Oʻzbekiston Respublikasining “Dafn etish va dafn ishi toʻgʻrisida” 2010-yil 27-dekabrdagi OʻRQ-276-son Qonunini bajarish yuzasidan Vazirlar Mahkamasi qaror qiladi:

1. Dafn etishga nafaqa tayinlash va toʻlash tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar kiritilsin.

3. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

4. Oʻzbekiston Respublikasi Moliya vazirligi, Sogʻliqni saqlash vazirligi, Mehnat va aholini ijtimoiy muhofaza qilish vazirligi, Adliya vazirligi manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom “Dafn etish va dafn ishi toʻgʻrisida”gi Oʻzbekiston Respublikasi Qonuniga muvofiq dafn etishga nafaqa (keyingi oʻrinlarda nafaqa deb ataladi) tayinlash va toʻlash tartibini belgilaydi.

2. Nafaqa marhumning eriga (xotiniga), ota-onasiga, farzandlariga va boshqa qarindoshlariga yoki marhumning qonuniy vakiliga, bunday shaxs boʻlmagan taqdirda esa — dafnni amalga oshirish majburiyatini zimmasiga olgan boshqa shaxsga tayinlanadi va toʻlanadi.

Nafaqa Oʻzbekiston Respublikasi fuqarolariga, shuningdek Oʻzbekiston Respublikasida doimiy yashaydigan xorijiy fuqarolarga va fuqaroligi boʻlmagan shaxslarga beriladi.

3. Ushbu Nizom maqsadlari uchun quyidagi atamalar va taʼriflardan foydalaniladi:

dafn etish majburiyatini zimmasiga olgan shaxs — marhumning eri (xotini), ota-onasi, farzandlari va boshqa qarindoshlari yoki qonuniy vakili, bunday shaxslar boʻlmagan taqdirda esa — dafn etish majburiyatini zimmasiga olgan boshqa jismoniy shaxs;

xodim — ish beruvchi bilan mehnat shartnomasi tuzgan mehnat munosabatlari subyekti, shu jumladan ishlaydigan pensioner yoki davlat ijtimoiy nafaqasi oluvchi ishlovchi;

ish bilan band shaxs — oʻzini mustaqil ravishda ish bilan taʼminlagan jismoniy shaxs, tadbirkor, shu jumladan yuridik shaxs tashkil etmasdan tadbirkorlik faoliyati bilan shugʻullanadigan, yordamchi va dehqon xoʻjaligida ish bilan band boʻlgan, bevosita mol oʻstirish, chorvachilik hamda boshqa qishloq xoʻjaligi mahsulotlari yetishtirish va sotishni amalga oshiradigan tadbirkor, koʻrsatib oʻtilgan toifadagi fuqarolarning ishlab chiqarishda qatnashuvchi oila aʼzosi, shuningdek oilaviy tadbirkorlik subyekti va hunarmand;

ish bilan band boʻlmagan shaxs — qonun hujjatlariga muvofiq ishsiz sifatida rasman roʻyxatdan oʻtkazilgan mehnatga layoqatli yoshdagi jismoniy shaxs, shuningdek haq toʻlanadigan ishga yoki mashgʻulotga ega boʻlmagan vaqtincha ish bilan band boʻlmagan mehnatga layoqatli shaxs;

taʼlim oluvchi — qonun hujjatlariga muvofiq umumiy oʻrta, oʻrta maxsus, kasb-hunar, oliy yoki oliy taʼlimdan keyingi maʼlumotga ega boʻlish maqsadida taʼlim muassasasida oʻqiyotgan, ishlovchi hisoblanmaydigan jismoniy shaxs;

bola — mehnatga layoqatli yoshda boʻlmagan, taʼlim oluvchi hisoblanmaydigan jismoniy shaxs;

fuqarolarning ayrim toifalari — qonun hujjatlariga muvofiq toʻliq yoki qisman davlat taʼminotidagi (“Mehribonlik”, “Saxovat”, “Muruvvat” uylaridagi, jazoni oʻtash joylarida va hokazolardagi) jismoniy shaxslar;

xodimning qaramogʻidagi oila aʼzosi — “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 19-moddasida tilga olingan xodimning qaramogʻida boʻlgan mehnatga layoqatsiz oila aʼzosi.

