Oʻzbekiston Respublikasining “Taʼlim toʻgʻrisida”gi Qonuniga (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda) muvofiq, bolalarning oromgohlarda dam olishi va sogʻlomlashtirilishini tashkil etish maqsadida Oʻzbekiston Respublikasi Xalq taʼlimi vazirligi hamda Sogʻliqni saqlash vazirligi qaror qiladilar:

1. Bolalar sogʻlomlashtirish oromgohlari haqidagi nizom ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasining “Taʼlim toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda) “Kasaba uyushmalari, ularning huquqlari va faoliyatining kafolatlari toʻgʻrisida”gi (Oʻzbekiston Respublikasi Oliy Kengashining Axborotnomasi, 1992-y., 9-son, 344-modda) qonunlariga muvofiq Oʻzbekiston Respublikasidagi bolalar sogʻlomlashtirish oromgohlari (bundan buyon matnda oromgoh deb yuritiladi) faoliyatini tashkil etish tartibini belgilaydi.

1. Ushbu Nizom talablari kasaba uyushmasi qoʻmitasiga tashkilot tomonidan bepul foydalanish uchun berilgan oʻz balansida boʻlgan yoki ijaraga olingan oromgohlarga tatbiq etiladi.

2. Oromgoh oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga, ushbu Nizomga hamda oʻz ustaviga amal qiladi.

3. Oromgoh yuridik shaxs hisoblanadi, oʻz ustaviga, mustaqil balansiga, bank hisob raqamiga, oʻz nomi yozilgan muhrga, yuridik manzili koʻrsatilgan shtamp va blankalarga ega boʻladi.

4. Oromgoh davlat boshqaruvi va mahalliy davlat hokimiyati organlari hamda boshqa tashkilotlar (bundan buyon matnda balansda saqlovchi deb yuritiladi) tomonidan oromgohning maqsad va vazifalaridan kelib chiqqan holda loyiha asosida qurilgan oromgohlarda, pansionatlarda, dam olish uylarida, sanatoriy-profilaktoriylarda, umumiy oʻrta taʼlim maktablarida, maktab-internatlarda, kasb-hunar kollejlari va akademik litseylarda va boshqa taʼlim muassasalarida qonun hujjatlarida belgilangan tartibda tashkil etiladi va roʻyxatdan oʻtkaziladi.

Oromgoh bir nechta balansda saqlovchi va kasaba uyushmalari organlarining birgalikdagi mablagʻlari asosida tashkil etilishi mumkin.

5. Oromgoh 7 yoshdan 14 yoshgacha boʻlgan bolalarning dam olishlari uchun barcha sharoitlar yaratilgan, sanitariya-gigiyena talablariga javob beradigan maktabdan tashqari taʼlim muassasasi hisoblanadigan sogʻlomlashtirish muassasasidir.

6. Quyidagilar oromgohning asosiy vazifalari hisoblanadi:

bolalarning hayoti va sogʻligʻini muhofaza qilish, oʻquv-tarbiya ishlarini olib borish;

bolaning jismoniy, intellektual, maʼnaviy va axloqiy kamol topishiga koʻmaklashish;

bolani Oʻzbekiston xalqining tarixiy va milliy anʼanalari va maʼnaviy qadriyatlar bilan tanishtirish;

bolalarni mehnatga ijobiy munosabatini tarbiyalash.

7. Oromgoh oʻziga yuklangan vazifalarga muvofiq quyidagi funksiyalarni amalga oshiradi:

bolalar har tomonlama kamol topishlari va boʻsh vaqtlarini samarali oʻtkazishlari uchun imkoniyat yaratish;

bola shaxsining rivojlanishi, uning qiziqishlari, iqtidorining rivojlanishi, mustaqil bilim olishi va ijodiy mehnat qilishi uchun zarur shart-sharoitlar yaratish;

oromgohning moddiy-texnika bazasini mustahkamlashga oid chora-tadbirlarni amalga oshirish;

bolalarning ehtiyojlarini oʻrganish va shunga muvofiq ularning ijodiy imkoniyatlarini rivojlantirishga qaratilgan toʻgaraklar tashkil etish;

fan asoslari boʻyicha qoʻshimcha taʼlim berish;

bolalarga sanʼat va hunarmandchilikning anʼanaviy milliy turlarini oʻrgatish;

qobiliyatli, iqtidorli bolalarni aniqlash, ularning shaxsini rivojlantirishga qaratilgan musobaqalar, sayyohlik slyotlari, texnika va badiiy ijodkorlik hamda boshqa tadbirlarni tashkillashtirish va oʻtkazish.

