O‘zbekiston Respublikasi Vazirlar Mahkamasining 2010-yil 13-dekabrdagi 294-son “2011 — 2015-yillar uchun past kuchlanishli elektr tarmoqlarni modernizatsiyalash va yangilash dasturi to‘g‘risida”gi qarori ijrosini ta’minlash uchun buyuraman:

1. Elektr energiyasidan foydalanish qoidalarini buzganlik uchun tarmoqdan uzilgan iste’molchilarning elektr qurilmalarini elektr tarmoqlariga qaytadan ulash uchun to‘lovni undirish tartibi to‘g‘risida nizom ilovaga muvofiq tasdiqlansin.

2. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Nizom Vazirlar Mahkamasining 2009-yil 22-avgustdagi 245-son qarori (O‘zbekiston Respublikasi qonun hujjatlari to‘plami, 2009-y., 35-son, 382-modda) bilan tasdiqlangan Elektr energiyasidan foydalanish qoidalariga (bundan buyon matnda Qoidalar deb yuritiladi) va O‘zbekiston Respublikasi Vazirlar Mahkamasining 2010-yil 13-dekabrdagi 294-son “2011—2015-yillar uchun past kuchlanishli elektr tarmoqlarni modernizatsiya qilish va yangilash dasturi to‘g‘risida”gi qaroriga muvofiq Qoidalarni buzganlik uchun elektr tarmog‘idan uzilgan iste’molchilarning elektr qurilmalarini elektr tarmoqlariga qaytadan ulash uchun to‘lovni undirish tartibini belgilaydi.

1. Ushbu Nizom iste’molchilar, hududiy elektr tarmoqlari korxonalari va ularning elektr ta’minoti korxonalari (bundan buyon matnda hududiy elektr tarmoqlari korxonasi deb yuritiladi) uchun taalluqlidir.

2. Iste’molchilarning elektr qurilmalari hududiy elektr tarmoqlari korxonasi tomonidan Qoidalarda belgilangan holatlarda va tartibda elektr tarmog‘idan uzib qo‘yilishi mumkin.

3. Iste’molchilarning elektr qurilmalarini elektr tarmog‘iga qaytadan ulash va elektr energiyasini yetkazib berish iste’molchi tomonidan Qoidalarning buzilgan holatlari bartaraf etilganidan va ushbu Nizomda belgilangan to‘lovlar to‘langanidan so‘ng amalga oshiriladi.

4. Qoidalarni buzganlik uchun elektr tarmog‘idan uzilgan iste’molchilarning elektr qurilmalarini elektr tarmoqlariga qaytadan ulash, ushbu qurilmalarni elektr tarmog‘idan uzgan hududiy elektr tarmoqlari korxonasi tomonidan iste’molchilarning yozma arizasiga muvofiq amalga oshiriladi.

5. Iste’molchining arizasiga asosan hududiy elektr tarmoqlari korxonasi vakili iste’molchi bilan birgalikda iste’molchining elektr qurilmalarini elektr tarmog‘idan uzishga sabab bo‘lgan Qoidalarni buzish holatlari bartaraf etilganligini tekshirib, ikki tomonlama dalolatnoma tuzadi.

6. Iste’molchining elektr qurilmalarini elektr tarmog‘idan uzishga sabab bo‘lgan Qoidalarni buzish holatlari bartaraf etilganligini tasdiqlovchi dalolatnoma asosida hududiy elektr tarmoqlari korxonasi vakili tomonidan elektr tarmog‘idan uzilgan elektr qurilmalarini elektr tarmoqlariga qaytadan ulash uchun iste’molchiga to‘lov hujjati (hisob-faktura, kvitansiya) beriladi.

Bunda to‘lov hujjati (hisob-faktura, kvitansiya)ga muvofiq to‘lanadigan pul miqdori ushbu Nizomning ilovasida keltirilgan iste’molchilarning elektr qurilmalarini hududiy elektr tarmoqlariga qaytadan ulash uchun to‘lov stavka miqdorlariga muvofiq belgilanadi.

7. Iste’molchi to‘lov hujjati (hisob-faktura, kvitansiya) bo‘yicha to‘lovni amalga oshirib, ushbu to‘lov hujjatini hududiy elektr tarmoqlari korxonasi vakiliga topshirganidan so‘ng uning elektr tarmog‘idan uzilgan elektr qurilmalarini elektr tarmoqlariga qaytadan ulash amalga oshirilgan to‘lovlar navbati bo‘yicha uch kun ichida bajariladi.

