Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli Bayoniga muvofiq buyuraman:

1. “Hayvonlarni degelmintizatsiyalashda albent preparati 2,5% va 10% li suspenziyalarini qoʻllash boʻyicha Qoʻllanma” ilovaga muvofiq tasdiqlansin.

2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 14-avgustda tasdiqlangan “Hayvonlarni degelmintizatsiyalashda albent preparati 2,5% va 10% li suspenziyalarini qoʻllash boʻyicha Qoʻllanma” oʻz kuchini yoʻqotgan deb hisoblansin.

4. Mazkur buyruqning ijrosini nazorat qilishni oʻz zimmamda qoldiraman.

1. Albent suspenziyasi (Albent suspensio) — tarkibida faol taʼsir etuvchi moddasi sifatida albendazol va toʻldiruvchisi boʻlgan gijjalarga qarshi preparat. Sinonimlari: albendazol suspenziyasi, albenol suspenziyasi, alvet suspenziyasi, valbazen suspenziyasi.

2. Preparat tashqi koʻrinishiga koʻra quyuq, qaymoqsimon, nordon taʼmli suyuqlik; 10% li suspenziya — oq rangda, 2,5% li suspenziya nimpushti rangga ega.

Chiqarilish shakli:

1 ml tarkibida 0,1 g albendazol va yordamchi moddalari boʻlgan 10% suspenziya;

1 ml tarkibida 0,025 g albendazol va yordamchi moddalari boʻlgan 2,5% suspenziya.

Preparat polietilen idishlarga, shisha flakonlarga yoki polimer oʻramlarga 10, 20, 50, 100, 200, 500 va 1000 ml dan qadoqlanadi.

Preparat quruq binoda, bolalar qoʻli yetmaydigan joyda, 25°S dan yuqori boʻlmagan haroratda, “B” roʻyxati boʻyicha saqlanadi. Muzlatishga yoʻl qoʻyilmaydi.

Preparatning yaroqlilik muddati saqlash shartlariga rioya qilinganda tayyorlangan kunidan boshlab 2 yil.

3. Albendazol karbamatbenzimidazollar guruhiga mansub boʻlib, parazit hujayralaridagi mikrotubulyar apparati funksiyasini buzib, tubulin oqsili zararlanishiga olib keladi. Buning natijasida hujayrada biokimyoviy buzilishlar vujudga keladi, yaʼni — metafaza bosqichida hujayra boʻlinishini bostiruvchi glyukoza va fumaratreduktaza transportini shikastlaydi. Gijjalarning tuxum qoʻyishi va lichinkalarining rivojlanishiga yoʻl qoʻymaslik aynan shu mexanizmga bogʻliq.

4. Preparat keng taʼsir koʻlamiga ega, jinsiy yetilgan trematodlar, jinsiy yetilgan va jinsiy yetilmagan tsestod va nematodlarga nisbatan faol. Ovotsid taʼsirga ega boʻlib, yaylovlarning gijjalar bilan zararlanishini kamaytiradi.

5. Preparat hayvonlar uchun kam zaharli, tavsiya etilgan dozalarda mahalliy qoʻzgʻatuvchi va sensibillovchi xususiyatlarga ega emas.

6. Organizmdan axlat bilan (taxminan 95%), buyrak orqali (taxminan 2—5%) ajraladi.

7. Albent suspenziyasini nematodozlar, trematodozlar va tsestodozlarni davolash va oldini olish maqsadida, individual ravishda bir marta, ogʻiz orqali, avvaldan ochlik diyetasisiz va boʻshashtiruvchi vositalarsiz: yirik shoxli mol va otlarga 10% li suspenziya holatida, qoʻy va echkilarga 2,5% yoki 10% li suspenziya holatida qoʻllaniladi.

8. Preparat yirik shoxli molga individual ravishda 10% li suspenziya holatida monezioz, oʻpka va oshqozon-ichak nematodozlarida 100 kg vaznga 7,5 ml dan, surunkali fassiolezda 100 kg vaznga 10 ml dan qoʻllaniladi, bu esa oʻz navbatida 75 mg/kg va 10 mg/kg albendazolni tashkil etadi.

9. Otlarga preparat individual ravishda 10% li suspenziya holatida ogʻiz orqali 100 kg hayvon vazniga 7,5 ml dozada (7,5 mg/kg albendazol) qoʻllaniladi.

10. Mayda shoxli molga preparat individual ravishda 2,5% yoki 10% li suspenziya holatida quyidagi dozalarda qoʻllaniladi:

11. Preparatni qoʻllashda ushbu Qoʻllanmaga koʻra qoʻshimcha va ogʻirlashtiruvchi asoratlar kuzatilmaydi.

12. Suspenziyani oʻtkir fassiolezda, urchitish davrida, qoʻylarga boʻgʻozlikning birinchi yarmida, boshqa turdagi urgʻochi hayvonlarga — dastlabki uch oyida, shuningdek infeksion kasalliklar bilan kasallangan va oriqlagan hayvonlarga qoʻllash tavsiya etilmaydi.

13. Yirik shoxli mol, qoʻy va echkilarni soʻyishga degelmintizatsiyalashdan soʻng kamida 14 kun oʻtgach, otlarni kamida 7 kun oʻtgach ruxsat etiladi.

Sutni isteʼmol qilishga preparat qoʻllanilgach 4 kundan soʻng ruxsat etiladi.

Belgilangan muddatdan avval soʻyilgan goʻsht va sutdan goʻshtxoʻr hayvonlarga yemish sifatida yoki goʻsht suyak uni ishlab chiqarishda foydalaniladi.

14. Preparat bilan ishlashda shaxsiy gigiyena va xavfsizlik texnikasining umumiy qoidalariga rioya etish lozim.

15. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: uzgnkl@rambler.ru. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.