4. Ushbu Nizom marhum harbiy xizmatchilarga, harbiy yigʻinlarga chaqirilgan fuqarolarga, ichki ishlar organlarining harbiy xizmatni oʻtashda (harbiy yigʻinlar), ichki ishlar organlaridagi xizmatni oʻtashda vafot etgan xodimlariga yoki tinch davrda jarohat (yaralanish, jarohat, kontuziya) natijasida vafot etgan xodimlariga, shuningdek xizmatda boʻlishning cheklangan yoshiga toʻlgandan keyin, salomatligining holatiga koʻra yoxud tashkiliy-shtat tadbirlari munosabati bilan harbiy xizmatdan yoki ichki ishlar organlaridagi xizmatdan boʻshatilgan marhum fuqarolarga nisbatan qoʻllanilmaydi. Ularni dafn etish marhum harbiy xizmatni (harbiy yigʻinlarni) oʻtagan, ichki ishlar organlarida xizmat qilgan vazirliklar, davlat qoʻmitalari va idoralar mablagʻlari hisobiga amalga oshiriladi.

5. Nafaqa:

a) davlat pensiyasi oluvchi pensioner;

b) davlat ijtimoiy nafaqasi oluvchi fuqaro;

v) xodim yoki uning qaramogʻidagi oila aʼzosi;

g) bola hayotining birinchi haftasi mobaynida vafot etganda yoki oʻlik bola tugʻilganda (perinatal oʻlim);

d) ish bilan band boʻlgan yoki band boʻlmagan shaxs, fuqarolarning ayrim toifalariga tegishli boʻlgan shaxs yoki bola vafot etgan taqdirda tayinlanadi.

6. Ushbu Nizom 5-bandining “a”, “b”, “g” va “d” kichik bandlarida koʻrsatilgan shaxslar vafot etgan taqdirda nafaqa Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlari (keyingi oʻrinlarda Pensiya jamgʻarmasi boʻlimi deb ataladi) tomonidan tayinlanadi.

Ushbu Nizom 5-bandining “v” kichik bandida koʻrsatilgan shaxs vafot etganda nafaqa korxona, muassasa yoki tashkilot (keyingi oʻrinlarda tashkilot deb ataladi) tomonidan mazkur Nizomda nazarda tutilgan tartibda tayinlanadi.

7. Ushbu Nizomda nazarda tutilgan tartibda dafn etish majburiyatini zimmasiga olgan shaxs nafaqa olish huquqiga ega boʻladi.

8. Dafn etish majburiyatini zimmasiga olgan yuridik shaxslarga nafaqa toʻlanmaydi.

9. Nafaqa uchun unga boʻlgan huquq yuzaga kelgandan keyin 6 oy mobaynida murojaat qilish mumkin.

10. Ishlamaydigan pensioner vafot etgan taqdirda zimmasiga dafn etish majburiyatini olgan shaxsga “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 63-moddasida belgilangan miqdorda nafaqa toʻlanadi.

11. Ushbu Nizomning 5-bandi “b”, “v”, “g” va “d” kichik bandlarida koʻrsatilgan shaxslar vafot etgan taqdirda dafn etish majburiyatini zimmasiga olgan shaxsga eng kam oylik ish haqining uch baravari miqdorida nafaqa toʻlanadi.

12. Nafaqa miqdori oʻlim sodir boʻlgan kundagi, asosli sabablarga koʻra (marhumni qidirish, jasadni xorijiy davlat hududidan olib kelish va boshqalar) marhum oʻlim aniqlangan kundan kech dafn etilgan hollarda — ushbu holatni tasdiqlaydigan hujjatlar asosida dafn etish kunida marhumning pensiyasi yoki belgilangan eng kam oylik ish haqi miqdoridan kelib chiqib belgilanadi.

