatilgan holda tilxat, shuningdek olingan va yetishmayotgan hujjatlar roʻyxati beriladi.

32. Pensiya jamgʻarmasi boʻlimi hujjatlarni qabul qilishda taqdim etilgan hujjatlarning mazmuni va rasmiylashtirilishining toʻgʻriligini, ularning nusxalari hujjatlarning asl nusxasiga muvofiqligini tekshirishi kerak.

Bunda shaxsning pensiya olishga boʻlgan huquqi, talab etiladigan ish staji mavjudligi, shuningdek pensiya tayinlash uchun asos hisoblanadigan hujjatlarning mavjudligi koʻrib chiqiladi.

Pensiya jamgʻarmasi boʻlimi tashkilotdan yoki shaxsdan qabul qilingan hujjatlarni rasmiylashtirishni oxiriga yetkazishni va qoʻshimcha hujjatlarni taqdim etishni talab qilish, shuningdek, zarur hollarda ushbu hujjatlarning toʻgʻri berilganligini tekshirib koʻrish huquqiga ega.

33. Agar hujjatda tugʻilgan vaqt toʻgʻrisida aniq sana koʻrsatilmagan holda oy koʻrsatilgan boʻlsa, u holda tegishli oyning 15-kuni tugʻilgan sana hisoblanadi.

Agar taqdim etilgan hujjatda oy koʻrsatilmasdan faqat tugʻilgan yil koʻrsatilgan boʻlsa, ushbu yilning birinchi iyuli tugʻilgan kun sifatida qabul qilinadi.

34. Barcha taqdim etilgan hujjatlar bilan birga pensiya tayinlash toʻgʻrisidagi ariza, shuningdek Pensiya jamgʻarmasi boʻlimining pensiya tayinlash toʻgʻrisidagi qarori pensiyaga oid hujjatlar yigʻma jildiga tikib qoʻyiladi.

35. Pensiya olish huquqini beradigan ish stajiga quyidagilar qoʻshib hisoblanadi:

a) faoliyat turi, mulk va xoʻjalik yuritish shakllaridan qatʼi nazar, xodim davlat tomonidan ijtimoiy sugʻurtalangan holda bajargan har qanday ish, agar u Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlagan boʻlsa.

1965-yilgacha boʻlgan davrda jamoa xoʻjaligidagi ish stajini hisoblab chiqishda, ushbu yildagi mehnat bilan qatnashish kunlari sonidan qatʼi nazar, har bir ishlab berilgan yil ish stajiga bir kalendar yil sifatida qabul qilinadi.

1965-yildan keyingi davr uchun jamoa xoʻjaligidagi ish stajini hisoblab chiqishda, agar jamoa xoʻjaligi aʼzosi uzrsiz sabablarga koʻra jamoa xoʻjaligida belgilangan mehnatda ishtirok etish minimumini bajarmagan boʻlsa, ishlangan vaqtning amalda davom etgan davri hisobga olinadi. Agar jamoa xoʻjaligi aʼzosi jamoa xoʻjaligida mehnatda ishtirok etishning belgilangan minimumini jamoa xoʻjaligi aʼzolari tarkibiga qabul qilish (chiqish) yilida bajargan boʻlsa, u holda uning ishi staji jamoa xoʻjaligi aʼzolari tarkibiga qabul qilingan sanadan (chiqish sanasigacha) boshlab qabul qilinadi.

Jamoa xoʻjaligida mehnatda ishtirok etishning belgilangan minimumini tasdiqlaydigan hujjatlar mavjud boʻlmasa mehnatning amaldagi davomiyligi boʻyicha ish vaqti hisobga olinadi.

Ijodiy faoliyat bilan mashgʻul boʻlgan ijodiy uyushmalar aʼzolariga 1991-yil 1-yanvargacha ish staji agar ana shu muallifning asari birinchi marta eʼlon qilingan yoki jamoat oldida ijro etilgan (namoyish etilgan) kundan eʼtiboran, 1991-yil 1-yanvardan boshlab esa — ular faqat Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlagan boʻlsalar, ijodiy uyushmalarning boshqaruvlari tomonidan belgilanadi.

Ish stajiga, oʻtgan davr uchun bir yoʻla qoʻshib hisoblash (toʻlash)dan qatʼi nazar, uning uchun sugʻurta badallari hisoblangan (toʻlangan) oylar qabul qilinadi, dehqon xoʻjaliklari aʼzolari hamda qoramol yetishtirish hamda shaxsiy yordamchi va dehqon xoʻjaliklarida yetishtirilgan chorvachilik mahsulotlarini sotish bilan band boʻlgan shaxslar bundan mustasno;

b) harbiy xizmat (shu jumladan safarbarlik chaqirigʻi rezervidagi harbiy xizmat) va partizanlar otryadlari va qoʻshilmalarida boʻlish, davlat xavfsizligi organlaridagi va ichki ishlar organlaridagi xizmat;

v) harbiylashtirilgan soqchilikda, maxsus aloqa organlarida va idoraviy boʻysunuvidan qatʼi nazar, kon-qutqaruv qismlaridagi xizmat;

g) Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlagan boʻlsa, yakka tartibdagi mehnat faoliyati yoki qoramol yetishtirish hamda shaxsiy yordamchi va dehqon xoʻjaliklarida yetishtirilgan chorvachilik mahsulotlarini sotish boʻyicha faoliyat;

d) qarab turish vaqti:

I guruh nogironiga yoki 16 yoshgacha nogiron bolaga qarab turish;

oʻzgalarning parvarishiga muhtoj boʻlgan qariyalarga qarab turilgan vaqt — 80 yoshga toʻlgan qariya oʻzganing parvarishiga muhtoj boʻlgan davr.

Bunda I guruh nogironini yoki 16 yoshgacha nogiron bolani, shuningdek oʻzgalarning parvarishiga muhtoj boʻlgan 80 yoshga toʻlgan keksaga qarab turish vaqti pensiya tayinlash uchun zarur boʻlgan ish stajiga faqat qarab turgan va qarab turishga muhtoj boʻlgan shaxs bilan birga yashagan shaxslardan biriga qoʻshib hisoblanadi;

e) oliy taʼlim muassasalarida (shu jumladan ularda oʻqish harbiy xizmatga tenglashtiriladigan harbiy taʼlim muassasalarida), aspiranturada (stajorlar-tadqiqotchilar-izlanuvchilar institutida), doktoranturada (katta ilmiy xodimlar — izlanuvchilar institutida) va klinik ordinaturada kunduzgi oʻqish, shu jumladan chet elda oʻqish;

j) bola 3 yoshga toʻlgunga qadar, bolani parvarishlash taʼtillarida boʻlish vaqti, biroq jami koʻpi bilan 3 yil.

Bolani parvarishlash taʼtilida boʻlish davri (shu jumladan puli toʻlanadigan taʼtilda boʻlish) yoshga doir imtiyozli pensiya olish huquqini beradigan maxsus ish stajiga qoʻshilmaydi;

z) ofitserlar tarkibidan boʻlgan shaxslarning, praporshchiklarning, michmanlarning va muddatdan tashqari xizmat harbiy xizmatchilarining xotinlari, ularni ishga joylashtirish imkoniyati boʻlmagan joylarda erlari bilan yashagan vaqt, biroq koʻpi bilan 10 yil.

36. Agar ushbu Nizomning 35-bandida koʻrsatilgan davrlar bir vaqtning oʻzida bir davrga toʻgʻri kelsa, u holda pensiyani hisoblab chiqish uchun ish stajiga pensiya tayinlash uchun murojaat qilganning xohishiga koʻra faqat bir davr qoʻshib hisoblanadi.

37. Ushbu Nizomning 35-bandi “e”—“z” kichik bandlarida nazarda tutilgan davrlar ish stajiga ushbu Nizomning 35-bandi “a”—“g” kichik bandlarida koʻrsatilgan kamida 5 yil umumiy ish staji mavjud boʻlganda qoʻshib hisoblanadi.

Nogironlik va boquvchisini yoʻqotganlik pensiyalarini tayinlashda ushbu Nizomning 35-bandi “e”—“z” kichik bandlarida nazarda tutilgan davrlar ushbu Nizomning 35-bandi “a”—“g” kichik bandlarida koʻrsatilgan ish staji mavjud boʻlganda, uning qancha davom etganligidan qatʼi nazar, qoʻshib hisoblanadi.

Mehnatda mayiblanganlik yoki kasb kasalligiga chalinish oqibatida I va II guruh nogironlikda boʻlish vaqti yoshga doir va boquvchisini yoʻqotganlik pensiyasini tayinlashda stajga qoʻshib hisoblanadi.

Yoshga doir pensiya tayinlangandan keyin ishlangan vaqt pensiya tayinlash uchun stajga qoʻshib hisoblanmaydi. Ertaroq muddatdan boshlab yoshga doir pensiya tayinlashda staj pensiya tayinlangan kungacha hisobga olinadi.

38. Nogironni sakkiz yoshgacha tarbiya qilgan bolalikdan nogironning onasiga pensiya tayinlashda talab qilinadigan 20 yillik ish stajiga ushbu Nizomning 35-bandi “a”—“d” kichik bandlarida koʻrsatilgan davrlar qoʻshib hisoblanadi.

Bunda ushbu Nizomning 35-bandi “e”—“z” kichik bandlarida nazarda tutilgan davrlar ish stajiga ushbu Nizomning 35-bandi “a”—“g” kichik bandlarida nazarda tutilgan kamida 5 yil ish staji mavjud boʻlganda kiritiladi.

Ushbu Nizomning 35-bandi “d” kichik bandida nazarda tutilgan davr Qonunning 8-moddasi talablariga rioya etgan holda ish stajiga kiritiladi.

39. Stajga quyidagilar imtiyozli tarzda qoʻshib hisoblanadi:

a) harakatdagi armiya tarkibiga kiruvchi harbiy qismlar, shtablar va muassasalardagi, jangovar harakatlar davrida partizan otryadlari va qoʻshilmalaridagi xizmat va erkin yollanganlar tarkibidagi ish, baynalmilal burchni bajarishda jangovar harakatlarda ishtirok etish — uch hissa barobarida;

b) Ulugʻ Vatan urushi davrida mamlakat ichkarisida ishlash, shu jumladan harbiy qismlardagi erkin yollanganlar tarkibidagi ish va ushbu bandning “a” kichik bandida nazarda tutilgan xizmatdan tashqari, harbiy xizmat — ikki hissa barobarida;

v) Qonun 10-moddasining “a” va “b” bandlariga hamda 11-moddasining “a” bandiga muvofiq imtiyozli shartlarda pensiya olish huquqini beradigan — erkaklarda 10 yildan ortiq va ayollarda 7 yilu 6 oydan ortiq ishlangan har bir toʻliq yil — ikki hissa barobarida;

g) moxovxonalarda, vaboga qarshi muassasalarda, immunitet tanqisligi virusi bilan kasallangan shaxslar davolanadigan yuqumli kasalliklar muassasalarida ishlash — ikki hissa barobarida;

d) patologoanatomiya muassasalari va sud-tibbiy ekspertiza muassasalarining tibbiy xodimlaridan ayrim toifalarining ishi ushbu Nizomga 3-ilovaga muvofiq — bir yarim hissa barobarida;

e) asossiz ravishda jinoiy javobgarlikka tortilgan, asossiz ravishda qatagʻon qilingan va keyinchalik oqlangan fuqarolarning qamoqda boʻlish va hibsda saqlash joylarida turgan vaqti — bir yarim hissa barobarida.

Ushbu bandda nazarda tutilgan ish stajini imtiyozli hisoblash tartibi Qonun boʻyicha tayinlanadigan pensiyalarning barcha turlari uchun qoʻllanadi.

40. Pensiyaga boʻlgan huquqni belgilashda pensiya olish huquqini beradigan ish staji ushbu Nizomning 39-bandida belgilangan qoidalar qoʻllanmasdan aniqlanadi.

41. Talab qilinadigan ish stajidan ortiq staj mavjud boʻlgan taqdirda umumiy ish staji yaxlitlanishi kerak. Bunda ish stajining umumiy 15 kalendar kundan ortiq davri toʻliq oygacha yaxlitlanadi, 15 kalendar kungacha boʻlgan davr esa (15-kalendar kunning oʻzi ham) hisobga olinmaydi.

42. Uchuvchilar va uchuvchi-sinovchilar tarkibiga kiruvchi xodimlarga pensiyalar tayinlash uchun belgilangan xizmat muddatlarini hisoblab chiqish tartibi ushbu Nizomga 4-ilovada keltirilgan.

43. Sanoatning mavsumiy tarmoqlari tashkilotlarida band boʻlgan xodimlarga ushbu Nizomga 5-ilovaga muvofiq toʻliq mavsum mobaynidagi ish bir yildagi ish uchun, toʻliq boʻlmagan mavsum mobaynidagi ish — amalda band boʻlgan davr boʻyicha hisobga olinadi.

Imtiyozli shartlarda yoshga doir pensiya olish huquqini beradigan yer osti ishlaridagi stajni hisoblab chiqishda (Qonun 10-moddasining “a”, “b” bandlari va 11-moddasining “a” bandi) mehnatda mayiblanish yoki ushbu ishda olingan kasb kasalligi oqibatida nogironlikda boʻlish vaqti ushbu Nizom 39-bandining “v” bandida belgilangan qoidalar qoʻllanmasdan koʻrsatib oʻtilgan stajga kiritiladi.

44. Agar dehqon xoʻjaligi aʼzosi yoki sovxoz xodimi ushbu yilda 12 oy ishlagan va kamida 9 oy mobaynida Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlagan boʻlsa, dehqon xoʻjaligi aʼzosining, shuningdek sovxoz xodimining ish stajiga bir kalendar yil qoʻshib hisoblanadi.

Boshqa hollarda staj sugʻurta badallari toʻlangan oylar soniga mutanosib ravishda hisobga olinadi.

45. Fermer xoʻjaligi aʼzosi va qishloq xoʻjaligi kooperativi (shirkati) xodimining ish staji Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlanishining amaldagi davri boʻyicha aniqlanadi.

46. Qoramol yetishtirish hamda shaxsiy yordamchi va dehqon xoʻjaliklarida yetishtirilgan chorvachilik mahsulotlarini sotish bilan band boʻlgan shaxslarga mehnat stajini hisoblashda, agar mazkur shaxs ushbu kalendar yilning kamida 9 oyi mobaynida badallar toʻlagan boʻlsa pensiya tayinlash uchun ish stajiga toʻliq kalendar yil qoʻshib hisoblanadi.

Koʻrsatib oʻtilgan shaxslar tomonidan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari bir yilda eng kam oylik ish haqining kamida toʻrt yarim baravari miqdorida toʻlangan taqdirda qoramol yetishtirish va yetishtirilgan chorvachilik mahsulotlarini sotish bilan band boʻlish davrlari Qonunga muvofiq pensiya tayinlash uchun mehnat stajiga qoʻshib hisoblanadi.

Mazkur Nizomning ushbu bandida, shuningdek 44-bandida nazarda tutilgan ish stajini hisoblash tartibi Qonunga muvofiq pensiyalar tayinlashda qoʻllanadi.

47. Diniy tashkilotlarning band boʻlgan shaxsi va xodimiga (shu jumladan diniy marosimlarni bajaruvchiga), shuningdek fuqarolik-huquqiy shartnoma boʻyicha ishlovchi shaxslarning ish stajiga Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlash sharti bilan ularning ish davri qoʻshib hisoblanadi.

