O‘zbekiston Respublikasining “Mehnatni muhofaza qilish to‘g‘risida”gi Qonuniga va O‘zbekiston Respublikasi Vazirlar Mahkamasining 2010-yil 20-iyuldagi 153-son “Mehnatni muhofaza qilish bo‘yicha normativ huquqiy bazani yanada takomillashtirish to‘g‘risida”gi qaroriga muvofiq buyuraman:

1. Margarin ishlab chiqarish xodimlari uchun xavfsizlik qoidalari ilovaga muvofiq tasdiqlansin.

2. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Qoidalar O‘zbekiston Respublikasining “Mehnatni muhofaza qilish to‘g‘risida”gi Qonuniga hamda O‘zbekiston Respublikasi Vazirlar Mahkamasining 2000-yil 12-iyuldagi 267-son “Mehnatni muhofaza qilishga doir me’yoriy hujjatlarni qayta ko‘rib chiqish va ishlab chiqish to‘g‘risida”gi va 2010-yil 20-iyuldagi 153-son “Mehnatni muhofaza qilish bo‘yicha normativ-huquqiy bazani yanada takomillashtirish to‘g‘risida”gi (O‘zbekiston Respublikasi qonun hujjatlari to‘plami, 2010-y., 28-29-son, 234-modda) qarorlariga muvofiq margarin ishlab chiqarish xodimlari uchun xavfsizlik qoidalarini belgilaydi.

1. Mazkur Qoidalar margarin ishlab chiqarish tashkilotlariga (bundan buyon matnda tashkilotlar deb yuritiladi) taalluqlidir.

2. Mazkur Qoidalar ishlab chiqarish binolarini va inshootlarini loyihalash, qurish va qayta qurishda, sexlarni texnik jihozlash va qayta jihozlashda, texnologik jarayonlar hamda uskunalardan foydalanishda hisobga olinishi lozim.

3. Mazkur Qoidalar texnik jihatdan tartibga solish sohasidagi normativ hujjatlar, shaharsozlik normalari va qoidalari, sanitariya qoidalari, normalari va gigiyena normativlari talablari bajarilishi shart ekanligini istisno etmaydi.

4. Tashkilotlarda mehnatni muhofaza qilishga oid talablarga rioya etilishi ustidan, shu jumladan noqulay va alohida mehnat sharoitlarida ishlaganlik uchun xodimlarga imtiyozlar va kompensatsiyalar berilishi yuzasidan davlat nazorati mehnatni muhofaza qilish sohasidagi maxsus vakolatli davlat organi hamda qonunchilik hujjatlariga muvofiq boshqa davlat organlari tomonidan amalga oshiriladi.

Mehnatni muhofaza qilish holatini o‘rganish, ish beruvchilarning jamoa shartnomalari va kelishuvlarida nazarda tutilgan mehnatni muhofaza qilish bo‘yicha majburiyatlari bajarilishi ustidan nazorat kasaba uyushmalariga va xodimlarning boshqa vakillik organlari, shuningdek mehnatni muhofaza qilish bo‘yicha vakil etilgan shaxs tomonidan amalga oshiriladi.

6. Tashkilotlarda quyidagi asosiy hujjatlar ishlab chiqilishi va tasdiqlanishi lozim:

mehnat sharoitlari va mehnatni muhofaza qilish ishlarini yaxshilash, sanitariya-sog‘lomlashtirish bo‘yicha qoidalarni o‘z ichiga olgan jamoa shartnomasi;

Vazirlar Mahkamasining 2014-yil 15-sentabrdagi 263-sonli qarori bilan tasdiqlangan Ish o‘rinlarini mehnat sharoitlari va asbob-uskunalarning jarohatlash xavfliligi yuzasidan attestatsiyadan o‘tkazish tartibi to‘g‘risidagi nizomga muvofiq yuritiladigan ish joyining mehnat sharoitlari xaritasi;

mehnatni muhofaza qilish xizmatining choraklik ish rejalari;

xodimlar va muhandis-texnik xodimlarni o‘qitish, yo‘l-yo‘riq berish va bilimlarini sinovdan o‘tkazish dasturlari;

mehnatni muhofaza qilish bo‘yicha nazorat yuritish jurnali (uch bosqichli nazorat);

xodimlarga yong‘inga qarshi yo‘l-yo‘riq berish va yong‘in-texnikaviy minimum mashg‘ulotlarini o‘tkazish dasturi;

har bir kasb va ish turlari uchun mehnat muhofazasi bo‘yicha yo‘riqnomalar.

7. “Mehnatni muhofaza qilish to‘g‘risida”gi Qonunning 12-moddasiga muvofiq ishlab chiqarish faoliyatini amalga oshiruvchi, xodimlarining soni ellik kishi va undan ortiq bo‘lgan har bir tashkilotda mehnatni muhofaza qilish talablariga rioya etilishini ta’minlash, ularning bajarilishi ustidan nazoratni amalga oshirish maqsadida mehnatni muhofaza qilish xizmati tashkil etiladi yoki mehnatni muhofaza qilish bo‘yicha tegishli tayyorgarlikka ega bo‘lgan mutaxassis lavozimi joriy etiladi. Ellikta va undan ortiq transport vositasi mavjud bo‘lgan tashkilotda yo‘l harakati xavfsizligi xizmati ham tashkil etiladi yoki yo‘l harakati xavfsizligi bo‘yicha mutaxassis lavozimi joriy etiladi.

Xodimlarining soni ellik nafardan kam bo‘lgan tashkilotda mehnatni muhofaza qilish xizmatini tashkil etish yoki mehnatni muhofaza qilish bo‘yicha mutaxassis lavozimini joriy etish to‘g‘risidagi qaror ish beruvchi tomonidan mazkur tashkilot faoliyatining o‘ziga xos xususiyati hisobga olingan holda qabul qilinadi.

8. Mehnatni muhofaza qilish xizmati va yo‘l harakati xavfsizligi xizmati tashkilotning mustaqil tarkibiy bo‘linmalari bo‘lib, ular bevosita tashkilot rahbariga bo‘ysunadi.

9. Mehnatni muhofaza qilish xizmatining mutaxassislari lavozim yo‘riqnomasiga binoan ularning majburiyatlariga kiritilmagan boshqa ishlarni bajarishga jalb qilinishi mumkin emas.

10. Tashkilotlarda mehnat faoliyati bilan bog‘liq ravishda sodir bo‘lgan baxtsiz hodisalar va boshqa jarohatlanishlarni tekshirish va hisobini yuritish Vazirlar Mahkamasining 1997-yil 6-iyundagi 286-son qarori (O‘zbekiston Respublikasi Hukumati qarorlarining to‘plami, 1997-y., 6-son, 21-modda) bilan tasdiqlangan Ishlab chiqarishdagi baxtsiz hodisalarni va xodimlar salomatligining boshqa xil zararlanishini tekshirish va hisobga olish to‘g‘risidagi nizomga muvofiq amalga oshirilishi lozim.

11. Tashkilot xodimlari o‘z kasblari va ish turlari bo‘yicha belgilangan tartibda o‘qishlari, ularning bilimlari sinovdan o‘tkazilishi va ularga yo‘l-yo‘riq berilishi kerak.

13. Mehnatni muhofaza qilish bo‘yicha yo‘riqnomalar ishlab chiqiladi hamda tashkilot xodimlarini va ish joylarini ushbu yo‘riqnomalar bilan ta’minlash tashkilot rahbariyati zimmasiga yuklatiladi.

14. Tashkilotlar GOST 17.2.3.02-2014 bo‘yicha xavfli va zararli ishlab chiqarish omillari, ularning tavsifi, yuzaga kelish manbalari, xodimlarga ta’sir qilish xususiyatlari va salomatlik uchun xavflilik darajasi va kelgusidagi oqibatlari to‘g‘risida to‘liq va xolisona ma’lumotga ega bo‘lishi lozim.

15. Ish joylaridagi ishlab chiqarish muhiti hamda mehnat jarayonining xavfli va zararli omillari to‘g‘risidagi ma’lumotlar ishlab chiqarish muhitining fizik, kimyoviy, radiologik, mikrobiologik va mikroiqlim o‘lchovi natijalari, shuningdek mehnatning og‘ir sharoitlari attestatsiya qilish orqali belgilanishi lozim.

16. Yangi zararli moddalar paydo bo‘lishiga yoki xavfli va zararli omillar yo‘qolishiga olib keladigan texnologik jarayonlar o‘zgarishlarida yoki yangi ishlab chiqarish uskunalarini joriy qilishda xavfli va zararli omillar to‘g‘risidagi ma’lumotlarga tegishli o‘zgartirishlar kiritilishi lozim.

17. Tashkilot o‘ta xavfli sharoitda bajariladigan ishlar ro‘yxatiga ega bo‘lishi lozim. Ro‘yxatga xavfli moddalar bilan bajariladigan ishlar, balandlikda, ifloslangan havo va suv muhitida, yuqori harorat va namlik sharoitida bajariladigan ishlar, bug‘ va suv isitish qozonlari, yuk ko‘tarish mexanizmlari, bosim ostida ishlaydigan sig‘imlar, elektr uskunalarga xizmat ko‘rsatish bilan bog‘liq ishlar va amaldagi tarmoq ro‘yxatlariga muvofiq boshqa ishlar kiritilishi shart.

18. Barcha xodimlar o‘ta xavfli ishlarni bajarish topshirig‘ini olishdan oldin, mehnat muhofazasi bo‘yicha yo‘l-yo‘riq olishi va ishlarni bajarish usullarini o‘zlashtirib olishi shart.

19. O‘ta xavfli ishlarni bajarish, faqat belgilangan tartibda rasmiylashtirilgan naryad-ruxsatnomaga muvofiq amalga oshirilishi lozim.

20. Tashkilot rahbariyati o‘ta xavfli ishlarni rejalashtirishda, tashkillashtirishda va xavfsiz bajarishda belgilangan talablarga muvofiq amalga oshirilishiga to‘la javobgardir.

21. Xodimlarni xavfli va zararli ishlab chiqarish muhiti omillaridan himoya qilish jamoaviy va yakka tartibdagi himoya vositalaridan foydalanish orqali ta’minlanishi lozim.

22. Jamoaviy himoya qilish vositalariga quyidagilar kiradi:

ishlab chiqarish xonalari va ish joylarining havo muhitini me’yorlashtirish vositalari (shamollatish va havo tozalash, isitish, havo haroratini, namligini bir xil me’yorda saqlash va boshqalar);

ishlab chiqarish xonalari va ish joylarining yorug‘ligini normallashtirish vositalari (yoritish asboblari, yorug‘likdan himoya qilish moslamalari va boshqalar);

shovqindan, tebranishdan, elektr va statik toklar urishidan hamda uskunalar yuzasini yuqori darajadagi haroratdan himoya qilish vositalari;

mexanik va kimyoviy omillarning ta’siridan himoya qilish vositalari.

23. Jamoaviy himoya vositalari xavfli va zararli ishlab chiqarish omillari bo‘lgan xonadagi barcha xodimlarga ta’sir qilganda qo‘llanishi shart va tashkilotni qurish yoki rekonstruksiya qilish loyihalariga kiritilishi lozim.

24. Jamoaviy himoya vositalari xavfli va zararli ishlab chiqarish omillarini ruxsat etilgan miqdorgacha kamaytirish imkonini bermagan hollarda yakka tartibdagi himoya vositalari qo‘llanilishi lozim. Bunday hollarda yakka tartibdagi himoya vositalarisiz xodimlarning ishga jalb qilinishi taqiqlanadi.

25. Yakka tartibdagi himoya vositalaridan foydalanadigan xodimlar ularni qo‘llashi, himoya xususiyatlari va amal qilish muddati to‘g‘risida ma’lumotlarga ega bo‘lishi lozim.