13. Ish haqiga tuman koeffitsiyenti belgilangan tumanlarda va joylarda nafaqa miqdori tuman koeffitsiyentlari hisobga olinmasdan belgilanadi.

14. Xodim yoki uning qaramogʻidagi oila aʼzosi vafot etgan taqdirda nafaqa uni tayinlagan tashkilot tomonidan toʻlanadi, keyinchalik koʻrsatib oʻtilgan sarf-xarajatlar qonun hujjatlariga muvofiq Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobiga qoplanadi.

15. Nafaqa qonun hujjatlarida belgilangan tartibda ishonchnoma boʻyicha toʻlanishi mumkin.

16. Ushbu Nizom 5-bandining “a”, “b” va “d” kichik bandlarida koʻrsatilgan shaxslar vafot etgan taqdirda nafaqa tayinlash toʻgʻrisidagi ariza marhumning yashash joyidagi Pensiya jamgʻarmasi boʻlimiga beriladi.

Oʻlik bola tugʻilganda yoki bola hayotining birinchi haftasi mobaynida vafot etgan taqdirda (perinatal oʻlim) nafaqa tayinlash toʻgʻrisidagi ariza dafn etish majburiyatini zimmasiga olgan shaxsning yashash joyidagi Pensiya jamgʻarmasi boʻlimiga beriladi.

17. Dafn etish majburiyatini zimmasiga olgan shaxsning quyidagi hujjatlar ilova qilingan holda berilgan arizasi nafaqa toʻlash uchun asos hisoblanadi:

FHDY organi tomonidan berilgan oʻlim toʻgʻrisidagi guvohnoma nusxasi va oʻlim toʻgʻrisidagi maʼlumotnomaning asl nusxasi. Oʻlik bola tugʻilganda yoki bola hayotining birinchi haftasi mobaynida vafot etgan taqdirda (perinatal oʻlim) qonun hujjatlarida belgilangan tartibda berilgan perinatal oʻlim toʻgʻrisidagi maʼlumotnomaning asl nusxasi;

ariza beruvchining pasporti nusxasi.

Oʻlik bola tugʻilganda yoki bola hayotining birinchi haftasi mobaynida vafot etgan taqdirda perinatal oʻlim toʻgʻrisidagi maʼlumotnoma belgilangan tartibda ikki nusxada rasmiylashtiriladi.

18. Nafaqa barcha zarur hujjatlar mavjud boʻlgan taqdirda murojaat qilingan kunda tayinlanadi.

19. Nafaqa tayinlash toʻgʻrisidagi arizani qabul qilish quyidagi hollarda rad etiladi:

ushbu Nizom 5-bandining “a”, “b”, “g” va “d” kichik bandlarida koʻrsatilgan shaxslar vafot etgan kundan boshlab 6 oy oʻtgandan keyin nafaqa uchun murojaat qilinganda;

ushbu Nizomning 17-bandida koʻrsatilgan barcha zarur hujjatlar taqdim etilmaganda.

20. Nafaqa tayinlash yoki nafaqa tayinlashni rad etish Pensiya jamgʻarmasi boʻlimining qarori bilan rasmiylashtiriladi.

21. Nafaqa tayinlash rad etilgan taqdirda Pensiya jamgʻarmasi boʻlimi murojaat qilingan kunda, rad etish sabablari va qabul qilingan qaror yuzasidan shikoyat qilish tartibi koʻrsatilgan, ariza beruvchi taqdim etgan barcha hujjatlarning asl nusxalari ilova qilingan holdagi bildirishnomani ariza beruvchining qoʻliga beradi yoki unga pochta orqali joʻnatadi.

22. Ariza beruvchi nafaqa tayinlash yoki nafaqa tayinlashni rad etish toʻgʻrisidagi qaror yuzasidan bevosita sudga yoki Pensiya jamgʻarmasi boʻlimining yuqori organiga shikoyat qilishi mumkin.

23. Nafaqa tayinlash toʻgʻrisidagi ariza va nafaqa tayinlash toʻgʻrisidagi qaror taqdim etilgan barcha hujjatlar bilan birgalikda nafaqa oluvchining alohida hujjatlar yigʻmajildida saqlanadi.