48. Chet elda ishlash davrlari ish stajiga, agar Oʻzbekiston Respublikasining xalqaro shartnomalarida oʻzgacha hol nazarda tutilmagan boʻlsa, Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga belgilangan sugʻurta badallari toʻlangan boʻlsa, qoʻshib hisoblanadi.

Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlash va chet eldagi ish staji toʻgʻrisida mehnat daftarchalariga yozuvlarni kiritish tartibi Oʻzbekiston Respublikasi Vazirlar Mahkamasi tomonidan belgilanadi.

49. Oʻzbekiston Respublikasida doimiy yashaydigan xorijiy fuqarolarga va fuqaroligi boʻlmagan shaxslarga chet eldagi ish stajiga, agar Oʻzbekiston Respublikasining xalqaro shartnomalarida oʻzgacha hol nazarda tutilmagan boʻlsa, Oʻzbekiston Respublikasidagi ishga toʻgʻri keladigan stajning uchdan biridan ortiq boʻlmagan doirada kiritiladi.

50. Mehnatda mayiblanish yoki kasb kasalligiga chalinish oqibatida nogironlik pensiyasi, ish stajidan qatʼi nazar, tayinlanadi.

51. Mehnatda mayiblanish yoki kasb kasalligiga chalinish oqibatida nogironlik pensiyasidan umumiy kasallik oqibatida nogironlik pensiyasiga oʻtkazishda zarur staj nogironlikning dastlabki belgilanishi vaqtiga nisbatan yosh boʻyicha belgilanadi.

52. Umumiy kasallik oqibatida nogironlik pensiyasi nogironlik boshlangan vaqtda nisbatan quyidagi ish staji mavjud boʻlganda tayinlanadi:

53. Ish davrida yoki ish toʻxtatilgandan keyin 20 yoshga toʻlgungacha umumiy kasallik oqibatida nogiron boʻlib qolgan shaxsga pensiya, ish staji davridan qatʼi nazar, tayinlanadi.

Agar umumiy kasallik oqibatida nogironlik boshlangan vaqtga nisbatan ushbu Nizomning 52-bandida belgilangan yoshga nisbatan talab qilinadigan ish staji mavjud boʻlmagan taqdirda va ish stajiga qoʻshimcha ravishda erishish sharti bilan talab qilinadigan ish staji pensiya tayinlash uchun murojaat qilingan kundagi yoshga nisbatan belgilanishi mumkin.

54. Nogironlik pensiyasi tayinlangandan keyingi ish vaqti yoshga doir yoki vafot etgan nogiron uchun boquvchisini yoʻqotganlik pensiyalarini hisoblab chiqish uchun ish stajiga qoʻshib hisoblanadi.

55. Ish staji ish, xizmat, oʻqish yoki ish stajiga hisoblanadigan boshqa faoliyat amalga oshirilishi joyidan, shuningdek arxiv muassasalaridan beriladigan hujjatlar boʻyicha belgilanadi.

Ish bilan mashgʻul shaxslarga ish staji ushbu Nizomga 6-ilovaga muvofiq shakl boʻyicha Oʻzbekiston Respublikasi davlat soliq organlari tomonidan taqdim etiladigan maʼlumotlar asosida Pensiya jamgʻarmasi boʻlimi tomonidan beriladigan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlanganligi toʻgʻrisidagi maʼlumotnomalar boʻyicha belgilanadi.

56. Ish staji toʻgʻrisida hujjatlar mavjud boʻlmagan taqdirda mehnat faoliyati davrlari sudning qarori bilan belgilanadi.

57. Ish staji toʻgʻrisidagi taqdim etilgan hujjatlarning asoslanganligi va ishonchliligini aniqlash maqsadida Pensiya jamgʻarmasi boʻlimi:

ish stajini tasdiqlash uchun taqdim etilgan hujjatlarning mazmunini va zarur tarzda rasmiylashtirilganligini baholaydi hamda zarurat boʻlganda ular berilishining asoslanganligini tekshirish toʻgʻrisida qaror qabul qiladi;

zarur hollarda mehnat faoliyatining ayrim davrlarini ish staji davriga hisobga olish yoki hisobdan chiqarib tashlash toʻgʻrisida qaror chiqaradi.

58. Ish staji toʻgʻrisidagi hujjatlar harbiy harakatlar, tabiiy ofatlar, avariyalar, halokatlar yoki boshqa favqulodda vaziyatlar natijasida toʻliq saqlanmagan yoki qisman saqlangan hollarda ish stajini tasdiqlash Oʻzbekiston Respublikasi Vazirlar Mahkamasi, Qoraqalpogʻiston Respublikasi Vazirlar Kengashi yoki viloyatlar, tumanlar (shaharlar)ning mahalliy davlat hokimiyati organlari (hokimliklar) tomonidan tashkil etiladigan ish stajini aniqlash boʻyicha maxsus komissiyalar tomonidan amalga oshiriladi.

Qisman saqlanib qolgan hujjatlar va guvohlarning koʻrsatmalari asosida koʻrsatib oʻtilgan komissiyalar tomonidan belgilangan mehnat faoliyati davrlari ish stajiga, shuningdek hujjatlar bilan tasdiqlangan ish vaqti sifatida imtiyozli pensiya olish huquqini beradigan maxsus ish stajiga kiritiladi.

59. Mehnat daftarchasi ish stajini tasdiqlaydigan asosiy hujjat hisoblanadi.

Ish bilan band boʻlgan shaxsning ish staji Oʻzbekiston Respublikasi davlat soliq organlari tomonidan taqdim etiladigan maʼlumotlar asosida Pensiya jamgʻarmasi boʻlimining sugʻurta badallari toʻlanganligini tasdiqlaydigan maʼlumotnomasi boʻyicha belgilanadi.

Mehnat daftarchasi mavjud boʻlmaganda, shuningdek mehnat daftarchasida zarur yozuvlar boʻlmagan yoki mehnat faoliyati davrlari toʻgʻrisida notoʻgʻri va noaniq yozuvlar mavjud boʻlgan hollarda ish stajini tasdiqlash uchun (ish bilan band shaxsning ish stajidan tashqari) maʼlumotnomalar, buyruqlardan koʻchirmalar, shaxsiy hisobvaraqlari va ish haqi berish uchun vedomostlar, mehnat shartnomalari (kontraktlar), arxiv maʼlumotnomalari va mehnat faoliyati davrlari toʻgʻrisidagi maʼlumotlar mavjud boʻlgan boshqa hujjatlar qabul qilinadi.

Bunda maʼlumotnomada ishga qabul qilish toʻgʻrisidagi, ish (lavozim) boʻyicha oʻzgarishlar toʻgʻrisidagi va asoslari koʻrsatilgan holda mehnat shartnomasining toʻxtatilishi toʻgʻrisidagi maʼlumotlar koʻrsatilishi kerak. Maʼlumotnoma tashkilot yoki arxiv rahbari, shuningdek maʼlumotnomani tayyorlagan xodim tomonidan imzolanadi va maʼlumotnomani bergan tashkilot yoki arxivning muhri bilan tasdiqlanadi.

60. 1991-yil 1-yanvargacha ijodiy uyushmalar aʼzolari hisoblangan ijodiy xodimlarning ish staji ushbu muallifning asari birinchi marta eʼlon qilingan yoki jamoat oldida ijro etilgan (namoyish qilingan) kunni tasdiqlaydigan ijodiy uyushmalar boshqaruvlari tomonidan berilgan maʼlumotnomalar bilan belgilanadi.

1991-yil 1-yanvardan keyin ish stajini belgilash uchun Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlash davri toʻgʻrisidagi maʼlumotnomalar, shuningdek ijodiy uyushmalardagi mavjud maʼlumotlar asosida ijodiy uyushmalar boshqaruvi tomonidan berilgan ijodiy faoliyat davri toʻgʻrisidagi maʼlumotnoma qabul qilinadi.

61. Ijodiy uyushmalar aʼzolari hisoblanmagan boshqa ijodiy xodimlarning ijodiy faoliyatini tasdiqlash uchun Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlash davri toʻgʻrisidagi maʼlumotnomalar qabul qilinadi.

62. Harbiy xizmatni, davlat xavfsizligi organlaridagi xizmatni, shuningdek asrda boʻlganlik vaqtini tasdiqlash uchun:

harbiy guvohnomalar (harbiy biletlar);

mudofaa ishlari boʻyicha boʻlimlarning, yuqori harbiy qismlarning, Oʻzbekiston Respublikasi Mudofaa vazirligi, Oʻzbekiston Respublikasi Ichki ishlar vazirligi va Oʻzbekiston Respublikasi Milliy xavfsizlik xizmatining shtablari va muassasalarining maʼlumotnomalari;

arxiv maʼlumotnomalari va harbiy-davolash muassasalarining maʼlumotnomalari qabul qilinadi.

Yuqorida koʻrsatib oʻtilgan hujjatlar asosida mehnat daftarchasiga kiritilgan harbiy xizmat toʻgʻrisidagi yozuvlar ham tasdiqlash uchun qabul qilinadi.

Jangovar harakatlar davrida harakatdagi armiya tarkibidagi harbiy xizmat, shu jumladan baynalmilal burchni bajarishdagi harbiy xizmat ushbu Nizomga 7-ilovaga muvofiq shakl boʻyicha Oʻzbekiston Respublikasi Mudofaa vazirligi tomonidan belgilanadigan tartibda beriladigan mudofaa ishlari boʻyicha boʻlimlarning maʼlumotnomalari asosida imtiyozli hisoblab chiqilgan holda mehnat stajiga qoʻshib hisoblanadi.

Oʻzbekiston Respublikasi ichki ishlar organlaridagi xizmatni tasdiqlash uchun mehnat daftarchasiga kiritilgan bunday xizmat toʻgʻrisidagi yozuvlar, yozuvlar boʻlmagan taqdirda esa — ushbu Nizomga 8-ilovaga muvofiq shakl boʻyicha Oʻzbekiston Respublikasi Ichki ishlar vazirligi tomonidan belgilanadigan tartibda beriladigan maʼlumotnomalar qabul qilinadi.

63. Oliy taʼlim muassasalarida (shu jumladan ularda oʻqish harbiy xizmatga tenglashtiriladigan harbiy-taʼlim muassasalarida) aspiranturada (stajorlar-tadqiqotchilar-izlanuvchilar institutida), doktoranturada (katta ilmiy xodimlar-izlanuvchilar institutida) va klinik ordinaturada kunduzgi oʻqish vaqti diplomlar, shuningdek maʼlumotnomalar va arxiv maʼlumotlari asosida berilgan va oʻqish davrlari toʻgʻrisidagi maʼlumotlar mavjud boʻlgan boshqa hujjatlar bilan tasdiqlanadi.

Hujjatlarda bunday maʼlumotlar mavjud boʻlmagan taqdirda oʻqish davrining isboti sifatida, hujjatlarda toʻliq oʻquv yilini tamomlaganlikka koʻrsatma mavjud boʻlishi sharti bilan, tegishli yillarda mazkur taʼlim muassasasida oʻqish davri davomiyligi toʻgʻrisidagi maʼlumotnomalar taqdim qilinadi.

64. Ish davrida boshlangan vaqtincha mehnatga layoqatsizlik davri davomiyligi ushbu ish joyi boʻyicha beriladigan maʼlumotnomalar boʻyicha belgilanadi.

Bunda koʻrsatib oʻtilgan (tibbiyot muassasalari tomonidan berilgan mehnatga layoqatsizlik varaqalari bilan tasdiqlangan) davr ish stajiga faqat Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlangan taqdirda kiritiladi.

65. I guruh nogironiga yoki 16 yoshgacha nogiron bolaga, shuningdek 80 yoshga toʻlgan keksalarga qarab turish vaqti:

qarab turishning haqiqiy holatlarini tekshirish dalolatnomasi;

nogironlikda boʻlganlikni (I guruh nogironlari va nogiron bolalar uchun), yoshni (keksalar va nogiron bolalar uchun) tasdiqlaydigan hujjatlar va oʻzganing parvarishi zarurligi toʻgʻrisida (keksalar uchun) davolash muassasasining tibbiy xulosasi asosida belgilanadi.

Qarab turishning haqiqiy holatlarini tekshirish dalolatnomasi fuqarolarning oʻzini oʻzi boshqarish organidan olingan maʼlumotlar va qarab turilgan shaxslardan, shuningdek ularning qoʻshnilaridan soʻrab chiqish asosida Pensiya jamgʻarmasi boʻlimi tomonidan tuziladi.

66. Bolani parvarishlash taʼtilida boʻlish vaqti bolani parvarishlash taʼtili berilishi va undan qaytish toʻgʻrisidagi buyruqlarning nusxalari ilova qilingan holda tashkilot tomonidan berilgan, bolaga qaralgan vaqtni tasdiqlaydigan maʼlumotnomalar asosida belgilanadi.

Bolani parvarishlash taʼtilida boʻlish vaqti bolani parvarishlash taʼtili berilishi va undan qaytish toʻgʻrisidagi maʼlumotnomalar yoki buyruqlar mavjud boʻlmaganda, shuningdek buyruqlarda zarur yozuvlar boʻlmaganda yoki bolani parvarishlash taʼtilida boʻlganlik davrlari toʻgʻrisida notoʻgʻri va noaniq yozuvlar boʻlganda, ushbu davr uchun oylik ish haqi toʻgʻrisidagi maʼlumotnoma bolani parvarishlash taʼtilida boʻlganlik davrining tasdigʻi sifatida qabul qilinadi.

Arxiv tomonidan tasdiqlangan yuqorida koʻrsatib oʻtilgan hujjatlar mavjud boʻlmaganda bolani parvarishlash taʼtilida boʻlish davri quyidagi davrlarni tashkil etadi:

1 yil — 1971-yil 1-yanvardan 1983-yil 1-noyabrgacha tugʻilgan bola uchun;

1,5 yil — 1983-yil 1-noyabrdan 1990-yil 1-iyulgacha tugʻilgan bola uchun;

3 yil — 1990-yil 1-iyuldan keyin tugʻilgan bola uchun.

Koʻrsatib oʻtilgan hollarda bolani parvarishlash taʼtili boshlangan sana sifatida bola tugʻilgan sana qabul qilinadi.

1965-yildan keyingi davr uchun jamoa xoʻjaligi aʼzosining bolani parvarishlash taʼtilida boʻlish vaqtini aniqlashda, agar jamoa xoʻjaligi aʼzosi boʻlgan, bola tuqqan ayol jamoa xoʻjaligida mehnatda ishtirok etishning belgilangan minimumini bajarmagan boʻlsa, bola tugʻilgan yil (pensiya tayinlashni soʻrab murojaat qilganning tanlovi boʻyicha) mehnat stajining toʻliq yili, biroq jami koʻpi bilan 3 yil sifatida hisobga olinadi.

67. Oldini olish chorasi sifatida qamoqda boʻlish vaqti, jazoni oʻtash vaqti, shaxs lavozimdan noqonuniy chetlatilganligi munosabati bilan ishlamagan vaqt, tibbiyot muassasasida boʻlish vaqti tergov organlari yoki ichki ishlar organlarining maʼlumotnomalari bilan tasdiqlanadi va reabilitatsiya (oqlov hukmi, reabilitatsiyalovchi asoslar boʻyicha ish toʻxtatilishi toʻgʻrisidagi ajrim (qaror) haqidagi hujjatlar mavjud boʻlganda ish stajiga hisoblanadi.