8. Oromgoh quyidagi turlarga boʻlinadi:

statsionar turdagi oromgoh — moddiy-texnik bazasiga muvofiq balansda saqlovchi tomonidan kasaba uyushmasi qoʻmitasi bilan kelishgan holda shahardan tashqari, sanatoriya turi, sport sogʻlomlashtirish va dam olish koʻrinishida tashkil etiladigan oromgohdir;

kunduzgi oromgoh — xalq taʼlimi organlari tomonidan balansda saqlovchi va kasaba uyushmalari qoʻmitalari bilan kelishgan holda taʼlim muassasalarida va boshqa moslashtirilgan muassasalar negizida tashkil etiladigan oromgohdir.

9. Oromgohda bolalarning yoshi va qiziqishlarini hisobga olgan holda guruhlar tuziladi. Guruhlardagi bolalar soni 7 — 9 yoshdagi oʻquvchilar uchun 30 nafardan, 10 — 14 yoshdagi oʻquvchilar uchun 40 nafardan oshmasligi kerak.

10. Bolalarni oromgohda sogʻlomlashtirish muddatlari Oʻzbekiston kasaba uyushmalari Federatsiyasi Kengashi Rayosati tomonidan moliyaviy imkoniyatlardan kelib chiqqan holda hududiy sogʻliqni saqlash organlarining tavsiyalari va tabiiy-iqlim sharoitlarini hisobga olib belgilanadi. Bunda yozgi mavsum davrida 10 kundan, kuzgi va qishki mavsum davrida 7 kundan kam boʻlmagan muddatni tashkil etadi.

11. Bolalar oromgohlarga yoʻllanma asosida yuboriladilar. Bunda oromgohga yoʻllanma bolalarning ota-onalari yoki ularning oʻrnini bosuvchi shaxslar (bundan buyon matnda ota-onalar deb yuritiladi) tomonidan toʻlangan mablagʻlar asosida beriladi.

12. Bolalarni oromgohga qabul qilish tegishli tuman (shahar) hokimliklari huzurida tashkil etiladigan maxsus komissiya tomonidan ushbu oromgoh faoliyat yuritishga tayyorligi haqidagi tegishli dalolatnoma rasmiylashtirilganidan hamda shtatlar jadvaliga muvofiq xodimlar bilan toʻla taʼminlanganidan soʻng amalga oshiriladi.

13. Oromgoh faoliyatiga rahbarlik qilish balansda saqlovchining buyrugʻi bilan tasdiqlanadigan boshliq tomonidan amalga oshiriladi. Oromgoh boshligʻiga nomzod balansda saqlovchi va kasaba uyushmasi qoʻmitasi bilan birgalikda belgilanadi.

14. Oromgoh boshligʻi oʻz faoliyatini Xalq taʼlimi xodimlari asosiy lavozimlarining malaka tavsiflarida (roʻyxat raqami 1541, 2006-yil 18-yanvar) (Oʻzbekiston Respublikasi qonun hujjatlari toʻplami, 2006-yil, 3-son, 20-modda) belgilangan talablarga muvofiq amalga oshiradi.

15. Oromgoh xodimlarining shtatlar jadvali balansda saqlovchi va kasaba uyushmasi qoʻmitasi bilan birgalikda oromgohdagi bolalarning sigʻimi quvvatidan kelib chiqqan holda ishlab chiqiladi va balansda saqlovchi tomonidan tasdiqlanadi.

16. Oromgoh faoliyatiga jalb etiladigan xodimlar oromgoh boshligʻining buyrugʻi bilan tasdiqlanadi.

Bunda oromgohning tibbiyot xodimlari (bolalar shifokori va tibbiy hamshira (feldsher) tegishli sogʻliqni saqlash organlari bilan kelishgan holda ishga qabul qilinadi. Tibbiyot xodimlari oromgoh rahbariyati bilan birgalikda bolalarning hayoti, sogʻligʻi va jismoniy rivojlanishi, belgilangan tartibda mavsum davomida davolash-profilaktika ishlarini olib borishi, sanitariya normalari, qoidalari va gigiyena normativlariga rioya qilinishi, ovqatlanishini tashkil etish uchun masʼuldirlar.