8. Elektr energiyasi iste’molini hisobga olish va nazorat qilishning avtomatlashtirilgan tizimiga ulangan iste’molchilarning elektr qurilmalari elektr ta’minoti shartnomasi bilan belgilangan miqdorlarda va muddatlarda elektr energiyasi (quvvat) uchun to‘lov amalga oshirilmaganligi sababli elektr tarmog‘idan uzilgan holatlarda ularni elektr tarmoqlariga qaytadan ulash uchun to‘lov miqdori ushbu Nizom ilovasining 2 va 4-bandlarida keltirilgan stavka miqdorlari bo‘yicha, Qoidalarning boshqa xil buzilish holatlarida elektr qurilmalarni elektr tarmog‘iga qaytadan ulash uchun to‘lov miqdori esa ushbu Nizom ilovasining 1 va 3-bandlarida keltirilgan stavka miqdorlari bo‘yicha belgilanadi.

9. Quyidagi holatlarda elektr tarmog‘idan uzilgan iste’molchilarning elektr qurilmalarini elektr tarmoqlariga qaytadan ulash uchun to‘lov miqdori ushbu Nizomning ilovasida belgilangan to‘lov stavkasining ikki barobari miqdorida belgilanadi:

Qoidalar buzilganligi uchun elektr tarmog‘idan uzilgan iste’molchilarning elektr qurilmalari elektr tarmoqlariga o‘zboshimchalik bilan ulanganda;

iste’molchi tomonidan Qoidalar bir yil davomida takroran buzilganda, maishiy iste’molchilar bundan mustasno.

10. Qoidalar buzilganligi uchun elektr tarmog‘idan uzilgan iste’molchilarning elektr qurilmalarini elektr tarmoqlariga qaytadan ulash uchun hududiy elektr tarmoqlari korxonasining hisobiga to‘langan mablag‘lar ushbu korxonaning asosiy faoliyatidan tushadigan boshqa daromadlari jumlasiga kiritilgan holda quyidagi tartibda taqsimlanadi:

40 foizi — elektr tarmog‘idan uzilgan iste’molchilarning elektr qurilmalarini elektr tarmoqlariga qaytadan ulashni amalga oshirgan hududiy elektr tarmoqlari korxonasi moddiy-texnika resurslarini xarid qilishga;

60 foizi — Vazirlar Mahkamasining 2010-yil 13-dekabrdagi 294-son qarori bilan tasdiqlangan 2011 — 2015-yillar uchun past kuchlanishli elektr tarmoqlarni modernizatsiya qilish va yangilash dasturini moliyalashtirish uchun mablag‘lardan maqsadli foydalanishga “O‘zbekenergo” davlat-aksiyadorlik kompaniyasining maxsus hisobiga yo‘naltiriladi. Bunda ushbu Dastur amalga oshirilganidan so‘ng mablag‘lar har yili “O‘zbekenergo” davlat-aksiyadorlik kompaniyasining manzilli qurilishlar ro‘yxatiga kiritiladigan past kuchlanishli elektr tarmoqlarni rekonstruksiya qilish va yangilarini qurishni moliyalashtirishga yo‘naltiriladi.

11. Bir nechta ulanish nuqtasiga ega bo‘lgan elektr tarmog‘idan uzilgan iste’molchilarning elektr qurilmalarini elektr tarmoqlariga ulashda har bir amaldagi qaytadan ulash nuqtasi bo‘yicha alohida to‘lov amalga oshiriladi.

12. Iste’molchilarning elektr qurilmalari hududiy elektr tarmoqlari korxonasining aybi bilan elektr tarmog‘idan uzib qo‘yilgan holatlarda ularni elektr tarmog‘iga qaytadan ulash uchun to‘lov undirilmaydi.

Bunda iste’molchilar elektr energiyasi to‘liq yetkazib berilmaganligi oqibatida hududiy elektr tarmoqlari korxonasi tomonidan yetkazilgan zararni qonun hujjatlarida belgilangan tartibda undirishlari mumkin.

13. Iste’molchilar tomonidan elektr tarmog‘idan uzilgan elektr qurilmalarini elektr tarmoqlariga qaytadan ulash uchun amalga oshirilgan to‘lovlar ularni Qoidalar buzilganligi uchun qonun hujjatlarida belgilangan tartibdagi javobgarlikdan ozod qilmaydi.

14. Ushbu Nizom talablari buzilishida aybdor bo‘lgan shaxslar qonun hujjatlarida belgilangan tartibda javobgarlikka tortiladi.

15. Mazkur Nizom O‘zbekiston Respublikasi Moliya vazirligi, Iqtisodiyot vazirligi, Monopoliyadan chiqarish va raqobatni rivojlantirish davlat qo‘mitasi va “O‘zbekenergo” davlat-aksiyadorlik kompaniyasi bilan kelishilgan.