68. Ofitserlar tarkibidan boʻlgan shaxslarning, praporshchiklarning, michmanlarning va muddatidan tashqari xizmat harbiy xizmatchilarining xotinlari, ularni ishga joylashtirish imkoniyati boʻlmagan joylarda erlari bilan yashagan vaqti maʼlumotnomalar bilan tasdiqlanadi.

Xizmat Oʻzbekiston Respublikasi hududida oʻtalgan hollarda ushbu maʼlumotnoma mazkur Nizomga 9-ilovaga muvofiq shakl boʻyicha Oʻzbekiston Respublikasi Mehnat va aholini ijtimoiy muhofaza qilish vazirligining aholi bandligi hududiy organi tomonidan beriladi, xizmat chet elda oʻtalgan taqdirda esa — ushbu Nizomga 10-ilovaga muvofiq shakl boʻyicha harbiy xizmat oʻtalgan joy boʻyicha yuqori harbiy qismlar, muassasalar, harbiy-oʻquv (oʻquv) muassasalari komandirlari (boshliqlari) tomonidan beriladi.

69. Harakatdagi armiya tarkibiga kiruvchi harbiy qismlar, shtablar va muassasalardagi, jangovar harakatlar davrida partizan otryadlari va qoʻshilmalarida xizmat va erkin yollanganlar tarkibidagi ish, baynalmilal burchni bajarishda jangovar harakatlarda qatnashish mudofaa ishlari boʻlimlari va tegishli organlar tomonidan berilgan maʼlumotnomalar bilan tasdiqlanadi.

70. Xodimlarning ayrim toifalari uchun belgilangan imtiyozli shartlarda pensiya olish huquqini tasdiqlash uchun (masalan: ishlarning qizgʻin uchastkalarida yoki qizgʻin ishlarda bandlik toʻgʻrisida, muayyan moddalar yoki xavflilikning muayyan darajalariga kiradigan zararli moddalar bilan ishlash toʻgʻrisida, yer osti ishlarida bandlik toʻgʻrisida, ishlarni muayyan usulda bajarganlik toʻgʻrisida, muayyan joyda ishlarni bajarganlik toʻgʻrisida va shu kabilar) maxsus stajni tasdiqlash maqsadida ushbu Nizomga 11-ilovaga muvofiq shakl boʻyicha faqat tashkilotning aniqlashtiruvchi maʼlumotnomalari qabul qilinadi.

71. Uchuvchilar va uchuvchi-sinovchilar tarkibiga kiruvchi xodimlarning ayrim toifalariga imtiyozli pensiya taʼminoti huquqini beradigan maxsus ish staji:

uchuvchilar va uchuvchi-sinovchilar tarkibiga kiruvchi xodimlar uchun — tegishli tashkilot tomonidan berilgan uchilgan soatlarni tasdiqlaydigan maʼlumotnoma bilan tasdiqlanadi. Uchuvchi-sinovchilar tarkibiga kiradigan ayrim xodimlarning sinov texnikasini sinashda bandligi tashkilotlar tomonidan berilgan maʼlumotnomalar bilan tasdiqlanadi;

havo harakatini boshqargan xodimlar uchun — mehnat daftarchasi bilan, shuningdek: havo harakatini bevosita boshqarishga qoʻyish toʻgʻrisidagi belgilar bilan birga harakat xizmati dispetcheri (parvozlar rahbarining) guvohligi; mutaxassisni havo harakatini bevosita boshqarish bilan bogʻliq lavozimga tayinlash toʻgʻrisidagi maʼlumotlar koʻrsatilgan holda tashkilotning maʼlumotnomalari asosida tasdiqlanadi.

72. Teatrlar va boshqa teatr-tomosha korxonalari va jamoalarining artistlari ayrim toifalarining imtiyozli pensiya taʼminoti olish huquqini beradigan maxsus ish staji mehnat daftarchasi bilan tasdiqlanadi.

Kasb (lavozim)ning nomi, bajariladigan ishning janrga mansubligi, xususiyati yoki ish kechgan tashkilotning maqomi toʻgʻrisida mehnat daftarchasida zarur maʼlumotlar mavjud boʻlmagan hollarda maxsus ish staji ushbu shaxsga nisbatan maʼlumotlar mavjud boʻlgan ish joyidan berilgan maʼlumotnoma bilan tasdiqlanadi.

73. Oʻzbekiston Respublikasi fuqarolarining yollanish (kontrakt) boʻyicha chet eldagi ish staji Oʻzbekiston Respublikasi Mehnat va aholini ijtimoiy muhofaza qilish vazirligining Tashqi mehnat migratsiyasi masalalari agentligi tomonidan mehnat daftarchalariga kiritiladigan yozuvlar boʻyicha aniqlanadi.

74. Avariyalar va mahalliy koʻlamdagi boshqa favqulodda vaziyatlar (yongʻin, suv bosishi), tashkilotning toʻliq tugatilishi yoxud ushbu Nizomning 58-bandida nazarda tutilgandan boshqa sabablar boʻyicha arxiv maʼlumotlarining mavjud emasligi munosabati bilan mavjud ish staji toʻgʻrisidagi hujjatlar mavjud boʻlmaganda va ularni olish imkoni boʻlmaganda ish staji sud tartibida belgilanadi.

75. Sudning qarori bilan jamoa xoʻjaligi aʼzosining ish staji tasdiqlangan taqdirda ushbu stajni belgilash 16 yoshdan boshlab amalga oshiriladi, agar ish staji boshlanishi Ikkinchi jahon urushi davriga toʻgʻri kelsa — 14 yoshdan belgilanadi.

76. Ish stajini tasdiqlash uchun taqdim etiladigan hujjatlar mansabdor shaxs tomonidan imzolanishi va tashkilotning asosiy muhri bilan tasdiqlanishi kerak.

Mehnat daftarchasidagi yozuvlar ushbu daftarchani toʻldirish va yuritish paytida amalda boʻlgan mehnat daftarchalarini yuritishni tartibga soladigan qonun hujjatlari talabiga muvofiq rasmiylashtirilishi kerak.

Agar mehnat daftarchalarida va boshqa hujjatlarda yozuvlar belgilangan qoidalardan chetga chiqqan holda bajarilgan boʻlsa ularni ish stajining isboti sifatida qabul qilish mumkinligi toʻgʻrisidagi masala Pensiya jamgʻarmasi boʻlimi tomonidan hal etiladi.

77. Ish stajini tasdiqlash uchun faqat mehnat daftarchalariga kiritilgan va tasdiqlaydigan hujjatlar asosidagi maʼlumotnomalarda koʻrsatilgan ish davrlari toʻgʻrisidagi maʼlumotlar qabul qilinadi.

Keyinchalik oʻz faoliyatini toʻxtatgan jamoa xoʻjaliklari, qishloq xoʻjaligi kooperativlari (shirkatlar) va fermer xoʻjaliklari tomonidan berilgan maʼlumotnomalar, agar ularda maʼlumotnoma berish uchun asoslar mavjud boʻlsa, eʼtiborga olinadi.

78. Hujjatlar asosida mehnat daftarchasiga kiritilgan ish staji toʻgʻrisidagi jami yozuvlar quyidagi ish davrlariga nisbatan:

1962-yil 14-dekabrdan keyin, agar mehnat daftarchasiga ariza beruvchi mehnat daftarchasini bergan tashkilotga kirguniga qadar qaysi tashkilotda, qaysi vaqtda va qanday lavozimlarda ishlaganligi toʻgʻrisida aniq yozuvlar kiritilgan boʻlsa;

1962-yil 14-dekabrgacha, mehnat daftarchasida koʻrsatib oʻtilgan maʼlumotlar bor-yoʻqligidan qatʼi nazar, ish stajining isboti hisoblanadi.

Agar ariza beruvchi mehnat daftarchasidan tashqari jami yozuvlar tegishli boʻlgan mehnat daftarchasi toʻldirilguniga qadar davr uchun ish toʻgʻrisida ayrim hujjatlarni taqdim etsa, u holda umumiy yakun sifatida yozilgan butun ish staji hujjatlar bilan tasdiqlanishi kerak. Bu amaldagi qoidalarga muvofiq ular toʻgʻrisidagi yozuvlar mehnat daftarchasiga alohida satrda yozilishi kerak boʻlgan mehnat faoliyati davrlari toʻgʻrisida hujjatlar taqdim etilishi hollariga tegishli emas.

Jami yozuvlarda hisobga olinishi mumkin boʻlgan Ikkinchi jahon urushi davridagi ish davrlari toʻgʻrisida hujjatlar taqdim etilganda ushbu hujjatlar boʻyicha ish staji qoʻshimcha ravishda bir baravar yoki ikki baravar miqdorga muvofiq hisoblab chiqiladi. Ushbu holatda mehnat daftarchasiga umumiy yakun bilan yozilgan jami ish stajini tasdiqlash talab etilmaydi.

79. Oʻqish davrida akademik taʼtillarda boʻlish vaqti ish stajiga qoʻshib hisoblanmaydi.

80. Agar ish stajini tasdiqlaydigan hujjatda koʻrsatilgan ismi, otasining ismi yoki familiyasi pasport yoki tugʻilganlik toʻgʻrisidagi guvohnoma boʻyicha ismi, otasining ismi yoki familiyasi bilan mos boʻlmasa ushbu hujjatning mazkur shaxsga tegishliligi holati faqat mehnat daftarchasini yoki ish staji toʻgʻrisidagi boshqa hujjatni birinchi marta bergan tashkilot tomonidan tasdiqlanishi mumkin.

81. Ish staji toʻgʻrisida taqdim etilgan hujjatda aniq sanalar belgilanmasdan faqat yillar koʻrsatilgan hollarda tegishli yilning 1-iyuli sana sifatida qabul qilinadi, agar oyning sanasi koʻrsatilmagan boʻlsa, tegishli oyning 15-kuni ana shunday sana hisoblanadi.

82. Pensiya jamgʻarmasi boʻlimi yoki ish stajini belgilash boʻyicha maxsus komissiya tomonidan chiqarilgan ish stajini qabul qilish yoki qabul qilmaslik toʻgʻrisidagi qaror bilan rozi boʻlinmagan taqdirda ushbu masala sud tomonidan hal etiladi.

83. Ish haqi toʻgʻrisidagi maʼlumotnoma shaxs murojaat qilgandan keyin uning talabi boʻyicha ushbu Nizomga 12 va 13-ilovalarga muvofiq shakl boʻyicha qonun hujjatlarida belgilangan muddatlarda tashkilot, shuningdek arxiv tomonidan beriladi.

84. Ish haqi toʻgʻrisidagi maʼlumotnoma shaxsiy hisob raqamlari va hisoblangan ish haqi toʻgʻrisidagi boshqa hujjatlar asosida pensiya tayinlashni soʻrab murojaat qilgan yoki vafot etgan boquvchi ishlagan tashkilot tomonidan beriladi. Agar tashkilot tugatilgan yoki boshqa sabablarga koʻra oʻz faoliyatini toʻxtatgan boʻlsa, ish haqi toʻgʻrisidagi maʼlumotnoma tashkilotning huquqiy vorisi yoki davlat arxivi tomonidan beriladi.

Arxiv saqlanayotgan hujjatlar asosida ish haqi turlari boʻyicha hisoblangan summalarni yoyib koʻrsatgan holda belgilangan shakl boʻyicha ish haqi turlari boʻyicha maʼlumotnoma berish imkoniga ega boʻlmagan hollarda, arxiv fondidagi mavjud hujjatlarga muvofiq maʼlumotnoma yoki maʼlumotlar berishi mumkin.

Qonunda nazarda tutilgan hollarda pensiyani hisoblash uchun:

a) Oʻzbekiston Respublikasida tegishli kasb va malaka xodimining ish haqi toʻgʻrisidagi maʼlumotnoma — Oʻzbekiston Respublikasida ishlamagan boshqa mamlakatlardan koʻchib kelgan fuqarolar uchun.

Respublikada bunday kasb va malaka boʻlmagan taqdirda ish haqi Oʻzbekiston Respublikasi Vazirlar Mahkamasi tomonidan belgilangan tartibda aniqlanadi;

b) mualliflik gonorari toʻgʻrisidagi maʼlumotnomalar — ijodiy uyushmalar aʼzolari va ijodiy uyushmalarning aʼzolari hisoblanmagan boshqa ijodiy xodimlar uchun.

1991-yil 1-yanvardan soʻng koʻrsatib oʻtilgan shaxslar, shuningdek band boʻlgan shaxslar Oʻzbekiston Respublikasi davlat soliq organlari tomonidan taqdim etiladigan maʼlumotlar asosida Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badallari toʻlanganligi toʻgʻrisida Pensiya jamgʻarmasi boʻlimi tomonidan berilgan maʼlumotnomalarni taqdim etadilar.

85. Ish haqi hisoblangan ish haqi summasidan olinadi.

Ish haqini guvohlar koʻrsatmasi asosida aniqlashga yoʻl qoʻyilmaydi. Lavozim maoshlari shtat jadvalidan koʻchirmalar va jamoat tashkilotlarining aʼzolik biletlari haqiqiy ish haqini tasdiqlaydigan hujjat oʻrnini bosa olmaydi.

Ish haqi toʻgʻrisidagi maʼlumotlar qisman mavjud boʻlmagan hollarda mavjud boʻlmagan davrlar uchun ish haqini aniqlash uchun mintaqaviy koeffitsiyent hisobga olinmasdan, qonun hujjatlarida tegishli davrlar uchun belgilangan eng kam oylik ish haqi miqdorlari qabul qilinadi.

Pensiya tayinlash uchun berilgan hujjatlarda ishonchsiz maʼlumotlar aniqlanganda yoki ish haqi toʻgʻrisidagi maʼlumotlarni buzadigan tuzatishlar aniqlanganda Pensiya jamgʻarmasi boʻlimi pensiya tayinlashgacha ularni tekshirishi yoki qoʻshimcha maʼlumotlar taqdim etish yoki ish haqi toʻgʻrisida berilgan maʼlumotnomalarga tushuntirishlar berish toʻgʻrisida yozma soʻrov yuborishi shart.

86. Ishdagi tanaffuslar mavjudligidan qatʼi nazar, oxirgi oʻn yillik mehnat faoliyati davomidagi istalgan ketma-ket besh yil uchun (pensiya tayinlashni soʻrab murojaat etgan kishining tanlovi boʻyicha) oylik ish haqi olinadi.

87. Ushbu Nizomning 35-bandi “d”, “e”, “j” va “z” kichik bandlarida koʻrsatilgan davrlar, shuningdek muddatli harbiy xizmatni oʻtash vaqti, shaxs mehnat faoliyatini amalga oshirmasdan, mehnatda mayiblanish va kasb kasalligiga chalinish oqibatida I yoki II guruh nogironi boʻlib qolgan vaqt ish haqini aniqlashda mehnat faoliyatining oxirgi oʻn yillik davriga kiritilmaydi.

Mehnat faoliyatining oxirgi oʻn yillik davrida ushbu Nizomning 35-bandi “d”, “e”, “j” va “z” kichik bandlarida koʻrsatilgan davrlar, shuningdek muddatli harbiy xizmatni oʻtash vaqti, shaxs mehnat faoliyatini amalga oshirmasdan, mehnatda mayiblanish va kasb kasalligiga chalinish oqibatida I yoki II guruh nogironi boʻlib qolgan vaqt mavjud boʻlgan taqdirda ushbu davrlar mazkur Nizomning 35-bandi “a”, “b”, “v” va “g” kichik bandlarida koʻrsatilgan davrlarga almashtirilishi kerak, muddatli harbiy xizmatni oʻtash vaqti, shaxs mehnat faoliyatini amalga oshirmasdan, mehnatda mayiblanish va kasb kasalligiga chalinish oqibatida I yoki II guruh nogironi boʻlib qolgan vaqt bundan mustasno.