24. Nafaqani toʻlash pensiya tayinlash toʻgʻrisida murojaat qilgan ariza beruvchi yashaydigan joydagi “Oʻzbekiston pochtasi” OAJ pochta aloqasining obyektlari operatorlari va provayderlari (keyingi oʻrinlarda pochtaning tarkibiy boʻlinmalari deb ataladi) orqali Pensiya jamgʻarmasi boʻlimi tomonidan amalga oshiriladi.

25. Pensiya jamgʻarmasi boʻlimi quyidagilarga majbur:

har bir toʻlov oyi boshida oʻtgan oy uchun nafaqa turi boʻyicha toʻlangan mablagʻlar umumiy summasidan kam boʻlmagan miqdordagi nafaqa toʻlash uchun zarur mablagʻlarni pochtaning tegishli tarkibiy boʻlinmalari depozit hisob raqamlariga moliyalashtirish;

ariza beruvchi murojaat qilgan kunda nafaqa toʻlashga vedomost va reyestrni rasmiylashtirish hamda ariza beruvchiga nafaqa toʻlashni amalga oshirish uchun ularni pochtaning tegishli tarkibiy boʻlinmasiga taqdim etish.

Toʻlov oyidan keyingi oyning 7-kunidan kechikmay pochtaning tarkibiy boʻlinmasi va Pensiya jamgʻarmasi boʻlimi amalda toʻlangan mablagʻlar summasi va nafaqa oluvchilar soni toʻgʻrisida taqqoslash dalolatnomasini tuzadilar.

26. Pochtaning tarkibiy boʻlinmasi tomonidan nafaqa Pensiya jamgʻarmasi boʻlimi tomonidan taqdim etilgan vedomost va ariza beruvchining pasporti asosida naqd pul mablagʻlari bilan toʻlanadi.

27. Pochtaning tarkibiy boʻlinmalari nafaqani Pensiya jamgʻarmasi boʻlimlaridan olingan vedomostlarga qatʼiyan muvofiq ravishda hamda tijorat banklarining xizmat koʻrsatuvchi filiallaridan olingan naqd pul mablagʻlaridan oʻzi joylashgan joy boʻyicha tasdiqlangan buyurtmanomalarga muvofiq toʻlaydi.

28. Xodim yoki uning qaramogʻidagi oila aʼzosi vafot etgan taqdirda nafaqa tayinlash toʻgʻrisidagi ariza tashkilot maʼmuriyatiga beriladi.

29. Nafaqa xodimning asosiy ish joyi boʻyicha tashkilotning ijtimoiy sugʻurta komissiyasi (keyingi oʻrinlarda komissiya deb ataladi) tomonidan tayinlanadi. Komissiyaning tarkibi va raisi tashkilot rahbarining buyrugʻi bilan tasdiqlanadi.

30. Komissiyalar boʻlmagan tashkilotlarda nafaqa tashkilot rahbarining buyrugʻi bilan bunday vakolat berilgan shaxs tomonidan tayinlanadi.

31. Marhumni dafn etish majburiyatini zimmasiga olgan shaxs tomonidan quyidagi hujjatlar ilova qilingan holda berilgan ariza nafaqa tayinlash uchun asos hisoblanadi:

a) qonun hujjatlarida belgilangan tartibda FHDY organi tomonidan berilgan oʻlim toʻgʻrisidagi guvohnoma nusxasi va oʻlim toʻgʻrisidagi maʼlumotnomaning asl nusxasi;

b) xodimning qaramogʻidagi oila aʼzosi vafot etgan taqdirda — fuqarolarning oʻzini oʻzi boshqarish organi maʼlumotnomasi yoki marhumning xodim bilan qarindoshligi darajasini tasdiqlaydigan hujjat (tugʻilish haqidagi guvohnoma, nikoh toʻgʻrisidagi guvohnoma va boshqalar);

v) ariza beruvchi pasportining nusxasi.

