Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli Bayoniga muvofiq buyuraman:

1. Hayvonlarning bakterial kasalliklarini davolash va oldini olishda brovatsilin (emlash uchun kukun) preparatini qoʻllash boʻyicha Qoʻllanma ilovaga muvofiq tasdiqlansin.

2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2006-yil 14-sentabrda tasdiqlangan “Hayvonlarning bakterial kasalliklarini davolash va oldini olishda brovatsilin (emlash uchun kukun) preparatini qoʻllash boʻyicha Qoʻllanma” oʻz kuchini yoʻqotgan deb hisoblansin.

4. Mazkur buyruqning ijrosini nazorat qilish boshliq oʻrinbosari M. Yusupov zimmasiga yuklatilsin.

1. Brovatsilin — 1g tarkibida antibiotiklarning sterillangan tuzlari: bitsilin—1 — 500 ming. HB, natriy benzilpenitsillin — 300 ming. HB, prokain-benzilpenitsillin—200 ming. HB mavjud boʻlgan bakteriyalarga qarshi preparat.

2. Brovatsilin tashqi koʻrinishiga koʻra oq yoki och sargʻimtir rangli kukun.

3. Preparat shisha flakonlarga 0,25, 0,5, 1 va 2 g dan qadoqlanadi.

4. Brovatsilin yorugʻlik tushmaydigan, bolalar qoʻli yetmaydigan joyda 20°S gacha haroratda saqlanadi.

Preparatning yaroqlilik muddati saqlash shartlariga rioya qilinganda tayyorlangan kunidan boshlab 3 yil.

5. Penitsillin tuzlari aralashmasi keng koʻlamdagi bakteritsid taʼsirga egaligi bilan ajralib turadi. Taʼsir koʻlami grammusbat (Staphylococcus spp,, Streptococcus spp., Clostridium spp., Corynebacterium diphtheriae., Bacillus antracis) va baʼzi grammanfiy mikroorganizmlar, shuningdek spiroxetlar (Borrelia, Leptospira, Treponema), koʻpchilik aktinomitsetlar (Actinomyces bovis, Actinobacillis lignieresii) va patogen mikroorganizmlarning baʼzi boshqa turlariga tegishli.

6. Mushak orasiga yuborilganda konsentratsiyaning yuqori darajasiga natriy benzilpenitsillin va prokain-benzilpenitsillin hisobiga emlashning birinchi soatidayoq erishiladi, hamda bitsillin-1 ning preparatning yordamchi qoʻshimchalari bilan birgalikdagi prolongatsiya taʼsiriga koʻra shu darajada 72 soat davomida saqlanadi.

7. Preparat aminoglikozidlar guruhiga mansub antibotiklar (gentamitsin, kanamitsin, neomitsin, streptomitsin va shunga oʻxshash) bilan sinergik taʼsirga ega.

8. Brovatsilin hayvonlarning penitsillinlarga taʼsirchan mikroorganizmlar qoʻzgʻatgan infeksiyalarida (aktinomikoz, roja, nekrobakterioz, pasterellez, streptokokkoz, stafilokokkoz, septitsemiya, shuningdek pnevmoniya, mastit, endometrit, abssess, flegmonlar va shu kabilarda) davolovchi va profilaktika vositasi sifatida, hamda preparatning qonda uzoq vaqt saqlanuvchi terapevtik konsentratsiyasini taʼminlash maqsadida qoʻllaniladi.

9. Dozalari va qoʻllash usullari.

a) Brovatsilin suspenziyasi aseptik tarzda, preparatli flakonga 1 g preparatga 3 ml erituvchi hisobida inyeksiya uchun sterillangan suv yoki xlorli natriyning izotonik eritmasini qoʻshgan holda bevosita qoʻllash oldidan tayyorlanadi.

b) Flakon yaxshilab chayqatilgandan soʻng, olingan suyuqlikni mushak orasiga chuqurroq yuboriladi. Yirik hayvonlarga har bir flakon tananing boshqa-boshqa joylariga yuboriladi.

v) Minimal terapevtik (va profilaktik) miqdori (dozasi):

yirik shoxli mol, ot va choʻchqalarga 1 kg tirik vaznga 10 000HB;

qoʻy, echki, quyon, it va mushuklarga 1 kg tirik vaznga 15 000HB;

moʻynali hayvonlar va uy parrandalariga 1 kg tirik vaznga 30 000HB.

Kasallik ogʻir oʻtgan hollarda ushbu dozalarni 20—50% ga oshirish maqsadga muvofiqdir.

10. Qarshi koʻrsatmalar.

Brovatsilin antagonistlar vazifasini bajaruvchi makrolidlar guruhiga mansub antibiotiklar (eritromitsin, tilozin va boshq.) va tetratsiklin bilan bir vaqtda qoʻllanilmaydi.

Penitsillinga individual taʼsirchanligi boʻlgan hayvonlarga qoʻllanilmaydi. Allergik taʼsirlar paydo boʻlgan taqdirda hayvonlarga parenteral ravishda adrenalin, dimedrol va 10% kalsiy xlor eritmasi doimiy dozalarda yuboriladi.

11. Hayvonlarni soʻyishga brovatsilin qoʻllanilgach 15 kundan soʻng ruxsat etiladi. Davolash davrida va undan keyingi 4 kun davomida olingan sut va tuxumlarni isteʼmol qilish man etiladi.

12. Preparat ushbu qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: uzgnkl@tkt.uz. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.