88. Ish haqi toʻgʻrisida maʼlumotnoma taqdim etilmaganligi yoki ularning ishonchliligi va asosliligini tekshirish mumkin emasligi munosabati bilan ish stajiga kiritilmagan davrlar, shuningdek ish haqi saqlanmagan holda taʼtilda boʻlish davrlari mehnat faoliyatining oxirgi oʻn yillik davri uchun ish haqini hisoblab chiqishdan chiqarib tashlanmaydi.

89. I yoki II guruh nogironi boʻlib qolgan shaxsning, shuningdek vafot etgan, nogironlik boshlangan yoki vafot etgan vaqtida bir oydan kam ish stajiga ega boʻlgan boquvchining ish haqi ishlangan kunlar uchun ish haqi summasini ishlangan kunlar soniga boʻlish va olingan natijani ushbu oyning ish kunlari soniga koʻpaytirish yoʻli bilan aniqlanadi.

90. Ish haqi tarkibiga sugʻurta badallari hisoblangan, Oʻzbekiston Respublikasi Soliq kodeksining 172-moddasida koʻrsatilgan mehnatga haq toʻlash tarzidagi barcha daromadlar kiritiladi.

91. Oʻzbekiston Respublikasi Mudofaa, ichki ishlar, favqulodda vaziyatlar vazirliklari, Milliy xavfsizlik xizmati harbiy xizmatchilarining, ichki ishlar organlari va bojxona organlari oddiy va boshliqlar tarkibiga kiruvchi shaxslarining, shuningdek oʻquv yoki yoʻqlama qilish yigʻinlariga chaqirilgan harbiy xizmatga majburlarning ish haqi tarkibiga qonun hujjatlariga muvofiq sugʻurta badallari hisoblanadigan mehnatga haq toʻlash tarzidagi daromadlar bilan boʻlgani singari pul taʼminotining barcha turlari kiritiladi.

92. Pensiya tayinlashni soʻrab murojaat qilgan shaxsning xohishiga koʻra oʻqish davrida toʻlangan stipendiya ish haqiga tenglashtiriladi.

93. Band boʻlgan shaxsning ish haqi miqdori Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga toʻlangan sugʻurta badallari summasidan kelib chiqqan holda aniqlanadi.

94. Ish haqining natura shaklidagi qismi Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga hisoblangan sugʻurta badallari miqdorlaridan kelib chiqqan holda aniqlanadi.

95. Ish haqiga mintaqaviy koeffitsiyentlar belgilangan tumanlarda ishlagan shaxsga pensiya tayinlashda mintaqaviy koeffitsiyent hisobga olingan holda hisoblab chiqilgan sugʻurta badallari qoʻshib hisoblangan ish haqi hisobga olinadi.

96. Vafot etgan pensionerning oila aʼzosiga boquvchisini yoʻqotganlik pensiyasi miqdori vafot etgan pensioner (boquvchi)ning pensiyasini hisoblash uchun qabul qilingan ish haqidan hisoblab chiqiladi.

Boquvchi nogironlik pensiyasi oluvchi hisoblangan va pensiya tayinlangandan keyin mehnat faoliyatini amalga oshirgan hollarda boquvchisini yoʻqotganlik pensiyasini tayinlashni soʻrab murojaat qilgan vafot etgan boquvchi oila aʼzosining xohishiga koʻra nogironlik pensiyasi tayinlangandan keyin ega boʻlingan ish staji boquvchisini yoʻqotganlik pensiyasini hisoblab chiqishda hisobga olinadi. Talab qilinadigan ish staji boquvchi vafot etgan kunda uning yoshi boʻyicha aniqlanadi.

Bunda koʻrsatib oʻtilgan ish staji uchun olingan ish haqi ish haqi tarkibiga kiritiladi, agar boquvchi yoshga doir pensiya olsa va pensiya tayinlangandan keyin ishni davom ettirsa pensiya tayinlangandan keyin ish staji va ish haqi hisobga olinmaydi.

97. Oʻzbekiston Respublikasining chet elda ishlagan fuqarolarining pensiyasini hisoblash uchun ish haqi Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga toʻlangan sugʻurta badallari summasidan kelib chiqqan holda aniqlanadi.

Sugʻurta badallari toʻlash va mehnat stajini hisobga olish tartibi Oʻzbekiston Respublikasi Vazirlar Mahkamasi tomonidan belgilanadi.

98. Oy, yil choragi, yarim yillik, yil yakunlari boʻyicha mukofotlar, shuningdek davr yakunlari boʻyicha toʻlanadigan taqdirlash puli, davlat bayramlari va ishlarning ayrim turlarini bajarganlik uchun bir martalik mukofotlar, shuningdek shunga oʻxshash boshqa toʻlovlar (shu jumladan jamoa xoʻjaliklari aʼzolariga pilla yetishtirish boʻyicha toʻlovlar hamda yillik ish yakunlari boʻyicha qoʻshimcha toʻlovlar), sugʻurta badallari toʻlanishi sharti bilan, ular hisoblangan oy uchun ish haqi tarkibiga kiritiladi.

Xodimga ishdan boʻshaganidan keyin toʻlangan mukofotlar (davr yakunlari boʻyicha taqdirlash puli va yillik ish yakunlari boʻyicha qoʻshimcha toʻlovlar) mehnat shartnomasi toʻxtatilgan oy uchun ish haqi tarkibiga kiritiladi.

99. Ish kunlari soni toʻliq boʻlmagan oylar uchun (ishga kirish yoki ishdan boʻshash munosabati bilan) ish haqi pensiya tayinlashni soʻrab murojaat qilganning xohishiga koʻra ish haqi tarkibiga kiritilishi mumkin. Bunda ish kunlari soni toʻliq boʻlmagan oylar toʻliq kalendar oylar sifatida hisobga olinadi.

100. Tashkilotning ustav sarmoyasida (fondida) qatnashish munosabati bilan olingan daromadlar va dividendlarni taqsimlash tarzidagi toʻlovlar ish haqi tarkibiga kiritilmaydi.

101. Pensiyani hisoblab chiqish uchun qabul qilinadigan oʻrtacha oylik ish haqi ketma-ket ishlangan oltmish kalendar oydagi ish haqining yakka tartibdagi koeffitsiyentini qoʻllagan holda qayta hisoblab chiqilgan umumiy miqdorini oltmishga boʻlish yoʻli bilan aniqlanadi.

Agar nogironlik yoki boquvchisini yoʻqotganlik pensiyasini tayinlashda pensiyani hisoblash uchun qabul qilinadigan ish staji besh yildan kam boʻlsa pensiyani hisoblash uchun oʻrtacha oylik ish haqi kalendar ish oylari uchun qayta hisoblangan ish haqi umumiy summasini ushbu oylar soniga boʻlish yoʻli bilan aniqlanadi.

102. Ish haqining yakka tartibdagi koeffitsiyentini qoʻllagan holda pensiyalarni hisoblab chiqish uchun ish haqini qayta hisoblab chiqish tartibi Oʻzbekiston Respublikasi Vazirlar Mahkamasi tomonidan belgilanadi.

103. Mavsumiy ishlarda band boʻlgan xodimlarga pensiya tayinlashda pensiyani hisoblash uchun qabul qilinadigan oʻrtacha oylik ish haqi oxirgi oʻn yildan istalgan ketma-ket besh mavsum uchun qayta hisoblab chiqilgan ish haqini oltmishga boʻlish yoʻli bilan aniqlanadi.

104. Pensiyani hisoblash uchun qonun hujjatlarida pensiya tayinlanadigan sanaga belgilangan eng kam oylik ish haqining sakkiz baravari miqdoridan ortiq boʻlmagan summadagi oʻrtacha oylik ish haqi qabul qilinadi.

105. Pensiya tayinlash uchun qabul qilinadigan oʻrtacha oylik ish haqi eng kam oylik ish haqi miqdoridan kam boʻlgan yoki ish haqi toʻgʻrisidagi maʼlumotlar toʻliq mavjud boʻlmagan hollarda pensiya miqdori qonun hujjatlarida pensiya tayinlashni soʻrab murojaat qilingan kunda belgilangan eng kam oylik ish haqidan kelib chiqib mintaqaviy koeffitsiyent hisobga olinmasdan hisoblab chiqiladi.

106. Pensiya miqdori ish staji davriga bogʻliq boʻladi va:

pensiyaning bazaviy miqdoridan;

ish staji uchun pensiya oshirilishidan;

pensiyaga ustama haqlardan shakllanadi.

107. Pensiyani hisoblash uchun pensiyalarning quyidagi bazaviy miqdorlari belgilanadi:

a) yoshga doir pensiyalar uchun — pensiyani hisoblash uchun qabul qilinadigan oʻrtacha oylik ish haqining 55 foizi, biroq eng kam oylik ish haqining 100 foizidan kam emas;

b) I va II guruh nogironlariga nogironlik pensiyasi uchun — pensiyani hisoblash uchun qabul qilinadigan oʻrtacha oylik ish haqining 55 foizi, biroq eng kam oylik ish haqining 100 foizidan kam emas;

v) boquvchisini yoʻqotganlik pensiyasi uchun oilaning har bir mehnatga layoqatsiz aʼzosiga — pensiyani hisoblash uchun qabul qilinadigan oʻrtacha oylik ish haqining 30 foizi miqdorida, biroq eng kam oylik ish haqining 50 foizidan kam emas;

g) har ikkala ota-onasini yoʻqotgan bolalarga (chin yetimlarga) boquvchisini yoʻqotganlik pensiyasi uchun yoki vafot etgan yolgʻiz onaning bolalariga har bir bola uchun — pensiyani hisoblash uchun qabul qilinadigan oʻrtacha oylik ish haqining 30 foizi, biroq eng kam oylik ish haqining 100 foizidan kam emas.

108. Pensiya tayinlash uchun talab qilinadigandan ortiq ish stajining har bir toʻliq yili uchun pensiyalarning bazaviy miqdorlari:

a) yoshga doir pensiyalar — pensiyani hisoblash uchun qabul qilinadigan oʻrtacha oylik ish haqining 1 foiziga;

b) I va II guruhlar nogironlariga nogironlik pensiyalari — pensiyani hisoblash uchun qabul qilinadigan oʻrtacha oylik ish haqining 1 foiziga;

v) boquvchisini yoʻqotganlik pensiyalari oilaning har bir mehnatga layoqatsiz aʼzosiga — boquvchi oʻrtacha oylik ish haqining 0,5 foiziga oshiriladi.

109. Har ikkala ota-onasini yoʻqotgan bolalarga (chin yetimlarga) tayinlanadigan boquvchisini yoʻqotganlik boʻyicha pensiyalarini oshirish eng kam oylik ish haqining sakkiz baravari miqdori doirasida har ikkala ota-onaning ish haqi umumiy miqdoridan amalga oshiriladi.

Bunda har ikkala ota-onasini yoʻqotgan bolalarga (chin yetimlarga) tayinlanadigan boquvchisini yoʻqotganlik pensiyasi miqdori har ikkala ota-onaning umumiy ish staji miqdoridan kelib chiqqan holda aniqlanadi, yaʼni pensiya tayinlash va talab etiladigandan ortiq staj uchun pensiyani oshirish har ikkala ota-onaning umumiy ish staji miqdori boʻyicha amalga oshiriladi.

Agar ota-onadan birining ish staji va ish haqidan kelib chiqqan holda hisoblangan boquvchisini yoʻqotganlik pensiyasi miqdori har ikkala ota-onaning umumiy ish staji va ish haqidan kelib chiqqan holda hisoblangan boquvchisini yoʻqotganlik pensiyasi miqdoridan koʻp boʻlsa, u holda, chin yetim maqomini saqlab qolgan holda, murojaat etganning xohishi boʻyicha ota-onadan birining ish staji va ish haqidan kelib chiqqan holda hisoblangan pensiyaning eng koʻp miqdori tayinlanadi.

110. Mehnatda mayiblanish yoki kasb kasalligiga chalinish oqibatida I va II guruhlar nogironlariga nogironlik pensiyasining bazaviy miqdori nogironlik boʻyicha pensiya tayinlangan kunda ushbu Nizomning 52-bandida nazarda tutilgan ish staji mavjud boʻlganda oshiriladi.

111. Qonunning 28-moddasiga muvofiq shaxslarning ayrim toifalari pensiyaga ustama haq olish huquqiga ega.

112. Pensiyaga ustama haqlar quyidagi miqdorlarda belgilanadi:

a) I guruh urush nogironlariga — eng kam oylik ish haqining 150 foizi;

b) II guruh urush nogironlariga — eng kam oylik ish haqining 125 foizi;

v) koʻrish boʻyicha I guruh nogironlariga — eng kam oylik ish haqining 100 foizi;

g) I guruh nogironlariga — eng kam oylik ish haqining 75 foizi;

d) II guruh yolgʻiz nogironlariga — eng kam oylik ish haqining 50 foizi;

e) urush qatnashchilariga va ularga tenglashtirilgan shaxslarga — eng kam oylik ish haqining 50 foizi;

j) Ikkinchi jahon urushi davrida front orqasida ishlagan va harbiy majburiyatlarni bajargan shaxslarga — eng kam oylik ish haqining 30 foizi;

z) oʻlimi harbiy xizmat majburiyatlarini bajarish yoki ichki ishlar organlarida xizmat qilish bilan bogʻliq boʻlgan harbiy xizmatchilar va ichki ishlar organlari xodimlarining ota-onalariga va yangi nikohga kirmagan beva xotinlariga (beva erlariga) — eng kam oylik ish haqining 30 foizi;

i) Oʻzbekiston Respublikasi oldida alohida xizmatlarga ega boʻlgan shaxslarga — xizmatlarga qarab eng kam oylik ish haqining 100 foizidan 150 foizigacha;

k) Oʻzbekiston Respublikasi Vazirlar Mahkamasining “Oʻzbekistonda teatr va musiqa sanʼatini yanada rivojlantirishni qoʻllab-quvvatlash va ragʻbatlantirish chora-tadbirlari toʻgʻrisida”gi Farmonni amalga oshirish masalalari haqida” 1995-yil 28-oktabrdagi 415-son qaroriga 1-ilovada koʻrsatilgan tashkilotlarda ishlagan imtiyozli pensiya olish huquqiga ega boʻlgan artistlarga, Qonunning 10-moddasi “g” bandiga muvofiq, yoshidan qatʼi nazar — eng kam oylik ish haqining 75 foizi;

l) Oʻzbekiston Respublikasi Vazirlar Mahkamasining “Oʻzbekistonda teatr va musiqa sanʼatini yanada rivojlantirishni qoʻllab-quvvatlash va ragʻbatlantirish chora-tadbirlari toʻgʻrisida”gi Farmonni amalga oshirish masalalari haqida” 1995-yil 28-oktabrdagi 415-son qaroriga 2-ilovasida koʻrsatilgan lavozimlarda va tashkilotlarda ishlagan (erkaklar uchun kamida 25 yil va ayollar uchun kamida 20 yil) teatr, konsert tashkilotlarining artistlari va badiiy xodimlariga, teatr va musiqa sanʼatining ijodiy xodimlarini tayyorlash bilan band boʻlgan taʼlim muassasalarining professor-oʻqituvchilar tarkibiga va konsertmeysterlariga — eng kam oylik ish haqining 50 foizi.

