Respublika aholisini ijtimoiy muhofaza qilishni taʼminlash maqsadida:

1. 1996-yil 1-sentabrdan boshlab Oʻzbekiston Respublikasining hududida:

ish haqining eng oz miqdori — oyiga 550 soʻm;

mehnat pensiyasining eng oz miqdori — oyiga 1125 soʻm;

fuqarolarning soliqqa tortilmaydigan daromadi eng oz miqdori — oyiga 600 soʻm;

yagona tarif setkasi boʻyicha boshlangʻich (nulinchi) razryadining eng oz miqdori — oyiga 600 soʻm miqdorida belgilansin.

2. 1996-yilning 1-sentabridan budjet muassasalari va tashkilotlari xodimlarining ish haqi, barcha turdagi pensiyalar, oliy oʻquv yurtlari talabalari, oʻrta maxsus va hunar-texnika bilim yurtlari oʻquvchilari stipendiyalarining miqdorlari oʻrta hisobda 1,25 baravar oshirilsin.

3. 1996-yil 1-sentabrdan quyidagilar belgilab qoʻyilsin:

— bolaligidan nogironlar uchun nafaqalar miqdori oyiga 1125 soʻm;

— zarur ish stajiga ega boʻlmagan keksa va mehnatga qobiliyatsiz fuqarolar uchun nafaqalar miqdori oyiga 680 soʻm.

4. Ish haqiga ustama va qoʻshimcha haqlarning barcha turlari, shuningdek bolasi ikki yoshga toʻlgunga qadar uni parvarish qiluvchi onalarga, bolali oilalarga nafaqalar hamda eng oz ish haqiga nisbatan belgilangan boshqa toʻlovlar ushbu Farmonda koʻrsatilgan eng oz ish haqi miqdori asosida 1996-yil 1-sentabrdan boshlab amalga oshiriladi.

5. Oʻzbekiston Respublikasi Vazirlar Mahkamasining 1996-yil 23-iyuldagi 262-son qarori bilan Yagona tarif setkasining yangi tarif koeffitsiyentlari joriy etilishi maʼlumot uchun qabul qilinsin.

6. Oʻzbekiston Respublikasi Ijtimoiy taʼminot vazirligi, Mehnat vazirligi, budjetdan pul bilan taʼminlanadigan vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tashkilotlar va muassasalar mazkur Farmon qoidalariga asoslanib hamda 1996-yil 1-sentabrdan joriy etiladigan yangi tarif koeffitsiyentlarini hisobga olgan holda pensiyalar, nafaqalar, stipendiyalarning hamda budjet muassasalari va tashkilotlari xodimlari mansab maoshlarining miqdorlari oʻz vaqtida qayta hisoblab chiqilishini taʼminlasinlar.

7. Budjet muassasalari va tashkilotlari xodimlarining ish haqini hamda bolasi ikki yoshga toʻlgunga qadar uni parvarish qiladigan ishlovchi onalarga nafaqalarni oshirish bilan bogʻliq xarajatlarning 80 foizi respublika davlat budjeti hisobidan va 20 foizi budjet muassasalari va tashkilotlarining smetalar boʻyicha umumiy xarajatlarini kamaytirish, jumladan ishlovchilar sonini qisqartirish hisobidan;

— oliy oʻquv yurtlari talabalari, oʻrta maxsus va hunar-texnika bilim yurtlari oʻquvchilarining stipendiyalarini, 16 yoshgacha bolalari boʻlgan oilalarning nafaqalarini, bolasi ikki yoshga toʻlgunga qadar uni parvarish qiluvchi ishlamaydigan onalarning nafaqalarini, kam taʼminlangan oilalarga moddiy yordamni oshirish bilan bogʻliq xarajatlar toʻliq respublika davlat budjeti hisobidan;

— bolaligidan nogironlar uchun, shuningdek zarur ish stajiga ega boʻlmagan keksa va mehnatga qobiliyatsiz fuqarolar uchun barcha turdagi pensiyalar va nafaqalarni oshirish bilan bogʻliq xarajatlar ijtimoiy sugʻurta fondi hisobidan qoplansin.

8. Xoʻjalik hisobidagi korxonalar va tashkilotlar:

— eng oz ish haqini mazkur Farmonda belgilangan miqdorda oshirilishini taʼminlasinlar;

— ishlab chiqarish samaradorligini oshirish va mehnat xarajatlarini pasaytirish hisobidan ish haqini koʻpaytirsinlar.

9. Oʻzbekiston Respublikasi Prezidentining 1996-yil 18-martdagi 1408-son Farmoni (8-bandi bundan mustasno) oʻz kuchini yoʻqotgan deb hisoblansin.

10. Oʻzbekiston Respublikasi Vazirlar Mahkamasi ushbu Farmonning bajarilishini nazorat qilishni taʼminlasin.