17. Statsionar turdagi oromgoh xodimlari uchun yashash va ovqatlanish bepul amalga oshiriladi va buning uchun sarflanadigan xarajatlar balansda saqlovchi hisobidan qoplanadi.

18. Statsionar turdagi oromgohni taʼminlash (binolari va inshootlarini taʼmirlash, isitish, yoritish, tozalash, qoʻriqlash, suv taʼminoti, kanalizatsiya, jihozlash, telefon aloqasi, madaniy va sport asbob-uskunalari bilan taʼminlash, tibbiyot punktini talablarga muvofiq jihozlash, bank xizmatlari, yoqilgʻi va oziq-ovqat mahsulotlarini keltirish, shuningdek farroshlar, qorovullar hamda oromgoh binolari va inshootlariga texnik xizmat koʻrsatuvchi boshqa xodimlarning ish haqi hamda profilaktik dezinfeksiya uchun xarajatlar) balansda saqlovchi hisobidan amalga oshiriladi.

Agar oromgoh bir nechta balansda saqlovchilarning hamkorligida tashkil etilgan boʻlsa, ushbu bandning birinchi xatboshisida koʻrsatilgan xarajatlar oromgohni tashkil etishda ishtirok etgan tashkilotlar tomonidan oromgohga sogʻlomlashtirish uchun joʻnatilgan bolalarning soniga mutanosib ravishda qoplanadi.

19. Kunduzgi oromgohlarni taʼminlash, bolalarni sogʻlomlashtirish, tarbiyaviy ishlarni oʻtkazish, xodimlarning ish haqi, ovqatlanishi uchun zarur boʻlgan moddiy baza bilan taʼminlash balansda saqlovchi va tegishli xalq taʼlimi organlari tomonidan kasaba uyushmasi organi bilan kelishgan holda bolani oromgohda taʼminlash boʻyicha xarajatlar smetasiga muvofiq amalga oshiriladi.

20. Bolalarni oromgohda saqlash xarajatlari balansda saqlovchi, ijtimoiy sugʻurta mablagʻlari, kasaba uyushmasi budjeti mablagʻlari, ota-onalar yoʻllanma uchun toʻlagan mablagʻlar, shuningdek qonun hujjatlari bilan taqiqlanmagan boshqa manbalar hisobidan belgilangan tartibda amalga oshiriladi.

21. Balansda saqlovchi bolalarni oromgohda tasdiqlangan normativlardan ziyod taʼminlanishini tashkillashtirishi mumkin. Bunda bolalar oromgohda tasdiqlangan normativlardan ziyod boʻlishi va taʼminlanishi bilan bogʻliq xarajatlar, shu jumladan, bolalarning ovqatlanishi, davolanishi, oromgoh xodimlarining ish haqi uchun qoʻshimcha mablagʻ ajratishi va boshqa xarajatlar balansda saqlovchi tomonidan qoplanadi.

22. Oromgohning buxgalteriya hisobi va hisoboti qonun hujjatlarida belgilangan tartibda amalga oshiriladi.

23. Balansda saqlovchilar va kasaba uyushmalari qoʻmitalari muntazam ravishda, lekin mavsum davomida kamida bir marta oromgohning moliyaviy-xoʻjalik faoliyati ahvolini tekshiradilar.

24. Oromgohda mavsum tugashi bilan balansda saqlovchilar va kasaba uyushmalari qoʻmitalari tomonidan uning moliyaviy-xoʻjalik faoliyati taftish qilinadi va mulki xatlov (inventarizatsiya)dan oʻtkaziladi. Taftish va xatlov natijalari boʻyicha tuzilgan dalolatnomalar, bayonnomalar, qaydnomalar, moliyaviy hisobotlar, shuningdek oromgohning faoliyati haqidagi hisobotlar kasaba uyushmasi qoʻmitasida saqlanadi.

Bunda kasaba uyushma qoʻmitasi oromgohning faoliyati haqidagi hisobotni maʼlumot uchun balansda saqlovchiga, moliyaviy hisobotni esa umumlashtirish uchun yuqori turuvchi kasaba uyushmasi organiga yuboradi.

25. Oromgohni qayta tashkil etish yoki tugatish Oʻzbekiston Respublikasining qonun hujjatlarida belgilangan tartibda amalga oshiriladi.

26. Ushbu Nizom Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi va Oʻzbekiston Kasaba uyushmalari Federatsiyasi Kengashi bilan kelishilgan.