113. Ustamalar, tayinlanadigan pensiyalar turidan qatʼi nazar, hisoblanadi. Agar pensiya tayinlashni soʻrab murojaat qilgan ushbu Nizomning 112-bandida nazarda tutilgan bir necha ustama haqni bir vaqtda olish huquqiga ega boʻlsa, u holda ustama haqlar quyidagi hollarda bir vaqtning oʻzida tayinlanishi mumkin:

a) pensiya tayinlashni soʻrab murojaat qilgan shaxsga ushbu Nizomning 112-bandi “a” yoki “b” kichik bandlarida nazarda tutilgan ustama haq bilan bir vaqtda ushbu Nizomning 112-bandi “z” va “i” kichik bandlarida koʻrsatilgan ustama haq, shuningdek ushbu Nizomning 112-bandi “k” yoki “l” kichik bandlarida koʻrsatilgan ustama haq qoʻshib hisoblanishi mumkin;

b) pensiya tayinlashni soʻrab murojaat qilgan shaxsning tanloviga koʻra ushbu Nizomning 112-bandi “v”, “g” yoki “d” kichik bandlarida nazarda tutilgan ustama bilan bir vaqtda ushbu Nizomning 112-bandi “e” yoki “j” kichik bandlarida koʻrsatilgan ustamalardan biri, shuningdek ushbu Nizomning 112-bandi “z” va “i” kichik bandlarida koʻrsatilgan ustama haq qoʻshib hisoblanishi mumkin;

v) pensiya tayinlashni soʻrab murojaat qilgan shaxsning tanloviga koʻra ushbu Nizomning 112-bandi “v”, “g” yoki “d” kichik bandlarida nazarda tutilgan ustama haq bilan bir vaqtda ushbu Nizomning 112-bandi “k” yoki “l” kichik bandlarida koʻrsatilgan ustama haqlardan biri qoʻshib hisoblanishi mumkin.

114. Ushbu Nizomning 112-bandida nazarda tutilgan ustama haqlardan tashqari, ishlamaydigan pensionerlarga Oʻzbekiston Respublikasi Prezidentining “Faxriy unvonlar uchun toʻlovlar miqdorini oshirish toʻgʻrisida” 2007-yil 17-dekabrdagi PF-3942-son Farmoniga ilovaga muvofiq faxriy unvonlar uchun qoʻshimcha haq qoʻshib hisoblanadi.

Ilgari amal qilgan qonun hujjatlariga asosan berilgan faxriy unvonlarga ega boʻlgan shaxslarga toʻlov amaldagi qonun hujjatlarida nazarda tutilgan miqdorlarda amalga oshiriladi.

Faxriy unvon uchun qoʻshimcha toʻlov, pensiyaga ustama haqlarning soni va miqdorlaridan qatʼi nazar, amalga oshiriladi.

115. Boshqa davlatdan kelgan shaxsning, shu jumladan ilgari Oʻzbekiston Respublikasidan ketgan shaxsning pensiya hujjatlari yigʻmajildini hisobga qabul qilib olishda, uning boshqa davlatda pensiya olganligidan qatʼi nazar, pensiya miqdori hisobga qabul qilish toʻgʻrisida murojaat qilingan vaqtda amalda boʻlgan qonun hujjatlari talablariga muvofiq hisoblanadi.

116. Pensiya tayinlash masalalarini koʻrib chiqish uchun pensiya jamgʻarmasi boʻlimida pensiya tayinlash boʻyicha komissiya (keyingi oʻrinlarda komissiya deb ataladi) tuziladi. Komissiya faoliyatini tashkil etish tartibi qonun hujjatlarida belgilanadi.

117. Komissiya boshqa zarur hujjatlar bilan birgalikda pensiya tayinlash toʻgʻrisidagi ariza tushgandan keyin oʻn kun muddatda tegishli qaror qabul qiladi (pensiya tayinlash toʻgʻrisida, pensiya tayinlashni rad etish haqida, taqdim etilgan hujjatlarning asoslanganligini tekshirish toʻgʻrisida va shu kabilar).

118. Agar ariza beruvchi pensiya olish huquqiga ega boʻlgani holda pensiya tayinlash uchun murojaat qilishda nazarda tutilgan zarur hujjatlarni taqdim etmasa yoki taqdim etilgan hujjatlar ularning asoslanganligi va ishonchliligi yuzasidan qoʻshimcha tekshirishni talab qilsa, komissiya tomonidan ariza beruvchining yozma roziligiga koʻra shubha tugʻdirmaydigan mavjud hujjatlar boʻyicha pensiya tayinlanishi mumkin. Agar ariza beruvchi shubha tugʻdirmaydigan mavjud hujjatlar boʻyicha pensiya tayinlashga rozi boʻlmasa, komissiya ariza beruvchi tomonidan taqdim etilgan hujjatlarni tekshirish tamom boʻlgandan keyin pensiya tayinlash toʻgʻrisida qaror qabul qiladi.

119. Pensiya ishi komissiya tomonidan pensiya tayinlash toʻgʻrisida qaror qabul qilingan kun mobaynida rasmiylashtirilishi kerak.

Pensiya ishlarini rasmiylashtirish va yuritish tartibi, shuningdek pensiya hujjatlari shakllari va ularni toʻldirish qoidalari Oʻzbekiston Respublikasi Moliya vazirligi tomonidan tasdiqlanadi.

120. Pensiya tayinlash rad etilgan taqdirda Pensiya jamgʻarmasi boʻlimi tegishli qaror chiqarilgandan keyin besh kundan kechikmay tashkilot yoki ariza beruvchiga rad etish sabablarini, qabul qilingan qaror yuzasidan shikoyat qilish tartibi koʻrsatilgan bildirishnomani berishi yoki yuborishi hamda barcha taqdim etilgan hujjatlarning asl nusxalarini hujjatlar olinganligi toʻgʻrisidagi tilxat bilan pensionerning (ota-onaning, qonuniy vakilning) qoʻliga qaytarishi shart.

121. Komissiyaning qarori yuzasidan ariza beruvchi tomonidan Pensiya jamgʻarmasi boʻlimining bevosita yuqori organiga yoki sudga shikoyat qilish mumkin.

122. Boquvchisini yoʻqotganlik pensiyasini olish huquqiga ega boʻlgan oila aʼzolarining barchasiga bitta umumiy pensiya tayinlanadi. Oila aʼzosining talabiga koʻra uning pensiyadagi ulushi ajratiladi va unga alohida toʻlanadi.

Boshqa tumanda (shaharda) yashaydigan oila aʼzosi oʻziga pensiya ulushini tayinlash yoki ajratish toʻgʻrisidagi ariza bilan murojaat qilganda murojaat qilganning yashash joyi boʻyicha Pensiya jamgʻarmasi boʻlimi rasmiylashtiradigan yoki ushbu oilaning amaldagi pensiya hujjatlar yigʻmajildi turgan Pensiya jamgʻarmasi boʻlimiga tegishli xabarnomani yuboradi. Xabarnomaga ariza va yangidan murojaat qilgan oila aʼzosining pensiya olish huquqini tasdiqlaydigan hujjatlar ilova qilinadi.

Pensiya ishini rasmiylashtirishning barcha hollarida oila har bir aʼzosining pensiyaga boʻlgan huquqini tasdiqlaydigan barcha hujjatlar tikib qoʻyiladi.

Boquvchisini yoʻqotganlik pensiyasini olish huquqini aniqlashda vafot etgan boquvchi oilasining nogironlikning III guruhiga ega boʻlgan aʼzolari vafot etgan boquvchi oilasining mehnatga layoqatsiz aʼzolari jumlasiga kiritilmaydi.

Agar vafot etganning bolalari, aka-ukalari, opa-singillari yoki nevaralari parvarishi bilan ular uch yoshga toʻlgungacha band boʻlgan oila aʼzolaridan biri pensiya turlaridan bittasini oluvchi boʻlsa, u holda uning xohishi boʻyicha Qonunning 4-moddasiga muvofiq faqat pensiyaning bitta turi tayinlanadi.

Boquvchisining vafotidan keyin tugʻilgan bolaga boquvchisini yoʻqotganlik pensiyasi ushbu pensiyaga huquqi paydo boʻlgan kundan boshlab, pensiya tayinlash uchun birinchi marta murojaat qilinganda, boquvchi vafot etgan kundan boshlab 6 oydan kechikmay tayinlanadi. Qolgan holatlarda pensiya murojaat qilingan kundan boshlab tayinlanadi.

123. Agar oilaning alohida yashaydigan aʼzosining pensiyaga boʻlgan huquqini tasdiqlaydigan hujjatlar oilaning boshqa aʼzolariga pensiya tayinlash toʻgʻrisida qaror chiqarilganidan keyin tushsa, u holda alohida yashaydigan oila aʼzosiga pensiya ulushi ajratilgan holda oilaning barcha aʼzolariga pensiya tayinlash toʻgʻrisida yangidan qaror qabul qilinadi.

Oilaning koʻrsatib oʻtilgan aʼzosining tushgan hujjatlari amaldagi pensiya ishiga qoʻshib qoʻyiladi, pensiya ulushini ajratish toʻgʻrisidagi qaror nusxasi esa uning yashash joyi boʻyicha Pensiya jamgʻarmasi boʻlimiga yuboriladi. Pensiya jamgʻarmasi boʻlimi pensiya ulushini ajratish uchun asos boʻlgan barcha zarur hujjatlarning nusxalari bilan birga pensiya ulushini oluvchiga mustaqil pensiyaga oid hujjatlar yigʻmajildini rasmiylashtirishi kerak.

124. Ulushli pensiyani toʻlaydigan Pensiya jamgʻarmasi boʻlimi pensiya ulushini ajratgan Pensiya jamgʻarmasi boʻlimiga pensiya miqdorini qayta koʻrib chiqish yoki uni toʻlashni toʻxtatish zarurligiga olib kelgan boquvchisini yoʻqotganlik boʻyicha ulushli pensiya oluvchi oilaning tarkibida yuz bergan barcha oʻzgarishlar toʻgʻrisida xabar qilishi shart.

Pensiya ulushini toʻlash toʻxtatilgan taqdirda hujjatlar pensiya toʻlash davom etayotgan Pensiya jamgʻarmasi boʻlimiga yuboriladi.

125. Shaxslarning ayrim toifalari Qonunga muvofiq imtiyozli shartlarda yoshga doir pensiya olish huquqiga ega.

126. Imtiyozli shartlarda pensiya olish huquqiga Oʻzbekiston Respublikasi Vazirlar Mahkamasining 1994-yil 12-maydagi 250-son qarori bilan tasdiqlangan 1, 2 va 3-roʻyxatlarda (keyingi oʻrinlarda roʻyxatlar deb ataladi) nazarda tutilgan ishlarni bajarish bilan band boʻlgan xodimlar ega boʻladilar.

127. Texnologiyadagi, ishlab chiqarish va mehnatni tashkil etishdagi oʻzgarishlar, xodimlar soni (shtati) yoki ish xususiyatining oʻzgarishiga olib kelgan ish hajmining qisqarishi yoxud korxona tugatilganligi munosabati bilan ishdan ozod etilgan va ishsiz deb eʼtirof etilgan shaxslarga yoshga doir muddatidan oldin beriladigan pensiya Qonunning 47-moddasida nazarda tutilgan muddatlarga muvofiq tayinlanadi.

128. Toʻliq boʻlmagan ish staji sharoitida pensiya:

a) yoshga doir pensiya — ushbu Nizomning 35-bandi “a”, “b”, “v” va “g” kichik bandlarida nazarda tutilgan kamida 5 yil ish staji mavjud boʻlganda pensiya tayinlash uchun yetarli ish stajiga ega boʻlmagan shaxsga;

b) nogironlik pensiyasi — pensiya tayinlash uchun yetarli ish stajiga ega boʻlmagan umumiy kasallik oqibatidagi I va II guruhlar nogironlariga (shu jumladan bolalikdan nogironlarga);

v) boquvchisini yoʻqotganlik pensiyasi — umumiy kasallik oqibatida vafot etgan va nogironlik pensiyasini tayinlash uchun yetarli ish stajiga ega boʻlmagan boquvchisini yoʻqotgan oila aʼzolariga tayinlanadi.

129. Staj toʻliq boʻlmagandagi pensiya miqdori Qonunda belgilangan miqdorlardan past boʻlishi mumkin emas.

Staj toʻliq boʻlmagan holda pensiya olgan vafot etgan pensionerning oila aʼzolariga pensiya vafot etgan boquvchiga pensiya undan kelib chiqib tayinlangan ish stajiga mutanosib ravishda tayinlanadi.

130. Toʻliq boʻlmagan ish staji holatida pensiya quyidagi tarzda mavjud stajga mutanosib ravishda hisoblab chiqiladi: dastlab tegishli toʻliq pensiya aniqlanadi; ushbu pensiya talab etiladigan ish staji oylari soniga boʻlinadi, olingan summa amaldagi ish staji oylari soniga koʻpaytiriladi.

131. Toʻliq boʻlmagan ish staji holatida pensiya Qonunning 47-moddasida nazarda tutilgan muddatlarga muvofiq tayinlanadi.

132. Pensionerga rasmiy hujjat hisoblanadigan pensiya guvohnomasi beriladi.

133. Pensiyalarning bir turini olgan pensioner Qonunga muvofiq unga boʻlgan huquq mavjud boʻlgan taqdirda pensiyaning boshqa turiga oʻtkazish toʻgʻrisidagi ariza bilan murojaat qilishi mumkin.

Pensiyaning bir turidan pensiyaning boshqa turiga oʻtkazishda tayinlangan pensiyani toʻlash toʻxtatiladi va qonun hujjatlari bilan qoʻyiladigan talablarga muvofiq boshqa turdagi pensiya tayinlanadi.

134. Pensiyaning bir turidan pensiyaning boshqa turiga oʻtkazish toʻgʻrisidagi ariza pensionerning yashash joyi boʻyicha Pensiya jamgʻarmasi boʻlimiga beriladi.

Vafot etgan boquvchining voyaga yetmagan oila aʼzosi (boquvchisini yoʻqotganlik pensiyasini oʻtkazishda) yoki belgilangan tartibda huquqiy layoqatsiz deb eʼtirof etilgan shaxsning nomidan Pensiyaning bir turidan pensiyaning boshqa turiga oʻtkazish toʻgʻrisidagi ariza uning ota-onasi yoki qonuniy vakili yashaydigan joy boʻyicha Pensiya jamgʻarmasi boʻlimiga berilishi mumkin.

Pensiya jamgʻarmasi boʻlimi pensiyaning bir turidan pensiyaning boshqa turiga oʻtkazish toʻgʻrisidagi masalani shaxs tegishli ariza bilan murojaat qilganda koʻrib chiqadi.

Shaxsning arizasi maxsus daftarda roʻyxatdan oʻtkaziladi. Pensiya jamgʻarmasi boʻlimi tomonidan ariza beruvchiga ariza qabul qilingan sana koʻrsatilgan tilxat, shuningdek yetishmaydigan hujjatlar roʻyxati beriladi.

