Oʻzbekiston Respublikasi Hukumati va Xitoy Xalq Respublikasi Hukumati bundan keyin “Ahdlashuvchi Tomonlar” deb ataluvchilar,

ikki mamlakat oʻrtasida doʻstona munosabatlarni yanada rivojlantirishga koʻmaklashishni istab,

fuqarolarning vizasiz oʻzaro safarlari uchun sharoitlar yaratishga intilib,

tenglik va oʻzaro qulaylik yaratish prinsiplariga muvofiq,

diplomatik pasportlar egalarining oʻzaro vizasiz safarlari masalasi boʻyicha doʻstona maslahatlashuvlar yoʻli bilan,

Oʻzbekiston Respublikasining diplomatik pasportiga ega boʻlgan Oʻzbekiston Respublikasi fuqarolari va Xitoy Xalq Respublikasining diplomatik pasportiga ega boʻlgan Xitoy Xalq Respublikasi fuqarolari vizalar rasmiylashtirmasdan boshqa Ahdlashuvchi Tomon hududiga kirishlari, chiqishlari va tranzit oʻtib ketishlari mumkin.

Ushbu Bitimning 1-moddasida koʻrsatilgan Ahdlashuvchi Tomonlarning fuqarolari boshqa davlat hududiga Davlat chegarasining xalqaro oʻtish punktlari orqali kirishlari, chiqishlari va hududidan tranzit oʻtishlari hamda ushbu davlatning vakolatli organlari tomonidan oʻrnatilgan tartibda zarur rasmiylashtiruvlarni bajarishlari kerak.

1. Bir Ahdlashuvchi Tomonning fuqarolari boshqa Tomonning hududida boʻlgan vaqtida boshqa Ahdlashuvchi Tomonning qonun va qoidalariga rioya etishlari zarur, biroq tegishli xalqaro konvensiyalarda boshqacha nazarda tutilgan holatlar bundan mustasno.

2. Ushbu Bitimning 1-moddasida koʻrsatilgan Ahdlashuvchi Tomonlarning fuqarolari, agar ular boshqa Ahdlashuvchi Tomonning hududida 30 (oʻttiz) kundan koʻproq muddatga qolishni xohlasalar, yashab turishlari boʻyicha rasmiylashtiruvlarni boshqa Ahdlashuvchi Tomonning vakolatli organlari tomonidan oʻrnatilgan tartibda bajarishlari kerak.

Ahdlashuvchi Tomonlar hukumatlarida vazirlar oʻrinbosarlari va undan yuqori lavozimlardagi mansabdor shaxslar va shuningdek, general unvoniga ega harbiy xizmatchilar, agar ular boshqa Ahdlashuvchi Tomon hududiga xizmat maqsadida ketayotgan boʻlsalar, diplomatik kanallar orqali tegishli Tomonning roziligini olishlari yoki ushbu Ahdlashuvchi Tomonning vakolatli organlarini boʻladigan tashrifi va uning maqsadi toʻgʻrisida xabardor qilishlari kerak.

Ushbu Bitim Ahdlashuvchi Tomonlardan har birining boshqa Ahdlashuvchi Tomonning nomaqbul deb hisoblanishi mumkin boʻlgan fuqarolarining kirishini rad etish yoki boʻlish muddatini cheklash huquqlaridan mahrum qilmaydi.

Ahdlashuvchi Tomonlar milliy (davlat) xavfsizlikni taʼminlash, jamoat tartibini saqlash maqsadida yoki Ahdlashuvchi Tomonlar fuqarolari sogʻligʻiga tahdid tufayli ushbu Bitimning amal qilishini vaqtinchalik, qisman yoki butunlay toʻxtatishga boʻlgan oʻz huquqlarini saqlab qoladilar.

Ushbu Bitimning amal qilishini toʻxtatish va uni qayta tiklash toʻgʻrisida Ahdlashuvchi Tomonlar qisqa vaqt ichida diplomatik kanallar orqali bir-birini xabardor qiladilar.

1. Ahdlashuvchi Tomonlar ushbu Bitim imzolangan sanadan boshlab 30 (oʻttiz) kun davomida diplomatik kanallar orqali ushbu Bitimning 1-moddasida koʻrsatilgan diplomatik pasportlarning namunalari bilan almashadilar.

2. Agar Ahdlashuvchi Tomonlardan biri ushbu Bitimning amal qilish davrida diplomatik pasportlarni almashtirish yoki ularga biror oʻzgartishlar kiritgan hollarda ular joriy etilishidan 30 (oʻttiz) kun ilgari diplomatik kanallar orqali boshqa Ahdlashuvchi Tomonga xabar berishi va yangi pasportlar namunalarini taqdim qilishi lozim.

1. Ushbu Bitim imzolangan sanadan boshlab 30-(oʻttizinchi) kun kuchga kiradi.

2. Ushbu Bitim nomuayyan muddatga tuzilgan. Agar Ahdlashuvchi Tomonlardan biri ushbu Bitimning amal qilishini tugatishni talab qilsa, boshqa Ahdlashuvchi Tomon ushbu haqida diplomatik kanallar orqali yozma ravishda xabardor qilinadi. Ushbu Bitim xabarnoma olingan sanadan boshlab 90-(toʻqsoninchi) kuni oʻz amalini tugatadi.

3. Ahdlashuvchi Tomonlarning yozma kelishuviga koʻra ushbu Bitimga oʻzgartishlar kiritilishi mumkin.

Toshkent shahrida 2010-yil 9-iyunda ikki nusxada, har biri oʻzbek, xitoy va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilish maqsadida rus tilidagi matndan foydalaniladi.