26. Tashkilotda quyidagilar ta’minlanishi shart:

yakka tartibdagi himoya vositalarining zarur miqdori va nomenklaturasi;

himoya vositalarini qo‘llash va to‘g‘ri foydalanish ustidan doimiy nazorat amalga oshirilishi;

himoya vositalarining samaradorligi va sozligi tekshirilishi;

yakka tartibdagi himoya vositalaridan xavfli va zaharli moddalar muhitida foydalanilganda ularning degazatsiya va dezinfeksiya qilinishi (bir marta qo‘llaniladigan himoya vositalari bundan mustasno).

27. Turli agressiv moddalar bilan ishlayotganda teri kasalliklarini oldini olish uchun profilaktik pasta va mazlardan foydalanish lozim.

28. Xodimlar Yog‘-moy va tamaki ishlab chiqarish xodimlari uchun maxsus kiyim, maxsus poyabzal va boshqa yakka tartibda himoyalanish vositalarini bepul berishning namunaviy me’yorlariga (ro‘yxat raqami 2113, 2010-yil 23-iyun) (O‘zbekiston Respublikasi qonun hujjatlar to‘plami, 2010-y., 24-25-son, 205-modda) muvofiq yakka tartibdagi himoya vositalari bilan ta’minlanishi lozim.

29. Tashkilotlarda tanlov o‘tkazilishi lozim bo‘lgan kasblar va mutaxassisliklar ro‘yxati bo‘lishi lozim.

30. Xodimlar, ishlab chiqarish uchastkalarining rahbarlari tegishli ma’lumotga va ish tajribasiga ega bo‘lishi kerak.

31. Bosim ostida ishlovchi ishlab chiqarish uskunalari va xavfi yuqori bo‘lgan ishlarda xizmat ko‘rsatuvchi xodimlar maxsus kurslarda tayyorgarlikdan o‘tgan va tegishli guvohnomaga ega bo‘lishi shart.

32. O‘zbekiston Respublikasi Vazirlar Mahkamasining 2023-yil 14-iyuldagi 290-son qarori bilan tasdiqlangan O‘n sakkiz yoshga to‘lmagan shaxslarning mehnatidan foydalanilishi taqiqlangan og‘ir ishlarning hamda zararli yoki xavfli mehnat sharoitlaridagi ishlarning ro‘yxatiga (O‘zbekiston Respublikasi qonun hujjatlari to‘plami, 2009-y., 30-31-son, 355-modda) muvofiq o‘n sakkiz yoshga to‘lmagan shaxslar zararli va noqulay mehnat sharoiti mavjud ishlarga qabul qilinmasligi lozim.

34. Tashkilotlarda xodimlarning salomatligini nazorat qilish Xodimlarni tibbiy ko‘rikdan o‘tkazish tartibi to‘g‘risidagi nizomga (ro‘yxat raqami 2387, 2012-yil 29-avgust) muvofiq amalga oshirilishi lozim.

35. Tashkilot rahbariyati, kasaba uyushmasi qo‘mitasi va O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasining hududiy boshqarmalari yoki tuman (shahar) bo‘linmalari bilan birgalikda har yili dastlabki (mehnat shartnomasini tuzayotganda) va davriy (mehnat faoliyati davomida) majburiy tibbiy ko‘rikdan o‘tishi lozim bo‘lgan xodimlarning ro‘yxatini tuzishi hamda xodimlarning tibbiy ko‘rikdan o‘tishini ta’minlashi zarur.

36. Majburiy tibbiy ko‘riklar tashkilotga tibbiyot xizmati ko‘rsatuvchi davolash-profilaktika muassasalari tomonidan, agar ular bo‘lmagan taqdirda tashkilot joylashgan joydagi hududiy davolash-profilaktika muassasasi tomonidan o‘tkaziladi.

37. Ish beruvchi majburiy tibbiy ko‘rikdan o‘tmagan yoxud majburiy tibbiy ko‘rik natijalariga ko‘ra tibbiy komissiyalar tomonidan berilgan tavsiyalarni bajarishdan bo‘yin tovlagan shaxslarni ishdan chetlashtirishi shart.

38. Tashkilot rahbariyati o‘z xodimlarining majburiy tibbiy ko‘rikdan o‘z vaqtida o‘tishi uchun va majburiy tibbiy ko‘rikdan o‘tmagan shaxslarni ishga qo‘yish natijasida fuqarolarning sog‘lig‘iga yetkazilgan zararli oqibatlar uchun javobgar bo‘ladi.

39. Xodimlarni sog‘lig‘i tufayli ularga ruxsat etilmagan ishlarda ishlatish taqiqlanadi.

40. Ishlab chiqarish xonalarini tabiiy va sun’iy yoritish SHNQ 2.01.05-24 “Tabiiy va sun’iy yoritish” shaharsozlik normalari va qoidalari talablariga mos bo‘lishi lozim.

41. Avariya yoritish tarmoqlariga elektr energiya iste’molchilarining ulanishi taqiqlanadi. Avariya yoritishlarining sozligi har chorakda kamida bir marta tekshirilishi lozim.

42. Yoritish vositalari toza va soz holatda bo‘lishi kerak. Yorug‘ tushuvchi oynalarni yilda kamida ikki marotaba tozalash lozim.

43. Yorug‘lik tushadigan deraza va eshiklarni turli predmetlar (uskuna, tayyor mahsulot va boshqalar) to‘sib qo‘yishiga ruxsat etilmaydi.

44. Sun’iy yoritish umumiy va birlashgan tizimda ishlatiladi (umumiy mahalliy bilan birgalikda). Birgina mahalliy yoritishni qo‘llash taqiqlanadi.

45. Uchastka va xonalarda portlash bo‘yicha xavfli gaz va changlar konsentratsiyasi yig‘ilib qolish ehtimoli bo‘lsa, elektr yoritish tizimi portlashdan alohida bajarilishi kerak.

46. Xavflilik darajasi yuqori bo‘lgan xonalarda kuchlanishi 36 V dan yuqori bo‘lmagan ko‘chma elektr yoritqichlar ishlatilishi kerak. Uskunalar va inshootlar (bunkerlar, silososlar, quduqlar, bug‘lantirish kameralari, tunnellar va boshqalar)ni ichki sirtini yoritish uchun ko‘chma elektr yoritqichlarning kuchlanishi 12 V dan oshmasligi kerak.

47. Tashkilot xonalari ish hududidagi harorat, nisbiy namlik, havoni harakatlanish tezligi va boshqalar GOST 12.1.005-88 “Ish hududining havosi. Umumiy sanitariya-gigiyenik talablari”ga muvofiq bo‘lishi kerak.

48. Noqulay omillar ta’siriga qarshi himoya tadbirlarini tuzishda samarali havo almashinuvi tizimini SHNQ 2.04.05-22 “Isitish, ventilyatsiya va konditsiyalash” shaharsozlik normalari va qoidalari talabiga muvofiq tashkil qilish lozim.

49. Ishlab chiqarish binolarida mikroiqlim SanQvaM 0203-06 “Ishlab chiqarish binolari mikroiqlimi sanitariya me’yorlari” talablariga muvofiq bo‘lishi lozim.

50. Tashkilot maydonlari va binolarining joylashuvi SHNQ 2.09.17-21 “Sanoat korxonalarining bosh rejalarini loyihalash” shaharsozlik normalari va qoidalari talabiga mos bo‘lishi kerak.

51. Tashkilotda transport vositalarini va piyodalarni tashkilot hududida harakatlanish chizmasi ishlab chiqilgan va tasdiqlangan bo‘lishi kerak.

52. Transport vositalari va tashkilot hududida piyodalarning harakati chizmasi tashkilotga kirish va chiqish hamda ish uchastkalari va sexlarning ko‘rinarli joylariga osib qo‘yilishi kerak.

53. Tashkilot maydonlari ko‘kalamzorlashtirilgan va suv quyish quvurlari tarmoqlari bilan ta’minlangan bo‘lishi kerak.

54. Tashkilot maydonidagi o‘tish joylari mustahkam yopqichlar, suvlar oqib ketadigan inshootlar bilan jihozlangan bo‘lishi kerak.

55. Yilning yoz vaqtida yo‘lkalar va o‘tish joylariga suv sepilgan, qishda qordan tozalanib, qum sepilgan bo‘lishi lozim.

56. Ishlab chiqarish binolari va inshootlari SHNQ 2.09.02-23 “Korxonalarning ishlab chiqarish hamda ma’muriy-maishiy bino va inshootlari. Loyihalash talablari” shaharsozlik normalari va qoidalari talablariga muvofiq bo‘lishi lozim.

57. Yordamchi binolar va xonalar SHNQ 2.09.02-23 “Korxonalarning ishlab chiqarish hamda ma’muriy-maishiy bino va inshootlari. Loyihalash talablari” shaharsozlik normalari va qoidalari talablariga muvofiq bo‘lishi lozim.

58. Nam xonalarda hamda issiq o‘tkazuvchi pollarda (betonli, g‘ishtli, plitali va boshqalar) muntazam ishlashga mo‘ljallangan ish joylarida yog‘och to‘shamalar va panjaralar yotqizilgan bo‘lishi kerak.

59. Pol to‘shamalari zararli moddalar, ishlab chiqarishdagi kirlar va changlardan yengil tozalanadigan bo‘lishi kerak.

60. Binoga transport vositalarining kirish joylari darvozalar va signal asbob-uskunalari bilan ta’minlangan bo‘lishi lozim.

61. Darvoza tavaqalari yopiq va ochiq holatida maxsus moslamalar mustahkam o‘rnatilgan bo‘lishi kerak.

62. Transport vositalari binoga kirishi uchun darvoza eni foydalanilayotgan transport vositalari eni miqdoridan oshiq bo‘lishi kerak.

63. Darvozalarning balandligi transport vositasining balandligidan kamida 0,2 m dan oshiq bo‘lishi kerak.

64. Tashkilotlarda binolar va inshootlardan foydalanish holatini muntazam kuzatish tashkil etilgan bo‘lishi kerak.

65. Barcha ishlab chiqarish binolari va inshootlari bir yilda ikki martadan (bahor va kuzda) kam bo‘lmagan holda tashkilot rahbari tomonidan tayinlangan komissiya tomonidan texnik ko‘rikdan o‘tkazilishi lozim. Texnik ko‘rik xulosalari, ularda topilgan nuqsonlarni bartaraf etish bo‘yicha tadbirlar va muddati ko‘rsatilgan dalolatnomalar orqali rasmiylashtirilishi kerak.

66. Xodimlar uchun xavf tug‘diruvchi halokat tusidagi buzilishlar tezda bartaraf etilishi kerak. Xavfli hududlarda ishlab chiqarish jarayonlari halokat bartaraf etilgunga qadar to‘xtatib turilishi lozim, shuningdek xizmat ko‘rsatuvchi xodimlar xavfsiz joyga ko‘chirilishi kerak.

67. Shamollatish va isitish SHNQ 2.04.05-22 “Isitish, ventilyatsiya va konditsiyalash” shaharsozlik normalari va qoidalari talablariga muvofiq bo‘lishi lozim.

68. Oqimli shamollatishlarni tashqi havo tizimidan olish yerdan kamida 2 m balandlikda bajarilishi kerak.

69. O‘tish joylarida joylashgan isitish jihozlari ruxsat etilgan o‘tish yo‘laklarining enini kamaytirmasligi kerak.

70. Ish joylarida havo harorati yengil jismoniy ishda 21°C, o‘rtacha og‘ir ishda 17°C va og‘ir ishda 16°C dan past bo‘lmasligi lozim.