135. Pensiya jamgʻarmasi boʻlimi tomonidan barcha zarur hujjatlar bilan birga pensiyaning bir turidan pensiyaning boshqa turiga oʻtkazish toʻgʻrisidagi ariza qabul qilingan sana pensiyaning bir turidan pensiyaning boshqa turiga oʻtkazish uchun murojaat qilingan kun hisoblanadi.

136. Pensiyaning bir turidan pensiyaning boshqa turiga oʻtkazish uchun murojaat qilgan pensionerning arizasiga quyidagilar ilova qilinishi kerak:

ushbu Nizomning 83-bandi talablari hisobga olingan holda pensiyaning bir turidan pensiyaning boshqa turiga oʻtkazish toʻgʻrisidagi ariza berilgan paytdan mehnat faoliyatining oxirgi oʻn yili mobaynida istalgan ketma-ket besh yildagi ish haqi toʻgʻrisida maʼlumotnoma;

ushbu Nizomning 16-bandi hisobga olingan holda ushbu Nizomning 12—14-bandlariga muvofiq uning uchun ariza berilgan pensiya turini tayinlash uchun talab qilinadigan hujjatlar, ushbu hujjatlar pensiyaning olinadigan turi boʻyicha rasmiylashtirilgan pensiya hujjatlar yigʻmajildida mavjud boʻlmagan taqdirda.

Bundan tashqari, zarur hollarda, boquvchisini yoʻqotganlik pensiyasi oluvchi oila aʼzolari soni oʻzgarishini tasdiqlaydigan hujjatlar taqdim etiladi.

137. Pensiyaning bir turidan pensiyaning boshqa turiga oʻtkazish toʻgʻrisidagi ariza Pensiya jamgʻarmasi boʻlimi tomonidan oʻn kun muddatda koʻrib chiqilishi kerak.

Yoshga doir pensiyani nogironlik pensiyasiga oʻtkazishda yoshga doir pensiya tayinlangandan keyin ega boʻlingan ish staji va ish haqi hisobga olinmaydi hamda nogironlik pensiyasini hisoblash uchun oʻrtacha oylik ish haqi ilgari yoshga doir pensiyani tayinlashdan oldingi ishning oxirgi oʻn yilidan kelib chiqqan holda, nogironlik pensiyasini tayinlash vaqtida amalda boʻlgan qonun hujjatlarida nazarda tutilgan pensiyani hisoblash uchun ish haqi va ish stajini hisoblash shartlari qoʻllangan holda aniqlanadi.

Ilgari shaxsning yoshiga doir tayinlangan pensiyani pensiyalarning boshqa turlaridan bittasi boʻyicha toʻlovning toʻxtatilishi munosabati bilan tiklashda yoshga doir pensiya tayinlangandan keyin ega boʻlingan ish staji va ish haqi hisobga olinmaydi va pensiyani hisoblash uchun oʻrtacha oylik ish haqi yoshga doir ilgari tayinlangan pensiyadan oldingi ishning oxirgi oʻn yilidan kelib chiqqan holda, tiklash vaqtida amalda boʻlgan qonun hujjatlarida nazarda tutilgan pensiyani hisoblash uchun ish haqi va ish stajini hisoblash shartlari qoʻllangan holda aniqlanadi.

Boquvchisini yoʻqotganlik pensiyasiga oʻtkazishda pensiya miqdorini hisoblash Qonunning 34-moddasi shartlariga rioya qilgan holda amalga oshiriladi, ish staji esa umumiy tartibda, uchuvchilar va sinovchi uchuvchilar tarkibidagi xodimlarga pensiyalar tayinlash uchun uzoq muddatli xizmat muddatlarini hisoblash tartibida nazarda tutilgan shartlar va normalar qoʻllanmasdan hisoblab chiqiladi (ushbu Nizomga 4-ilova).

138. Pensiyaning bir turidan pensiyaning boshqa turiga oʻtkazish rad etilgan taqdirda Pensiya jamgʻarmasi boʻlimi tegishli qaror chiqarilgandan keyin besh kundan kechikmay rad etish sabablari, qabul qilingan qaror yuzasidan shikoyat qilish tartibi koʻrsatilgan holda rad etish toʻgʻrisida pensionerga xabarnomani berishi yoki yuborishi shart va bir vaqtning oʻzida pensiyaning bir turidan pensiyaning boshqa turiga oʻtkazish uchun taqdim etilgan barcha hujjatlarning asl nusxalarini hujjatlar olinganligi toʻgʻrisidagi tilxat bilan pensionerning qoʻliga qaytarishi kerak.

139. Pensiya jamgʻarmasi boʻlimi tomonidan pensiyaning bir turidan pensiyaning boshqa turiga oʻtkazish toʻgʻrisida qaror qabul qilingandan keyin pensiyaning boshqa turini toʻlash pensioner barcha zarur hujjatlar bilan birga tegishli ariza bilan murojaat qilgan oydan keyingi oyning birinchi kunidan boshlanadi.

140. Pensiyaning bir turidan pensiyaning boshqa turiga oʻtgan pensionerlarga yangi pensiya guvohnomasi yoziladi.

141. Pensioner pensiya miqdorini qayta hisoblab chiqish uchun asos paydo boʻlgan taqdirda pensiyaning tayinlangan turi miqdorini qayta hisoblab chiqish toʻgʻrisidagi ariza bilan murojaat qilishi mumkin.

142. Quyidagi holatlar tayinlangan pensiya miqdorini qayta hisoblab chiqish uchun asos boʻlib xizmat qiladi:

a) pensioner tomonidan pensiya hujjatlar yigʻmajildida mavjud boʻlmagan va pensiya miqdoriga taʼsir koʻrsatadigan qoʻshimcha hujjatlar taqdim etilishi (ushbu Nizomning 35-bandida nazarda tutilgan ish staji va pensiya tayinlangunga qadar ish haqi toʻgʻrisida);

b) nogironlik guruhining oʻzgarishi;

v) boquvchisini yoʻqotganlik pensiyasini oluvchi oila aʼzolari sonining oʻzgarishi;

g) ushbu Nizomning 112-bandida nazarda tutilgan ustama haq olish huquqining paydo boʻlishi;

d) eng kam oylik ish haqi miqdorining oʻzgarishi;

e) daromadlarning indeksatsiya qilinishi.

143. Ish haqiga mintaqaviy koeffitsiyentlar belgilangan tumanlarda (shaharlarda) ishlagan shaxsga pensiyalarni qayta hisoblashda mintaqaviy koeffitsiyent hisobga olingan holda hisoblab chiqilgan amaldagi ish haqi hisobga olinadi.

144. Pensionerlar pensiyani qayta hisoblash uchun qayta hisoblab chiqish huquqi paydo boʻlgandan keyin istalgan vaqtda murojaat qilishlari mumkin.

145. Pensiya miqdorini qayta hisoblash toʻgʻrisidagi ariza pensioner yashaydigan joy boʻyicha Pensiya jamgʻarmasi boʻlimiga beriladi.

Oilaning voyaga yetmagan aʼzosi (boquvchisini yoʻqotganlik pensiyasi) yoki belgilangan tartibda huquqiy layoqatsiz deb eʼtirof etilgan shaxsning nomidan pensiya miqdorini qayta hisoblash toʻgʻrisidagi ariza uning ota-onasi yoki qonuniy vakili yashaydigan joy boʻyicha Pensiya jamgʻarmasi boʻlimiga berilishi mumkin.

Pensiya jamgʻarmasi boʻlimi pensiya miqdorini qayta hisoblash toʻgʻrisidagi masalani shaxs tegishli ariza bilan murojaat qilganda koʻrib chiqadi.

Shaxsning arizasi maxsus daftarda roʻyxatdan oʻtkaziladi. Pensiya jamgʻarmasi boʻlimi tomonidan ariza beruvchiga ariza qabul qilingan sana koʻrsatilgan tilxat, shuningdek olingan va yetishmaydigan hujjatlar roʻyxati beriladi.

146. Pensiya jamgʻarmasi boʻlimi tomonidan barcha zarur hujjatlar bilan birga pensiya miqdorini qayta hisoblash toʻgʻrisidagi ariza qabul qilingan sana pensiya miqdorini qayta hisoblash uchun murojaat qilingan kun hisoblanadi.

147. Pensiya miqdorini qayta hisoblash uchun murojaat qilgan pensionerning arizasiga ushbu Nizomning 142-bandi “a”, “v” va “g” kichik bandlari asosida mazkur Nizomning 12 — 14 va 16-bandlarida koʻrsatilganlaridan zarur hujjatlar ilova qilinishi kerak.

148. Pensiya jamgʻarmasi boʻlimi nogironlik guruhi oʻzgarganligi munosabati bilan pensiya miqdorini qayta hisoblashda TMEKdan olingan nogironlik toʻgʻrisidagi maʼlumotnomaning tegishli qismini pensionerning pensiya hujjatlar yigʻmajildiga ilova qiladi.

149. Quyidagi hollarda pensiya miqdorini qayta hisoblash toʻgʻrisida ariza berish talab qilinmaydi:

qonun hujjatlariga muvofiq eng kam oylik ish haqining miqdori oʻzgarganda;

tayinlangan pensiya miqdori kamayishiga olib kelgan holatlar yuz berganda;

oilaning 16 yoshdan 18 yoshgacha boʻlgan aʼzolaridan biri taʼlim muassasasidan berilgan uning oʻquvchi ekanligi haqidagi maʼlumotnomani taqdim etgan taqdirda boquvchisini yoʻqotganlik pensiyasini oluvchi oila aʼzolari soni oʻzgarganda;

nogironlik guruhi oʻzgarganda.

150. Pensiya miqdorini qayta hisoblash toʻgʻrisidagi ariza Pensiya jamgʻarmasi boʻlimi tomonidan besh kun muddatda koʻrib chiqiladi.

151. Pensiya miqdorini qayta hisoblash rad etilgan taqdirda Pensiya jamgʻarmasi boʻlimi tegishli qaror chiqarilgandan keyin besh kundan kechikmay rad etish sabablarini, qabul qilingan qaror yuzasidan shikoyat qilish tartibini koʻrsatgan holda pensionerga rad etish toʻgʻrisidagi bildirishnomani berishi yoki yuborishi hamda ayni bir vaqtda taqdim etilgan hujjatlarni hujjatlar olinganligi toʻgʻrisidagi tilxat bilan pensionerning qoʻliga qaytarishi shart.

152. Pensiya miqdorini qayta hisoblash toʻgʻrisida komissiya tomonidan qaror qabul qilingandan keyin pensiya miqdorini qayta hisoblash pensioner barcha zarur hujjatlar bilan birga tegishli ariza bilan murojaat qilgan oydan keyingi oyning birinchi kunidan boshlab amalga oshiriladi. Ish haqining eng kam miqdori oʻzgargan taqdirda pensiya miqdorini qayta hisoblash ish haqining miqdori oʻzgarishi uchun asos boʻlgan normativ-huquqiy hujjatda koʻrsatilgan sanadan boshlab amalga oshiriladi.

Pensiya miqdori kamayishiga olib kelgan holatlar yuz berganda (boquvchisini yoʻqotganlik pensiyasini oluvchi oila aʼzolari soni oʻzgarishi, nogironlik guruhining oʻzgarishi) qayta hisoblash ushbu holatlar boshlangan oydan keyingi oyning birinchi kunidan boshlab amalga oshiriladi.

153. Pensiyaga oid hujjatlar yigʻmajildi turgan joy boʻyicha Pensiya jamgʻarmasi boʻlimi pensiya miqdori qayta hisoblash zarurligiga olib kelgan boquvchisini yoʻqotganlik boʻyicha ulushli pensiya oluvchi oila tarkibida yuz bergan barcha oʻzgarishlar toʻgʻrisida boquvchisini yoʻqotganlik boʻyicha ulushli pensiya toʻlaydigan Pensiya jamgʻarmasi boʻlimiga xabar qilishga majbur.

Bunday holatda komissiyaning tegishli qarori nusxasi ushbu pensiyaning ulushini toʻlaydigan Pensiya jamgʻarmasi boʻlimiga yuboriladi.

154. Ish staji va pensiya tayinlangandan keyin ega boʻlingan (olingan) ish haqi hisobga olingan holda pensiya miqdorini qayta hisoblash amalga oshirilmaydi.

155. Umumiy belgilangan yosh kamaytirilgan holda yoshga doir pensiya tayinlangan shaxsga u umumiy belgilangan yoshga toʻlganligi munosabati bilan pensiya miqdorini qayta hisoblab chiqilmaydi.

Ilgari boquvchisini yoʻqotganlik pensiyasi tayinlangan bolaga ikkinchi ota-onaning vafoti munosabati bilan pensiya miqdorini ikkinchi boquvchining pensiya miqdoriga taʼsir koʻrsatadigan ish staji va ish haqini hisobga olgan holda qayta hisoblab chiqish pensiya miqdorini qayta hisoblab chiqish uchun murojaat qilingan vaqtda amalda boʻlgan qonun hujjatlariga muvofiq pensiyani hisoblash tartibi qoʻllangan holda amalga oshiriladi.

Pensioner tomonidan pensiya tayinlangungacha ega boʻlingan ish staji va ish haqi toʻgʻrisidagi qoʻshimcha hujjatlarning taqdim etilishi munosabati bilan pensiyani qayta hisoblab chiqishda qayta hisoblash vaqtida amalda boʻlgan ish staji va ish haqini aniqlash tartibi qoʻllanadi, bunda pensiyani qayta hisoblash uchun oʻrtacha oylik ish haqi toʻlanadigan pensiyani tayinlashdan oldingi ishning oxirgi oʻn yilidan kelib chiqqan holda aniqlanadi.

156. Pensiya miqdorini qayta hisoblash Oʻzbekiston Respublikasi Vazirlar Mahkamasi tomonidan belgilanadigan tartibda ish haqining yakka tartibdagi koeffitsiyenti qoʻllangan holda amalga oshiriladi.

157. Ishlamaydigan pensionerlarga pensiya yashash joyi boʻyicha Pensiya jamgʻarmasi boʻlimlari tomonidan “Oʻzbekiston pochtasi” OAJning pochta aloqasi obyektlari, operatorlari va provayderlari orqali (keyingi oʻrinlarda pochtaning tarkibiy boʻlinmalari deb ataladi) yoki pensionerning xohishiga koʻra pul mablagʻlarini fuqarolarning depozit hisob raqamlariga naqd pulsiz oʻtkazish yoʻli bilan tijorat bankining filiali orqali toʻlanadi.

Pochtaning tarkibiy boʻlinmalari orqali pensiyalarni toʻlash tartibi Oʻzbekiston Respublikasi Moliya vazirligi va Oʻzbekiston aloqa va axborotlashtirish agentligi tomonidan belgilanadi.

158. Tijorat bankining filiali orqali pensiya oladigan pensioner har 6 oyda pensiya toʻlaydigan Pensiya jamgʻarmasi boʻlimiga kelish yoʻli bilan oʻzining pensiya summasini olish huquqini tasdiqlashi zarur.

Pensioner belgilangan muddatda Pensiya jamgʻarmasi boʻlimiga kelmagan taqdirda Pensiya jamgʻarmasi boʻlimi xodimlari oʻn kun mobaynida:

uning tirik ekanligi;

ishga joylashganligi;

yashash joyi oʻzgarganligi yoki chet elga ketganligi;

jazoni oʻtash joylarida ekanligi;

keksalar va nogironlarning internat uylarida (pansionatlarida) yashayotganligi holatlarini aniqlash uchun pensioner yashaydigan joyga boradilar.