32. Nafaqa barcha zarur hujjatlar mavjud boʻlgan taqdirda murojaat qilingan kunda tayinlanadi.

33. Nafaqa tayinlash toʻgʻrisidagi arizani qabul qilish quyidagi hollarda rad etiladi:

xodimning yoki uning qaramogʻidagi oila aʼzosining vafotidan 6 oy oʻtgandan keyin murojaat qilinganda;

ushbu Nizomning 31-bandida koʻrsatilgan barcha zarur hujjatlar taqdim etilmaganda.

Nafaqa tayinlash yoki nafaqa tayinlashni rad etish komissiyaning protokol qarori yoki tashkilot rahbarining buyrugʻi bilan bunday vakolat berilgan shaxsning qarori bilan rasmiylashtiriladi.

34. Nafaqa tayinlash rad etilgan taqdirda korxona rad etish sabablarini va qabul qilingan qaror yuzasidan shikoyat qilish tartibini koʻrsatgan, ariza beruvchi tomonidan taqdim etilgan barcha hujjatlarning asl nusxalarini ilova qilgan holda bildirishnomani ariza beruvchining qoʻliga beradi yoki unga pochta orqali yuboradi.

35. Nafaqa tayinlash yoki nafaqa tayinlashni rad etish toʻgʻrisidagi qaror yuzasidan ariza beruvchi bevosita sudga yoki Pensiya jamgʻarmasining hududiy boʻlimiga yoxud, mavjud boʻlsa, yuqori organiga shikoyat qilishi mumkin.

36. Tashkilot qayta tashkil etilganda (qoʻshib yuborish, qoʻshib olish, boʻlish, ajratib chiqarish, oʻzgartirish) nafaqa olish huquqiga ega boʻlgan shaxsga ushbu Nizomga muvofiq nafaqa tayinlash va toʻlash tashkilotning huquqiy vorisi tomonidan amalga oshiriladi.

37. Tashkilotda, uning rahbariyati tasdiqlaganidek, mablagʻlar yoʻqligi yoki yetarli emasligi tufayli nafaqa toʻlash mumkin boʻlmagan, shuningdek nafaqa tayinlash uchun murojaat qilingan muddat mobaynida tashkilot tugatilgan taqdirda nafaqa Pensiya jamgʻarmasi boʻlimi tomonidan tayinlanadi.

38. Tashkilot tomonidan nafaqa vedomost va ariza beruvchining pasporti asosida naqd pul mablagʻlari bilan toʻlanadi.

39. Tashkilotning bosh (katta) buxgalteri komissiya bilan bir qatorda nafaqa toʻlashga mablagʻlarning toʻgʻri sarflanishi yuzasidan javob beradi.

40. Nafaqa tayinlash toʻgʻrisidagi ariza va nafaqa tayinlash haqidagi qaror taqdim etilgan barcha hujjatlar bilan birgalikda tashkilot buxgalteriyasida saqlanadi.

41. Nafaqaga soliq solinmaydi va undan ushlab qolinmaydi.

42. Nafaqaning asossiz va noqonuniy toʻlanishi holatlari aniqlangan taqdirda ariza beruvchiga toʻlangan nafaqa summasi sud tartibida undiriladi.

43. Tijorat banklarining pochtaning tegishli tarkibiy boʻlinmalariga va tashkilotlarga xizmat koʻrsatuvchi filiallari ularni nafaqa toʻlash uchun zarur boʻlgan naqd pul mablagʻlari bilan oʻz vaqtida taʼminlash boʻyicha barcha choralarni koʻrishi kerak.

44. Nafaqalarni toʻlash va yetkazib berish boʻyicha xarajatlarni (bank xizmatlari uchun tashkilot xarajatlari hisobga olinmagan holda) moliyalashtirish Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobiga amalga oshiriladi.

45. Nafaqa olish huquqiga ega boʻlgan shaxs vafot etgan taqdirda olinmay qolgan nafaqa summasi meros tarkibiga kiritilmaydi va ota-onaga, eriga (xotiniga), shuningdek nafaqa oluvchi vafot etgan kunda u bilan birgalikda yashagan oila aʼzolariga toʻlanadi.