71. Xodimlarning isinishi uchun xonalarda havo harorati 22°C dan kam bo‘lmasligi kerak.

72. Isinish xonalarigacha bo‘lgan masofa binolarda joylashgan ish joylaridan 75 m dan, bino tashqarisidagi ish joylaridan esa 150 m dan ko‘p bo‘lmasligi lozim.

73. Ish joylarida, xonalarda va tashkilot hududida shovqin va tebranishning darajasi SanQvaM 0120-01 “Ish joylarida shovqinning yo‘l qo‘yilgan darajasining sanitariya me’yorlari”, SanQvaM 0122-01 “Ish joylarida umumiy va lokal tebranishning sanitariya me’yorlari”, GOST 12.1.003-2014 va GOST 12.1.012-2004 talablariga muvofiq bo‘lishi kerak.

74. Ish joylarida shovqin va tebranish darajasini muntazam nazorat qilib turish kerak. Agarda u belgilangan me’yorlardan yuqori bo‘lgan hollarda uni pasaytirish uchun quyidagi tadbirlar qo‘llanishi lozim:

detallarning zarbali harakatlarini zarbasiz harakatlarga, ilgarilama-qaytma harakatlarni aylanma harakatlarga o‘zgartirish;

shovqin chiqaruvchi agregat yoki uning ayrim qismlariga shovqinni to‘suvchi qobiqlar o‘rnatish;

agregatdan chiqayotgan aerodinamik shovqinlarga qarshi samarali tovush so‘ndirgichlar qo‘llash;

shovqinli uskunalarni (parraklar, kompressor) to‘silgan xonalarda yoki sexdan tashqarida joylashtirish;

tebranishni kamaytirish uchun, uning manbalarini (elektr dvigatellar, parraklar va shu kabilar) mustaqil poldan va binoning boshqa konstruksiyalaridan izolyatsiyalangan poydevorlarda yoki maxsus hisoblab chiqilgan amortizatorlarga o‘rnatilishi kerak.

75. Ishlab chiqarish xonalarida shovqinni texnik vositalar bilan bartaraf etishning iloji bo‘lmasa, shaxsiy eshitish a’zolarini himoya qilish vositalari va shovqinga qarshi kaskalardan foydalanish kerak.

76. Suv bilan ta’minlash va kanalizatsiya tizimi SHNQ 2.04.01-22 “Binolarning ichki suv ta’minoti va oqova suvlarni chiqarib yuborish” shaharsozlik normalari va qoidalari talabiga mos kelishi kerak.

77. Ishlab chiqarish oqova suvlari, tashqi kanalizatsiyaga yetib kelguncha zararli moddalardan tozalanishi lozim.

78. Ichimlik suvidan foydalanish uchun suv quvuriga ulangan favvorachalar bo‘lishi kerak. Suv quvurlari yo‘q bo‘lganda baklarda qaynatilgan suv bo‘lishi lozim.

79. Ichimlik suvining harorati 8°C dan 20°C gacha bo‘lishi kerak.

80. Ish joyidan suv ichish qurilmasigacha bo‘lgan masofa 75 m dan oshmasligi kerak.

81. Tashkilotda kanalizatsiya tizimi yo‘q bo‘lganda O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasining hududiy boshqarmalari yoki tuman (shahar) bo‘limlari bilan kelishilgan holda tashkilotda yer qatlamini ifloslantirmagan holda dushxonalardan va yuz-qo‘l yuvgichlardan suv oqmaydigan qurilmali axlat o‘ralarini mavjud bo‘lishiga ruxsat etiladi.

82. Xodimlarning ish vaqti, shu jumladan qisqartirilgan ish vaqti, dam olish va tanaffuslar vaqti tashkilotlar tomonidan qonun hujjatlarga muvofiq belgilanadi.

83. Margarin ishlab chiqarish texnologik jarayonlari GOST 12.3.002-2014 talablariga muvofiq bo‘lishi lozim.

84. Ishlab chiqarish jarayonlarining xavfsizligi quyidagi talablarni amalga oshirish orqali ta’minlanadi:

ishlab chiqarish uskunalariga xizmat ko‘rsatish tartibidagi texnologik jarayonlarni (ish turlarini), ish usullari va rejimlarini qo‘llash;

ishlovchilarga zararli ta’sir ko‘rsatmaydigan birlamchi material, yarim tayyor mahsulotlar va tayyor mahsulotlarni qo‘llash, agar ushbu talabni bajarishning imkoni bo‘lmasa ishlab chiqarish jarayonining xavfsizligini va xodimlarning himoyasini ta’minlovchi choralar ko‘rish;

shikastlanish va kasb kasalliklari manbai bo‘lmagan ishlab chiqarish uskunalarini qo‘llash;

xavfli va zararli ishlab chiqarish omillarining tarqalishini cheklovchi vositalarni qo‘llash;

ishlab chiqarish uskunalarini to‘g‘ri joylashtirish va ish joylarini to‘g‘ri tashkil etish;

birlamchi material va yarim tayyor mahsulotlarni, tayyor mahsulotlarni va ishlab chiqarish chiqindilarini saqlash va transport vositalarida tashishning xavfsiz usullarini qo‘llash;

xavfli va zararli ishlab chiqarish omillarining xususiyatiga mos keluvchi himoyalanish vositalarini qo‘llash;

ish bajarilayotgan paytdagi xavfli hududlarni belgilash.

85. Ishlab chiqarish jarayonlari atrof muhitning (havo, tuproq, suv havzalari) ifloslanishiga va zararli omillarning tegishli me’yorlaridan ortiq darajada tarqalishiga olib kelmasligi shart.

86. Ishlab chiqarish jarayonlari soz uskunalar, soz nazorat-o‘lchash asboblari, himoya to‘siqlari, blokirovkalar, ishga tushiruvchi apparatlar, texnologik asbob-uskunalar mavjud bo‘lgan taqdirda amalga oshirilishi lozim.

87. Ishlab chiqarish jarayoni texnologik hujjatlarga muvofiq olib borilishi lozim.

88. Ishlab chiqarish jarayonida birlamchi material va yarim tayyor mahsulotlar qo‘llanilsa, shuningdek xavfli va zararli ishlab chiqarish omillariga ega bo‘lgan oraliq moddalar hosil bo‘lsa xodimlarga oldindan o‘zini bexatar tutish qoidalari haqida ma’lum qilinishi va ular tegishli tartibda o‘qitilishi hamda himoya vositalari bilan ta’minlanishi lozim.

89. Birlamchi material va yarim tayyor mahsulotlar belgilangan tartibda tegishli gigiyenik me’yorlar tasdiqlangandan so‘ng qo‘llanilishi lozim.

90. Texnologik jarayonlarning nazorat tizimi xizmat ko‘rsatish uchun qulay va xavfsiz joylarga joylashtirilishi lozim. Bu joylarda silkinish, texnologik mahsulotlar bilan ifloslanish, tizimning aniqligi va ishonchliligiga ta’sir etuvchi mexanik va boshqa zararli ta’sirlar bo‘lmasligi lozim.

91. Nazorat uskunalari yechilgan holda ta’mirlanayotganda, ushbu uskunalar zudlik bilan tekshirilgan va ko‘rsatkichlari bir xil bo‘lgan uskunalar bilan almashtirilishi lozim.

92. Nazorat uskunalari va signal lampalarining joylashishi hamda ularning ko‘rsatkichlarini qulay kuzatish imkoniyatini yaratish lozim.

93. Boshqaruv tarmog‘i markaziy pultida jarayonning texnologik parametri kattaligi, uning ish jarayonida yo‘l qo‘yilishi mumkin bo‘lgan kattalikka yetganligi haqida avtomatik tarzda signal beruvchi qurilmalar joylashtirilishi lozim.

94. Texnologik jarayonlarning nazorat tizimi ta’mirlanganidan so‘ng sinovdan o‘tkazilishi hamda uning natijalari uskunaning pasporti va maxsus jurnalda qayd qilinishi lozim.

95. Bo‘linish chegarasi bo‘lgan moddalarning idishlardagi suyuqlik sathini nazorat qilish uchun yuqori va quyi sathlar belgilangan ko‘rsatkich qo‘llanishi lozim.

96. Daraja ko‘rsatkichlarida shaffof element sifatida oyna yoki plastmassadan foydalanishda, ular singanda xodimlarni jarohatlanishidan saqlovchi moslama qo‘llanishi lozim.

97. Bo‘linish chegarasi bo‘lgan moddalarning idishlardagi suyuqlik sathini nazorat qilish lozim. Idishlardagi sath ko‘rsatkichlaridan tashqari ovozli, yorug‘lik va boshqa signalizatorlar qo‘llanishi mumkin.

98. Kislota va ishqorlarni quyish, tushirish va tashish ishlari mexanizatsiyalashtirilgan bo‘lishi lozim.

99. Oltingugurt kislotasini ishqorli idishlarga quyish taqiqlanadi.

100. Kislota va ishqorlarni idishlarga faqat yuqoridagi lyuklar va quvurlar orqali quyishga ruxsat etiladi.

101. Kislota, ishqor va boshqa agressiv moddalar bilan ishlar bajariluvchi xonalarda o‘ziga o‘zi yordam berish uchun favvorachali qo‘l yuvgichlar o‘rnatilgan bo‘lishi va neytrallovchi vositalarning zarur bo‘lgan zaxirasi tayyorlab qo‘yilishi lozim.

102. Yo‘laklar ustidan o‘tgan kislota va ishqor quvurlarining flanetsli birikmalari bo‘lmasligi lozim. Barcha flanetsli birikmalar metall g‘iloflar bilan himoyalangan bo‘lishi lozim.

103. Suyultirilgan oltingugurt kislotasini po‘lat idishlarda, 78 foizdan past darajada suyultirilgan oltingugurt kislotasini faqat kislotaga chidamli yopiq idishlarda saqlashga ruxsat etiladi.

104. Kislotalar boshqa materiallardan alohida saqlanishi lozim. Oltingugurt kislotasi eritmasini tayyorlashda kislotani suvga ohista quyib aralashtirib turish lozim. Oltingugurt kislotasiga suvni quyish taqiqlanadi.

105. Barcha idishlar va o‘lchagichlar sath o‘lchagichlar va zaxiradagi idishga yo‘naltirilgan bo‘shatish quvurlariga ega bo‘lishi lozim. Bo‘shatish quvurlari idishning ustki yuzasidan kamida 0,15 m masofada o‘rnatilishi lozim.

106. O‘yuvchi ishqorlar qopqoqlari doimo yopiq po‘lat rezervuarlarda saqlanishi lozim. Ishqorlarni aluminiy va ruhlangan idishlarda saqlash taqiqlanadi.

107. Qattiq ishqorli barabanlarning qopqoqlari zich yopilgan bo‘lishi, barabanlar quruq xonalarda saqlanishi lozim.

108. Kislota va ishqor ortilgan transport vositasida odamlarni olib yurish taqiqlanadi. Kislota va ishqorlarni boshqa materiallar bilan birga tashishga ruxsat etilmaydi.

109. Kislota va ishqorli idishlar yashiklarga joylashtirilishi va maxsus aravachalarda tashilishi yoki ikki ishchi tomonidan maxsus jihozlangan zambillarda olib yurilishi lozim. Bunda idishlar mahkam berkitilgan va ularga suyuqlikning nomi yozilgan birka osib qo‘yilgan bo‘lishi lozim. Kislota va ishqorlarni ochiq idishlarda tashish taqiqlanadi. O‘yuvchi suyuqliklarni korzinkaning dastagidan tutib ko‘tarishga faqat korzinkaning tubi va dastaklarining mustahkamligi tekshirib ko‘rilgandan so‘nggina ruxsat etiladi. Kislota va ishqorlarning sexlardagi zaxirasi bir kunlik ehtiyojdan ortmasligi lozim.