Olinadigan pensiyaga pensionerning huquqi tasdiqlangan taqdirda pensiyani toʻlash navbatdagi 6 oyga davom ettiriladi.

Pensionerning huquqlari tasdiqlanmagan taqdirda pensiyani toʻlash fuqarolarning oʻzini oʻzi boshqarish tegishli organi vakillari va qoʻshnilar ishtirokida Pensiya jamgʻarmasi boʻlimi xodimlari tomonidan tuzilgan toʻlanayotgan pensiyani toʻlashga va uning miqdori asoslanganligiga taʼsir koʻrsatuvchi holatni tasdiqlaydigan dalolatnoma asosida toʻxtatib turiladi.

Koʻrsatib oʻtilgan dalolatnoma asosida Pensiya jamgʻarmasi boʻlimi pensiyani toʻlashni toʻxtatib turish (toʻxtatish) yoki uning miqdorini oʻzgartirish toʻgʻrisida tegishli qaror qabul qiladi.

159. Ishlab turgan pensionerga pensiya toʻlash, ish vaqtining qancha davom etishidan, tashkilotning tashkiliy-huquqiy shaklidan, shuningdek shartnoma (bitim)ning xususiyatidan (turidan) qatʼi nazar, qonun hujjatlarida belgilangan miqdorda ish joyi boʻyicha toʻlanadi.

Bunda fuqarolik-huquqiy shartnoma boʻyicha ishlayotgan pensionerga pensiya toʻlash ishlayotgan pensionerlar uchun qonun hujjatlarida belgilangan miqdorlarda amalga oshiriladi;

Tashkilot rahbari pensiyani tayinlagan Pensiya jamgʻarmasining tegishli boʻlimiga pensioner ishga qabul qilinganligi toʻgʻrisida (fuqarolik-huquqiy shartnoma tuzilganligi toʻgʻrisida) besh kun muddatda xabar qilishi, shuningdek ishga qabul qilinganlik toʻgʻrisidagi buyruqdan koʻchirmani (fuqarolik-huquqiy shartnoma nusxasini) taqdim etishi shart;

Ishlab turgan pensionerlarga pensiyalar toʻlash tartibi Oʻzbekiston Respublikasi Moliya vazirligi tomonidan belgilanadi.

160. Pensiya toʻlash qonun hujjatlariga muvofiq rasmiylashtirilgan ishonchnoma boʻyicha amalga oshirilishi mumkin.

Bunda ishonchnoma bergan shaxs pensiya toʻlaydigan Pensiya jamgʻarmasi boʻlimiga bir yilda kamida bir marta kelib tayinlangan pensiyaga boʻlgan oʻz huquqini tasdiqlashi kerak. Ishonchli vakil pensiya toʻlashga taʼsir etishi mumkin boʻlgan, oʻziga maʼlum barcha holatlar toʻgʻrisida Pensiya jamgʻarmasi boʻlimiga xabar berishi shart.

Ishonchnoma pochtaning tegishli tarkibiy boʻlinmasida saqlanadi. Bunda pochtaning tegishli boʻlinmasi ishonch bildirilgan shaxs tomonidan ishonchnoma taqdim etilgan sanadan boshlab oʻn kun muddatda Pensiya jamgʻarmasining tegishli boʻlimiga pochta tarkibiy boʻlinmasining asosiy muhri va rahbarning imzosi bilan tasdiqlangan ishonchnoma nusxasini yuborishi shart.

161. Pensioner sogʻligʻining holati va yashash faoliyatining cheklanganligi darajasi oʻzgarganda, TMEKning asossiz qarori holatlari aniqlanganda, nogironlikni belgilashning toʻgʻriligini tekshirishlarda, shuningdek agar TMEK qarori soxta hujjatlar asosida chiqarilgan boʻlsa pensioner belgilangan tartibda oʻtkaziladigan takroriy tibbiy koʻrikdan oʻtkazish uchun kelmagan taqdirda pensiyani toʻlash toʻxtatib qoʻyiladi va u faqat fuqaro TMEKga yangidan murojaat qilgan va I yoki II guruh nogironi deb eʼtirof etilgan kundan boshlab tiklanishi mumkin.

Agar nogiron qayta tibbiy koʻrikdan oʻtkazishga kelmaganligi sababli pensiya toʻlash vaqtinchalik toʻxtatib turilsa va qayta tibbiy koʻrikdan oʻtkazilgandan keyin fuqaro nogiron deb eʼtirof etilmasa, u holda pensiya toʻlash vaqtinchalik toʻxtatib turilgan kundan boshlab toʻxtatiladi.

162. Qayta tibbiy koʻrikdan oʻtkazilgan shaxs mehnatga layoqatli deb eʼtirof etilgan taqdirda pensiya u mehnatga layoqatli deb eʼtirof etilgan oyning oxirigacha, biroq nogironlik belgilangan kundan ortiq boʻlmagan muddatga toʻlanadi.

163. Nogironlikning III guruhi belgilangan shaxslarga, shu jumladan 2011-yil 1-yanvardan keyin takroriy tibbiy koʻrikdan oʻtkazilgandan soʻng nogironlikning III guruhi belgilangan shaxslarga nogironlik pensiyasi toʻlanmaydi.

164. Pensiya miqdori oʻzgarishiga yoki pensiya toʻlash toʻxtatilishiga sabab boʻladigan holatlar yuz bergan taqdirda (ishga kirish, oila aʼzolari tarkibining oʻzgarishi, toʻliq davlat taʼminotiga oʻtish va shu kabilar) pensiya oluvchi oʻn kun muddatda bu haqda oʻziga pensiya toʻlaydigan Pensiya jamgʻarmasi boʻlimiga maʼlum qilishi shart.

Pensionerlarni toʻliq davlat taʼminotida turgan shaxslar jumlasiga kiritish shartlari ushbu Nizomga 14-ilovada keltirilgan.

Yuqorida koʻrsatib oʻtilgan holatlar boshlanganligi toʻgʻrisida Pensiya jamgʻarmasi boʻlimiga oʻz vaqtida xabar berilmasligi munosabati bilan pensiyaning noqonuniy summasi pensioner yoki qonuniy vakil (ota-ona), shuningdek ishonch bildirilgan (pensionerning vafoti holati qasddan yashirilgan taqdirda) tomonidan qaytarilishi kerak.

165. Faxriy unvon uchun pensiyaga qoʻshimcha toʻlov olish huquqi paydo boʻlgan taqdirda pensioner faxriy unvon uchun qoʻshimcha toʻlovni olish uchun pensiya toʻlaydigan Pensiya jamgʻarmasi boʻlimiga ariza beradi.

Arizaga faxriy unvon berish toʻgʻrisidagi guvohnoma ilova qilinishi kerak.

Faxriy unvonlar uchun pensiyaga qoʻshimcha toʻlovlar faxriy unvon berilganligi toʻgʻrisidagi guvohnomaning nusxasi ilova qilingan holda ariza berilgan oydan keyingi oyning birinchi kunidan boshlab amalga oshiriladi.

Ishlab turgan pensionerlarga faxriy unvonlar uchun qoʻshimcha toʻlov ish haqi toʻlash bilan bir vaqtda ish joyi boʻyicha amalga oshiriladi.

166. Daromad (gonorar, taqdirlash puli va shu kabilar) olingan taqdirda ijodiy faoliyat bilan band boʻlgan shaxslarga pensiya tayinlangandan keyin daromad olingan oy uchun pensiya ishlab turgan pensionerlar uchun belgilangan tartibda toʻlanadi.

167. Pensionerning doimiy propiskasi boʻlmasa va u faqat vaqtincha propiska qilingan boʻlsa (Toshkent shahrida va Toshkent viloyatida kelgan joyi boʻyicha hisobga olinmagan boʻlsa) pensiya vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning amal qiladigan muddati mobaynida toʻlanadi. Oʻzbekiston Respublikasida doimiy yashaydigan xorijiy fuqaroga yoki fuqaroligi boʻlmagan shaxsga pensiya yashash hujjati amal qiladigan muddat davomida toʻlanadi.

168. Qariyalar va nogironlarning internat uylarida (pansionatlarida) yashovchi yolgʻiz pensionerlarga pensiya bilan ular taʼminoti uchun sarf-xarajat oʻrtasidagi farq, biroq tayinlangan pensiyaning kamida 10 foizi va urush nogironlariga esa — kamida 20 foizi toʻlanadi. Ruhiy bemorlar internat uylarida yashovchi pensionerlarga pensiya toʻlanmaydi.

Pensioner ruhiy bemorlar uchun davolash muassasalarida boʻlgan vaqt uchun pensiya qonun hujjatlarida belgilangan tartibda rasmiylashtirilgan ishonchnoma boʻyicha toʻlanadi.

169. Pensioner tomonidan oʻz vaqtida talab qilib olinmagan pensiyaning hisoblangan summasi oʻtgan vaqt uchun Oʻzbekiston Respublikasi Prezidentining farmonlariga muvofiq pensiyalar miqdorlari oshirilishi hisobga olingan holda toʻlanadi, biroq pensiya olish uchun murojaat qilishdan oldingi uch yildan ortiq vaqt uchun emas.

Bunda 12 oydan ortiq boʻlmagan vaqt uchun berilishi kerak boʻlgan pensiya summasi bir yoʻla toʻlanadi. Qolgan qismi esa oylik pensiya summasidan ortiq boʻlmagan teng ulushlarda toʻlanadi.

Pensiya jamgʻarmasi boʻlimining aybi bilan oʻz vaqtida olinmagan pensiya summasi oʻtgan vaqt uchun Oʻzbekiston Respublikasi Prezidentining farmonlariga muvofiq pensiyalar miqdorlari oshirilishi hisobga olingan holda, muddat cheklanmasdan toʻlanadi.

Pensioner doimiy yashash uchun Oʻzbekiston Respublikasi tashqarisiga koʻchib ketgan taqdirda olinmagan pensiya bir yoʻla toʻlanadi.

170. Pensioner Oʻzbekiston Respublikasi doirasida doimiy yashash uchun boshqa tuman (shahar)ga koʻchgan taqdirda pensiya hujjatlar yigʻmajildi pochtaning tarkibiy boʻlinmalari orqali pensionerning yangi yashash joyi boʻyicha joylashgan Pensiya jamgʻarmasi boʻlimiga yuboriladi yoki pensionerning qoʻliga beriladi.

Ushbu holatda pensiyani toʻlash pensiya hujjatlar yigʻmajildi olingandan keyin pensiya oluvchining yangi yashash joyi boʻyicha Pensiya jamgʻarmasi boʻlimi tomonidan davom ettiriladi. Bunda pensiyani toʻlash oldingi yashash joyi boʻyicha pensiyani toʻlash toʻxtatilgan vaqtdan boshlab davom ettiriladi.

171. Tayinlangan pensiyani toʻlash:

pensioner vafot etganda;

tayinlangan pensiyaga huquqlar yoʻqolganda;

doimiy yashash uchun Oʻzbekiston Respublikasi tashqarisiga chiqib ketilganda toʻxtatiladi.

172. Tayinlangan pensiyani toʻlash:

pensiya toʻlash muddati tamom boʻlganda;

ketma-ket uch oydan ortiq vaqt mobaynida pochta aloqasi tashkiloti orqali pensiya olinmaganda;

pensioner ozodlikdan mahrum etilganda;

pensioner ruhiy bemorlar internat uylarida yashaganda;

pensiyani toʻlashni toʻxtatib turish toʻgʻrisida pensioner tomonidan ariza berilganda toʻxtatib turiladi;

Tayinlangan pensiyani toʻlash qonun hujjatlarida nazarda tutilgan boshqa hollarda ham toʻxtatib turilishi mumkin.

Pensionerning sud hukmi boʻyicha qamoq joylarida boʻlgan vaqti uchun pensiya toʻlanmaydi. Pensioner ozod boʻlgandan keyin pensiyani toʻlash Pensiya jamgʻarmasi boʻlimiga ariza berilgan kundan boshlab tiklanadi.

173. Agar nogiron tayinlangan muddatda qayta tibbiy koʻrikdan oʻtish uchun TMEKga uzrli sabablarsiz kelmasa unga pensiya toʻlash toʻxtatib turiladi, u yana nogiron deb eʼtirof etilgan taqdirda toʻxtatib turilgan kundan boshlab, biroq bir oydan ortiq muddatga tiklanadi.

Uzrli sababga koʻra qayta tibbiy koʻrikdan oʻtish muddati oʻtkazib yuborilgan taqdirda pensiyani toʻlash toʻlov toʻxtatib turilgan kundan boshlab qayta tekshirish kunigacha, biroq, agar TMEK uni bu davrda nogiron deb eʼtirof etsa 3 yildan ortiq boʻlmagan muddatga amalga oshiriladi. Bunda agar qayta tekshirish chogʻida nogiron nogironlikning boshqa guruhiga (yuqoriroq yoki pastroq guruhga) oʻtkazilgan boʻlsa, u holda koʻrsatib oʻtilgan vaqt uchun pensiya oldingi guruh boʻyicha toʻlanadi.

Agar umumiy kasallik oqibatida mehnat layoqatini yoʻqotgan nogironga pensiya toʻlash mehnat layoqati tiklanganligi tufayli toʻxtatilgan boʻlsa yoki uzrli sabablarsiz qayta tibbiy koʻrikdan oʻtishga kelmaganligi oqibatida toʻxtatib turilgan boʻlsa, u holda keyinchalik u nogiron deb eʼtirof etilgan taqdirda ilgari tayinlangan pensiyani toʻlash, agar pensiya toʻlash toʻxtatilgandan keyin besh yildan koʻp boʻlmagan vaqt oʻtgan boʻlsa, nogironlik yangidan belgilangan kundan boshlab tiklanadi. Agar besh yildan koʻp vaqt oʻtgan boʻlsa pensiya yana umumiy asoslarda tiklanadi.

174. Pensiya toʻlash toʻxtatilishiga (toʻxtatib turilishiga) yoki tiklanishiga olib keladigan holatlar paydo boʻlganda pensiyani toʻlash, ushbu Nizomning 171 va 172-bandlarida koʻrsatilgan hollardan tashqari, tegishli holat boshlangan oydan keyingi oyning birinchi kunidan boshlab toʻxtatiladi (toʻxtatib turiladi) yoki tiklanadi.

175. Pensionerga berilishi kerak boʻlgan va uning vafoti munosabati bilan olinmay qolgan pensiya summasi meros tarkibiga kiritilmaydi va boquvchisini yoʻqotganlik pensiyasi bilan taʼminlanadigan shaxslar doirasiga tegishli oila aʼzolariga toʻlanadi. Ota-onalar, eri (xotini), shuningdek pensioner vafot etgan kunda u bilan birga yashagan oila aʼzolari, agar ular boquvchisini yoʻqotganlik boʻyicha pensiyasi bilan taʼminlanadiganlar doirasiga kirmagan taqdirda ham ushbu summalarni olish huquqiga ega.

Pensioner vafot etgan oy uchun olingan pensiya summasi oilaning koʻrsatib oʻtilgan aʼzolariga uning vafotigacha ushbu oyning kunlari uchun toʻlanadi.

Oilaning bir necha aʼzolari murojaat qilgan taqdirda ularga berilishi kerak boʻlgan pensiya summasi ular oʻrtasida teng taqsimlanadi.

Koʻrsatib oʻtilgan summa, uning uchun pensioner vafot etgandan soʻng 6 oydan kechikmay murojaat qilingan taqdirda toʻlanadi.

