Oʻzbekiston Respublikasining “Rieltorlik faoliyati toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2010-yil, 51-son, 480-modda), Oʻzbekiston Respublikasi Prezidentining 2006-yil 26-apreldagi PQ–335-son “Oʻzbekiston Respublikasi Davlat mulki qoʻmitasi faoliyatini takomillashtirishga doir chora-tadbirlar toʻgʻrisida”gi qarori (Oʻzbekiston Respublikasi qonun hujjatlari toʻplami, 2006-yil, 17-son, 140-modda) va Oʻzbekiston Respublikasi Vazirlar Mahkamasining 2011-yil 10-maydagi 129-son “Rieltorlik faoliyatini litsenziyalash toʻgʻrisida nizomni tasdiqlash haqida”gi qaroriga (Oʻzbekiston Respublikasi qonun hujjatlari toʻplami, 2011-y., 19-son, 189-modda) muvofiq Oʻzbekiston Respublikasi davlat mulkini boshqarish Davlat qoʻmitasi qaror qiladi:

1. Oʻzbekiston Respublikasi Rieltorlik xizmatlarining milliy standarti (1-son RXMS) “Rieltorlik xizmatlari sifatini nazorat qilishning ichki qoidalariga qoʻyiladigan umumiy talablar” ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Rieltorlik xizmatlarining milliy standarti (1-son RXMS) Oʻzbekiston Respublikasining “Rieltorlik faoliyati toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2010-y., 51-son, 480-modda), Oʻzbekiston Respublikasi Prezidentining 2006-yil 26-apreldagi PQ–335-son “Oʻzbekiston Respublikasi Davlat mulki qoʻmitasi faoliyatini takomillashtirishga doir chora-tadbirlar toʻgʻrisida”gi qarori (Oʻzbekiston Respublikasi qonun hujjatlari toʻplami, 2006-yil, 17-son, 140-modda), Oʻzbekiston Respublikasi Vazirlar Mahkamasining 2011-yil 10-maydagi 129-son “Rieltorlik faoliyatini litsenziyalash toʻgʻrisida nizomni tasdiqlash haqida”gi (Oʻzbekiston Respublikasi qonun hujjatlari toʻplami, 2011-y., 19-son, 189-modda) qaroriga muvofiq rieltorlik xizmatlari sifatini nazorat qilishning ichki qoidalariga qoʻyiladigan umumiy talablarni belgilaydi.

1. Rieltorlik tashkilotining ichki qoidalari (keyingi oʻrinlarda ichki qoidalar deb yuritiladi) deyilganda rieltorlik tashkiloti tomonidan rieltorlik faoliyatini amalga oshirishda samaradorlikni va uning rieltorlik faoliyati toʻgʻrisidagi qonun hujjatlari talablariga muvofiqligini taʼminlash maqsadida tasdiqlangan va rieltorlik xizmatlarini amalga oshirishga doir talablarni belgilovchi hujjatlar tushuniladi.

2. 1-son RXMSning asosiy vazifalari quyidagilardan iborat:

ichki qoidalarni ishlab chiqishda rieltorlik tashkilotlarga qoʻyiladigan majburiy talablarni belgilash;

rieltorlar va rieltorlik tashkilotlarning boshqa xodimlari tomonidan ichki qoidalar talablariga rioya qilinishi ustidan ichki nazoratni amalga oshirishni tavsiflash.

3. Ichki qoidalarni ishlab chiqish va amalda qoʻllash barcha rieltorlik tashkilotlari uchun rieltorlik faoliyatini amalga oshirishning majburiy sharti hisoblanadi.

4. Ichki qoidalarni qoʻllash rieltorlik tashkilotlariga rieltorlar va rieltorlik tashkilotlari boshqa xodimlarning ishi ustidan qoʻshimcha tarzda nazorat qilishni taʼminlashga va bu bilan rieltorlik tashkiloti tomonidan koʻrsatilayotgan xizmatlarning sifatini oshirishga imkon yaratadi.