110. Kislota va ishqorli butilka va bochkalarning qopqoqlari sekin-asta yig‘ilib qolgan gazlarni chiqarib yuboradigan holda ochilishi lozim. Oltingugurt kislotasi bo‘lgan metall bochkaning qopqog‘ini ochish uchun uchqun hosil qilmaydigan asbobdan foydalanish lozim.

111. Kislota va ishqorlarni sexning texnologik qurilmalariga quyish jarayoni yopiq oqimda bajarilishi va mexanizatsiyalashtirilgan bo‘lishi lozim.

112. To‘kilgan kislota va ishqorlar darhol neytrallanishi va yig‘ishtirib olinishi lozim.

113. Apparatlarni tozalashdan avval ularda qolgan kislota soda eritmasi bilan neytrallanishi, hosil bo‘lgan gaz havo yoki bug‘ bilan siqib chiqarilishi lozim.

114. Kislota va ishqorlar bilan ishlovchi xodimlar belgilangan normalarga muvofiq himoya vositalari, maxsus kiyim, maxsus poyabzal va yakka tartibda himoyalanishning boshqa vositalari bilan ta’minlanishi lozim.

115. Qattiq yog‘larni eritish alohida ajratilgan xonada bajarilishi lozim.

116. Yog‘larni o‘tkir bug‘ bilan eritish kameralari va kabinalari zich yopiluvchi eshiklar va berkituvchi qurilmasi yo‘q havo tortuvchi quvurlar bilan jihozlangan bo‘lishi lozim.

117. Ortiqcha (kondensatsiyalanmagan) bug‘ning bochkadan erkin chiqib ketishi uchun eritish shtutserining diametri bochka teshigining diametridan kichik bo‘lishi lozim.

118. Eritish uchun bug‘ning ortiqcha bosimi 0,5 kgs/sm² (0,0454 MPa)dan ortmasligi lozim.

119. Eritish kameralarini tozalash, ular 40°C gacha sovutilgandan so‘ng bajarilishi lozim.

120. Polning sathida va undan pastda joylashgan idishlar to‘silgan bo‘lishi lozim.

121. Bochkalarni bug‘latuvchi shtutserga o‘rnatish va undan olish faqat bug‘ jo‘mragi berkitilib, ogohlantiruvchi plakat osib qo‘yilgandan so‘ng bajarilishi lozim.

122. Bochkalarni qizdirish vannalariga tushirish va ularni vannadan chiqarib olish mexanizatsiyalashtirilgan bo‘lishi lozim.

123. Bochkalar ustma-ust ikki qatordan baland qilinmay tag tomoni bilan taxlanishi lozim, bunda qatorlar orasiga reykalar qo‘yilishi lozim. Bochkalar yotqizib taxlangan hollarda, ularning dumalab ketishining oldini olish uchun tormoz kolodkalari o‘rnatilishi lozim, taxlash balandligi ikki qatordan oshmasligi lozim.

124. To‘ldirilgan bochkalarni taxlash odatda mexanizatsiyalashtirilgan bo‘lishi lozim, vazni 80 kg gacha bo‘lgan bochkalarni qo‘lda taxlashni ikki ishchi bajarishi lozim.

125. Yog‘ eritish xonasini bo‘sh idishlar bilan to‘ldirib yuborish taqiqlanadi.

126. Mexanizmlarni, apparatlarni, idishlarni, quvurlarni bug‘lash va yuvish uchun bug‘ va suv quvurlarida maxsus shtutserlar va ularga puxta mahkamlangan maxsus shlanglar o‘rnatilgan bo‘lishi lozim.

127. Uskunalarni qo‘lda yuvishdan oldin, ular elektr toki tarmog‘idan o‘chirilgan va quvurlardan uzib qo‘yilgan bo‘lishi lozim.

128. Uskunani qismlarga ajratish va yig‘ish paytida og‘ir detallarni ko‘tarish va joydan-joyga ko‘chirish uchun ko‘taruvchi moslamalar (tallar, tagliklar, aravachalar) o‘rnatilgan bo‘lishi lozim. Mashinalarning detallari turg‘un holatda bo‘lishi va ishlashga xalaqit bermasligi lozim.

129. Ammiakda ishlovchi uskunani (sovutish barabanlari, votatorlar va boshqalar) yuvishdan oldin, undagi suyuq ammiak bo‘shatib olinishi va yuvish paytida ushbu uskunadan ammiakning bug‘larini so‘rib olish amalga oshirilishi lozim.

130. Yuvish eritmasidagi kaustik sodaning miqdori:

mexanik yuvish paytida — 2 foizdan;

qo‘lda yuvish paytida — 0,2 foizdan yuqori bo‘lmasligi lozim.

131. Qo‘lda yuvish paytida kalsiylangan sodaning yuvish eritmasidagi miqdori 0,5-1 foizdan yuqori bo‘lmasligi lozim.

132. Maxsus yuvish vositalarining miqdori, ularni qo‘llash bo‘yicha yo‘riqnomalarga muvofiq aniqlanadi.

133. Qo‘lda yuvish paytida yuvish eritmasining harorati 55°S dan yuqori bo‘lmasligi lozim.

134. Aluminiydan bajarilgan idishlarni kaustik sodada yuvish taqiqlanadi.

135. Laboratoriya xonalari havo uzatuvchi-tortuvchi tizimiga, issiq va sovuq suv ta’minotiga, elektr energiyasiga, markazlashtirilgan isitish tizimiga ega bo‘lishi lozim.

136. Zaharli moddalar bilan ishlash uchun mo‘ljallangan xonalar laboratoriyaning boshqa xonalaridan ajratilgan bo‘lishi lozim.

137. Tortuvchi shkaflar germetik armaturali elektr lampalari bilan jihozlangan va ularning o‘chirgichlari shkafning tashqarisida joylashgan bo‘lishi lozim. Shtepsel rozetkalari shkafning tashqi yon tomonida o‘rnatilgan bo‘lishi lozim.

138. Alanga va yonuvchi-portlovchi moddalar foydalanadigan ishlarga mo‘ljallangan ish stollari va tortuvchi shkaflar yonmaydigan material bilan qoplangan, kislota va ishqorlar bilan ishlaganda esa — yemirilishga chidamli material bilan qoplangan va yonmaydigan materialdan bajarilgan to‘siqqa (bortikka) ega bo‘lishi lozim. Tashkilotda buyruq asosida kislotalar, ishqorlar va yong‘in xavfi bo‘lgan moddalarni saqlash uchun javobgar shaxs tayinlangan bo‘lishi lozim.

139. Gaz va suv quvurlarining jo‘mraklari ish stollari va tortuvchi shkaflarning old tomonida joylashgan va bexosdan ochilib ketish imkoni bo‘lmagan holda o‘rnatilgan bo‘lishi lozim.

140. Kimyoviy laboratoriya idishlarini yuvish uchun imkon qadar laboratoriyaning markazida joylashgan alohida ajratilgan yuvish xonasi nazarda tutilgan bo‘lishi lozim. Yuvish xonasi yuvish stollari bilan jihozlangan bo‘lishi lozim, kuchli hidga ega bo‘lgan moddalarning hidini chiqarib tashlash va xromli eritmada yuvish uchun bitta hidni tortuvchi shkafli stol va sodali hamda toza suv bilan yuvish uchun — ikkita ochiq stol o‘rnatilgan bo‘lishi lozim.

141. Laboratoriyadagi havo almashinuvi shunday hisoblangan bo‘lishi kerakki, bunda zaharli, portlash xavfi bo‘lgan gazlarning, bug‘larning va changning ish xonalarining havosidagi miqdori, ularning me’yorga muvofiq belgilangan yo‘l qo‘yiluvchi miqdorlaridan ortmasligi lozim.

142. Ishlab chiqarish jarayonlari yong‘in va portlash xavfsizligi, ularni rejalashtirishda, tashkillashtirishda va olib borishda GOST 12.1.033-81 talablariga va ushbu Qoidalarga muvofiq ta’minlanishi lozim.

143. Ishlab chiqarishda sinalmagan yong‘in va portlash xavfi mavjud hamda toksik xususiyatlarga ega bo‘lgan moddalar va materiallarni qo‘llash taqiqlanadi.

144. Ishlab chiqarish binolari va xonalarining portlash jihatidan xavflilik toifalari loyiha tashkiloti tomonidan TLTM 24-86 “Texnologik loyihalashtirish tarmoq me’yorlari”ga muvofiq har bir holat uchun alohida aniqlanishi kerak.

145. Ishlab chiqarish jarayonlarini amalga oshirishda yong‘inlar, portlashlar, avariyalar, zaharlanishlar sodir bo‘lishi hamda atrof muhit uning chiqindilari (oqova suvlari, shamollatish tizimi chiqindilari va boshqalar) bilan ifloslanishi ehtimolini istisno etadigan sharoitlar ta’minlanishi lozim.

146. Ishlab chiqarish binolari va xonalari dastlabki yong‘inni o‘chirish vositalari bilan ta’minlangan bo‘lishi shart.

147. Havoda va ishlab chiqarish xonasining avtoklav bo‘limida hamda kompressor stansiyalarida portlash xavfi bor gazlar miqdori doimiy nazorat qilinishi lozim.

148. Shamollatish tizimi yong‘indan darak beruvchi signalizatsiya bilan birlashtirilgan bo‘lishi lozim.

149. Bino va yong‘in suv manbai yo‘laklari hamda yong‘inni o‘chirish vositalariga boradigan yo‘laklar doimo bo‘sh bo‘lishi kerak.

150. Portlashni oldini olish uchun avtoklav, kompressor, nasoslarning podshipniklari hamda mashina va agregatlarining ishqalanuvchi qismlarini qizib ketishiga yo‘l qo‘ymaslik lozim.

151. Aralashganida portlovchi modda hosil qilishi mumkin bo‘lgan gazlarni umumiy kollektorga chiqarish taqiqlanadi.

152. Ishlab chiqarish binolari va xonalari uchun hududiy yong‘in xavfsizligi xizmati bilan kelishilgan yong‘in xavfsizligi bo‘yicha yo‘riqnoma ishlab chiqilishi va ko‘rinadigan joyga osib qo‘yilishi lozim.

153. Xodimlar bilan yong‘in xavfsizligi bo‘yicha mashg‘ulotlar o‘tkazilishi va yong‘inni oldini olish bo‘yicha yo‘l-yo‘riqlar berilishi kerak.

154. Tashkilotlarda elektr qurilmalarini o‘rnatish va ulardan foydalanishda O‘zbekiston Respublikasi Vazirlar Mahkamasining 2020-yil 11-noyabrdagi 712-son qarori bilan tasdiqlangan Iste’molchilar elektr qurilmalarini texnik ekspluatatsiya qilish qoidalari va Iste’molchilar elektr qurilmalarini ekspluatatsiya qilishda xavfsizlik texnikasi qoidalari va mazkur Qoidalar talablariga rioya qilinishi kerak.

155. Elektr tok o‘tkazuvchi qismlar, taqsimlovchi qurilmalar, apparatlar va o‘lchash asboblari, shuningdek turli saqlovchi qurilmalar, rubilniklar va boshqa ishga tushiruvchi apparatlar va moslamalar faqat yonmaydigan asoslarda montaj qilinishi lozim.

156. Yoritish va quvvatli uskunalar hamda elektr tarmoqlarining tuzilishi xonalardagi sharoitlarga va ulardagi ishlab chiqarishning xususiyatiga mos bo‘lishi shart.

157. Yuqori namlik va issiqlik ajralib chiquvchi xonalarda elektr yoritgichlar namlikdan, elektr dvigatellari esa suyuqlik sachrashidan himoyalangan bo‘lishi shart.