176. Agar ishlab turgan pensioner ishdan boʻshashi munosabati bilan oʻz ish joyi boʻyicha pensiya summasini olishga ulgurmasa, olinmagan pensiya summasi qonun hujjatlarida belgilangan miqdorda Pensiya jamgʻarmasi boʻlimi tomonidan toʻlanadi.

177. Doimiy yashash uchun Oʻzbekiston Respublikasi tashqarisiga ketishgacha tayinlangan pensiya (Oʻzbekiston Respublikasi pensiya taʼminoti toʻgʻrisida xalqaro shartnomalar tuzgan davlatlar bundan mustasno) Pensiya jamgʻarmasi boʻlimiga ketish toʻgʻrisida ariza berilgan kundagi pensiya miqdori hisob-kitobidan kelib chiqib Oʻzbekiston Respublikasi tashqarisiga joʻnab ketishdan 6 oy avval Oʻzbekiston Respublikasi milliy valyutasida toʻlanadi.

Pensiya toʻlanadigan olti oylik davr Oʻzbekiston Respublikasi tashqarisiga doimiy yashash uchun ketishdan avvalgi olti oy uchun pensiya toʻlash uchun arizada koʻrsatilgan sanadan boshlab hisoblab chiqiladi.

Oʻzbekiston Respublikasi pensiya taʼminoti toʻgʻrisida xalqaro shartnomalar tuzgan Oʻzbekiston Respublikasi tashqarisidagi davlatga doimiy yashash uchun ketilgan kungacha tayinlangan pensiya turar joyidan roʻyxatdan chiqqan oyning oxirigacha toʻlanadi.

178. Olti oy avval pensiya:

ariza, fuqaroning shaxsini tasdiqlaydigan Oʻzbekiston Respublikasi fuqarosi pasporti asosida, unda “Doimiy yashash joyidan roʻyxatdan chiqarildi” degan belgi hamda ichki ishlar organlarining kirish, chiqish va fuqarolik boʻlimining doimiy yashash uchun ketish toʻgʻrisidagi stikeri, ketish varaqchasi, shuningdek u borish niyatida boʻlgan xorijiy davlatning vizasi (agar bu zarur boʻlsa) boʻlganda — Oʻzbekiston Respublikasi fuqarosiga;

ariza, chet ellik uchun istiqomat uchun berilgan guvohnoma asosida, unda “Doimiy yashash joyidan roʻyxatdan chiqarildi” degan belgi, shuningdek xorijiy davlatning vizasi (agar bu zarur boʻlsa) boʻlganda — xorijiy fuqaroga;

ariza, fuqaroligi boʻlmagan shaxs guvohnomasi asosida, unda “Doimiy yashash joyidan roʻyxatdan chiqarildi” degan belgi hamda ichki ishlar organlarining kirish, chiqish va fuqarolik boʻlimining doimiy yashash uchun ketish toʻgʻrisidagi stikeri, shuningdek u borish niyatida boʻlgan xorijiy davlatning vizasi (agar bu zarur boʻlsa) boʻlganda — fuqaroligi boʻlmagan shaxsga toʻlanadi.

179. Olti oy avval pensiya toʻlash pochta oʻtkazmasi bilan yoki pochta aloqasi tashkiloti orqali bir martalik vedomost asosida, shuningdek tijorat bankining filialida pensionerning nomiga ochilgan bank hisob raqamiga naqd pulsiz oʻtkazish yoʻli bilan amalga oshiriladi.

180. Olti oy avval toʻlangan pensiya summasini Oʻzbekiston Respublikasi qonun hujjatlariga muvofiq pensiya toʻlangan davrda pensiyalar miqdorlari oʻzgarganligi munosabati bilan qayta hisob-kitob qilish amalga oshirilmaydi.

181. Agar shaxs olti oy avval pensiya toʻlangandan keyin doimiy yashash uchun Oʻzbekiston Respublikasi tashqarisiga ketmagan taqdirda, unga pensiya toʻlangan olti oylik davr tamom boʻlgandan keyin pensiyani navbatdagi toʻlash uchun murojaat qilgan taqdirda ushbu Nizomning 177 va 178-bandlarida koʻrsatilgan tartibda olti oy avval yana pensiya toʻlanishi mumkin.

182. Mehnatda mayiblanish yoki kasb kasalligiga chalinish oqibatida nogironlik pensiyasi tayinlangan shaxs doimiy yashash uchun Oʻzbekiston Respublikasi tashqarisiga ketgan taqdirda (Oʻzbekiston Respublikasi pensiya taʼminoti toʻgʻrisida xalqaro shartnomalarga ega boʻlgan davlatlar bundan mustasno) pensiya chet elda boʻlgan vaqt uchun toʻlanadi.

183. Ushbu Nizomning 182-bandida koʻrsatilgan shaxsga pensiya oʻtkazish bilan bogʻliq xarajatlar Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobiga amalga oshiriladi.

184. Mehnatda mayiblanish yoki kasb kasalligiga chalinish oqibatida nogironlik pensiyasi quyidagi hujjatlar asosida qayta hisoblab chiqiladi:

pensiyani oʻtkazish toʻgʻrisidagi ariza;

shaxsning Oʻzbekiston Respublikasi tashqarisida doimiy yashash joyini tasdiqlaydigan hujjat;

Oʻzbekiston Respublikasidan doimiy yashash joyiga ketish (bir davlatdan boshqa davlatga koʻchib oʻtish) sanasi toʻgʻrisidagi maʼlumotnoma.

185. Shaxsning Oʻzbekiston Respublikasi tashqarisidagi doimiy yashash joyini tasdiqlaydigan hujjat Oʻzbekiston Respublikasining diplomatik vakolatxonasi yoki konsullik muassasasi yoxud xorijiy davlatning vakolatli organi (mansabdor shaxsi) tomonidan beriladi.

Bunda xorijiy davlatning vakolatli organi (mansabdor shaxsi) tomonidan berilgan hujjat pensionerning doimiy yashash joyidagi davlatda Oʻzbekiston Respublikasining konsullik muassasasi tomonidan belgilangan tartibda legalizatsiya qilinishi kerak, bunday muassasa boʻlmagan taqdirda esa, pensionerning doimiy yashash joyi davlatining Tashqi ishlar vazirligi, ushbu mamlakatning Oʻzbekiston Respublikasidagi konsullik muassasasi yoki diplomatik vakolatxonasi tomonidan legalizatsiya qilinishi, keyinchalik, agar Oʻzbekiston Respublikasining xalqaro shartnomasida oʻzgacha hol nazarda tutilmagan boʻlsa, Oʻzbekiston Respublikasi Tashqi ishlar vazirligining Konsullik boshqarmasida tasdiqlanishi kerak.

186. Mehnatda mayiblanish yoki kasb kasalligiga chalinish oqibatida nogironlik pensiyasini Oʻzbekiston Respublikasi tashqarisiga oʻtkazish fuqaroning har bir yilning 31-dekabrida tirik ekanligini tasdiqlaydigan hujjat Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi ijro etuvchi apparatiga taqdim etilishi sharti bilan amalga oshiriladi.

Mehnatga layoqatsiz fuqarolarga (18 yoshga toʻlmagan bolalarga, aka-ukalarga, opa-singillarga va nabiralarga) va sud tomonidan belgilangan tartibda huquqiy layoqatsiz deb eʼtirof etilgan — ularning qonuniy vakillari pensiya oluvchilar hisoblanadigan fuqarolarga tayinlangan mehnatda mayiblanish yoki kasb kasalligiga chalinish oqibatida nogironlik pensiyalarini toʻlash uchun fuqaroning tirik ekanligini tasdiqlaydigan hujjat pensiya oluvchi uchun va pensiya tayinlangan fuqaro uchun taqdim etiladi.

Bunday hujjat Oʻzbekiston Respublikasining chet eldagi diplomatik vakolatxonasi yoki konsullik muassasasi, xorijiy davlatning notariusi yoxud vakolatli organi (mansabdor shaxsi) tomonidan beriladi.

Koʻrsatib oʻtilgan hujjatlar taqdim etilmagan taqdirda mehnatda mayiblanish yoki kasb kasalligiga chalinish oqibatida nogironlik pensiyasini toʻlash Oʻzbekiston Respublikasi qonun hujjatlarida belgilangan tartibda toʻxtatib turiladi (toʻxtatiladi).

Koʻrsatib oʻtilgan hujjatlar taqdim etilgandan keyin mehnatda mayiblanish yoki kasb kasalligiga chalinish oqibatida nogironlik pensiyasini toʻlash Oʻzbekiston Respublikasi qonun hujjatlarida belgilangan tartibda tiklanadi (qayta tiklanadi).

187. Pensiya jamgʻarmasi boʻlimi pensiya oluvchi doimiy yashash uchun Oʻzbekiston Respublikasi tashqarisiga ketgandan keyin uning pensiya hujjatlar yigʻmajildini Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi apparatiga beradi.

188. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi apparati mehnatda mayiblanish yoki kasb kasalligiga chalinish oqibatida nogironlik pensiyasini shaxsga u doimiy yashaydigan xorijiy davlatning bankidagi yoki boshqa moliya-kredit muassasasidagi hisob raqamiga oʻtkazishni xorijiy valyutada amalga oshiradi, agar Oʻzbekiston Respublikasining xalqaro shartnomasida oʻzgacha hol nazarda tutilmagan boʻlsa.

Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi ijro etuvchi apparatining xorijiy valyutadagi xarajatlari Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobiga amalga oshiriladi. Oʻz valyuta mablagʻlari mavjud boʻlmagan taqdirda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi apparati xorijiy valyutani belgilangan tartibda ichki valyuta bozorida xarid qiladi.

189. Mehnatda mayiblanish yoki kasb kasalligiga chalinish oqibatidagi nogironlik pensiyasini oʻtkazish chet elga joʻnab ketishdan oldin pensiya toʻlangan oydan keyingi oydan boshlab amalga oshiriladi.

190. Chet elga oʻtkaziladigan mehnatda mayiblanish yoki kasb kasalligiga chalinish oqibatidagi nogironlik pensiyasi summasi, agar Oʻzbekiston Respublikasining xalqaro shartnomalarida oʻzgacha hol belgilanmagan boʻlsa, Oʻzbekiston Respublikasining pensiya haqidagi qonun hujjatlarida nazarda tutilgan tartibda qayta hisoblab chiqiladi.

191. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi apparati Oʻzbekiston Respublikasi Tashqi iqtisodiy faoliyat milliy banki orqali chet elga oʻtkazilishi kerak boʻlgan mehnatda mayiblanish yoki kasb kasalligiga chalinish oqibatida tayinlangan pensiyalar summasining oʻz vaqtida konvertatsiya qilinishi va joʻnatilishini taʼminlaydi. Mehnatda mayiblanish yoki kasb kasalligiga chalinish oqibatida tayinlangan pensiyalar summalarini konvertatsiya qilish va yuborish boʻyicha xarajatlar Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobiga amalga oshiriladi.

192. Mehnatda mayiblanish yoki kasb kasalligiga chalinish oqibatidagi nogironlik pensiyasi tayinlangan Oʻzbekiston Respublikasi tashqarisida doimiy yashaydigan shaxsga oʻtgan vaqt uchun olinmagan pensiya summasini toʻlash toʻlov amalga oshiriladigan tegishli davr uchun Oʻzbekiston Respublikasi qonun hujjatlarida belgilangan pensiya miqdorlaridan kelib chiqqan holda amalga oshiriladi.

193. Pensiyaga oid hujjatlar yigʻmajildi Pensiya jamgʻarmasi boʻlimi idoraviy arxivida maxsus jihozlangan shkaflarda (stellajlarda) saqlanadi.

194. Pensiya jamgʻarmasi boʻlimi pensiyaga oid hujjatlar yigʻmajildining saqlanishini taʼminlash yuzasidan barcha zarur choralarni koʻrishi kerak. Pensiyaga oid hujjatlar yigʻmajildi yoʻqolgan va saqlanmagan taqdirda pensiyaga oid hujjatlar yigʻmajildining dublikati tiklanadi.

195. Qariya va nogironlar, shuningdek ruhiy bemorlar internat uylarida yashovchi shaxslarning pensiyaga oid hujjatlar yigʻmajildlari ushbu muassasalar joylashgan joydagi Pensiya jamgʻarmasi boʻlimida saqlanadi.

196. Oʻzbekiston Respublikasi doirasida pensionerning yashash joyi oʻzgargan taqdirda pensiyaga oid hujjatlar yigʻmajildi Pensiya jamgʻarmasi boʻlimining soʻrovi asosida pochta orqali joʻnatiladi yoki pensionerning (ishonchli vakilning) qoʻliga beriladi.

197. Pensiya taʼminoti sohasida Mustaqil Davlatlar Hamdoʻstligi qatnashchilari boʻlgan davlatlarning fuqarolari huquqlari kafolatlari toʻgʻrisida 1992-yil 13-martdagi Bitim qatnashchilari boʻlgan davlatlarga va ijtimoiy taʼminot (pensiya taʼminoti) toʻgʻrisidagi ikki tomonlama shartnomalar qatnashchilari boʻlgan davlatlarga doimiy yashash uchun joʻnab ketayotgan shaxsning pensiyaga oid hujjatlar yigʻmajildi, agar ahdlashayotgan davlatlar tomonidan oʻzgacha hol belgilanmagan boʻlsa, pensionerga (ishonchli vakilga) berilishi mumkin.

198. Pensioner ijtimoiy taʼminot (pensiya taʼminoti) toʻgʻrisida xalqaro shartnomalar tuzilmagan davlatga Oʻzbekiston Respublikasi tashqarisiga doimiy yashash joyiga joʻnab ketayotganda pensiyaga oid hujjatlar yigʻmajildi berilmaydi va u Pensiya jamgʻarmasi boʻlimi arxivida saqlanadi.

199. Ular boʻyicha pensiya toʻlash toʻxtatilgan pensiyaga oid hujjatlar (pensiya yigʻmajildlari, shaxsiy hisobvaraqlari, toʻlov vedomostlarining yirtib olinadigan talonlari va boshqalar) Pensiya jamgʻarmasi boʻlimining idoraviy arxivida, ular boʻyicha toʻlov amalga oshirilayotgan pensiyaga oid hujjatlar yigʻmajildidan alohida, qonun hujjatlarida belgilangan tartibda belgilanadigan muddatlar mobaynida saqlanadi.

200. Qonun hujjatlarida belgilangan saqlash muddatlari tugagandan keyin pensiyaga oid hujjatlar (pensiya yigʻmajildlari, shaxsiy hisobvaraqlari, toʻlov vedomostlarining yirtib olinadigan talonlari va boshqalar) ilmiy-texnik ishlovdan soʻng Pensiya jamgʻarmasi boʻlimining ekspert komissiyasi qaroriga binoan yoʻq qilinishi mumkin.

Pensiyaga oid hujjatlar yigʻmajildida mehnat daftarchasi va oʻlim toʻgʻrisidagi guvohnoma mavjud boʻlgan taqdirda ushbu hujjatlar pensiyaga oid hujjatlar yigʻmajildidan olib qoʻyilishi va qonun hujjatlarida belgilangan muddat mobaynida saqlanishi kerak.

Pensiyaga oid hujjatlarni yoʻq qilish holatini tasdiqlash uchun Pensiya jamgʻarmasi boʻlimi boshligʻi tomonidan tasdiqlanadigan tegishli dalolatnoma tuziladi.