Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli Bayoniga muvofiq buyuraman:

1. “Chorvachilik va veterinariyada askorbin kislotasi (vitamin s-substansiya) preparatini qoʻllash boʻyicha Qoʻllanma” ilovaga muvofiq tasdiqlansin.

2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 26-dekabrda tasdiqlangan “Chorvachilik va veterinariyada askorbin kislotasi (vitamin s-substansiya) preparatini qoʻllash boʻyicha Qoʻllanma” oʻz kuchini yoʻqotgan deb hisoblansin.

4. Mazkur buyruqning ijrosini nazorat qilishni oʻz zimmamda qoldiraman.

1. Askorbin kislotasi (Acidum ascorbinicum) — g-Lakton 2,3-degidro-L-gulon kislota.

Sinonimlari: Acidum ascorbicum, Ascorbin, Ascorbit, Ascorvit, Cantan, Cantaxin, Cebione, Cecon, Celin, Ceneton, Cevalin, Cevex, Laroscorbine, Redoxon, Scorbumine, Vicin, Vitascorbol va boshqalar.

2. Tashqi koʻrinishiga koʻra nordon taʼmli, hidsiz, suvda yaxshi eruvchan (1:3, 5), spirtda — sekin eriydigan, efir va xloroformda erimaydigan, oksidlanuvchilar bilan moslashmaydigan, eritmalari havoda oson oksidlanuvchan oq kristallik kukun.

3. Bankalarga, kartonli va chetlari mustahkamlangan barabanlarga yoki polietilen qavatli qogʻoz qoplarga qadoqlangan kukun shaklida chiqariladi.

4. Preparat quruq, salqin, havo kirmaydigan va yorugʻlik tushmaydigan joyda saqlanadi.

Yaroqlilik muddati saqlash shartlariga rioya qilinganda tayyorlangan kunidan boshlab 3 yil.

5. Askorbin kislotasi oksidlanish-tiklanish jarayonlarini tartibga solishda, oqsil va uglevod almashinuvi, qon ivishi, toʻqimalar yangilanishi, gormonlar hosil boʻlishi, prokollagen va kollagen sintezida, qon tomirlari oʻtkazuvchanligini yoʻlga qoʻyishda ishtirok etadi.

6. Askorbin kislotasi kam zaharli preparatlarga kiradi. Soʻyish va hayvonlardan olingan mahsulotlardan foydalanish muddatlariga taʼsir koʻrsatmaydi.

7. Askorbin kislotasini gipo va S avitaminozida, shuningdek moddalar almashinuvi buzilganda, organizm rezistentligini oshirish maqsadida intoksikatsiyalarda, anemiya, diatez, gepatit, metrit, nefrit, plevrit, suyak sinishlarida, oshqozon-ichak trakti fermentlari faolligining pasayishida, ogʻir metall va barbituratlar bilan zaharlanishlarda zaharga qarshi vosita sifatida qoʻllaniladi.

8. Askorbin kislotasini ozuqa yoki vitamin aralashmalari bilan qoʻshib, profilaktika maqsadida quyidagi dozalarda beriladi (mg/kg ozuqaga FTEM boʻyicha): parrandalarga (tovuqlar, broylyerlar, gʻozlar, kurkalar, oʻrdaklar, joʻjalar) 50, sut emuvchi choʻchqa bolalariga 50, toylarga 100—150, buzoqlarga 150—200; davolash maqsadida quyidagi dozalarda (mg/kg tirik vaznga FTEM boʻyicha): ichga otlarga 1—6, sigirlarga 2,5—10 , qoʻylarga 6—20, choʻchqalarga 2-8,5, itlarga 2,5-8,5, tulki va shimol tulkilariga 6—12, suvsarlarga 2,5-25, tovuqlarga 3—5; tomir orasiga otlarga 1—3, sigirlarga 1,25-5, itlarga 1,6-4,1.

9. Askorbin kislotasi tavsiya etilgan dozalarda qoʻllanilganda qoʻshimcha va ogʻir asoratlar kuzatilmaydi.

Askorbin kislotasini qoʻllashga qarshi koʻrsatmalar mavjud emas.

10. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: uzgnkl@rambler.ru. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.