158. Taqsimlovchi qurilmalar izolyatsiyasining qarshiligi va chidamliligi tekshirib turilishi lozim.

159. Ishlab chiqarish binolari va maishiy xonalarda qo‘llanuvchi lyuminessent yoritqichlar yopiq holda, namlik va chang o‘tkazmaydigan maxsus armaturada bajarilishi lozim.

160. Ko‘chirib yuriluvchi yoritqichlar shishali himoya qalpoqlari va metall to‘r bilan jihozlangan bo‘lishi lozim. Ushbu yoritqichlar va boshqa ko‘chirib yuriluvchi apparatlar uchun mis tolali egiluvchan kabel va elektr o‘tkazgichlar qo‘llanilishi lozim.

161. Evakuatsiya yo‘laklari va zinapoyalarda avariya yoritqichlari bo‘lishi lozim.

162. Avariya yoritqichlari boshqa yoritqichlardan turi, o‘lchamlari va maxsus tushirilgan belgilari bilan ajralib turishi va vaqti-vaqti bilan changdan tozalanib turilishi lozim.

163. Kabellar va elektr o‘tkazgichlarning izolyatsiyasi, tashqi birikmalar, himoyalovchi yerga ulagichlar, elektr dvigatellarning ishlash rejimi ko‘rikdan o‘tkazilishi va asboblar bilan o‘lchash orqali tekshirilib turilishi lozim.

164. Elektr apparatlari va agregatlarini nolga va yerga ulash simlarining butunligi kamida 6 oyda bir marta tekshirilishi lozim. Tekshirish natijalari dalolatnoma bilan rasmiylashtiriladi.

165. Kam quvvatli elektr lampalari va asboblarini kattaroq quvvatlilariga almashtirish tarmoq uchun yo‘l qo‘yiluvchi yuklanishni hisobga olgan holda elektr xo‘jaligi uchun javobgar xodimning ruxsati bilan amalga oshirilishi lozim.

166. Bitta elektr shtepseliga bir nechta iste’molchilarni ulash taqiqlanadi.

167. Changlarning statik elektr razryadlaridan alangalanib ketmasligi uchun mashinalarning g‘iloflari, uning asosiy vallari va havo quvurlari yerga ulangan bo‘lishi lozim. Havo quvurlarining filtrlari mayda katakli metall to‘rlar bilan o‘ralgan va to‘r yer bilan ulangan bo‘lishi lozim.

168. Tashkilotning barcha turdagi bino va inshootlari yashin qaytargichlar o‘rnatilgan holda to‘g‘ridan-to‘g‘ri yashin urishidan himoyalangan bo‘lishi lozim. Yashin qaytargichlar har yili bahorda tekshirib turilishi va nosozliklari bartaraf etilishi lozim.

169. Texnologik jarayonlarning xavfsizligi texnologik hujjatlarga hamda mehnat muhofazasi bo‘yicha yo‘riqnomalarga muvofiq ta’minlanishi kerak.

170. Ish hududida zararli moddalarning konsentratsiyasi nazoratini amalga oshiruvchi hamda qurilmalarning avariyaviy o‘chirilishini ta’minlovchi gaz tahlil qilish apparatlari o‘rnatilishi zarur.

171. Maxsus suyuqliklar bilan bajariladigan ishlar maxsus jihozlangan xonalarda yoki xonalarda o‘rnatilgan maxsus kameralar (stendlar)da bajarilishi kerak. Xonalarga kirishda “Yong‘indan xavfli”, “Chekilmasin”, “Begonalar kirishi taqiqlanadi” kabi ogohlantiruvchi va taqiqlovchi xavfsizlik belgilari o‘rnatilgan bo‘lishi lozim.

172. Alohida olingan texnologik jarayon (operatsiya)larda ishlab chiqarishning xavfli va zararli omillarining vujudga kelganligi to‘g‘risida o‘z vaqtida xabar berishni ta’minlash maqsadida, gaz tahlil qilish apparatlarida ishlaydigan yorug‘lik va ovoz beruvchi signalizatorlar ko‘zda tutilishi lozim.

173. Ishlab chiqarishning xavfli va zararli omillari yuzaga kelishi bilan bog‘liq bo‘lgan texnologik jarayonlar va operatsiyalar vaqtida, ushbu hududda xodimga bevosita xavfli va zararli omillarning ta’sirini chegaralovchi himoya ekrani o‘rnatilgan maxsus stendlar bo‘lishi yoki ushbu operatsiyalar mexanizatsiyalangan (avtomatlashtirilgan) qurilmalardan foydalangan holda amalga oshirilishi lozim.

Texnologik jarayon buzilgan hollarda xodimlarga zararli va xavfli omillarning ta’sir etishi istisno qilinishi va ular uchun ish bajarilayotgan joyni zudlik bilan va hech qanday qiyinchiliksiz tark etish imkoniyati ta’minlanishi zarur.

174. Birlamchi materiallar, yarim tayyor va tayyor mahsulotlarni hajm o‘lchamlari ishlarni bajaruvchi texnologik qurilmalar pasportida ko‘rsatilgan ko‘rsatkichlarga muvofiq bo‘lishi lozim.

175. Yuk ortish va tushirish ishlari hamda yuklarni joylashtirish Yuk ortish va tushirish ishlaridagi yukchilar uchun ishlarning xavfsizligi qoidalari (ro‘yxat raqami 1582, 2006-yil 13-iyun) (O‘zbekiston Respublikasi qonun hujjatlari to‘plami, 2006-y., 24-son, 221-modda) talablariga muvofiq bo‘lishi lozim.

176. Vazni 50 kg dan ortiq bo‘lgan yuklarni ortish va tushirish ishlari mexanizatsiyalashtirilgan bo‘lishi lozim.

177. Ombor yoki yuk saqlash uchun maydonchalar hududiga kirish joyida harakat yo‘nalishi, yuk ortish va tushirish joyi yoki transport vositalarining to‘xtab turish joyini ko‘rsatuvchi chizma osilgan bo‘lishi kerak.

178. Omborda ustma ust taxlangan yoki yuk idishlar stellajlari oralig‘idagi yo‘lakning eni 1,5 m dan kam bo‘lmasligi lozim. Omborda transport vositalari ishlatilganda, yo‘lakka qo‘shimcha qo‘llaniladigan transport vositalari o‘lchamlari kengligidagi yo‘l bo‘lishi lozim.

179. Tashkilotlar tomonidan chiqindisiz va kam chiqindili texnologiyalarni joriy qilish, ishlab chiqarish va maishiy chiqindilarning hosil bo‘lishini qisqartirish, ularni zararsizlantirish, qayta ishlash, saralash, saqlash, ko‘mib tashlash va utillashtirish ishlari belgilangan talablarga rioya qilish orqali amalga oshirilishi lozim.

180. Chiqindilarning xavfli turlari begona shaxslarning kirishi cheklangan joylarda, identifikatsiya belgilari va yozuvlari bilan ta’minlangan holda saqlanishi lozim.

181. Chiqindilarni ruxsat etilmagan joylarda saqlash, qayta ishlash va ko‘mib tashlash taqiqlanadi.

Tashkilotda barcha turdagi chiqindilar bilan muomala yuritish bo‘yicha yo‘riqnoma ishlab chiqilgan bo‘lishi lozim. Chiqindilarni yig‘ish, joylashtirish va tashishni ta’minlayotgan xodimlar chiqindilar bilan muomala yuritishning bexatar usullari bo‘yicha o‘qitilgan bo‘lishi kerak.

182. Barcha quvur o‘tkazgichlar loyihalashtirilishi lozim.

183. Tashkilot bosh muhandisi tomonidan tasdiqlangan ro‘yxatga asosan quvur o‘tkazgichlar doimo ko‘zdan kechirilishi va ta’mirlanishi lozim.

184. Barcha o‘rnatilgan quvur o‘tkazgichlar foydalanishga topshirilishidan oldin va ta’mirlashdan so‘ng tekshiruvdan va gidravlik sinov natijalari aks etgan texnik ko‘rikdan o‘tkazilishi lozim.

185. Tiqin armaturasi va uning joylashishi har bir agregatni ishonchli o‘chirilishini ta’minlashi kerak.

186. Avtoklav bo‘limidagi vodorod, yog‘, katalizator, inert gaz va suv o‘tadigan quvur o‘tkazgichlarda orqaga qaytarish klapanlari bo‘lishi shart.

187. Distillyator, dezorator va boshqa ishlab chiqarish uskunalarining bug‘lantirish uchun kuchli bug‘ beriladigan quvur o‘tkazgichlarida ortga (Suyuqlik yoki gaz fazaning yo‘nalishini faqat bir tomonlama tarafga harakat qilishini ta’minlaydigan moslama) klapani, berkitish ventili, manometri, saqlash va reduksion klapanlari o‘rnatilgan bo‘lishi kerak.

188. Yangi va ta’mirlangan (texnologik qurilmalarni avariya va noxush hodisadan) saqlash klapanlarining germetikligini tekshirilishi va stendda tartibga solinishi uning texnik pasportiga qayd etilishi lozim.

189. Toksik, yonuvchan, portlovchan moddalar haydaladigan quvurlarni maishiy, yordamchi, omborxona, boshqaruv va xo‘jalik xonalari, transformator xonalari va zina yo‘laklaridan o‘tkazishga yo‘l qo‘yilmaydi.

190. Yuqori bosim ostidagi bug‘ tizimiga gidravlik turtki berishning oldini olish uchun bug‘ ochqichini tez ochish va bug‘ning to‘planishi natijasida vujudga kelgan suv qaytargichni havo oqimi bilan tozalamasdan ochish taqiqlanadi.

191. Yonuvchan va portlovchan moddalar quvurlarini ochiq olovda qizdirish taqiqlanadi.

192. Tiqin armaturasi qoidaga ko‘ra poldan 3,6 m dan baland bo‘lmagan balandlikka o‘rnatilishi lozim. Ular poldan 1,6 m dan balandda joylashtirilgan hollarda, ko‘chmas asosga o‘rnatilgan narvonli maydoncha yoki uni poldan ta’mirlash mumkin bo‘lgan moslamasi bo‘lishi kerak.

193. Qayta o‘rnatilayotgan va ta’mirlangan tiqin armaturasi zichligi stendda 5 minut ishchi bosim ostida sinalishi kerak.

194. Armaturada uning dastasi va maxoviklarining aylanish yo‘nalishini ko‘rsatuvchi yo‘nalish belgisi bo‘lishi kerak. Barcha jo‘mraklarning old qismida o‘yilgan tiqin holatini ko‘rsatish belgilari oq rangda ko‘rsatilishi shart.

195. Sexlarda (ishlab chiqarish maydonlarida) tiqin, tartibga soluvchi va saqlash armaturalari ko‘rsatilgan quvur o‘tkazgichlarining o‘tkazilish tartibi va nazorat-o‘lchash asboblari tasviri osib qo‘yilishi shart. Chizmadagi tiqin armaturalari raqami va boshqa belgilar texnologik reglamentga mos kelishi shart.

196. Elektrodvigatellarni ishga tushirish qurilmalarida ularning funksional vazifalarini ko‘rsatuvchi yozuv bo‘lishi kerak.

197. Quvur o‘tkazgichlarda mahsulot yo‘nalishini ko‘rsatuvchi strelkalar bo‘lishi kerak. Tiqin armaturasining chizmada tartib raqami yozilgan bo‘lishi kerak.

198. Quvur o‘tkazgichlarni yotqizishda ular osilishi va to‘planib qoladigan joy hosil qilmasligi, yuborilayotgan material tiqilmasligi, kommunikatsiya cho‘zilib ketmasligini ta’minlashi lozim.

