Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli bayoniga muvofiq buyuraman:

1. “Choʻchqalar va parrandalarning bakterial kasalliklarini davolash va oldini olishda Tilozin-P (suvda eruvchi kukun) preparatini qoʻllash boʻyicha Qoʻllanma” ilovaga muvofiq tasdiqlansin.

2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 14-sentabrda tasdiqlangan “Choʻchqalar va parrandalarning bakterial kasalliklarini davolash va oldini olishda Tilozin-P (suvda eruvchi kukun) preparatini qoʻllash boʻyicha Qoʻllanma” oʻz kuchini yoʻqotgan deb hisoblansin.

4. Mazkur buyruqning ijrosini nazorat qilishni oʻz zimmamda qoldiraman.

1. Tilozin-P (Tilosin-P) — g tarkibida 500 mg tilozin tartrat mavjud, bu esa 500 000 IYE tilozin asosiga teng boʻlgan preparat.

2. Tashqi koʻrinishiga koʻra preparat oqdan to och-sariq ranggacha boʻlgan ichga qabul qilinuvchi kukun.

3. Preparat bankalarga 200, 500,1000 g dan va bochkalarga 25 kg dan qadoqlanadi.

4. Tilozin-P preparati B roʻyxati boʻyicha quruq, yorugʻlik tushmaydigan joyda, 15°S dan 300° S gacha haroratda saqlanadi.

Preparatning yaroqlilik muddati saqlash shartlariga rioya qilinganda tayyorlangan kunidan boshlab 3 yil.

5. Tilozin makrolidli antibiotik boʻlib, grammusbat va baʼzi grammanfiy mikroorganizmlarga (kokklar, klostridiyalar, erizipelotrikslar, pasterellalar, kampilobakteriyalar, spiroxetalar, leptospiralar, brutsellalar, neyseriyalar, rikketsiyalar, gemofilyuslar, xlamidiyalar, hamda mikoplazmalarga) nisbatan faol taʼsir koʻrsatadi.

6. Preparat ribosomalar bosqichida oqsil sintezlariga toʻsqinlik qilish orqali (50S-ribosoma subirliklarini uzluksiz bogʻlash yoʻli bilan) bakteriostatik taʼsir koʻrsatadi.

7. Preparat peroral ravishda qoʻllanganda oshqozon-ichak traktidan yaxshi soʻriladi, hayvonlarning deyarli barcha organ va toʻqimalariga tarqaladi. Organizmdan asosan safro va siydik orqali, sogʻin sigirlarda — sut bilan ajralib chiqadi.

8. Preparat tetratsiklinlar, sulfanilamidlar, nitrofuranlar, eritromitsin, spektinomitsin bilan birgalikda qoʻllanilishi mumkin.

9. Tilozin eritmasi termostabil hisoblanadi, lekin yorugʻlikka taʼsirchan.

10. Tilozin-P davolash va profilaktika maqsadida quyidagilarda qoʻllaniladi:

parrandalarga Mycoplasma gallisepticum, M. synoviae, M. meleagridis qoʻzgʻatgan mikoplazmali infeksiyalarda, gemofilez, spiroxetoz va kampilobakteriozlarida;

choʻchqalarga dizenteriya, nekrotik enterit va bakterial etiologiyadagi gastroenterokolitlarida qoʻllaniladi.

11. Preparat oral ravishda ichish uchun yagona suyuqlik tariqasida ichimlik suvi bilan ichiriladi.

Tilozin-P parrandalarga profilaktika maqsadida 1 litr ichimlik suviga 1 g preparat dozasida (0,5 g yoki 500000 IYE tilozin asos) quyidagi sxema boʻyicha beriladi:

Preparat parrandalarni davolash maqsadida xuddi shu dozada, kasallikning ogʻirligiga qarab 2—5 kun davomida qoʻllaniladi.

Choʻchqalarni davolashda preparat 2 l ichimlik suviga 0,5 g preparat dozasida (0,25 g yoki 250 000 IYE tilozin asosi) 3—5 kun mobaynida beriladi. Kasallik alomatlari yoʻqolgach ham preparat yana bir kun davomida qoʻllaniladi.

Izoh: Preparat avval ozroq miqdordagi suvni preparatga qoʻshgan holda eritiladi, soʻngra eritma suv bilan kerakli konsentratsiyagacha aralashtiriladi. Suvxoʻraklarni quyosh nurlari tushmaydigan joyga qoʻyish lozim.

12. Qoʻshimcha asoratlar. Kamdan-kam holatlarda choʻchqalarda eritema, orqa chiqaruv sohasida qichishish kuzatiladi. Bu belgilar preparat qoʻllanilishi toʻxtatilgach yoʻqolib ketadi va qoʻshimcha davolashni talab etmaydi.

13. Qarshi koʻrsatmalar. Preparat quyonlarga, dengiz choʻchqalariga va olmaxonlarga, shuningdek tuxumlaridan isteʼmol maqsadida foydalaniluvchi tuxum qoʻyuvchi parrandalarga (tovuq va kurkalarga) qoʻllanilmaydi.

14. Parrandalarni va choʻchqalarni soʻyishga preparat qoʻllanilgandan keyin kamida 3 kun oʻtgach ruxsat etiladi. Belgilangan muddatdan avval soʻyilgan parranda va hayvonlarning goʻshtidan goʻshtxoʻr hayvonlarga yemish sifatida yoki goʻsht suyak uni ishlab chiqarishda foydalaniladi.

15. Preparat bilan ishlaganda, veterinariya preparatlari bilan ishlashda koʻzda tutilgan shaxsiy gigiyena va texnika xavfsizligining umumiy qoidalariga rioya etish kerak.

16. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: uzgnkl@rambler.ru. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.