Nafaqa tayinlash va toʻlash, ushbu Nizomning III boʻlimiga muvofiq, nafaqa oluvchi marhumning yashash joyidagi Pensiya jamgʻarmasi boʻlimi tomonidan amalga oshiriladi.

Bir necha shaxs murojaat qilgan taqdirda ularga tegishli boʻlgan nafaqa summasi ular oʻrtasida teng taqsimlanadi.

Koʻrsatib oʻtilgan summa nafaqa yuzasidan nafaqa oluvchi marhumning vafotidan keyin 6 oydan kechikmay murojaat qilingan taqdirda toʻlanadi.

1. Vazirlar Mahkamasining 1999-yil 12-apreldagi 171-son qarori (Oʻzbekiston Respublikasi QT, 1999-y., 4-son, 18-modda) bilan tasdiqlangan Fuqarolik holati dalolatnomalarini qayd etish qoidalarining 133-bandidagi “sugʻurta kassasiga” soʻzlari “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimiga” soʻzlari bilan almashtirilsin.

2. Vazirlar Mahkamasining “Yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslar va dehqon xoʻjaligi aʼzolarini davlat tomonidan ijtimoiy sugʻurtalash toʻgʻrisida” 2001-yil 24-avgustdagi 351-son qarorida (Oʻzbekiston Respublikasi QT, 2001-y., 8-son, 50-modda):

a) Yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslarning mehnat stajini hisobga olish va ularning budjetdan tashqari Pensiya jamgʻarmasiga badallar ajratishi tartibida (1-ilova):

3-band quyidagi tahrirda bayon qilinsin:

“3. Tadbirkor budjetdan tashqari Pensiya jamgʻarmasiga sugʻurta badallari toʻlagan taqdirda “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq pensiya bilan taʼminlanish huquqiga ega boʻladi”;

3-ilovadagi “Ijtimoiy sugʻurta boʻyicha toʻlangan toʻlovlar toʻgʻrisida maʼlumotlar (Dafn etish uchun nafaqa)” ustuni chiqarib tashlansin;

b) Dehqon xoʻjaligi aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizomda (2-ilova):

3-band quyidagi tahrirda bayon qilinsin:

“3. Dehqon xoʻjaligi aʼzosi budjetdan tashqari Pensiya jamgʻarmasiga sugʻurta badallari toʻlagan taqdirda “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq pensiya bilan taʼminlanish huquqiga ega boʻladi”;

3-ilovadagi “Ijtimoiy sugʻurta boʻyicha toʻlangan toʻlovlar toʻgʻrisida maʼlumotlar (Dafn etish uchun nafaqa)” ustuni chiqarib tashlansin.

3. Vazirlar Mahkamasining 2010-yil 19-fevraldagi 30-son qarori (Oʻzbekiston Respublikasi QT, 2010-y., 2-son, 11-modda) bilan tasdiqlangan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi toʻgʻrisidagi nizom 8-bandi “v” kichik bandining toʻrtinchi xatboshidagi “hamda dafn marosimi nafaqalarini” soʻzlari chiqarib tashlansin.

1. Vazirlar Mahkamasining “Keksalar va mehnatga layoqatsiz fuqarolar, nogiron bolalar va bolalikdan nogironlarning dafn marosimi uchun bir yoʻla beriladigan nafaqalar toʻgʻrisida” 2002-yil 1-maydagi 149-son qarori (Oʻzbekiston Respublikasi QT, 2002-y., 5-son, 22-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-son Farmoni, Oʻzbekiston Respublikasi Prezidentining “Oʻzbekiston Respublikasi Mehnat va aholini ijtimoiy muhofaza qilish vazirligi tuzilmasini takomillashtirish chora-tadbirlari toʻgʻrisida” 2009-yil 30-dekabrdagi PQ-1251-son hamda “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida” 2009-yil 30-dekabrdagi PQ-1252-son qarorlari)” 2010-yil 24-martdagi 52-son qaroriga 1-ilovaning 24-bandi (Oʻzbekiston Respublikasi QT, 2010-y., 3-son, 12-modda).