199. Yemirilishga uchraydigan apparat va quvur o‘tkazgich devorlarining qalinligi va tarkibi tasdiqlangan reja-jadvalga asosan tekshirilishi kerak. Quvur o‘tkazgichlarni tashqi omillar ta’sirida yemirilishdan saqlash choralari loyiha asosida olib borilishi kerak.

200. Texnologik apparat va quvur o‘tkazgichlarga o‘rnatilgan saqlash klapanlari bug‘ va suyuqlikni xavfsiz joyga chiqarish yo‘liga ega bo‘lishi lozim.

201. Flansli birikmalar tashqaridan kuzatish mumkin bo‘lgan va ochiq, ta’mirlash va o‘rnatish uchun qulay bo‘lgan joylarga joylashtirilishi kerak. Yog‘li, eritgichli, agressiv suyuqlik quvur o‘tkazgichlarining flans birikmalari kishilar o‘tish joylari va ish maydonlari ustidan o‘tkazilishiga yo‘l qo‘yilmaydi.

202. Jipslashtirish konstruksiyasi, to‘shama materiali va flans birikmalarining o‘rnatilishi texnologik tizimni ta’mirlash oralig‘ida bajarilganda yemiriluvchan birikmalar germetikligini ta’minlashi shart.

203. Bug‘ tizimiga gidravlik ta’sir ko‘rsatmaslik uchun bug‘ ventillarini tez ochish va kondensat uzatgichini havolatmay ochish taqiqlanadi.

204. Quvurlar o‘tkazgichlarning tashqi devori 45°C dan yuqori bo‘lgan barcha issiqlik tarqatuvchilari issiqlik izolyazatsiyasi bilan qoplanishi shart.

205. Issiqlik izolyatsiyasi materiallari silliq, namlikka va mexanik zararlanishga chidamli va issiq yuzalar uchun o‘tga chidamli bo‘lishi kerak.

206. Neytralizator yog‘ning harorati 95°C ga yetganda qizdirish qobig‘iga yoki spiralsimon qizdirgichga bug‘ berilishini o‘chirib qo‘yuvchi avtomatik qurilma bilan jihozlangan bo‘lishi lozim.

207. Neytralizator bug‘ qobig‘ida manometrga va bug‘ keluvchi quvurda ehtiyot klapaniga ega bo‘lishi lozim.

208. Neytralizator qopqoq bilan yopilgan va to‘lish sathini ko‘rsatgich bilan jihozlangan bo‘lishi lozim. Neytralizatorni belgilab qo‘yilganidan ortiq to‘ldirish taqiqlanadi.

209. Neytralizatorning tubida hosil bo‘lgan cho‘kma yog‘ni qizdirish boshlanishidan oldin olib tashlanishi lozim.

210. Ko‘p miqdorda ko‘pik hosil bo‘lib, suyuqlikning otilib chiqish xavfi yuzaga kelgan hollarda neytralizatsiya jarayonini olib borish taqiqlanadi.

211. Neytralizatorning sharnir quvuri ko‘tarish chig‘iri bilan jihozlangan bo‘lishi lozim.

212. To‘ldirilmagan neytralizatorning qizdiruvchi qurilmalariga bug‘ berish taqiqlanadi.

213. Vakuum-quritish qurilmalarida vakuummetr, termometr, bug‘ qobig‘ida manometr va bug‘ keluvchi quvurida ehtiyot klapani o‘rnatilgan bo‘lishi lozim.

214. Apparatni tozalash, ko‘zdan kechirish va ta’mirlash uchun kirish teshigining qopqog‘i oson ochilishi, zich berkilishi va ishonchli zichlovchi prokladkaga ega bo‘lishi lozim.

215. Moy o‘lchovchi oynalari, metall gardish va oyna singan taqdirda apparatdan moyning chiqishini berkitib qo‘yuvchi moslama bilan jihozlangan bo‘lishi lozim.

216. Vakuum-quritish apparati vakuum-nasosga suv yoki yog‘ning tegishiga yo‘l qo‘ymaydigan moslamalarga ega bo‘lishi lozim.

217. Filtr-presslarni yig‘ish paytida salfetkalarning, ular siqib qo‘yilgan joylarda yig‘ilib va buklanib qolishlariga ruxsat etilmaydi.

218. Filtr-press moy keluvchi liniyasida manometrga ega bo‘lishi lozim, filtrlash bosimi 2 kgs/sm² (0,196 MPa) dan ortmasligi lozim.

219. Ramalar, plitalar orasidan va armaturadan moy tomayotgan bo‘lsa, filtr-pressni ishlatish taqiqlanadi.

Ishlayotgan filtr-presslar bexosdan moyning sachrab ketishining oldini olish uchun salfetkalar bilan himoyalangan bo‘lishi lozim.

220. Filtr-pressni tozalash ikki ishchi tomonidan bajarilishi lozim, rama va plitalar o‘zaro kelishilgan tarzda joyidan surilishi lozim.

221. Filtr-presslar cho‘kmani mexanizatsiyalashtirilgan ravishda chiqarib tashlovchi tagliklar bilan jihozlangan bo‘lishi lozim.

222. Pressning gidravlik siqish tizimida manometr o‘rnatilgan bo‘lishi lozim, filtr-pressning siqish paytidagi bosimi ishlab chiqaruvchi zavodning pasport ma’lumotlariga mos bo‘lishi lozim.

223. Filtr-pressning siqgichi uchun mo‘ljallangan elektr dvigateli ortiqcha yuklanishdan himoyalangan bo‘lishi lozim.

224. Separatorni yechish va yig‘ish qat’iy ravishda ishlab chiqaruvchi zavodning yo‘riqnomasiga muvofiq bajarilishi lozim.

225. Separatorning barabanini yechib olish va o‘rnatish uchun maxsus elektr telfer o‘rnatilgan bo‘lishi lozim.

226. Separatorning muvozanati (balansirovkasi)ning buzilishiga yo‘l qo‘ymaslik uchun uning detallarini shunday rusumli boshqa separatorlardan yechib olinganlari bilan almashtirish taqiqlanadi.

227. Separatorning qopqog‘i ochiq bo‘lgan holatda ishga tushirishga imkon bermaydigan blokirovka bilan jihozlangan bo‘lishi lozim.

228. Separatorni ishga tushirishdan avval, uning to‘g‘ri yig‘ilganligiga ishonch hosil qilish lozim.

Maxsus jurnalda quyidagilar yozib qo‘yilishi lozim:

separatorni yig‘ishni bajargan slesarning familiyasi;

uni ishga tushirishga ruxsat beruvchi shaxsning familiyasi.

229. Titrash, begona shovqin paydo bo‘lgan, aylanishlar soni keskin o‘zgargan hollarda separator to‘xtatilishi lozim.

230. Bug‘, suv yoki elektr energiyasini berish to‘xtab qolgan hollarda separatsiya liniyasini avariyasiz to‘xtatish uchun birinchi navbatda bug‘ ejektorini to‘xtatish va quritish apparatidan vakuumni olib tashlash, nam moyni uzatish nasosini o‘chirish va shundan so‘ng birin-ketin barcha separatorlar, nasoslar va qorgichlarni to‘xtatish lozim.

231. Vaqti-vaqti bilan ishlovchi dezodoratorda agar, vakuum liniyasida berkituvchi moslama mavjud bo‘lsa, apparatning yuqori qismida 1,5 kgs/sm² (0,135 MPa) bosimga mo‘ljallangan ehtiyot membranasi o‘rnatilishi lozim.

232. Quruq bug‘lagichning quvuridagi zadvijka (agar u zarur bo‘lsa), uning shpindeli gorizontal holatda joylashadigan qilib montaj qilinishi lozim. Zadvijkaning konstruksiyasi shpindel harakatga keltirilayotgan paytda disk — yuzchalarining tushib ketishiga yo‘l qo‘ymasligi lozim.

233. Dezodoratorga o‘tkir bug‘ beruvchi quvur bosimi kam tomonda o‘rnatilgan manometrli va ehtiyot klapanli reduksiyalovchi qurilmaga ega bo‘lishi lozim.

234. Barometrik quvurning dezodoratordagi qoldiq bosimga mos keluvchi balandligi dezodoratorga barometrik tizimdan suv tushishiga yo‘l qo‘ymasligi lozim.

235. Dezodoratorda yog‘ni qizdirish faqat vakuum ostida bajarilishi lozim.

236. O‘tkir bug‘ quvuri bug‘ni dezodoratorga berishdan oldin liniyadan kondensatni chiqarib yuboruvchi moslamaga ega bo‘lishi lozim.

237. Tomchi yig‘gich to‘lib ketgan holda dezodoratsiyalovchi qurilmani ishlatish taqiqlanadi.

Pereeterifikatsiya reaktori sifatida qo‘llanilayotgan dezodorator apparatdagi yog‘ qatlamining ostiga natriy etilati kiritish uchun maxsus boks va quvur bilan butlangan bo‘lishi lozim.

238. Uzluksiz ishlovchi (De-Smet turidagi) dezodoratorni yuvish ishlab chiqaruvchi firmaning yo‘riqnomasiga muvofiq bajarilishi lozim.

239. Bug‘, suv va elektr energiyasi berilishi uzilib qolgan, shuningdek vakuum keskin tushib ketgan hollarda dezodoratsion qurilma darhol to‘xtatilishi lozim. Bug‘-ejektor blokini to‘xtatish uchun avval bug‘ni yopish, so‘ng suvni to‘xtatish lozim.

240. Sovun-ishqorli eritmalarni parchalash qurilmasi yopiq va havoni tortuvchi shamollatish tizimi bilan jihozlangan bo‘lishi lozim.

241. Sovun-ishqorli eritmalarni parchalash qurilmasi, uning ichidagi massaning harorati texnologik reglament bo‘yicha yo‘l qo‘yiluvchi eng yuqori haroratga yaqinlashganda isituvchi bug‘ning berilishini avtomatik ravishda o‘chirib qo‘yuvchi moslama bilan jihozlangan bo‘lishi lozim.

242. Parchalash uchun kislota berilayotgan paytda sovun-ishqorli eritmalarni parchalash qurilmasidagi massa aralashtirib turilishi lozim.

243. Sig‘imi 5 t dan ortiq bo‘lgan sovun-ishqorli eritmalarni parchalash qurilmalari ko‘pik ajratgich (havoli yoki mexanik) va qayta quyish quvuriga ega bo‘lishi lozim.

244. Grafitli yoki rezina zichlagichli salniklarga ega nasoslarni suyuqliksiz “salt yurish” rejimida ishga tushirish taqiqlanadi.

245. Avariyaga yo‘l qo‘ymaslik maqsadida, agar qayta o‘tkazuvchi qurilmalar mavjud bo‘lmasa, parrakli va porshenli nasoslar ishlayotgan vaqtda haydalayotgan tomondagi kranlarni berkitish mumkin emas.

246. Havo kompressorlaridan foydalanish qonunchilikka muvofiq amalga oshirilishi lozim.

247. Pasterizator manometr va ehtiyot klapani bilan jihozlangan bo‘lishi lozim. Agar sex tarmog‘idagi bosim qurilmasining pasportida ruxsat etilgan bosimdan ortiq bo‘lsa, bug‘ reduksion klapan orqali berilishi lozim.

248. Bug‘ yoki sutning sizib chiqishi paydo bo‘lsa, pasterizator to‘xtatilishi lozim.

249. Qismlarga ajratishdan avval pasterizator 40°C gacha sovutilishi lozim. Quvurli pasterizator, quvurlarning zichligini buzilishiga yo‘l qo‘ymaslik maqsadida iliq suv bilan sovutilishi lozim.