5. Ichki qoidalar rieltorlar va rieltorlik tashkilotlari boshqa xodimlarining mazkur rieltorlik tashkiloti doirasidagi faoliyatini tartibga soladi hamda ular va rieltorlik tashkilotining rahbariyati oʻrtasida yuzaga kelishi mumkin boʻlgan kelishmovchiliklarni hal etishning asosini taʼminlaydi.

6. Ichki qoidalar rieltorlik toʻgʻrisidagi qonun hujjatlariga muvofiq kelishi va oʻzaro bogʻliq boʻlishini taʼminlashi lozim.

7. Har bir rieltorlik tashkiloti rieltorlik faoliyati toʻgʻrisidagi qonun hujjatlari talablarini inobatga olgan holda oʻz ichki qoidalarini ishlab chiqadi.

8. Ichki qoidalar rieltorlarga va rieltorlik tashkilotlarining boshqa xodimlariga amaliyotda rieltorlik faoliyati toʻgʻrisidagi qonun hujjatlari talablarini bajarish hamda rieltorlik xizmatlarining sifatini oshirish boʻyicha oʻz xatti-harakatlarining aniq tartibini belgilashga qaratilgan tavsiyalardan iborat boʻlishi lozim.

9. Ichki qoidalar quyidagi guruhlarga boʻlinadi:

rieltorlik xizmatlarini koʻrsatish boʻyicha umumiy qoidalardan iborat qoidalar;

rieltorlik xizmatlarining amalga oshirilayotgan turlarini koʻrsatish tartibini belgilovchi qoidalar;

koʻrsatilayotgan rieltorlik xizmatlari sifatining ichki nazoratini amalga oshirishni belgilovchi qoidalar.

10. Ichki qoidalarda rieltorlik xizmatlarini koʻrsatish jarayonini tartibga solishga qaratilgan boshqa qoidalar ham boʻlishi mumkin.

11. Ichki qoidalar rietorlik tashkiloti rahbarining imzosi va mazkur tashkilotning muhri bilan tasdiqlanadi.

12. Ichki qoidalarning bayon etilishi qisqacha va aniq boʻlishi, turli xilda talqin etish imkoniyatiga yoʻl qoʻymaydigan boʻlishi kerak.

13. Ichki qoidalar hajmi va mazmuniga qarab oʻz nomiga ega boʻlgan alohida boʻlimlarga boʻlinadi. Boʻlimlar rim raqamlari bilan raqamlangan, barcha boʻlimlarning bandlari izchil ketma-ketlikda arab raqamlari bilan ifodalanishi lozim.

14. Ichki qoidalarning har bir bandi toʻliq bir koʻrsatmadan iborat boʻlishi lozim.

15. Jadvallar, grafiklar, xaritalar, sxemalar, hujjatlar va blanklarning namunalari ilovalarda joylashtirilishi, matnda esa tegishli havolalar koʻrsatilishi lozim.

16. Oʻzbekiston Respublikasi Rieltorlik xizmatlarining milliy standartlarida ayrim holatlar ichki qoidalar sifatida qoʻshimcha tarzda tasdiqlanishi lozimligi haqida bevosita koʻrsatmalar berilgan taqdirda, rieltorlik tashkiloti mazkur koʻrsatmaning birinchi navbatda bajarilishini taʼminlashi shart.

17. Ichki qoidalarga rioya etilishi ustidan lozim darajada nazoratni taʼminlash uchun ularning qoʻllanishi zarurligi rieltor va rieltorlik tashkiloti oʻrtasidagi mehnat munosabatlarida nazarda tutilgan rieltorning funksional majburiyatlariga kirishi lozim.

18. Ichki qoidalarning talablari bajarilishining nazorati rieltorlik faoliyatini amalga oshirishning rahbaridan boshlab rieltorlik tashkilotining rieltorgacha boʻlgan barcha darajalarida tashkil qilingan boʻlishi lozim.

19. Rieltorlik tashkilotlarining xodimlariga ichki qoidalarning mazmunini oshkor etmaslik va ulardan mazkur rieltorlik tashkiloti faoliyatining tashqarisida foydalanmaslik majburiyati tatbiq etiladi.