250. Plastinali pasterizatorning seksiya va plastinalarini tortib turuvchi boltlarni pasterizatorning ishlashi butunlay to‘xtamasdan oldin bo‘shatish taqiqlanadi.

251. Siqib chiqaruvchi barabanli pasterizator barabanni chiqarib olish va o‘rnatish uchun ko‘tarish moslamasiga ega bo‘lishi lozim.

252. Pasterizator ishlayotgan vaqtda haydash quvuridagi kranlarni berkitish taqiqlanadi.

253. Siqib chiqaruvchi sovutgich (votator)ga emulsiya beriluvchi va emulsiya chiqaruvchi quvurlarda manometrlar o‘rnatilgan bo‘lishi lozim.

254. Siqib chiqaruvchi sovutgich (votator)ni ammiak bilan sovutish tizimiga manometrlar, termometrlar, ehtiyot klapani, resiverdagi suyuq ammiakning sath ko‘rsatkichi kiritilishi lozim.

255. Qo‘shimcha klapandan ammiakni chiqarib yuborish bino tomidan 2 m balandga chiqarilgan maxsus quvur orqali amalga oshirilishi va bu quvurda ehtiyot klapanidan oldin va undan keyin hech qanday berkituvchi moslamalar bo‘lmasligi lozim.

256. Siqib chiqaruvchi sovutgich (votator)ning ammiak bilan sovutish tizimi avariya vaziyatida suyuq ammiakni xonadan tashqarida o‘rnatilgan zaxira idishga quyish kommunikatsiyasi bilan jihozlangan bo‘lishi lozim.

257. Siqib chiqaruvchi sovutgich (votator)ning yonidagi ish joyida har bir ishlovchi uchun shaxsiy protivogazlar bo‘lishi lozim.

258. Siqib chiqaruvchi sovutgich (votator) uzatmasi shkafining eshiklari doimo qulflangan bo‘lishi lozim.

259. Siqib chiqaruvchi sovutgich (votator)ning har bir to‘xtatilishi va ishga tushirilishi haqida ammiak kompressi mashinisti ogohlantirilishi lozim.

260. Margarinni qadoqlovchi avtomatik qurilma ishga tushirilganligi haqida atrofdagilarni ogohlantirish uchun tovushli signalizatsiya bilan jihozlangan bo‘lishi lozim.

261. Margarinni qadoqlovchi avtomatik qurilmaning himoya shitlari ishga tushiruvchi mexanizm bilan blokirovkalangan, mexanik qismining eshiklari esa qulflangan bo‘lishi lozim.

262. Margarinni qadoqlovchi avtomatik qurilma, ishga tayyorlash va ta’mirlashga, u batamom to‘xtatilgandan va uning yoqilishiga imkon bermaydigan choralar ko‘rilgandan so‘ng ruxsat etiladi.

263. Margarin pachkalarini karton qutilarga joylovchi avtomat magazinining qopqog‘i ochiq bo‘lgan holda mashinani ishga tushirishga yo‘l qo‘ymaydigan blokirovka bilan jihozlangan bo‘lishi lozim.

264. Margarinni qadoqlovchi avtomatik qurilmada pnevmatik tizimidagi manometr bo‘lishi lozim. Tizimdagi bosim avtomatning pasportida ko‘rsatilgan bosimdan ortiq bo‘lmasligi lozim.

265. Pnevmatik shlanglar tizimdagi havoning bosimi olib tashlangandan so‘nggina yechib olinishi mumkin.

266. Margarinni qadoqlovchi avtomatik qurilmani o‘chirish uchun har bir mashinada o‘rnatilgan avtonom tutqichlar yordamida avval joylagichdagi, so‘ng quti shakllantirgichdagi bosimni chiqarib yuborish lozim.

267. Sovutish barabani ammiak beruvchi va chiqaruvchi liniyasida manometrlar va ehtiyot klapani bilan jihozlangan bo‘lishi lozim. Sovutish barabanidagi ammiakning bosimi pasportda ko‘rsatilganidan ortiq bo‘lmasligi lozim.

268. Sovutish barabanining aylanuvchi qismi himoya qobig‘i bilan to‘silgan bo‘lishi lozim.

269. Sovutish barabanining salniklari xonaga ammiakni o‘tkazib yubormasligi lozim.

270. Ish joylarida barcha xodimlar uchun shaxsiy protivogazlar bo‘lishi lozim.

271. “Salt yurish” rejimida, ya’ni barabanning yuzasiga emulsiya bermasdan turib, unga ammiak berish taqiqlanadi.

272. Sovutish barabanining har bir to‘xtatilishi va ishga tushirilishi haqida ammiak-kompressor qurilmasi mashinisti ogohlantirilishi lozim.

273. Sovutish barabani statik elektr zaryadini qaytaruvchi moslama bilan jihozlanishi lozim.

274. Presslash qurilmasi ramaning stolchaga urilishining oldini olish uchun ochilish burchagi cheklagich yoki amortizator bilan jihozlangan bo‘lishi lozim.

275. To‘ldirilgan bochkalarni qabul qilish maydonchasi himoya to‘sig‘i bilan jihozlangan bo‘lishi lozim.

276. Mahsulot bilan to‘ldirilgan bochkalarni qabul qilish maydonchasi bochka tushayotgandagi zarbani so‘ndirish uchun amortizatorlarga o‘rnatilgan bo‘lishi lozim.

277. Bochka ko‘targichning tortish qismlari (Gal zanjirlari va shu kabilar) to‘silgan bo‘lishi lozim va bochkani stolga ag‘darish ohista bajarilishi lozim.

278. Sovutish qurilmasini montaj qilish, unga xizmat ko‘rsatish va undan foydalanish “Sanoatgeokontexnazorat” davlat inspeksiyasining 2009-yil 19-noyabrdagi 237-son buyrug‘i bilan tasdiqlangan “Ammiakli sovutish qurilmalarining tuzilishi va xavfsiz ishlatish qoidalari”ga muvofiq amalga oshirilishi lozim.

279. Gomogenizatorning kamerasi ehtiyot klapani va yo‘l qo‘yiladigan ishchi bosimni ko‘rsatuvchi qizil chiziqli manometr bilan jihozlangan bo‘lishi lozim.

280. Gomogenizator plunjerlarining salniklari puxta zichlangan va muntazam kuzatuv ostida bo‘lishi lozim.

281. Gomogenizatorni ishga tushirishdan avval rostlovchi vintlari chap tomonga oxirigacha burab qo‘yilgan, plunjerlarni sovutish uchun suv beruvchi jo‘mragi ochilgan bo‘lishi lozim.

282. Gomogenizator batamom to‘xtamasidan oldin, uning kallagini ochish, salniklarini zichlash va grund-buks gaykalarini tortib qo‘yish taqiqlanadi.

283. Shisha idishlarini yuvish mashinalariga shisha idishlarni va yuvuvchi eritmani yetkazib berish mexanizatsiyalashtirilgan bo‘lishi lozim.

284. Suv va ishqorli eritmalar baklari xodimlar uchun xavfsiz bo‘lgan joyga yo‘naltirilgan oqizib yuboruvchi quvurlari bilan jihozlangan bo‘lishi lozim.

285. Suv va eritmalarning harorati issiqlik rostlagichlari yordamida avtomatik ravishda tutib turilishi lozim.

286. Ishqorli eritmalarni purkagichlar puxta mahkamlangan bo‘lishi va muntazam ravishda tozalab turilishi lozim.

287. Issiq suv va ishqorli eritmalarni uzatuvchi nasoslarning haydash tomonida manometrlar o‘rnatilgan bo‘lishi lozim.

288. Shisha idishlarini yuvish mashinalariga xizmat ko‘rsatuvchi xodimlar tegishli maxsus kiyim bilan ta’minlangan bo‘lishi, ish joylaridagi polga esa yog‘och panjaralar o‘rnatilgan bo‘lishi lozim.

289. Kuzatish darchalari ochilgan holda shisha idishlarini yuvish mashinasini ishlatish taqiqlanadi.

290. Ko‘chib chiqqan etiketkalarni tutib qoluvchi to‘rlarni tozalash paytida himoya ko‘zoynaklari va qo‘lqoplaridan foydalanish lozim.

291. Chiqayotgan bug‘larni chiqarib tashlash uchun shisha idishlarini yuvish mashinasi mahalliy havo so‘rish moslamalari bilan jihozlangan bo‘lishi lozim.

292. Shisha idishlarini yuvish mashinasi quyidagi hollarda uni o‘chiradigan blokirovkalovchi moslamalarga ega bo‘lishi lozim:

idish tashuvchi konveyerlar (transportyorlar) ortiqcha yuklanganda yoki harakatlanmay qolganda;

idish ortuvchi qurilmalarning ishchi organlari harakatlanmay qolganda;

idishlarni tushiruvchi qurilmalar harakatlanmay qolganda;

idish tashigichlarning uyalaridan idishlar to‘liq tushmaganda;

olib ketuvchi konveyer idishlar bilan ortiqcha to‘ldirib yuborilganda;

mashinaga berilayotgan suvning bosimi belgilangan me’yorlardan kamayib ketganda;

yuvuvchi eritmalarning harorati belgilangan me’yorlardan ortiq o‘zgarganda.

Ushbu bandning yettinchi va sakkizinchi xatboshilarida ko‘rsatilganlaridan tashqari barcha blokirovkalar, ular ishlagan paytda yoqiluvchi nurlanuvchi signalizatsiyaga ega bo‘lishi lozim.

293. Boshqarish pultida, umumiy maqsadlardagi “Pusk” va “Stop” tugmalaridan tashqari mashinani, to‘plagich, uzatuvchi va olib ketuvchi konveyerlarning uzatmalarining barcha elektr dvigatellarini bir vaqtda tez o‘chirish tugmasi bo‘lishi lozim.

294. Boshqarish va blokirovkalash zanjirlarining ta’minoti 36 V dan ortiq bo‘lmagan kuchlanish bilan amalga oshirilishi lozim.

295. Tashkilotning ta’mirlash xizmati uskunalarning mehnat xavfsizligi standartlari, ularning texnik pasportlari, texnik yo‘riqnomalari va ishlab chiqaruvchi zavodning boshqa hujjatlarining talablariga mosligini ta’minlashi lozim.

296. Uskunalar zarur texnik holatda bo‘lishi uchun tashkilotda unga xizmat ko‘rsatishni yaxshilash, rejali va oldini oluvchi ta’mirlashning qat’iy bajarilishi hamda ta’mirlash ishlarining sifatini yaxshilash bo‘yicha choralar ko‘rilishi lozim.

297. Asosiy uskunalarni kapital va joriy ta’mirlash ishlab chiqilgan va tasdiqlangan ishlarni tashkil etish loyihasiga muvofiq amalga oshirilishi lozim. Ishlarni tashkil etish loyihalarida ta’mirlashni o‘tkazishga javobgar shaxslar, shuningdek ta’mirlash ishlarining tartibi va xodimlarning xavfsizligini ta’minlovchi choralar ko‘rsatilishi lozim.

298. Ishlayotgan sexlarda pudratchi tashkilotlar tomonidan bajariladigan ta’mirlash, qurilish va montaj ishlari naryad-ruxsatnoma bilan rasmiylashtirilishi lozim.

299. Barcha hollarda ta’mirlash ishlarining bajarilish tartibi va usullari bosh muhandis yoki uning o‘rinbosari bilan kelishilishi lozim.

300. Ta’mirlash ishlari bajariladigan hudud to‘silgan holatda bo‘lishi va u yerda xavfsizlik plakati va belgilari o‘rnatilgan bo‘lishi lozim.

301. Ta’mirlash ishlari boshlanishidan avval ta’mirlashda band bo‘lgan barcha xodimlar ishlarni tashkil etish loyihasi bilan tanishtirilishi va ta’mirlash ishlarini bajarish paytida xavfsizlik choralariga rioya qilish bo‘yicha yo‘l-yo‘riqdan o‘tkazilishi lozim.

302. Nosoz yuk ko‘taruvchi mexanizm va moslamalarda, shuningdek shahodatlangan muddati tugagan mexanizmlarda ishlash taqiqlanadi.

303. Yechib olingan agregatlar, detallar va metall konstruksiyalar yig‘ishtirib qo‘yilishi lozim.

304. Ta’mirlash paytida ish joylarini, yo‘llarni, yo‘laklarni va zinapoyalarni turli narsalar bilan to‘sib qo‘yish taqiqlanadi.

305. Havoza va to‘shamalarida ishlash uchun ehtiyot kamarlari va arqonlaridan foydalanishlari shart. Ehtiyot kamarlari arqonining mahkamlanish joyi konstruksiyalarda avvaldan belgilab qo‘yilgan bo‘lishi lozim.

306. Ta’mirlash ishlari bajarilayotgan hududdagi elektr o‘tkazgichlari yoki uskunalarning kuchlanish ostida bo‘lgan ochiq qismlari oldindan elektr tokidan o‘chirib qo‘yilgan yoki maxsus izolyatsiyalovchi vositalar bilan ishonchli himoyalangan bo‘lishi lozim.

307. Xodimlarning qizigan uskunaning ichiga kirgan holda ta’mirlash ishlarini olib borilishiga uskunani shamollatib, ichidagi gazlar butunlay chiqarib yuborilgandan va havoning harorati ko‘pi bilan 40°S gacha pasaytirilgandan so‘ng ruxsat etiladi.

308. Barcha ta’mirlash ishlari sex yoki tashkilot rahbari tomonidan tayinlangan shaxslarning rahbarligi va nazorati ostida bajarilishi lozim.

309. Materiallarni uskunaning ish maydonchasiga uzatish mexanizatsiyalashgan bo‘lishi va ular tushib ketmaydigan usulda bajarilishi lozim.

310. Ta’mirlash olib borilayotgan joy va barcha o‘tish joylari belgilangan me’yorlarga muvofiq yoritilishi lozim.

311. Ta’mirlash tugagach barcha keraksiz konstruksiyalar, asbob-uskunalar, materiallar va chiqindilar sexdan olib ketilishi, to‘siqlar, saqlovchi moslamalar va blokirovkalar o‘z joyiga o‘rnatilishi lozim. Barcha turdagi ta’mirlash ishlari tarmoq (idoraviy) nizomlariga muvofiq tuzilgan va tashkilot bosh muhandisi tomonidan tasdiqlangan rejaviy-ehtiyot ta’mirlash jadvaliga muvofiq bajarilishi lozim.

312. Yuqori kuchlanishga ega bo‘lgan elektr uskunalarida ta’mirlash ishlarini amalga oshirish uchun yetarli tajribaga ega bo‘lgan va xavfsizlik texnikasi bo‘yicha toifasi IV guruhdan past bo‘lmagan xodim tomonidan 1000 V dan yuqori bo‘lgan kuchlanishdagi va malaka toifasi III guruhdan kam bo‘lmagan xodim tomonidan 1000 V gacha kuchlanishga ega bo‘lgan uskunalar bilan ishlashga ruxsat beriladi.

313. Barcha zararli va portlovchi gazlar bo‘lgan hamda gazlar yig‘ilish ehtimoli bor xonalarda ta’mirlash ishlarini boshlashdan avval, shuningdek ta’mirlash ishlari hamda apparatlar va qurilmalarni tozalash vaqtida xonadagi shamollatish tizimini ishlatish zarur.

314. Ta’mirlash ishlari vaqtida portlovchan gaz va bug‘lar ajralib chiqaruvchi jarayonlarni bajarish taqiqlanadi. Ta’mirlash ishlarini boshlashdan oldin va ularni bajarayotganda binodagi havoda portlovchan bug‘, gaz bor-yo‘qligini tekshirish lozim. Polga, maydonchaga, zinaga va boshqa joylarga metal asboblarni tashlash taqiqlanadi.

315. Ta’mirlash ishlarini amalga oshirishda panjara, armatura, quvur o‘tkazgich va mufta qobig‘ida turish taqiqlanadi.

316. Xodimlarning o‘tishi, shuningdek asbob-uskunalar va ehtiyot qismlarini olib o‘tish uchun mo‘ljallangan yo‘llar sirpanchiq bo‘lmasligi kerak.

317. Zararli va portlovchan moddalar ishlatiluvchi asbob-uskuna va quvur o‘tkazgichlar devorining qalinligi (texnik ko‘rikdan o‘tkazish, parmalash, ultratovush yordamida) belgilangan muddatlarda tekshirib turilishi lozim.

318. Asbob-uskuna va quvur o‘tkazgichlarda ortiqcha bosim borligida boltlarni va shpilkalarni tortish taqiqlanadi.

319. Barcha portlab yonish xavfi bo‘lgan binolarda tortish shamollatish tizimi o‘chirilganda, rejali va ogohlantirish ta’mirlash ishlarini olib borish taqiqlanadi.

320. Asbob-uskuna (rezervuar)da ta’mirlash ishlari boshlanishidan oldin, unga ulangan barcha quvur o‘tkazgichlardan to‘sgich bilan to‘silgan va texnologik mahsulotlarning qoldiqlaridan tozalangan hamda o‘tkir bug‘ bilan bug‘lantirilgan, suv bilan yuvilgan va shamollatilgan bo‘lishi kerak.

321. Olovli ishlar yordamida yoki boshqa ta’mirlash ishlari ularni bajarish jarayonida ko‘rilgan chora-tadbirlarga qaramay xavfli vaziyat yuzaga keltirish sharoitlari aniqlanganda to‘xtatilishi shart.

322. Texnologik qurilma, sig‘im va quduqlarni ochish, ularni tekshiruvdan o‘tkazish, tozalash va ta’mirlash ishlari sex boshlig‘ining yozma ko‘rsatmasiga asosan (avariya hollaridan tashqari) muhandis-texnik shaxslarning uzluksiz nazoratida va ishga kirishish ruxsatnomasi to‘ldirilgandan so‘ng amalga oshirilishi lozim.

323. Xodimlarni texnologik qurilma (rezervuar) ichiga tushirishdan oldin unga ulangan barcha quvur o‘tkazgichlar to‘sgichlar bilan berkitilgan, texnologik mahsulotlarning qoldiqlaridan tozalangan, o‘tkir hidli qoldiqlar neytrallashtiruvchilar bilan xavfsizlantirilgan, suv bilan yuvilgan (yoki bug‘langan) hamda 40°S ga qadar sovutilgan va shamollatilgan bo‘lishi kerak.

324. O‘z tuzilishida harakatlanuvchi qismlari bo‘lgan texnologik qurilmalarga xodimlar tushirilishidan oldin, uni o‘chirish bilan quvvatsizlantirilishi, “Yoqilmasin, xodimlar ishlamoqda!” degan ogohlantirish yozuvi ilib qo‘yilishi kerak.

325. Texnologik qurilma, sig‘im va quduqlarning ichidagi havodan olingan namunaning tahlili ularning ichidagi havoda hajmi bo‘yicha kamida 20 foiz kislorod borligini va ammiak, sirka kislotasi va boshqa zararli aralashmalar yo‘qligini ko‘rsatgan taqdirdagina ularning ichida ishlarni bajarishga ruxsat etilishi lozim.

326. Ishlar mas’ul muhandis-texnik xodimning rahbarligida kamida uch xodim tomonidan bajarilishi, ulardan biri texnologik qurilma, idish yoki quduqning ichida bo‘lishi, ikkinchisi esa yuqorida turib qutqarish arqonini ushlagan holda ichkarida ishlayotgan xodimni kuzatib turishi va quduqning yonidan ketmasligi lozim.

327. Texnologik qurilmaning ichida ishlayotgan xodimning sog‘lig‘i yomonlashsa, u darhol ishni to‘xtatib, tashqariga chiqishi lozim. Zarur hollarda kuzatib turuvchi va ish rahbari jabrlangan xodimni tashqariga chiqarib olishlari shart.

328. Xodim avariya holatlarida ichida gaz bor yoki havo almashinuvi yetishmaydigan texnologik qurilmalar, sig‘imlar, quduqlarda ta’mirlash ishlarini boshlashidan oldin shlangli protivogazni kiyishi lozim. Shlangning orqa uchi toza havoli hududga chiqarib, mahkamlanib qo‘yilishi shart.

329. Shlangli protivogazda tanaffussiz ishlash muddati 15 daqiqadan oshmasligi shart, shundan so‘ng xodim 15 daqiqa ochiq havoda dam olishi lozim.

330. Idishlarni, ularning ichiga xodimlarning tushishi bilan bog‘liq ishlarga tayyorlash hamda ishlash paytidagi ko‘riladigan xavfsizlik choralari naryad-ruxsatnomada bayon qilingan bo‘lishi lozim.

331. Ta’mirlash jarayonida yong‘in xavfsizligi choralarini ta’minlash uchun javobgarlik olovli ishlar olib boriladigan sex, tajribaxona, ustaxona, omborxona, bo‘lim rahbarlariga yuklatilishi kerak.

332. Vaqtinchalik payvandlash ishlari va boshqa olovli ishlar bajariladigan joylar obyektning yong‘in xavfsizligi uchun javobgar shaxsining (muassasa, sex, laboratoriya, ustaxona, omborxona va shu kabilarning rahbari) yozma ruxsati bilan aniqlanishi lozim.

333. Olovli ishlar bilan bog‘liq ta’mirlash ishlariga yong‘in xavfsizligi talablari bo‘yicha belgilangan tartibda tekshiruvdan o‘tgan va maxsus ruxsatnoma berilgan xodimlar qo‘yilishi lozim.

334. Olovli ishlarni boshlashdan oldin, ushbu ishlarni bajaruvchi xodimlar mazkur ishlab chiqarishda ishlarni bexatar bajarish qoidalari bilan tanishtirilishi lozim.

335. Ishlab turgan portlash xavfi bor obyektlar va ishlab chiqarish qurilmalariga 25 m gacha bo‘lgan masofadagi hududlarda olovli ishlarni bajarish taqiqlanadi.

336. Olovli ishlar bajarilayotgan ish joylarida xavf yuzaga kelgan zahotiyoq ish to‘xtatilishi shart.

337. Tashkilotlarni (sexlarni) loyihalashtirishda, qurishda (montaj qilishda) mazkur Qoidalarga amal qilish uchun javobgarlik tegishli ishlarni bajaruvchi tashkilotlar zimmasiga yuklatiladi.

338. Mansabdor shaxslar va xodimlar mehnatni muhofaza qilish qoidalariga rioya qilmaganliklari uchun qonunchilik hujjatlariga muvofiq belgilangan tartibda javobgarlikka tortiladilar.

339. Mazkur Qoidalar O‘zbekiston Respublikasi Davlat arxitektura va qurilish qo‘mitasi, Ichki ishlar vazirligi, Sog‘liqni saqlash vazirligi, Mehnat va aholini ijtimoiy muhofaza qilish vazirligi, O‘zbekiston Kasaba uyushmalari Federatsiyasi Kengashi, “O‘zdavenergonazorat” inspeksiyasi, O‘zbekiston standartlashtirish, metrologiya va sertifikatlashtirish agentligi, “O‘zbekiston temir yo‘llari” Davlat aksionerlik temir yo‘l kompaniyasi va “Yog‘-moy va oziq-ovqat sanoati” uyushmasi bilan kelishilgan.